Gɛlaɠaa 5
5
Ananiasə da nɛ̨ą Safira
1Hulɔnu ta ə kɛ laa, diɛ kɛ naa ɓaa: Ananiasə Diɛ kɛ nɛ̨ą laa ɓaa: Safira. Ɉulɔnui ti da nɛ̨ą di pɛli ɉu, di di wɔ lɔi lɔwɔ́tɔɔ. 2Yili pulu, ɉulɔnui ti ə li a nwali bələ tɔ̨nɔ̨ gɛlaɠaa pɔ, ə naa di lííla; ə bələ tɔ̨nɔ̨ lɛɛ ɲee pulu. Da nɛ̨ą di hee mąą woo li kɛ. 3Kɛlaa, Piɛrə ə mo ɉulɔnui ti ɓa, yɛ mą: «Ananiasə, lə ɓə kɛ yai ɓilihi aa lɔ kpɔ ti ə́ lii hu kɛnɛ̨, yɛ́ lɛɛ kɛ Kili-Mąąhəɠɛɛ ɓa? Yɛ́ nɔi hɔ̨nwɔ̨ ta lɛɛ ə́ yee pulu. 4Gɛɛ hvo nɔi ti lɔwɔ́tɔɔ kɛi, ə kɛ a ə́ wɔ́ɔ́, nɔwɔtɔɔi nwɔ̨nɔ̨ ə́ mo, nwali ə kɛ a ə́ wɔ́ɔ́. Lə mɛ̨nį ɓa, ə́ giliŋąhiɛ yii ŋɛ̨i ɉuwu kɛ? Hvo kɛ lɛɛ kɛ li nuą diɛ, kɛlaa, Yálá ka ti ə́ lɛɛ kɛ mą.»
5Nwooɠaa ti mɛ̨n Ananiasə ə mo, ə too, ə haa. Nuą kpɔ mɛ̨nįi ti mɛ̨n, ɲɔw kɛnɛ̨ ə too di hu. 6Hilɛ lɛa di pa, di bowa mąą kpinįn gɛ, dəli di noo.
7Lɛɛlɛ haaɓa tɛɛ pulu, Ananiasə nɛ̨ą ə pa, mɛ̨nįi ti tɛɛ laa, gili hvo kɛ ɉu. 8Piɛrə ə nɛ̨ɛ̨nui ti mąąni kɛ, yɛ mą: «Ka wɔɔ lɔi lɔwɔ́tɔɔi ka mo, nwali kəlee ɓəi?»
Nɛ̨ɛ̨nui ti yɛ mą: «Ee! Nwali kəlee li.»
9Nąąlɔwai Piɛrə ə mo mą, yɛ mą: «Lə mɛ̨nį ɓa, ka nu hveelɛ ka pɛli mɛ̨nį tɔ̨nɔ̨ ɓa, ə gɛ, ka Kili-Mąąhəɠɛɛ hukɔɔn? Nɛ̨ɛ̨nu, 'ə́ wəli tɔɔ, nuąi li ə́ hilɛ looi, daa gbɛa həli ɓɛ, yɛ́ kpɛli, di kaa pai lii a yɛ́.»
10Ɲąąɓa, nɛ̨ɛ̨nui ti ə too Piɛrə kɔ́wɔ mu, ə haa. Ɓɛlɔwai ɉilɛlɛai di paa la, di gaa aa haa; di ɉəɠə dəli la, di noo ɉilɛ kwɛlɛ. 11Ɲɔw kɛnɛ̨ ə too Yálá ŋą nu kpɔn kəlee lɔwai, da nuąi kpɔ mɛ̨nįi ti bələ mɛ̨n.
Gɛlaɠaa di kpalo mɛ̨nįɠaa kɛ
12Gɛlaɠaa di kɛi kpalo mɛ̨nį tamąą da kwəi pilimąą mɛ̨nįɠaa kɛ nɔi nuą lɔwai. Laa na nuą kəlee di kɛi di ɲąąkpɔn Salomɔn yəi ɲumąn mu. 13Kɛlaa, nui lɔpee ta hvo lii hvo kɛli kpələ hvo too di pɔ, bələi mąn di kɛli di mąątɛ̨nɛ̨ la. 14Ɛlɛɛ, hinąą mąn, nɛ̨ąą mąn di kɛli too di a di kpulu kɛnɛ̨ɛ̨, a laai di kɛli mo Ną́mu la. 15Di kɛi pa a ɲɔ̨n gɛ nuą tamąą diɛ di laa bələ kwɛlɛ, ə gɛ, ɓɛlɔwai Piɛrə aa kɛi pa tɛɛi la, nįnįn ə hee kpɛli mąn di ta ɓa. 16Nu kpulu kɛnɛ̨ɛ̨ ə kɛi həɠə Ɉerusalɛmə da gwɛlɛ taaɠaa hu, diɛ pa a ɲɔ̨n gɛ nuą, ə mą kɛ nuąi Ɲįnɛ̨nŋaa di kɛ di pulu; gəlee kɔ́lɔi yɛ pono, Ɲįnɛ̨nŋaa diɛ həɠə di pulu.
