Matayi 7

Nizya kubalonga abantu abanji

(Luk. 6.37-38, 41-42)

1“Mutakabalongaye abantu abanji, umwakuti u Chala wepe atakabalonge. 2#Mlko. 4.24Pakuti mumo mukubalongela abantu abanji, momumo u Chala akwiza pakubalongela. Ichipimilo chicho mukubombezya pabantu abanji, cho chicho u Chala akwiza pakubombezya papinyu. 3Nkimba choni chicho ukwennya akapato mu lyiso ilya umukamu wako, ukusita ukwinong'ona ichizinka chicho chili mu lyiso lyako? 4Nkimba ungamubuzya bulibuli umukamu wako ukuti, ‘Zagha nefye akapato mu lyiso lyako,’ bo nawe bulo mu lyiso lyako muli ichizinka? 5Wee muzimbuli wee! Efya tasi ichizinka chicho chili mu lyiso lyako, po ukwiza pakwennya akiza nukwefya akapato kako kali mu lyiso ilya mukamu wako.

6“Mutakazipanje imbwa chicho chizelu pakuti zikwiza pakukusambukila nukukuluma. Mutakazisumbilaye ingulube chicho chipaghuliwe kwa Chala pakuti zikwiza pakukanyannya bulo.

Mulabaye, mulondaye, mukong'osyanje

(Luk. 11.9-13)

7“Mulabaye, po mukwiza pakupokela. Mulondaye, po mukwiza pakuvyagha, sona mukong'osyanje, po ulwiyi lukwiza pakubighukila. 8Pakuti umuntu wesi yuyo akulaba akwiza pakupokela, sona umuntu wesi yuyo akulonda akwiza pakuvyagha, sona umuntu wesi yuyo akukong'osya, ulwiyi lukwiza pakumwighukila. 9Nkimba alipo umuntu yuyo, nanti umwana wache akulaba ichibama, akumupa ibwe? 10Pamo nanti akulaba iswi, akumupa injoka? 11Nanti mwe bantu mwe babibi mumenye pakubapa ivintu ivyiza abana binyu, zili bulibuli nu Ghuso uwakumwanya? Nkimba angapotwa pakubapa ivintu ivyiza babo bakumulaba?”

12 # Luk. 6.31 “Mubabombelaye abantu abanji vivyo amwe mukulonda ukuti bababombelaye. Ichi cho chicho Indaghilo izya Mozesi nu bumanyisi ubwa balaghuzi vikumanyisya.

Nizya mulyango umufinye

(Luk. 13.24)

13“Mwinjilaye pamulyango umufinye. Pakuti umulyango uwa kubuzilo ubwa lunanganiko mukulu, sona izila iyakubukila kuko mpepe, po binji babo bakwendamo. 14Loli umulyango uwa ku bumi mufinye, sona izila iyakubukila kuko mpalapala, po bantu banandi babo bakuyagha.

Ikwi ni seke zyache

(Luk. 6.43-44)

15“Muchebaye nabo abalaghuzi abamyasi; bakwiza kukwinyu ngati zyo ng'ozi, loli mukasi bayanite bulo ni mpumpi! 16Mukwiza pakubamanyila mumbombo zyabo. Ikwi ilya mivwa litakwela abamulebe, pamo ikwi ilya ntolovu litakwela ivikomwa ivya makuyu. 17Ikwi ilyiza likwela ivikomwa ivyiza, loli ikwi ibibi likwela ivikomwa ivibibi. 18Ikwi ilyiza litangela ivikomwa ivibibi, sona ikwi ibibi litangela ivikomwa ivyiza. 19#Mat. 3.10; Luk. 3.9Ikwi lyosi lilyo litakwela ivikomwa ivyiza likudumuliwa nukusumbiwa pamoto. 20#Mat. 12.33Po mukwiza pakubamanyila abalaghuzi abamyasi mumbombo zyabo.

Ntabamenye nalumo

(Luk. 13.25-27)

21“Te bantu bosi babo bakunyitizya ukuti, ‘Mwene, Mwene,’ bakwiza pakwinjila mu Bumwene ubwa Kumwanya, loli bene babo bakubomba zizyo Utata wane uwakumwanya akulonda. 22Bo isiku lilyo u Chala akwiza pakubalonga abantu lyafika, abinji bakwiza pakunena ukuti, ‘Wee Mwene, Mwene tukalumbililagha amazyu agha Chala mwitabwa lyako, tukefyanga imizimu imibibi nukubomba ivyika ivyinji mwitabwa lyako.’ 23#Mas. 6.8Po nkwiza pakubabuzya ukuti, ‘Ntabamenye nalumo, epapo, mwe bantu ababibi amwe!’

Nizya bazenga nyumba babili

(Luk. 6.47-49)

24“Umuntu wesi yuyo akwivwa amazyu ghane nukughabombezya imbombo ayanite bulo nu muntu uwamahala, yuyo akazenga inyumba yache pilyalabwe. 25Ivula yikatima, isoko zikizula, sona impepo yikakuka nkani nukukoma inyumba yila. Loli inyumba yila yitakawa, pakuti yikazengiwa pilyalabwe. 26Umuntu wesi yuyo akwivwa amazyu ghane, loli atakughabombezya imbombo ayanite bulo nu muntu umupunganu yula, yuyo akazenga inyumba yache pamusesenga. 27Ivula yikatima, isoko zikizula, sona impepo yikakuka nkani nukuyikoma inyumba yila. Po inyumba yila yikawa nukumongonkana.”

Ubulaghili ubwa Yesu

28 # Mlko. 1.22; Luk. 4.32 Bo u Yesu anena zinizi, ichilundilo icha bantu chikaswigha nkani namumo akamanyizizya. 29Atakamanyisya ngati bo bamanyisi aba Ndaghilo izya Mozesi, loli akamanyisya ngati wemwenecho uwa bulaghili.

Trenutno izabrano:

Matayi 7: LMBNT2016

Istaknuto

Podijeli

Kopiraj