Zenesesi 7
7
Sa Vivineina sa Naqe
1Meke zama la koe Noa se Zihova, “La mamu suraṉa pa aka, gamu kasa doduru tatamana, sina ele dogoria Rau sapu agoi mo telemu sina tie toṉoto koari doduru tie pu toa pa popoa pepeso kamahire. 2Mamu turaṉa nuquru maeni ka zuapa hopehopeke karukarua, kokoreo meke maqota koari na kurukuru viadi saripu garodi pude va vukivukihini, ba koari pu lopu viadi, keke kokoreo meke keke mamaqota. 3Meke koari votivotiki puku kurukuru tapuru pa galegalearane, mamu vagi ka zuapa hopehopeke karukarua, mamu tavete gua asa pude kaqu ta kopue pude toa, pude boka hira pule pa popoa pepeso. 4Sipu hola ka zuapa rane, si kaqu garunia Rau sa ruku, sapu kaqu hoqa gore mae koari ka made ṉavulu puta rane na boṉi, pude va mate betoi sari doduru tiṉitoṉa toadi saripu ele taveti Rau,” gua si Asa. 5Meke tavete betoi Noa sari doduru tiṉitoṉa saripu garununi e Zihova.
6Ka onomo gogoto vuahenina se Noa, sipu ta evaṉa sa naqe pa popoa pepeso. 7Nuquru la suraṉa se Noa meke sa nana barikaleqe, meke sari na tuna koreo, meke sari na dia barikaleqe pa korapa aka, pude ta harupu koa sa naqe.#Mt 24:38-39; Lk 17:27 8-9Keke kokoreo na mamaqota koari doduru hopehopeke karukarua kurukuru toadi saripu viadi meke lopu viadi, sari na kurukuru tapuru na ṉame, si nuquru suraṉa turaṉae koe Noa pa korapa aka. 10Hola ka zuapa rane si ta evaṉa sa naqe pa popoa pepeso.
11Meke sipu onomo gogoto vuahenina se Noa, meke koasa vina manege zuapa rane pa sidara vina rua, si pusuru vura sa kolo sapu koa pa kauru pepeso meke ta tukele sa maṉauru meke hoqa gore mae sa luturu lavata.#2 Pit 3:6 12Meke hoqa gore pa popoa pepeso sa ruku koari ka made ṉavulu puta rane na boṉi. 13Meke koasa rane tugo asa, se Noa, meke sa nana barikaleqe, meke sari na tuna koreo sapu sari Semi, e Hami, meke e Zapeti, meke sari ka ṉeta dia barikaleqe si suraṉa pa korapa aka. 14Meke somana suraṉa luli koe Noa pa korapa aka sari doduru hopehopeke kineha kurukuru, manavasadi meke pinomodi, nomadi meke hitekedi, meke sari doduru kineha kurukuru tapuru. 15-16Meke mae sari doduru kurukuru toadi koe Noa, meke somana suraṉa luli pa korapa aka hopehopeke karukarua, kokoreo meke mamaqota, gua sapu garunu nia Tamasa. Meke tukua Zihova sa sasadana sa aka.
17Meke lopu makudo sa naqe koari ka made ṉavulu rane, meke sagesage nana sa kolo, meke boka ale sa Aka pa beru kolo. 18Meke noma sage sa kolo, ululu hola nia sa sa pepeso meke ale pa beru kolo sa aka. 19Meke lodu beto sari doduru toqere ululudi. 20Meke sa kolo si padana ka zuapa mita ululuna gua koari na toqere. 21Meke mate beto sari doduru tiṉitoṉa toadi: sari doduru kurukuru tapuru, na kurukuru ṉame, na made nene, meke sari doduru tinoni pa popoa pepeso. 22Sari doduru tiṉitoṉa saripu siṉo pa popoa pepeso si mate beto. 23Meke huara inete pani betoi e Zihova sari doduru tiṉitoṉa toadi pa popoa pepeso: sari doduru tinoni, na kurukuru, meke sari na kurukuru tapuru. Se Noa mo meke sarini pu koa koa sa pa korapa aka si koa hola. 24Siṉi eko mo sa kolo koasa kasia popoa koari ka keke gogoto lima ṉavulu rane.
Currently Selected:
Zenesesi 7: ROV
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.