मत्तायोस 17
17
येसुसी ऎथ्रना बदलारना
(मर 9:2-13; लूक 9:28-36)
1छे उल्ला ही ख़ॊख़ा येसुस पतरस अरा याकॊब अरा आसी भइय्योस यॊहनसिन तंग्है गने ओन्टा मेच्छा परता मइय्याँ होच्चस।#2पत 1:17,18 2आ बारी आर ही मुन्दहारे आसी ऎथ्रना बदलारा केरा। आसी मुंही बीड़ी लेक्खा बिल्चिया अरा आसी किचरी नगदे कोड़हे पंडरु बिल्ली लेक्खा मंजा केरा। 3अरा ऎरा, लॆम धर्मेसी कत्था तिंगुर मूसस अरा एलियस येसुस गने कछनख्रनुम ऎथ्रर।
4पतरस येसुसिन बाचस, “अना उर्बायो! नाम इसन र'अदत आद दौ हवे। निंग्हा मने र'ई होले ऎन इसन तीन गोटंग कुम्बा कम'ओन, ओन्टा निंगा, ओन्टा मूसस गे, ओन्टा एलियस गे।” 5अरा एन्ने ब'अम लगियस का ओन्टा बिल्चना बदाली आरिन कुल्लिया चिच्चा। अरा बदाली ती धर्मे बबस अबड़ा चेलारिन बाचस, “ईस एंग्है चोन्हा ख़द्दस, ईस ती ऎन नगदे रिझ्रदन, ईसहीन मेना।”#उत्प 22:2; भज 2:7; यसा 42:1; मत्ता 3:17; 12:18; मर 1:11; लूक 3:22; व्य 18:15 6चेलर मेंजर ती मुंही पाब खत्तरर अरा नगदे कोड़हे इल्चियर केरर। 7लिकिन येसुस हेद्दे केरस ती आरिन ऎसड़स ती बाचस, “चो'आ, अमा एल्चा।” 8ख़ने आर मॆन ईरयर अरा येसुसिन अम्बरकी नॆकन हूँ मल ईरयर।
9फेन आर परता ती एत्तालियर, आ बारी येसुस आरिन आनियस का, “मनवा ख़द्दन ऎन केचका ती उज्जा चो'अना गूटी, नीम एन्द्रा ईरकर अदिन नॆकन हूँ अमके तेंगा।” 10अरा चेलर आसिन मेंजर, “ख़ने एन्देरगे नॆग सिखाब'उर ब'अनर का, मसीसी ख़ॆख़ेल नू बरना ती मुन्द एलियस गे अउरिम बरना र'ई?”#मला 4:5
11येसुस आनाकिर्ताचस, “एलियस बर'ओस दिम अरा उर्मिन सपड़'ओस। 12लिकीन ऎन निमन ब'अदन, एलियस बरच ख़च्चिका र'अदस, अरा आसिन मल चिन्हचर। लिकिन एकासे आसिन नना बिद्दयर अन्नेम आसी गने नंजर। ई लेक्खम मनवा ख़द्दन ऎन हूँ आर ही ख़ेक्खा ती दुक्खे चॊद'ओन।”#मत्ता 11:14 13ख़ने चेलर ओर्खाचर का आस नमन यॊहन नूड़रत'उसी पत्त नू बाचकादस।
येसुस नाद धरचका ख़द्दासिन कोड़े नन्दस
(मर 9:14-29; लूक 9:37-43)
14एकाबारी येसुस अरा आसी चेलर गोंहड़ा गुसन अंड़सियर ख़ने, ओर्त आलस आसी गुसन बरचस ती मूकलिदरस, 15अरा ब'आ हेलरस, “अना उर्बायो, एंग्दस मइय्याँ सोग्गे ऎरा। एन्देरगेका आस गे मिर्गी बर'ई अरा आस नगदे दुक्खे चॊद्दस, अरा घड़ी घड़ी चिच्ची नू अरा घड़ी घड़ी अम्मु नू खत्तरदस कादस 16ऎन आसिन निंग्है चेलर गुसन ओन्द्रका रहचकन, लिकिन आर आसिन उजग'आ पोल्लर।”