Di gɛlaɠaa hon di pənə ɓo diɛ
17Ɉaláá laa həli mun gɛnɛ̨ da ɲee pɔ nuą; diɛ ɓaa: Sadusiɛ̨ɠaa, ɓɛlɔwai di yili kaa la ti, di líí ə holi kpɔ kɛnɛ̨ gɛlaɠaa pɔ. 18Di gɛlaɠaai hon nu kəlee ɲɛ̨i ɓa, di di too gaho ŋą. 19Kɛlaa, kwiihąą, Ną́mu nwɔ malaka ə gaho pɛlɛ́ laa ɓo, ə di kulɔ gaho pɛlɛ́ mu, yɛ diɛ:
20Ka li Yálá hee pɛlɛ́ mu, 'ká nu ɓalo woo ŋɛ̨i laa həli nɔi lonnii kəlee diɛ.
21Di lɛɛ nwoo pulu. Yələ ɓɔi lɔwai, dəli Yálá hee pɛlɛ́ mu, diɛ nuą kalan.
Ɉaláá laa həli mun gɛnɛ̨ ə pa, yaa da ɲee pɔ nuą, di tɔ́n vili nąmįną təli nwun dɔɔ hu, di gɛlaɠaa kulɔ gaho pɛlɛ́ mu di paa a diɛ Israɛlə nuą di wɔ ɲąąkpɔn gɛnɛ̨ɛ̨ hu. 22Nuąi di di tɔɔ, lii di mo di həli gaho pɛlɛ́ la, di hvo di kaa gaho pɛlɛ́ mu. Di pənə di pa, di di woo hukulɔ. 23Diɛ mą: «Lii ku mo, ku bɛlɛ́ɠaa kəlee kaa naa kpulɔɔ kpɔ a nɛlɛɛ, gaho pɛlɛ́ mɛ̨ikaa nuą kaa di ɓo heeni bɛlɛ́ laaləi. Ku bɛlɛ́ laa ɓo, ku hvo nu ta kaa bɛlɛ́n.»
24Ɓɛlɔwai di nwoo hukulɔi ti kɛ la, Yálá hee pɛlɛ́ ɲąąwooɓo nuą da ɉaláá laa həli nuą kpɛa-kpɛa diɛ, di kwəi ə pili diɛ, yii kɛ di mo gɛlaɠaa mąą mɛ̨nį hu, di hvo kɛ gɔlɔn. Di kɛi di kee mąąni kɛ, diɛ kɛ mą: Di gɛ pələ kɛ ləi diɛ kulɔ? 25Kɛlaa, di lɛɛ lɔ moi ti, nu ta ə pa, yɛ diɛ: «Nuą ŋɛ̨i ka di too gaho ŋąi, di kaa Yálá hee pɛlɛ́ mu diɛ nuą kalan.»
26Nąąlɔwai, Yálá hee pɛlɛ́ ɲąąwooɓomun ə həɠə yɛ li da ɲee pɔ nuą, ə gɛ, di gɛlaɠaa hon di pa a diɛ. Kɛlaa, di ho di yagalanmo. Mąąhɔlɔɓo, di kɛi ɲɔw, ə gɛ, di hvo nəi pa di hɔɔ a kwɛni. 27Yii kɛa di pa a diɛ, di di tɔɔ dɔ́n vili nąmįną lííla, ɉaláá laa həli mun gɛnɛ̨ ə di mąąni kɛ, 28yɛ diɛ: «Kɛlɛi ku hiɛ tɔn dɔɔ káá, kuɔ ka hvo kalan gɛ naai ti hu-ee? Akɛti, lə ɓə yai káámun káá Ɉerusalɛmə laahvɛɛ a ka wɔ kalan nwooi, ɛlɛɛ, káá ka wɔ nui ti haa wulu lɛɛ ku nwuɔ̨.»
