यॊहनस 21
21
तिबेरया समुदर पिंडी नू येसुस चेलर गे ऎथ्रदस
1इदही ख़ॊख़ा अउरिम येसुस तंगन तंग्है चेलारिन तिबेरया समुदर पिंडी नू ऎथ्रस। आद एन्ने मंजा। 2सिमॊन पतरस अरा दिदुमोस बारना तॊमस अरा गलिलेया जिला ही काना पद्दा ता नतनऎलस अरा जेबदयुसी दुयो तंग्दा बगर अरा येसुसी अउर ऎंड़ चेलर अइय्या जुमुरका रहचर। 3सिमॊन पतरस बाचस, “ऎन इंजो ल'आ कादन।” अबड़ा ओर्मर आसिन बाचर, “ऎम हूँ निंग्है गने क'ओम।” ख़ने आर उरखर ती डोंगा नू अरगियर, लिकिन अउला ता माख़ा आर एन्द्रा हूँ मल ख़क्खियर।#लूक 5:5
4पह पहर'आ लगिया आ बारी येसुस पिंडी नू बरचस ती इज्जस। लिकिन चेलर आसिन आस येसुस हिकदस ब'अरकी चिन्ह'आ पोल्लर। 5ख़ने येसुस आरिन बाचस, “अना ख़द्दारो, नीम जोक्केम इंजो लौचर का?” आर आनाकिर्ताचर, “मला।” 6ख़ने आस बाचस, “डोंगा ही तीना पक्खे जल्ली हेबड़ा, होले निमा गे इंजो ख़क्ख्र'ओ।” ख़ने आर अन्नेम जल्ली हिबड़ियर, अरा इंजो ही बग्गे बझरका ती जल्लिन डोंगा नू नतगा पोल्लर।#लूक 5:6
7ख़ने नॆकन येसुस चोन्हा नना लगियस आ चेलस पतरसिन बाचस, “ईस गा उर्बस हिकदस!” ईस गा उर्बस एन्ने आसी ब'अनन सिमॊन पतरस मेंजस ख़ने, आस बहरी ता किचरी मल अत्तका चड्डे थालरन पोज्जरस। तहाँ अम्मु नू डेघचस अरा पिंडी तरा ऒगालियस। 8नन्ना चेलर पिंडी ती कोड़हे गेच्छा मला, दुई सौ हाँथ केम नू रहचर, ख़ने इंजो ती निंदका जल्लिन नतकनुम डोंगा नू बरचर।
9आर डोंगा ती पिंडी नू इत्तियर ख़ने, कुइला पखना ही न्युर नू इंजो कुट्टका र'अनन अरा असन असमन उइय्का ईरियर। 10येसुस आरिन बाचस, “नीम अक्कुन लौचका इंजो ती जोक्क ओन्द्र'आ।” 11सिमॊन पतरस डोंगा नू अरगियस ती जल्लिन पिंडी नू नतकियस ओन्द्रस। अइय्या ओन सौ तिरपन गोट कोहाँ इंजो रहचा। अरा एन्ने ई बग्गे इंजो गुट्ठी र'अना ती हूँ जल्ली मल चर्रा। 12येसुस आरिन बाचस, “बरा, मॊख़ा” लिकिन चेला मधेर ती “नीन नॆ तंग्है?” एन्ने मेना गे नॆका हूँ डिढ मल मंजा। एन्देरगेका आर अक्खर का आस उर्बस हिकदस। 13येसुस बरचस ती असमन होच्चस ती आर गे चिच्चस, अरा इंजोन हूँ अन्नेम चिच्चस। 14येसुस केचका ती उज्जा चॊचस ती तंग्है चेलर गे ऎथ्रना, ईद तिसर खेप हवे।
पतरस गे छेद्द पॆसना
