Mat 8
8
Yesu ayɔni Onyime ɔtɔ
1Agi Yesu eple a dɔni ketokpaa aʋa ɛ, anɔkpi ʋidi eze ni yɛ kude. 2Lɛ onyime ɔtɔ gi azɛɛnya kunya kyikyĩ yɔ ɛ, aba yɛ klɔ. Edu yɛ aklamasi na kesea, lɛ aki yɛ litukpo si, “Ɔka, xe linu wɔ kupɛpɛ ɛ, ki mɛ isu ya idra a.”
3Lɛ Yesu anina yɛ ɔwla lɔ xe agbɔni onyimee e, lɛ asi yɛ si, “Èe, linu mɛ kupɛpɛ. Wɔ isu ya ìdra a!” 4Lɛ onu klɔ ko e, yɛ kunyaa kwilila. Yesu asi yɛ si, “Ta kutu! Wukífeke onugu ní liboe lɛ ya aʋa a. Pɔ̀ trɛ ní kusɔliɔ ɔkaɛ klɔ laa tɔ ɔtapo wo odi. Tɔ ɔnɔ kakaa ɔmɔ si wɔlɛ mumɔ ɛ, trɛ tɔ zɛɛtsa kidiliɛ gi Mose Ɔsã nɔ eʋi i.”
Yesu ayɔ ni Roma banɛ ma Baguta ba ɔka yɛ ɔxwɛdzɛɛ
5Agi Yesu eti eku ní Kapernaum i, Roma banɛ ma baguta ba ɔka ɔtɔ atsani yɛ lɛ eʋi ye kupɔnɔ si, 6“Ɔka, mɛ ɔxwɛdzɛɛ eetse gi ɔfini kesea ní kepea mɛ ɛ. Ɔ́ʋitani kuhwa a lɛ eepe nyani nyani.”
7Lɛ Yesu asi yɛ si, “Maatrɛ tɔ miiyɔni yɛ.”
8Lɛ baguta ba ɔkaɛ ebu le onu si, “Owo Ɔka, mégyeno gi maaki si wɔaba mɛ kepea mɛ ɛ. Wɔ kɔ ɛ, pani liboe tile ko, mɛ ɔxwɛdzɛɛ aayɔ. 9Mɛ fɛ malɛ ní ɔsã ese, lɛ baguta ba bali mɛ ese. Xegi masi ba mɛ ɔtɔ si, ‘Trɛ!’ ɛ, izɛɛtrɛ. Lɛ xegi masi ɔʋla si, ‘Ba!’ ɛ, izɛba; lɛ xe masi mɛ ɔxwɛdzɛɛ si, “Bitɛ te!” e, izɛbitɛ.
10Agi Yesu enu baguta ba ɔkaɛ yɛ liboe lɛ ya ɛ, litu ye kugyɔ, lɛ asi banama gi bali ni yɛ kude si, “Mɛɛsi mlɔ ní anukwarɛ mɛ si, mámɔ ɔnɔnɔ ní Israel nì kuʋaziŋa ʋidi uliɔ ya elu oʋídi i. 11Mɛɛsi mlɔ si, banima biadɔ kewetu ya ni keweku ya gi biaze ní ɔdɔŋakplɔ nɔ su nì Abraham, Isak ani Yakob ní lifunu ne Kaʋaŋaa mɛ. 12Pɔ̀ banama gi ba kaŋase kenu Kaʋaŋaa xe e, Aya aaŋwia ba ɛkpɛ ní litumu ne me. Niklɔ biabemi xe biatà ba ene na.” 13Lɛ Yesu asi baguta ba ɔkaɛ si, “Ga trɛ! Kidiliɛ gi kɛ aʋa wɔziŋa ɛ, kiaba kɛ mɛ ɔki wɔ.” Nite si baguta ba ɔkaɛ yɛ ɔxwɛdzɛɛ ayɔ ní lipoe lɛ klɔ ke me.
Yesu ayɔ ni banɔ glegle
14Agi Yesu aba eku Petro kepea mɛ ɛ, amɔ si kuwe kwivu Petro yɛnadzee plɛ ní ɔtɔsi aʋa. 15Nite si Yesu agbɔni yɛ ɔwla lɔ; lɛ kuweo kwiyurɔ yɛ, lɛ ayɔ xe ekpese yɛ aʋa kudi i.
16Agi ɔlagɔ lɔ ɛna ɛ, banima bɛmani banɔ glegle gi ifuɛfuɛ zimizi ne izɛkpɛ ba kunugu yo ní Yesu klɔ ɔ. Lɛ Yesu akpikpini ifuɛfuɛ zimizi ne nì liboe tile, lɛ ayɔni banyanya ba petee e. 17Abitɛ lɛ nite tɔ yiki liboe lɛ gi Aya yɛ oboedoplɛ Yesaya apani i liba lɛ mɛ si,
“Akɔ blɔ kubotsobotsoo atrɔ isu ya aʋa
lɛ etu blɔ bànya ʋa.”