29Kɛlaa, Piɛrə da mɛlan di di woo ŋąapənə, diɛ mą: «Mąąnɛ̨ɛ̨ nu ə Yálá woo hon ə tɛɛ nu woo ɓa. 30Jesus ŋɛ̨i ka ɉon ka gbanwo kolɔwa ɓa, ə haa, ka nąnni pɔlɔɠaa di wɔɔ Yálá, ə gulɔ haaɓɛlaa lɔwai ə gɛ a vulú. 31Ya ɓə Yálá ə gɛnɛ̨ ɉee mamįiyee hu, yɛ gɛ a tɔɔmun da nuą ɓalomun, yɛ Israɛlə hɔn mąąpənə mɛ̨nį, da ŋą nɛ̨ŋɛ̨nŋaa mąąhvaalɛɛ mɛ̨nį. 32Ku kaa a mɛ̨nįɠaa ti kəlee mąą kɛla, kuɔ, kwa Kili-Mąąhəɠɛɛ ti Yálá ə dɛɛ nuąi lɛɛ woo mu, di pɔ.»
33Nwoo taaləi ti mɛ̨n di mo, ə di lííholi kpɔ kɛnɛ̨, di di kiliŋąhiɛ di paa mɛ̨nį ɓa. 34Kɛlaa, nu tɔ̨nɔ̨ ə muhəɠə nwun dɔɔ hu, ə kɛ a Farisiɛ̨, naa ɓa: Gamaliɛlə, ə kɛ a tɔ́n galamɔ̨ɔ̨ kɛnɛ̨, mɛlɛ ə ɓo nɔi lonnii kəlee kwəi, ə mo, di gɛlaɠaa kulɔ woloɓo ɲɛnɛ̨ɛ̨. 35Yili pulu, Gamaliɛlə yɛ diɛ: «Israɛlə lonnii, mɛ̨nįi ka káá naa nuą ŋɛ̨i diɛ, ká ɉukpɛ a nɛlɛɛ. 36Ɉu hvo ni kwɛa li, gu hulɔnu ta kaa diɛ kɛ mą: Teudasə. Ə kɛi gbɔwɔ kɛ mɛ̨nį kɔ́lɔn mun; nu nwun nąąn ɲɔ̨nwɔ mąn ə həɠə ə hvilɛn bɔ. Di yaa kpįnį baa, bɔ nuą di taɠa-taɠa, nąą ə tɔɔ tin. 37Yili pulu, nonoɓo kɛ lai, Galile mun da kɛ mą: Ɉudasə, yaa kpɛli ə pa, ə nu kpulu kɛnɛ̨ həɠə ə di pu bɔ. Kɛlaa, yaa kpɛli, di baa, bulu nuą di taɠa. 38Yii ɓa, gáá moi káá: Ká ká laa kulɔ nuą ŋɛ̨i mąą mɛ̨nį hu. Mąąhɔlɔɓo, akɛ ə həɠə nuą pɔ, daɠa hiɛ ka ti. 39Kɛlaa, akɛ ə həɠə Yálá pɔ, ka hva pɛli ɉu taɠai. Ka gɛ a nɛlɛɛ, ka hvo pa kɔ́ pɛlɛ Yálá ɓa.»
Diɛn hvaa nwoo ɓa. 40Di gɛlaɠaa təli, di di kɛlɛ a galakpa, di tɔn dɔɔ diɛ, diɛ di hvo Jesus laa ɓo. Di ɓo diɛ. 41Gɛlaɠaai di həɠə dɔ́n vili nąmįną lííla a di kwəinɛ̨ɛ̨, diɛ li, mąąhɔlɔɓo, Yálá aa hvaa mą daa kɛ a nuąi mąąnɛ̨ɛ̨ di di mɔ̨nɔ̨ɓo Jesus laa mąą mɛ̨nį ɓa. 42Hvóló kəlee, di kɛi li Yálá hee pɛlɛ́ mu, da bɛlɛ́ɠaa laaləi diɛ nuą kalan a Jesus ŋɛ̨i gaa a Nwun mąąɓomun Yálá ə naakwɛlanmo nwɔ wəlɛɛ lɛlɛɛ.
Trenutno izabrano:
Gɛlaɠaa 5: BKPDCG
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi