Matayi 9
9
Yesu wutelimisa dikoka ayi wulemvukila masumu mandi.
(Malako 2.1-12 ; Luka 5.17-26)
1Yesu wukuma mu nlungu ayi wusabuka mbu ; ayi wuyenda ku divula diandi. 2Bannatina mu kiphoyi#9.2 Kiphoyi : minkanda minkaka misonama mbuka va buangu ki kiphoyi. dikoka dimosi. Yesu bu kamona minu kiawu, wukamba dikoka :
—Ba ayi bukhafi muanꞌama, masumu maku malemvukulu.
3Buna minlongi minkaka mi Mina mieka niunguta : “Mutu wawu wulembo vuezi Nzambi !” 4Yesu wuzaba mayindu mawu ayi wuba yuvula :
—Bila mbi luididi mayindu mambimbi mu mintima mieno ? 5Mbi bilutidi kambu phasi mu kamba : “Masumu maku malemvukulu” voti : “Telama kuaku ayi diata” ? 6Vayi muingi luzaba mboti ti Muana Mutu beki lulendo vava ntoto mu lemvukila masumu.
Buna wutala dikoka ayi wunkamba :
—Telama, bonga kiphoyi kiaku, vutuka ku nzoꞌaku.
7Dikoka beni ditelama ayi diyenda ku nzoꞌandi.
8Nkangu wu batu bu wumona bobo, bamona boma ayi bakembisa Nzambi wuvana lulendo luphila yoyi kuidi batu.
Bafindisa Yesu ziphaka
(Malako 2.13-22 ; Luka 5.27-39)
9Yesu wuyenda. Bu kaba vioka, wumona mutu wumosi, dizina diandi Matayi, wuvuanda mu bilu kimfutusulungu ziphaku. Wunkamba :
—Wundandakana !
Matayi wutelama ayi wunlandakana. 10Bu kaba ndia va meza mu nzo Matayi, buna mimfutisi miwombo mi ziphaku ayi bankua masumu bayiza dia va meza va kimosi ayi Yesu ayi minlonguki miandi.
11Bafalisi bu bamona bobo bayuvula minlonguki miandi :
—Bila mbi Nlongiꞌeno kalembo dila va kimosi ayi mimfutisi mi ziphaku ayi bankua masumu e ?
12Yesu bu kawa bobo, buna wuvutula :
—Batu badi nitu yi mvini batombanga munganga ko vayi batu badi bimbevo bawu bantombanga munganga. 13Luenda lulonguka tsundu yi mambu mama : thidi luba batu badi mintima mi kiadi vayi mbengi luthambikanga kaka makaba. Bila ndisia kuiza tela ko batu basonga vayi ndiyiza tela bankua masumu.
14Buna minlonguki mi Yowani miyiza kuidi Yesu mu kunyuvula ti :
—Bila mbi beto ayi bafalisi tueti kifuisa nzala mu diambu di lusambulu vayi minlonguki miaku mikifuisanga nzala ko mu diambu di lusambulu e ?
15Yesu wuba vutudila :
—Lumbanza ti batu bobo batumusu kuidi ditoko diodo dikuedidi balenda ba mu kiadi ditoko bu kakidi yawu va kimosi e ? Vayi vadi thangu bu bela ku bakatula ditoko va khatitsikꞌawu, buna bosi bela kukifuisa nzala mu diambu di lusambulu.
16Kuisi ko mutu wela bonga tendi kinledi kimona muingi kalondila nledi wukhulu bila tende kioki kimona maki kakuna nledi wukhulu, ayi divudu ma diba dinneni. 17Bobuawu balendi tula ko vinu kimona mu zitsaku zikhulu bila buna zitsaku zikanzukidi ayi buna vinu kidukukidi ayi zitsaku zifuidi. Vayi beti lundila vinu kimona mu zitsaku zimona. Mu phila yoyi zitsaku ayi vinu mabilundama bumboti !
