使徒 23
23
1 保羅注目看議會个人，講：「各位兄弟，𠊎行事為人係在上帝个面前照良心來做，直到今晡日。」 2大祭司亞拿尼亞吩咐企在身邊个人搧保羅个嘴角。 3保羅對佢講：「你這隻粉白个壁啊，上帝會修理你！你坐在該位係愛照法律審判𠊎，你樣做得違背法律，喊佢等打𠊎啊！」
4企在塍頭个人講：「你樣做得侮辱上帝个大祭司啊！」
5 保羅講：「各位兄弟，𠊎毋知佢係大祭司；聖經講過：『毋好譭謗治理人民个官長。』」
6 保羅看出這群人當中，有兜係撒都該黨个人，有兜係法利賽派个人；佢就在議會中大聲講：「兄弟啊，𠊎係一個法利賽人，係法利賽人个子孫。𠊎今晡日在這位受審問係因為𠊎盼望死人復活！」
7佢一講這句話，法利賽人㧯撒都該人就相爭，議會分做兩派。 8因為撒都該人毋相信復活，也毋信有天使㧯鬼魂，總係法利賽人三樣攏總信。 9吵鬧个聲越來越大，有兜法利賽派个經學教師企起來，強烈爭論講：「𠊎等尋毋到這個人有麼介毋著！無一定正經有鬼魂抑係天使㧯佢講話噢！」
10冤家越來越厲害，指揮官驚怕保羅被佢等扯爛，就命令兵仔下去，對人群中將保羅搶出來，帶入營房去。
11該暗晡，主企在保羅身邊，講：「你愛好膽！你已經在耶路撒冷為𠊎做見證，共樣，你也一定愛在羅馬做見證。」
殺害保羅个陰謀
12第二日打早，猶太人共下計謀，發誓在㓾掉保羅以前，毋食也毋啉。 13同謀个人有四十零儕。 14佢等去見祭司長㧯長老，講：「𠊎等已經發盡重个誓，毋食麼介東西，直到㓾死保羅！ 15這下，你等㧯議會愛請求指揮官，帶保羅來這位，詐意愛更加詳細來查問佢个事情；𠊎等會準備好勢，在佢來到這位以前㓾死佢。」
16 保羅个外甥聽到這陰謀，就入營房去㧯保羅講。 17保羅請一個軍官來，對佢講：「請帶這後生人去見指揮官；佢有事情愛報佢知。」 18該軍官就帶這後生人去見指揮官，講：「囚犯保羅請𠊎過去，要求𠊎帶這後生人來見你，因為佢有事情愛㧯你講。」
19指揮官就牽佢个手，帶佢去堘頭，問佢講：「你有麼介事情愛報告？」 20佢應講：「猶太人已經參詳好勢，準備要求你天光日帶保羅去議會，詐意愛詳細查問佢个事情。 21求你毋好答應佢等，因為有四十零儕會埋伏等等佢。佢等發過誓，毋食也毋啉，直到佢等㓾死保羅。這下，佢等已經準備好勢，等你个批准。」
22指揮官吩咐這後生人講：「莫俾別人知你已經將這個事情報告𠊎。」然後喊佢離開。
保羅被人送去交給腓力斯總督
23接等，指揮官喊兩個軍官來，吩咐講：「準備兩百個步兵，七十個騎兵，長槍手兩百儕，今暗晡九點鐘出發去凱撒利亞； 24也愛為保羅準備騎个馬，護送佢去腓力斯總督該位。」 25指揮官又寫好公文，內容講：
26「克勞第‧呂西亞㧯總督腓力斯大人請安： 27猶太人捉到這個人，正愛㓾死佢，𠊎聽講佢係羅馬公民，就帶兵去搶救。 28𠊎想愛查明佢等告佢个原因，所以帶佢到佢等个議會去。 29𠊎發現佢並無麼介該死抑係愛關个罪名；佢等告佢，就係為到佢等法律个問題。 30後來有人對𠊎報告，有人愛謀殺佢；𠊎黏時就決定送佢到你該位去，同時，吩咐該兜原告去你面前申告。」
31該兜兵仔照所吩咐个，將保羅帶去，透夜送佢去安提帕底。 32第二日，騎兵繼續護送保羅，其他个軍兵就回營去。 33騎兵來到凱撒利亞，將公文呈給總督，又將保羅交給佢。 34總督讀了公文，又問保羅係㖠省个人，知佢係基利家个人， 35就講：「等原告來到，𠊎就處理你个案件。」然後命令將保羅關在希律个官府底背。
Trenutno izabrano:
使徒 23: THV12Hdb
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society in Taiwan, 2012
All rights reserved
© 台灣聖經公會版權所有 2012