Banɔ tiaʋa bɛpɛ si biakuni Yesu kude
18Agi Yesu evu aŋu ni linɔkpii lɛ gi liklani yɛ su í, asi yɛ badɔkpasi ba si batrɛ ní limu ne kapɛ ʋla. 19Lɛ ɔsã nɔ ɔdɔbasɛ ɔtɔ aba Yesu klɔ lɛ asi yɛ si, “Ɔdɔbasɛ yɛ, maze ni wɔ kude trɛ ní ɔkɔ kakaa gi wɔatrɛ ɛ.”
20Lɛ Yesu ebu lɛ onu si, “kuŋwafudroʋi yo e, ezokpo la alɛ ní kɔ awla gi kúzeeze e, lɛ evu na alɛ ní kudzɔʋi yɔ awla, pɔ̀ ozekɔ ɔma ní Ɔnɔɛ Yebi ye awla.”
21Yesu yɛ ɔdɔkpasi dzedze apani si, “Ɔka, kpɛ ɔtɔ ɛ, kí tɔ midzitrɛ tɔ mizeevive mɔka.”
22Lɛ Yesu apani si, “Kuni mɛ kude tɔ ki tɔ bekpo ʋa bevive ba tutɔ ba bekpo ʋa.”
Yesu etsi liwɔ gagla lɛ onu
23Yesu emu eku ní katapokpaa mɛ lɛ yɛ badɔkpasi ba bekuni yɛ kude e. 24Kyɔŋ ko e, liwɔ gagla ɛtɔ likpese kufu ní limu ne aʋa gi lihali kuni yo e kpɛ ní katapokpaa mɛ ɛ, gi libasɛ si katapokpaa kɛtrányrɔ ɔ. Pɔ̀ ní lipoe lɛ klɔ mɛ ɛ, Yesu azɛɛdɔ sra. 25Lɛ yɛ badɔkpasi ba bɛtrɛ xe beze nyime ye xe bɛsi yɛ si, “Bu blo Ɔka, kwitranyrɔ!”
26Yesu ebu le onu si, “Ege lɛ loso mleese lifu ne, Mlɔ Kuʋaziŋaa kuli sisami koŋ!” Lɛ ayɔ xe akpɛ ozi ní liwɔ lɛ ni kuni yo aʋa si bidzini mɔni, lɛ niklɔ ɛdɔ zii i.
27Ɔnɔ kakaa yɛ onugu ètse, lɛ beʋi si, “Onyime woli lu liɛ ya a, gi liwɔ lɛ ni kuni yo akpɔ la bizee nu yɛ igbè le e!”
Yesu ayɔni benyime tiaʋa mɛ gi ifuɛfuɛ zimizi ne ikpasi
28Agi Yesu aba Gadara banɛ ma kesea me ní limu ne kapɛ ʋla ɛ, benyime tiaʋa gi bedo edɔni bekpo ʋa idrɔ lɛ kusi i, bɛtsani yɛ. Ifuɛfuɛ zimizi ize ní benyime ba mɛ, lɛ bizɛwa anyra na nite me si ɔnɔnɔ ɔʋíkeni idi si yiga kudeo liɔ klɔ ʋa. 29Kyɔŋ klɔ ko e, bɛkpɛ ozi taataataa si, “liboe woli wɔɛpɛ ní blɔ su, wɔ́ Aya Yebie? Kiba wɔba si wuwa blɔ nyɔnyɔɛ xe ableke lipoe trɔtrɔ lɛ liana na a?”
30Iha kisrɛsrɛ ɛtɔ iizɛŋa bidɔ mɛ ní niklɔ ɔza lɔ. 31Nite si ifuɛfuɛ zimizi ne iiki Yesu litukpo si, “Xe wɔtra kpikpini blɔ edono e, kɔ lɔɔ ki tɔ kutiku ní iha lɛ likpɔkpɛkpɛ lɛ klɔ mɛ.”
32Lɛ Yesu asi ba si, “Mledo,” nite si, ido lɛ izeetiku ní iha lɛ mɛ ɛ. Lɛ iha lɛ pɔ́ iise eple ní otoganɔ kapɛa eku ní limu ne me lɛ inyrɔ ɛ.
33Niteme si banɔ ba klɔ gi bɛzeedi iha lɛ aʋa ɛ, bese etrɛ ní ɔma nɔ mɛ. Niklɔ bedo liboe kakaa gi liba iha lɛ aʋa a, ni kiliɛ gi lize kí benyime ba klɔ mɛ gi ifuɛfuɛ zimizi ne ize e. 34Nite si banima pɔ́ gi bɛdɔ ɔma nɔ mɛ ɛ, bedo gi bɛzɛtsani Yesu. Agi bɛmɔ yɛ ɛ, bɛ bɛki yɛ litukpo si ɔsɛ ní ba kesea mɛ.
Trenutno izabrano:
Mat 8: avn
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
