Luk 20
20
Ri Galte Iesu isi Rakrakai ae i Tel Foim ini
Metiu 21:23-27; Mak 11:27-33
1Nenge biing, aunbiing Iesu i fafausum fanu la ke ka famam fafas ini Rokap na Fafas na palgan ubiif kale Felun Tunmapek, foron laulaumet na pris, foron tom fafausum ini nagogon ke foron famfamu ri ka la usuf i, 2ma ri ka diik u aragii, “Fas kemem, rakrakai tinga o tel foron tier igii ini? Ma se i ta u e rakrakai igii sing o?”
3Iesu ka kiliis ri aragii, “Ia sabin ian diik gam ini nenge fagalte. Gam fas iau, 4bapitaiso ke Jon, tinbae na kukulii le sing fanu sau?”
5Ke ri ka ngurke u tom na fatpoto ri aragii, “Male keren tara le tinbae na kukulii, ke in diik kerer le, ‘Isi sani biil gam unune lo?’ 6Isau male keren tara le, ‘sing fanu,’ ke fanu rin luumete kerer. Wara le fanu tikii ri unune tom le Jon i e nenge profet.”
7Ke ri ka kiliis u sau aragii, “Biil keme usum le tingah.”
8Iesu ka fas ri aragii, “Iau sabin, biil ian fas gam le rakrakai tinga ia tel foron tier igii ini.”
Orek Fatoftof lon foron Tom Foim na Porpor Wain
Metiu 21:33-46; Mak 12:1-12
9 #
Aisaia 5:1
Iesu ka fas fanu sabin ini orek fatoftof igii: “Nenge kaltu i so nenge porpor wain ke ka ta u usuf fale tom foim isi rin parpar kale ta bii lo ma ka la na nenge ninla ma biil i to fis sape. 10Na taul lulus, ka wuun nenge fafauun usuf foron tom foim ae, isi rik ta ti fale fuan wain tina porpor wain. Isau le foron tom foim ri ka pakti ke ri ka wuun fafis u ini lima kanan sau. 11Ke ka wuun ufu nenge fafauun kia sabin, ri ka pakti, ri ka famatlawen u ke ri ka wuun fafis u sabin ini lima kanan sau. 12Namih, ka wuun ufu fatuul u e fafauun ke ri ka paket falaulau u ke ri ka lin fasuu u.
13“Ke taman porpor wain ae ka tarah, ‘Sani ian tel u? Ian wuun keng kalalik ae ia ier kanaka isi. Awii ngan rin bulat lo.’
14“Isau le aunbiing foron tom foim ae, ri par u, ri ka put orek aragii, ‘Ier igii, in ti kiliis tama. Kerek siimete u, isi kirer mang e porpor wain igii, ae tama i fakale ta u ini.’ 15Ri ka luu suu ini tina porpor wain ae ke ri ka siimete u.
“Sani sabin taman porpor wain ae ik tel u ini ri? 16In la ma ik siimete foron tom foim ae ke ik ta porpor wain ae usuf fale fanu keskes.”
Aunbiing fanu ae ri ongen orek igii, ri ka tarah, “Biil tom!”
17 #
BukSong 118:22
Iesu ka par tortores usuf ri ke ka tarah, “Ke sani e kamtinan orek ae ri siit ta u na Buk na Gogoh ae i tarah,
‘Tuh ae foron tom tel fel ri puris ta u
ka tapiek temin tuh.’
18Fanu tikii ae ri luut una tuh ae rin burburngih ma se ae tuh igii i luut na olo, in pekpekes.”
19Foron tom fafausum ini nagogon turan foron laulaumet na pris ri ka im sal isi luse Iesu na aunbiing tom ae, wara le ri usum le i use orek fatoftof igii ulo ri. Isau le ri soke fanu.
Fagalte isi Sinangun Fiil Takiis
Metiu 22:15-22; Mak 12:13-17
20Foron tom fafausum ini nagogon turan foron laulaumet na pris ri ka luun matri lo Iesu. Ke ri ka wuun fakum fale fanu isi rin ongen u. Rin garan le ri foron tom tortores, isi rik tatakuun pes u ini ti orek ae in use u, isi rik ta u na liman laulaumet tina Rom ma ik nagogon u. 21Ke fanu ae ri wuun ta ri, ri ka diik Iesu aragii, “Tom fafausum, keme usum le orek turan fafausum kiam i tortores. Fafausum kiam i fafasi sau usuf fanu tikii ma o fausum tekentu ri la tom ini sinangu God. 22Arafah, i tortores le keren fiil takiis usuf Sisar,#20:22 Sisar i e laulaumet na matanfuntih na Rom, turan foron falifu tikii ae ri kiis na piklin nagogon tina Rom le biil?”
