使徒 17
17
在帖撒羅尼迦
1 保羅㧯西拉繼續向前行，經過暗妃坡里、亞波羅尼亞，來到帖撒羅尼迦，在該位有猶太人个會堂。 2保羅照佢平常个習慣入去會堂，連續三個安息日，根據聖經㧯人辯論， 3講解並證明基督的確愛受害，然後對死復活。佢講：「𠊎傳給你等个這個耶穌，就係基督。」 4其中有兜猶太人相信，就順從保羅㧯西拉；也有好多敬拜上帝个希臘人相信，婦女界个領袖也毋會少。
5總係，該兜毋信个猶太人心內嫉妒，聚集一兜鱸鰻，弛崗打陣，在城肚引起暴動。佢等撞入耶孫个屋下，愛尋保羅㧯西拉，將佢等拉去交給暴民； 6總係尋毋到，就將耶孫㧯其他幾個信徒拉去見地方官，告佢等講：「該兜擾亂天下个人，這下來到本城， 7耶孫在厥屋下接待佢等！佢等違悖皇帝个聖旨，講有另外一個王，名安到耶穌。」 8這兜話害眾人㧯地方官無葛無煞。 9地方官命令耶孫㧯其他个人寫切結書，然後正放佢等。
在庇哩亞
10天一暗，信徒就送保羅㧯西拉去庇哩亞。佢等去到該位，就入去猶太人个會堂。 11這位个人比帖撒羅尼迦人較開明。佢等熱心聽福音，逐日研究聖經，愛知保羅所講个有影麼。 12佢等中間有盡多猶太人相信；希臘上流社會个婦女㧯希臘个男人也毋會少。 13總係，帖撒羅尼迦个猶太人一聽講保羅又在庇哩亞傳上帝个道理，就去到該位吵鬧，煽動眾人。 14信徒即時就送保羅去海滣；總係西拉㧯提摩太留在庇哩亞。 15送保羅个人直直送佢到雅典，然後正倒轉庇哩亞；佢等帶轉保羅个吩咐，喊西拉㧯提摩太趕緊去佢該位，同佢見面。
在雅典
16 保羅在雅典等西拉㧯提摩太个時，看到滿城个偶像，心肝非常艱苦。 17所以，佢在會堂同猶太人㧯敬拜上帝个外邦人辯論，逐日也在街項个廣場同所堵到个人辯論。 18有兜伊壁鳩魯派㧯斯多亞派个哲學家也來同佢辯論。有兜講：「這憨蚩牯到底撮麼介把戲？」也有兜講：「佢像係傳外國个神明。」佢等恁樣講，係因為保羅傳耶穌㧯佢復活个福音。 19佢等就帶保羅到亞略巴古个議會去，講：「𠊎等做得知你所講个新道理麼？ 20有兜事情𠊎等聽起來感覺盡奇怪，想愛知到底係麼介意思。」 21(原來雅典人㧯所有來住在該位个外國人，全部盡好歸日講新聞聽消息。)
22 保羅企在亞略巴古議會中講：「雅典人啊！𠊎看你等逐樣事都顯出對宗教个熱誠。 23𠊎在城肚四位行來行去，看你等拜神个所在，發現有一座祭壇，頂高刻等『獻給毋識个神』。你等所敬拜毋識个神，𠊎這下愛講給你等知。 24佢係創造宇宙㧯其中萬物个上帝；佢既然係天地个主，就毋住在人手所起个廟， 25也無需要人用麼介來事奉佢；反轉係佢自家將生命、空氣，㧯萬物賜給人類。 26佢對一個人造出萬族，使佢等分散住在全地，又預定佢等个年限㧯所住个地界。 27佢恁樣做係愛佢等尋上帝，或者就會對恁樣來體驗到佢。其實，上帝同𠊎等每一個人離無幾遠。 28有人講：『𠊎等个生活、行動、生存全部在佢个手中。』又像你等當中某一個詩人講个：『𠊎等也係佢个子女。』 29既然𠊎等係上帝个子女，𠊎等就無應該恅到上帝个神性像人用手藝㧯心思所刻个金銀抑係石頭偶像。 30當人類懵懂無智識个時，上帝並毋愛追究；總係這下佢命令全人類愛離開邪惡个路、歸向佢。 31因為佢已經定日仔，愛通過佢所設立个一個人，用公義來審判全世界。佢使這個人對死復活，就係將證據給全人類看。」
32聽到保羅講起死人復活个事，有兜人就笑佢；也有兜人講：「𠊎等希望再聽你講這件事。」 33所以，保羅離開議會。 34有兜人順從佢，成做信徒；其中有亞略巴古个議員丟尼修，又有一個名安到大馬哩个婦人家，另外還有一兜人。
Trenutno izabrano:
使徒 17: THV12Hdb
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society in Taiwan, 2012
All rights reserved
© 台灣聖經公會版權所有 2012