使徒 9
9
掃羅信主
(使徒 22:6-16；26:12-18)
1同時，掃羅繼續用兇惡个口氣恐嚇信主个人。佢去見大祭司， 2要求發給大馬士革各猶太會堂个文書，准佢搜查信奉這道个人，無論男女，將佢等捉起來，送去耶路撒冷。
3佢去大馬士革个路上，會到城个時節，忽然有大光對天頂下來，四面照等佢。 4佢橫在地上，聽到有聲對佢講：「掃羅，掃羅！你做麼介迫害𠊎？」
5佢問講：「主啊，你係麼人？」
該聲應講：「𠊎就係你所迫害个耶穌。 6䟘起來，入城去，有人會將你應當做个事㧯你講。」
7跈掃羅共下行个人企在該位，講毋出話；佢等聽到聲，總係無看到人。 8掃羅對地上䟘起來，擘開目珠，麼介都看毋到。佢等就牽等佢个手，帶佢入大馬士革城。 9三日中間，佢看毋到；無食，也無啉。
10在大馬士革有一個信徒，名安到亞拿尼亞。主在異象中喊佢講：「亞拿尼亞！」佢應講：「主啊，𠊎在這位。」
11主講：「你黏時去直街，在猶大屋下尋一個大數人，名安到掃羅。佢在該位祈禱； 12掃羅在異象中已經看到一個名安到亞拿尼亞个人，入來為佢按手，俾佢看得到。」
13 亞拿尼亞應講：「主啊，盡多人㧯𠊎講過，這個人在耶路撒冷係樣般惡毒來迫害你个聖徒。 14這擺佢來大馬士革，帶等祭司長給佢个權柄，愛捉所有敬拜你个人。」
15主㧯佢講：「做你去！因為𠊎已經揀選佢來事奉𠊎。佢愛在外邦人、君王，㧯以色列人个面前宣傳𠊎个名。 16𠊎愛指示佢，為到𠊎个緣故，佢一定會堵到種種个苦難。」
17所以亞拿尼亞就去。佢入去該人屋下，按手在掃羅个身上，講：「掃羅兄弟啊，在你來這位个路上對你顯現个主耶穌親自派𠊎來，愛俾你再過看得到，並被聖靈充滿。」 18即時，有像魚鱗个東西對掃羅个目珠跌下來，佢就再看得到。所以佢䟘起來，接受洗禮； 19食過東西以後，佢个氣力就回復。
掃羅在大馬士革傳道
掃羅在大馬士革同信徒共下住一站時間。 20佢黏時去各會堂宣傳耶穌，講：「佢就係上帝个孻仔。」
21所有聽到个人就感覺盡奇怪，講：「這人毋係在耶路撒冷殺害該兜祈求該隻名个人嗎？佢來這位，敢毋係愛捉信徒，將佢等送給該兜祭司長嗎？」
22總係掃羅个講道反轉更加有力；佢用盡強个論證來證明耶穌係基督，使大馬士革个猶太人無法度㧯佢辯論。
23過一站時間，猶太人陰謀愛將掃羅㓾掉。 24有人將佢等个計劃㧯掃羅講。該時，佢等日夜在城門口掌等，想愛㓾佢。 25總係，有一暗晡，厥學生用大籃仔將佢對城牆頂縋落去。
掃羅在耶路撒冷
26 掃羅來到耶路撒冷，想愛同信徒來往；總係大家全部驚佢，毋相信佢係信徒。 27唯有巴拿巴接納佢，帶佢去見使徒，對佢等說明掃羅樣般在路上堵到主，主係樣般㧯佢講話，又㧯佢等講起掃羅在大馬士革奉耶穌个名傳道个時係樣般个勇敢。 28恁樣，掃羅就同使徒共下出入，在耶路撒冷奉主个名大膽傳道。 29佢也對講希臘話个猶太人傳道，同佢等辯論；佢等卻想愛㓾佢。 30兄弟知這個事，佢等就帶佢到凱撒利亞，送佢去大數。
31該時，在猶太、加利利，㧯撒馬利亞逐位个教會，全部有平安。因為敬畏主，也得到聖靈个幫助，教會就建立起來，人數日日增加。
彼得在呂大㧯約帕
32 彼得行遍逐所在。有一擺，佢訪問住在呂大个聖徒； 33在該位，佢堵到一個人，名安到以尼雅。這個人發癱風，睡草蓆八年，無法度䟘起來。 34彼得對佢講：「以尼雅，耶穌基督醫好你了。䟘起來，將你个被骨收好！」以尼雅黏時就䟘起來。 35所有住在呂大㧯沙崙个人都看到佢，佢等就相信主。
36在約帕有一個女信徒，名安到大比大 (希臘文个發音係多加，意思係「羚羊」)。姖行過盡多好事，常常幫助窮苦人。 37有一日，姖發病，死掉。人將姖个屍體洗淨，停在樓頂个間肚。 38約帕離呂大無幾遠。在約帕个信徒聽到彼得在呂大，就派兩個人去見佢，要求佢講：「請你趕緊來𠊎等這位！」 39彼得即時出發，同佢等共下去。彼得一到，人就帶佢上樓頂个間肚去。所有个寡婦圍等彼得緊噭，又將多加生前所做个內衫㧯外衫拿給佢看。 40彼得吩咐大家出去，就跪下去祈禱，然後面對屍體，講：「大比大，䟘起來！」姖擘開目珠，看到彼得，就坐起來。 41彼得伸手扶姖䟘起來，又喊該兜聖徒㧯寡婦入來，將多加生生交給佢等。 42這消息傳遍約帕，有盡多人就信主。 43彼得在約帕一個製皮師傅 #9:43 「製皮師傅」抑係譯做「礬皮師傅」抑係「硝皮師傅」，10:6，32 共樣；當時猶太人看做無淨浰个工作。西門个屋下住好多日。
Trenutno izabrano:
使徒 9: THV12Hdb
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society in Taiwan, 2012
All rights reserved
© 台灣聖經公會版權所有 2012