23Ka iliim ta garan kiri, pesu ka tara sing ri aragii, 24“Finngas iau ini ti dinaria.#20:24 Nenge pitkalang ken fan Rom, ri foteng u ini dinaria. Tantanwa se ke asa se igii lo?”
25Ke ri ka kiliis u aragii, “Sisar.”
Ka fas ri aragii, “Pesu, sani ke Sisar, ta u usuf Sisar, ma sani ke God, ta u usuf God.”
26Biil ifasi rin tatakuun pes u ini orek ae i use u na matan fanu. Ma ri ka bitit na orek ae i kiliis ri ini ke ri ka babat na ngusri.
Fagalte isi Fakekel na Biingen Apaptifis
Metiu 22:23-33; Mak 12:18-27
27 #
Aposel 23:8
Fale Sadusi ae ri use u la le biil ti apaptifis, ri ka la usuf Iesu ini nenge fagalte ke ri ka tarah, 28#Lo 25:5“Tom fafausum, Moses i siit ta u usuf kerer aragii, ‘Male nenge kaltu i met koseng antu ma biil ti kalalik kiruh, ke tualik in telpes makos ae, isi ik fapuar ti berberat ke tualik ae ka met tah.’ 29Nenge ifit latualik, neng famu i fakekel ta ke ka met koseng antu, ma biil ti kalalik kiruh. 30Fawu u, 31ke fatuul u sabin arae. Ifit latualik tikii ae, ri telpes ta fifin ae, ke ri ka met ma biil ti kalalik kiri. 32Namih, fifin sabin ae ka met. 33Ke, na biingen apaptifis, fifin ae in antu se tutus mang lo ri? Wara le ri fit tikii, ri telpes ta u.”
34Ke Iesu ka kiliis ri aragii, “Na liu igii, fanu ri fakekel la. 35Isau le na liu ae namih, fanu ae ri tortores isi rin apti fis tina minet, biil rin to fakekel sabin, biil. 36Ke biil sabin rin met, wara le rin arae foron angelo. Ri berberat ke God, wara le ri ka apti fis ta tina minet. 37#KisimBek 3:6Moses sabin i finngas ta u le foron minet rin apti fis, wara le, na ususe na au ae i sok, i foteng Kumguui le, ‘God ke Abaram, God ke Aisak ke God ke Jekop.’ 38God biil i God ken foron minet, biil. I God ken fanu ae ri liu, wara le na mata, ri tikii ri liu.”
39Fale tom fafausum ini nagogon ri ka tarah, “Tom fafausum, i rokap kanaka e orek kiam!” 40Ke ri ka binbin le rin diik u sabin ini ti fagalte.
Kalalik Kise e Mesaia?
Metiu 22:41-46; Mak 12:35-37
41Iesu ka diik ri aragii, “Isi sani ri ka tara le Mesaia i e kalalik ke Dewit? 42#BukSong 110:1Wara le Dewit tom i use u na Buk Seksek aragii:
‘Kumguui God i tara sing Kumguui kiak:
Kiis na miang,
43papang na aunbiing ian luun foron tuui kiam
na piklin kekem.’
44Dewit i foteng ta Mesaia le Kumguui kia. Male i arae, ke in tapiek kalalik ke Dewit arafah?”
Tumarang lon foron Tom Fafausum ini Nagogon
Metiu 23:1-36; Mak 12:38-40; Luk 11:37-52
45Aunbiing fanu tikii ri ongongen orek la ke Iesu, ka tara sing berberat na fafausum kia aragii, 46“Gamen tumarang lon foron tom fafausum ini nagogon. Ri ier la isi rin soleng fanu ini foron rokap na kilkiliis ke ri ier la isi fanu rin faorek pes ri ini bulat na foron salan la turim ken fanu. Ma ri ier isi kiis la tom na foron nian kiiskiis kausi na foron felun lotu ke na foron nian kiiskiis ken foron laulaumet na foron tel inen. 47Ri farop minmaran foron makos la, ke ri ka tel foron dolon sising la isi fanu rik par ri. Matngan fanu arae, in laumet kanaka e fangungut rin kep u.”
Trenutno izabrano:
Luk 20: BJP
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2015, 2021 Wycliffe Bible Translators, Inc. All rights reserved
