CHABANGCHAM 8
8
Duidetse Loibo
1Malee lungga bambo Noah khatdi pasai suikinbo khaoringdungtu Tingwang niu mangai makge; Paniu tingkai tu hunra kamkhaijiu tadui hai npikiu sude. 2Kadihpiriga bambo aladky khatdi tingpukga bambo duidet tingriuki hina kham mide. Siga tingriu tamide, 3sichiujiu tadui hai naimikpui kai khat-je-ringiu lungga npibi-bi mide. 4Chahiu chinniabogu tingmik kariu-je-chiniakiubo nai maleese Ararat Luongga kiujiu nbeng khai mide. 5Tadui hai npikiujiu chahiu kariubogu raithubo naise maluanggen ngaopad sude.
6Jeng atai sai Noah niu kiranki khat lepadde khatdi n-gek khattu langkhaide. 7Haise wanglan makge, chiudi tadui hai npikiu makthen len maguijiu bammide. 8Sibo lungga, Noah niu tadui npikiu mima chiubo phuira, makhao khattu langkhai-e, 9chiudi tadui hainiu phuiting bamkhabo jengniu, makhaose taokhaira hajiu, malee gase lenwang lanne. Sichiujiu Noah niu paben henpadjiu minkhai lan-e. 10Paniu jeng chinnia saiga, makhao situ langkhai lan-e. 11Haisiniu chawan pamun-juangga takiniu karingbo khat ponlujiu pakhuga wang lan-e. Sijengniu tadui hai npikiu mide chiubo Noah niu silude. 12Sibosai jeng chinnia saiga paniu makhao situ langkhai lan-e; sigara makhaose malan wang tamide.
13Noah niu tingkum 601 tangmiboga, raithubo hiugu raithubo naise, taduise npikiu mide. Noah niu malee gomse lepadjiu phuiboga, kadih hai sangkiu mibose ngaode. 14Chahiu niabogu tingmik makai-je-chiniakiubo naise kadih hai sangkang mide.
15Tingwang niu Noah khuga din-e, 16“Malee lung gasu nanao, nanahpiudung khatdi paliu naodungtu maluang lujiu npad sulo. 17Chakhao thingna hinatudi puilujiu npad sulo, sichiujiu kadihpiri pakhiangnaga pijiu lungkingpad karen sulo.” 18Sijengniu panao, panahmai khatdi pamupuidungtu Noah niu malee gasu maluang npad mide. 19Sichiujiu chakhao thingna hina pajat-jat, paphom-phom thiujiu malee gasu npad kam mide.
Noah niu Charathiubo
20Noah niu Rapiu leng rathakbam khat thiukhaide; sichiujiu paniu rathakbam gase, charachengga masanbo thingna chakhao hina maring kadkhai-e. 21Rathakga rukhaibo rimse Rapiu chun kimde, siniu pah paronna din-e, “Chamaina tienkam jengniu wadaodi Iniu kadihpiri haitu kam mahalan lakde; pah nating gasu pamaning hai sa-e, chiubo Iniu si-e. Iniu thainai kammibo kumjiu wadaodi khaoring hinatu kam mahalan lakde. 22Kadihpiriniu bamthen, lingbo wan khatdi atiatbo wan bamrabo-e. Siga ka-agibo nai kathiubo, tathe nai kariak, khatdi nchun nai n-nien chiujiu bamrabo-e.”
Trenutno izabrano:
CHABANGCHAM 8: LIANBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.