15आर मोक्का ख़ॊख़ा येसुस सिमॊन पतरसिन मेंजस, “अना सिमॊन, यॊहनसी ख़द्दायो! नीन ईरहिन्ती एंगन कोड़हे चोन्हा नन्दय का?” आस बाचस, “हाँ उर्बायो! ऎन निंगन चोन्हा नन्दन नीन अख़दय।” आस पतरसिन बाचस, “एंग्है भेंडो ख़द्द गुट्ठिन ओन्त'आ।” 16येसुस आसिन दोसर हॆल अउरिम मेंजस, “अना सिमॊन, यॊहनसी ख़द्दायो! नीन एंगन चोन्हा नन्दय का?” आस बाचस, “हाँ उर्बायो! ऎन निंगन चोन्हा नन्दन नीन अख़दय।” आस पतरसिन बाचस, “एंग्है भेंडो गुट्ठिन ख़ापा।” 17येसुस आसिन तिसर हॆल मेंजस, “अना सिमॊन, यॊहनसी ख़द्दायो! नीन एंगन चोन्हा नन्दय का?” तिसर हॆल हूँ “नीन एंगन चोन्हा नन्दय का?” एन्ने येसुस मेंजका ती पतरस दुक्खे मंजस। आस येसुसिन बाचस, “अना उर्बायो! नीन गा उर्मिन अख़दय। नीन इदन हूँ अख़दय का निंगन ऎन चोन्हा नन्दन।” येसुस आसिन बाचस, “नीन एंग्है भेंडो गुट्ठिन ओन्त'आ। 18ऎन निंगन मानिम ब'अदन, नीन निंग्है जॊंख़ परिया नू नीनिम अत्ता लिक्कय, अरा एक्सन काला तुक्का लगिया असन काला लिक्कय। लिकिन नीन पच्चोय ख़ने, नीन निंग्है ख़ेक्खा गुट्ठिन लमाब'ओय अरा नन्नस निंगन अत्त'ओस, अरा एक्सन नीन काला मल बेद्ददय असन आस निंगन हो'ओस।” 19पतरस एका लेक्खा खे'अनन ख़क्खोस ती धर्मेसिन महबा ननोस, एन्ने ऎद'आ गे दिम इदन येसुस तिंगियस। फेन येसुस आसिन बाचस, “नीन एंग्हा ख़ॊख़ा गुड़ियार'आ।”
20पतरस किर्रे ईरियस ती नॆकन येसुस चोन्हा ननालियस आ चेलासिन ख़ॊख़ा बरना इरियस। ई चेलस दिम माख़ा ही खुड़ती ओनो बारी येसुसी एंवख़ नू ठेकारस ती मेंजस, “अना उर्बायो, निंग्है बिड़दो नू पपहर गे संगे चि'उस एका ओर्तस?”#यॊ 13:25 21पतरस आसिन ईरियस ख़ने, येसुसिन मेंजस, “अना उर्बायो! ईसी पत्त नू एन्देर हिके?” 22ख़ने येसुस आसिन बाचस, “ऎन आसिन एंग्है किर्रना गूटी आस उज्जा गे ऎन बेद्ददन होले, इत्रु निंगा एन्देर? नीन एंग्है ख़ॊख़ा गुड़ियार'आ।” 23औंगे ई कत्था पत्त'उर ही नू बींड़रा केरा का आ चेलस मल खे'ओस। लिकिन येसुस एन्ने मल बाचका रहचस का, आस मल खे'ओस। आस एन्ने लेका बाचस, “ऎन आसिन एंग्है किर्रना गूटी आस उज्जा गे ऎन बेद्ददन होले, इत्रु निंगा एन्देर?”
ओगरारका कत्था
24आ चेलस दिम इबड़ा कत्था ही पत्त नू गोवाह चि'अरकी इबड़ा कत्थन लिखचस। ऎम अख़दम का आसी गोवाह मानिम र'ई।
25येसुस अउर हूँ कोड़हे नलख नंजस। ऎन सोचदन का, अबड़न उर्मिन ओन्टे ओन्टे लिखना होले, लिखचका पुथी गोट्टा ख़ॆख़ेल नू मल सम'ओ दने।
Trenutno izabrano:
यॊहनस 21: KURUXBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
