使徒 18
18
在哥林多
1這事以後，保羅離開雅典，來到哥林多。 2佢在該位堵到一個在本都出世个猶太人，名安到亞居拉，同厥𡜵娘百基拉最近正對意大利來，因為皇帝克勞第命令所有猶太人離開羅馬。保羅就去看佢等。 3佢留下來同佢等共下做事，因為保羅係靠製造帳篷生活个，㧯佢等係同業。 4每一個安息日，保羅就去會堂，㧯人辯論，勸猶太人㧯希臘人信主。
5 西拉㧯提摩太對馬其頓來到个時，保羅就用全部个時間傳道，對猶太人見證耶穌係基督。 6總係，佢等反對佢、譭謗佢个時，佢就撥掉衫頂高个泥粉，對佢等講：「你等若係滅亡，㧯𠊎無干涉，你等自家愛負責！從今以後，𠊎愛去外邦人該位。」 7保羅就離開佢等，去住在一個敬畏上帝、名安到提多‧猶士都个人屋下，厥屋下在會堂隔壁。 8會堂个主管基利司布㧯佢全家人信了主；還有盡多哥林多人聽到福音後也信，並接受洗禮。
9有一暗晡，保羅得到一個異象。主在異象中對佢講：「毋使驚，做你講，毋好恬恬， 10有𠊎㧯你同在，無人能害你，因為在這城肚𠊎還有盡多个子民。」 11保羅就在該位住一年半，用上帝个道教佢等。
12當迦流接任做亞該亞總督个時，猶太人聯合起來攻擊保羅，拉佢上法院， 13告佢講：「這個人教唆別人用無合法个方式敬拜上帝！」
14 保羅正想愛開口，迦流就對猶太人講：「這若係一件冤枉抑係犯法个事，你這兜猶太人啊，𠊎當然愛耐心聽你等； 15既然所爭論个係有關用字、名目㧯你等个法律，愛摳字眼你等自家去解決。𠊎毋愛審判這種个事！」 16佢就將佢等逐出法院。 17眾人就揪等會堂个主管所提尼，在法院前打佢。這個事，迦流也毋管。
保羅轉到安提阿
18 保羅在哥林多同信徒又共下住好多日仔，然後正離開佢等，同百基拉㧯亞居拉共下坐船向敘利亞去。出發以前，佢在堅革哩將頭那毛剪掉，因為佢識許願。 19到以弗所，保羅就將百基拉㧯亞居拉留在該位。佢自家入去會堂㧯猶太人辯論。 20大家請佢留下來住加幾日，總係保羅毋肯。 21離別个時，佢㧯佢等講：「若係上帝个意思，𠊎會倒轉來你等這位。」所以，保羅又坐船離開以弗所。
22 保羅一到凱撒利亞，就上耶路撒冷去㧯教會請安，然後去安提阿， 23在該位住一站時間正離開。佢行遍加拉太㧯弗呂家，逐所在堅固信徒个信心。
亞波羅在以弗所㧯哥林多
24有一個猶太人名安到亞波羅，來到以弗所。佢在亞歷山大出世，係一個有學問 #18:24 「學問」抑係譯做「口才」个人，對聖經有非常深个了解。 25有關主个道，佢識受相當多个訓練。佢盡熱心，常常教人關係耶穌个事，講到盡詳細。總係，佢單淨知約翰个洗禮定定。 26佢開始去會堂好膽講道；百基拉㧯亞居拉聽到，就請佢去佢等屋下，將上帝个道更加正確來講解給佢聽。 27後來，亞波羅決定愛去亞該亞，以弗所个兄弟姊妹就鼓勵佢，又寫信仔給亞該亞个信徒，請佢等接待佢。佢去到該位，對該兜蒙恩信主个人幫助盡大。 28佢常常在公開个辯論中盡有能力來駁倒猶太人，根據聖經證明耶穌係基督。
Trenutno izabrano:
使徒 18: THV12Hdb
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society in Taiwan, 2012
All rights reserved
© 台灣聖經公會版權所有 2012