Karikani B'aai 9
9
Ana Berita te Atua ma Nooa
1Ao E kakab'aiaa Nooa te Atua, ma natina mm'aane, ao E taku, “Karikiia natimi aika m'aiti b'a a aonga ni maekana te aonnaba ni kabane kanoami. 2A na maakui ngkami maan ma mannikiba, ao ika ni kabane; a na bane ni mena i aani m'aakami. 3Ao kam a kona ni kang irikoia maan ma aroka aika kiriin man te tai aei. I anga ni kabane nako imi b'a kanami. 4Te b'ai teuana ae kam aki riai ni kanna, bon te iriko ni man ae iai te raraa i nanona. I katabua te b'ai aei i bukina b'a e mena te maiu i nanon te raraa. 5Ngkana iai ane tiringa te aomata, ao e na boni katuaeaki. Ngkana tao te man ke te aomata ae tiringa te aomata temanna, ao N na bon katuaaea naba n tiringnga. 6A karikaki aomata b'a katotongan te Atua, ma ngaia are, ane tiringa te aomata temanna, ao e na manga tiringaki i roun te aomata temanna. 7Kam na karikiia natimi aika m'aiti, b'a a aonga ni kaona te aonnaba.”
8Ao E taku te Atua nakon Nooa ma natina mm'aane, 9“N na karaoa ngkai Au boraraoi ma ngkami ao nakoia naba kanoami, 10ao nakoni b'aai ni kabane aika maiu ake raomi n otinako naba man te kaibuke. 11Ao aikai Au taeka ni berita ma ngkami: I berita b'a bon akea riki b'aai aika maiu aika na manga kamaunaaki n te ieka, bon akea riki manga te ieka ae na kamaunaa te aonnaba. 12Ao N na katea Nei Wirara i buakon te nang b'a kanikinaean au Berita ma te aonnaba, 13Bon kanikinaean au Berita ae akea tokina ma ngkami, ao nakoni b'aai aika maiu ni kabane. 14Ngkana I rabuna karawa n taian nang ni karau, ao e kaoti nei wirara i buakoia, 15ao N na uringa iai au Berita nako imi ma maan ni kabane ake a na aki manga tiringaki b'aai aika maiu ni kabane n te ieka. 16Ngkana e kaoti Nei Wirara i buakon taian nang, ao ane N na nooria, ao N na uringa iai au boraraoi i marenau ma ngkami ae akea tokina. 17Ao bon anne kanikinaean te berita are I karaoia nakoni b'aai ni kabane aika maiu.”
Nooa ma natina mm'aane
18Ao aikai natin Nooa mm'aane ake a ruo man te kaibuke; Tem, Aam, ao Iabeta. (Taman Kanaan bon Aam.) 19Natin Nooa aika teniman aikai, boni ngaiia aia bakatibu kaain te aonnaba ni kabane.
20Bon te tia ununiki Nooa, are boni ngaia te moan aomata n unika te kureebe. 21Ao ngke e a tia ni mooi n te wain Nooa, ao e a koro ni manging, e kanakoa kunnikaina, ao e wene ni bebeekan i nanon te auti n rianna. 22Ao ngke e noora tamana teuare Aam b'a e bebeekan, ao e otinako n tuangiia tarina. 23Ao e anaa te niiniira teuare Tem, ma Iabeta, ao a taua i akuiia i aon angaia. Ao a nakonako n okirikaaki nakon te auti n rianna n tannako b'a a rawa n noora tamaia ngke e bebeekan, ao a rabuna iai tamaia. 24Ao ngke e a toki mangingin Nooa, ao e ongora aron natina are te bina, 25ao e taku,
“E na tekebuaka Kanaan!
E na riki b'a ana toro tarina.
26Nebonebo nakon te UEA, ae Atuan Tem.
E na riki b'a ana toro Tem.
27Ke E karikirakea riki Iabeta#9.27 Iabeta:” N Ebera nanona “karikirakea riki.” te Atua.
Ao ke a uaia ni maeka kanoana ma kanoan Tem!
Ao ke e riki Kanaan b'a ana toro Iabeta.”
28Ao e maiu Nooa i mwiin te ieka 350 riki te ririki, 29ao e mate ngke ai 950 ana ririki ni maiu.
Currently Selected:
Karikani B'aai 9: KNVB
Highlight
Share
Copy
Want to have your highlights saved across all your devices? Sign up or sign in