17येसुस आरिन आनाकिर्ताचस, “अना मल पत्त'ऊ अरा जिधा आलरो, ऎन एका गूटी निम्है गने र'ओन, एका गूटी निम्हैन सह'ओन, आसिन एंग्है गुसन ओन्द्र'आ” 18ख़ने येसुस नादन केप्पस अरा आद आसी मइय्याँ ती उरखा केरा। अरा आ कुक्कोस आ बारिम कोड़े मंजस केरस।
19तहाँ चेलर उछिन्द बेड़ा नू येसुस गुसन बरचर ती बाचर, “ऎम अदिन एन्देरगे ओथ्र'आ पोलकम।” 20आस आरिन बाचस, “निम्है पत्त'अना ही खंग्रना चड्डे, ऎन निमन मानिम ब'अदन का निम्है पत्त'अना मनी बिहनी लेक्खा हूँ र'ओ होले, ई परतन ब'आ ओंगोर का इसलेक कगरार'अय ती असन किर्रिमबि'अय, होले आद किर्रिमबि'ओ। अरा इन्द्रिइम कत्था निमा गे नना पोलना मल र'ओ।#मत्ता 21:21; मर 11:23; 1कोरि 13:2 [21लिकिन ई जाती बिगर गोहरारना अरा बिगर उपास ही मल उरखी।”]
येसुस तंग्है खे'अना ही पत्त नू अउरिम ब'अना
(मर 9:30-32; लूक 9:43-45)
22इकला येसुसी चेलर गलिलेया नू रहचर ख़ने येसुस आरिन बाचस, “मनवा ख़द्दन ऎन आलर ही ख़ेक्खा नू धरतार'ओन कालोन। 23अरा आर एंगन पिटा ख़च्चोर, लिकिन तीसर उल्ला उज्जा चो'ओन।” इदिन मेंजर ती आर नगदे हेन्दो मंजर।
धर्मेसी मन्दिर ही मालगुजारी चि'अना
24इकला येसुस अरा आसी चेलर कफरनहूम अंड़सियर ख़ने धर्मेसी मन्दिर ता ऊज'उर पतरस गुसन बरचर ती मेंजर, “एन्देर निम्है गुरुस धर्मेसी मन्दिर ही मालगुजारी चि'अदस का मला?”#निर्ग 30:13; 38:26 25आस बाचस, “हाँ, चि'अदस।” आस एड़पा बरचस, ख़ने येसुस आसी मेन्ना ती मुन्देम आसिन बाचस, “अना सिमॊन, नीन एन्देर सोचदय? ख़ॆख़ेल ता बॆलर मालगुजारी नॆखअय ती हो'अनर? तम्है ख़द्दर ती का नन्नर ती?” 26पतरस बाचस, “नन्नर ती।” येसुस आरिन बाचस, “होले ख़द्दर अम्बरर केरर।#17:26 येसुस एन्ने मने ती इदन ब'अदस का आर धर्मेसी ख़द्दर र'अना ही चड्डे आर धर्मेसी मन्दिर गे मालगुजारी चि'अना ही चाड़ मलकी। 27अन्नु हूँ इदगेका नाम आरिन अम्बोत मूड़त'आ। औंगे नीन समुदर नू कला ती गरी बॆचा। अरा एका इंजो मुन्द बझर'ओ अदिन हो'आ। अदही बइय्यन चलख़'आ, निंगा ओन्टा ढिबा ख़क्ख्र'ओ। अदिनिम हो'आ ती एंग्हा अरा निंगा गे चि'अके उइय्के।”
Trenutno izabrano:
मत्तायोस 17: KURUXBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