Yesu wuviatuka bimbevo ayi lufua mu ngolo
(Malako 5.21-43 ; Luka 8.40-56)
18Mu thangu Yesu kaba kamba mambu mama, pfumu yimosi wuyiza fukama va ntualꞌandi ayi wutuba :
—Muanꞌama wunketo fuidi vayi bufueni wiza ntetika koko kuaku ayi ma kazinga diaka !
19Yesu wutelama ayi wunlandakana va kimosi ayi minlonguki miandi.
20Mu thangu yina nketo wumosi wuba kimbevo kiviokanga menga ; kimbevo beni kizingila kumi mvu miodi, wufikama ku manima ayi wusimba tsongi nlediꞌandi. 21Bila wuyindula mu ntimꞌandi ti : “minu simba kuandi nledi andi, mfueti kaka beluka !”
22Yesu wutala ku manima ayi bu kammona, wutuba :
—Muanꞌama wunketo, ba bukhafi, bila minu kiaku kibelusidi ! Buna nketo beni wubeluka muna yina thangu.
23Yesu bu katula ku nzo pfumu, wumona minsiki mi minsioni#9.23 minsioni : Mu minkanda minkaka muawu bantubila bisiku bantedilanga “flute” Vayi batu bansekinina. ayi nkangu wu batu wuba ntela-ntela. 24Buna wutuba :
—Totukeno, bila muana wunketo kasi fua ko, vayi tulu tuandi kalekidi.
25Nkangu bu wumana totuka ku nganda, Yesu wukota ayi wusimba muana beni mu koko, bosi muana ndumba beni wutelama. 26Tsangu beni yitembakana mu zunga kioso.
27Yesu bu katotuka vana, baphofo buadi zinlandakana vayi sumbu ziba kuenda nlandakana zilembo yamikina :
—A Muana Davidi e, wutumoni kiadi e !
28Bu kakota ku nzo, baphofo zifikama va kaba. Niandi wuba yuvula :
—Luwilukidi ti ndenda vanga diawu e ?
Bawu bavutula :
—Nyinga Pfumu.
29Bosi wusimba meso mawu ayi wukamba :
—Bika buvangimina boso buididi minu kieno !
30Vana vawu meso mawu mazibukidi. Yesu wuba kandika ti :
—kadi mutu kazaba mambu mama.
31Vayi bawu bu bayenda, bamana tembikisa tsangu andi mu zunga kioso.
32Mu thangu batotuka, bannatina dibaba, wuba yamusungu kuidi pheve yimbimbi. 33Yesu wukuka pheve beni. Muna thangu beni kaka mutu weka nyoluka. Batu basimina ayi bakamba :
—Tumueni ko mambu ma phila yayi mu Iseli !
34Vayi Bafalisi bakamba :
—A keti mu lulendo lu Pfumu yi ziphevi zimbimbi kalembo kukila ziphevi zimbimbi !
Yesu wumona batu kiadi
(Malako 6.34 ; Luka 10.2)
35Yesu wuba diengilanga mu mavula moso ayi mu mala moso. Wuba longanga mu zinzo zi zikhutukunu zi Bayuda ayi wuba longanga Nsamu wumboti wu Kipfumu, wuba belusanga bimbevo biphila mu phila ayi ziphasi zi phila mu phila. 36Bu kamona nkangu wu batu, kiadi kimbuila mu diambu diawu, bila batu beni ku tsi mayindu baba ayi baba bavonga banga mamemi makondolo nsungi.
37Buna wukamba minlonguki miandi :
—Lutala, mimbutu miyela mieka miwombo mu tsola vayi bisadi bidi bifioti. 38Diawu lulomba kuidi Pfumu yi tsola muingi kafidisa bisadi mu diambu di vela mimbutu.
Trenutno izabrano:
Matayi 9: YOM
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Nkanda wu Moyo, Nguizani Yimona ayi Minkunga
Copyright © 2002 mu dizina di Biblica, Inc.®
Yisadulu mu nsua wu Biblica, Inc.® Minsua mi tsadulu mikinzika.
Kiyombe Contemporary Version, New Testament and Psalms
Copyright © 2002 by Biblica, Inc.®
Used by permission of Biblica, Inc.®. All rights reserved worldwide.
