Enzũko 9
9
Nyamuhanga akatsumula Noa
1Neryo Nyamuhanga mwatsumula Noa nʼabagala buwe, mwabũga nabo ati, Mubute, mukanyirire, mũsũlaye ekihugo. 2Obuli nyama syʼekihugo, obuli nyonyũ syʼomo kyanya, nʼamahere gosĩ gʼomo ngetsi, ebyosĩ ebikakululuka oko kitaka, byasyabubaha nʼeribasaga, neryo syabĩrĩhĩrwa omo byala byenyũ. 3Obuli kindu kiriho ekikagenda-genda byasyabya kalyo kenyũ. Ngoko nabaha emyaka mibisi ko namabaha nyitya ebyosĩ. 4Nĩkwa Simusyerya enyama ĩtalwĩre mʼomusasi, kusangwa go ngebe yayo 5Kwenene omusasi wenyũ go ngebe yenyũ, nasyabũlyago. Oko buli nyama nasyabũlyago, nʼomo byala byʼomundu, nʼomo byala bya mugala wabo mundu, nasyabũlya engebe yʼomundu. 6Omundundi oyũkũta omusasi wʼomundu, omusasi wuwe asyũtwa nʼomundu, kusangwa Nyamuhanga mwahangika omundu omo kĩsosekanĩo kiwe. 7Nĩkwa Ĩnywe, mubute, mukanyirire; mubute kutsibu omo kihugo, mukanyirire mukyo.
Endagane yʼekiminyikalo kyʼekima
8Neryo Nyamuhanga mwabũga na Noa, nʼabagala buwe ati, 9Nage, lebaya, nasyahanganĩa endagano yage haguma nenyũ, na haguma nʼabana benyũ enyũma wenyũ, 10nʼakandi haguma nʼobuli kihangikwa kiriho ekiri haguma nenyũ, esyonyonyũ, esyonde, nʼobuli nyama yʼekihugo haguma nenyũ, oko byosĩ ebĩkalũa omo bwato, obuli nyama yʼekihugo. 11Neryo nasyahanganĩa endagane yage haguma nenyũ. Nĩkwa emibiri yosĩ siyendisyaswalũsĩbwaho kandi omwʼigunga lyʼamagetsi; kandi erigunga lyʼamagetsi siryendisaswaherya ekihugo kyo kandi. 12Neryo Nyamuhanga mwabũga ati, Ekĩ ni kiminyikalo kyʼerilagana eryo ngahĩra omo katĩkatĩ kage nenyũ nʼobuli kihangikwa ekiri haguma nenyũ, oko syondengo sya kera na kera: 13Ngakanda ekima kyage omo bĩtũ, nakyo kyasyabya kiminyikalo kyʼendagane omo katĩkatĩ kage nʼekihugo. 14Neryo kyasyabya omugulu ngaleta ekĩtũ endata wʼekihugo, ekima kyasyalolwako omo kĩtũ. 15Nage nasyibuka endagano yage, eyiri omo katĩkatĩ kage nenyũ, nʼobuli kihangikwa ekiriho kyʼemibiri yosĩ. Amagetsi siendisyaswabya akagunga kandi nʼerĩherya emibiri yosĩ. 16Ekima kyasyabya omo kĩtũ; nage nasyasamalirakyo, inatoka eryibuka endagano ya kera na kera omo katĩkatĩ ka Nyamuhanga nʼobuli kihangikwa ekiriho kyʼemibiri yosĩ eyiri muna-kihugo. 17Neryo Nyamuhanga mwabũga na Noa ati, Ekĩ nĩ kiminyikalo kyʼendagano eyo nabĩrĩhanganĩa omo katĩkatĩ kage nʼemibiri yosĩ eyiri muna-kihugo.
Abana ba Noa
18Neryo abagala ba Noa, abalũa omo bwato, babya Semũ, Hamũ, na Yafetĩ: neryo Hamũ nĩ ĩse wa Kanana. 19Abasatu aba babya bana ba Noa, nabo mobatsungana oko kihugo kyosĩ.
20Neryo Noa mwatsũka eribya mũlĩmĩ, neryo mwahera eririma lyʼebĩnyũ. 21Neryo mwapũlya oko bĩnyũ, nĩkwa mwakũnda, neryo mwabya ndũmbũ omo hema yiwe. 22Neryo Hamũ ĩse wa Kanana mwalangira endũmbũ yʼĩse wuwe, neryo mwabwira bagala babo babiri ababya eyĩhya. 23Neryo Semũ na Yafetĩ mobĩmya olukimba, mobahĩralo oko bitigo byabo, mobagenda bũnyũma-nyũma, mobaswika endũmbũ yʼĩse wabo. Amũsũ wabo mwalola enyũma, mobatalangira endũmbũ yʼĩse wabo. 24Neryo Noa mwabuka oko bĩnyũ biwe, mwaminya ekyo mugala wuwe mulere alyamukolera.
25Neryo mwabũga ati,
Kanana atakirawe.
Akandisyabya mukobe wʼabakobe oko bagala babo.
26Neryo mwabũga ati,
Omwami Mukulu, Nyamuhanga wa Semũ apipawe.
Kanana abye mukobe wuwe.
27Nyamuhanga akanyaye Yafetĩ,
Ĩkale omo mahema wa Semũ,
Kanana abye mukobe wuwe.
28Neryo Noa mwabyaho enyũma wʼerigunga emyaka magana asatu nʼamakũmĩ atanu. 29Neryo ebiro byosi bya Noa byabya emyaka magana mwenda nʼamakũmĩ atanu, neryo mwahola.
Currently Selected:
Enzũko 9: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.