Matiyu 15

Tonoi Wila̱ u Ka̱shile

(Mar. 7:1-13)

1Ɗa Afarishi o yoku nu nlum n Wila̱ mu uta̱i a Urishelima, ɗa a̱ ta̱wa̱i u Yesu ɗa e ecei ni, 2“Yi ɗa̱i i zuwai ɗa mukumitoni n nu n tsu tono ili i na ikaya i tsu i yotsongi tsu ci yaꞋan ba? A tsu saꞋa biꞋi ekiye e le tsu na agadu a danai kafu a lyaꞋa ilikulyaꞋa ba.”

3Yesu wu ushuki, “Yi ɗa̱i i zuwai ɗa i tsu kpa̱ɗa̱ kutono Wila̱ u Ka̱shile sai kuyotsongusu ki ikaya i tsu? 4Ka̱shile ka danai, ‘Cikpa eshevu n a̱na̱vu,’ u danai kpamu, ‘Vi yaꞋanka baci eshevu ko a̱na̱vu una̱, i ta̱ a kuna wu.’#Kut. 20:12; 21:17. 5Amma i ci yaꞋan ta̱ kuyotsongusu ku yoku. I danai uma i baci n ili i ta̱ a kufuɗa a̱ ɓa̱nka̱ esheku ko a̱na̱ku e le, a kucikpa a dana, ‘Ili ya i Ka̱shile i ɗa,’ 6adama a nannai sai a gutsaka le e neke isheku i le ili ba. I iwain kuyaꞋan ili i na Ka̱shile ka danai adama a̱ wila̱ u na i zuwakai ka̱ci ka̱ ɗa̱. 7A̱ɗa̱ aza a kapalaka̱shi! Kadanshi ke keneki Ishaya mayun ɗa, ana u ɗanai i na Ka̱shile ka danai:

8‘Uma a nam pa i ta̱ a kucikpa mu n una̱ u le koci,

amma a̱ɗu e le i ta̱ daꞋin nu mpa.

9Kucikpa ku na i a kucikpa mu gbani ɗa ki.

Ili i na i o kuyotsongusu, wila̱ u uma u ɗa koci.’ ”#Ish. 29:13.

Ili i na i tsu zuwa vuza wo okpo n unata

(Mar. 7:14-23)

10Ɗa Yesu u ɗekei ka̱bunda̱i ka uma, ɗa u danai le, “Panai ka̱ta̱ i yeve ili i na mi a kudana. 11Ili i na i uwai a̱ una̱ u uma i ɗa i tsu zuwa le o okpo n unata ba. Amma ili i na yu uta̱i a̱ una̱ u le, i ɗa i tsu zuwa le o okpo n unata.”

12Ɗa mukumitoni ma n ta̱wa̱i wa̱ ni ɗa a danai, “Vi yeve ta̱ gaji a na vu nusakai Afarishi n kadanshi ka na vi yaꞋin va?”

13Ɗa wu ushuki, “Maɗanga ma na baci de dem Esheku a̱ va̱ a̱ shikpa̱i ba, i ta̱ a̱ kumuɗa̱ maꞋa n aralu a̱ ni ra̱ka̱. 14YaꞋin daꞋin n Afarishi a! I ta̱ an a̱yimba̱ a na i o kurono o otoku e le a̱yimba̱ alangu, dem vi le i ta̱ a̱ kuyikpa̱ a̱ ka̱wa̱wa̱.”

15Ɗa Biturusu we ecei, “Yi ɗa̱i tamkpamu vi ciya̱i a na vi yaꞋin kadanshi ki ili i na i tsu zuwa vuza u yaꞋan n unata?”

16Yesu u danai, “Ali n gogo na ka̱ta̱ vi yeve ba? 17Mayun vi yeve ta̱ ilikulyaꞋa ra̱ka̱ i na i uwai a̱ una̱, i tsu laza ta̱ a̱ ka̱tsuma̱, ka̱ta̱ i yeve yu uta̱ a ikyamba i vuma. 18Amma kadanshi ka kavama ka na ka̱ tsu uta̱ a̱ una̱ u vuma ka̱ tsu uta̱ ta̱ a̱ ka̱ɗu. Ili i nam pa ya i ɗaɗa i tsu zuwa vuma wo okpo n unata. 19Punu a̱ ka̱ɗu ɗaɗa kusheshe ku kavama ku nam pa ku tsu uta̱ ku na ku tsu zuwa vuma u yaꞋan munaka, koɓolo n tsugbani, n uboki kpamu. Ta punu kpamu aꞋuwa koɓolo n kushika ku uma ku tsu uta̱. 20Ili i nam pa ya i ɗa i tsu zuwa vuma wo okpo n unata. Amma vuza yoku u lyaꞋa baci ilikulyaꞋa babu na u saꞋi ekiye, na lo u zuwa yi wo okpo n unata ba.”

Yesu u ɓa̱nka̱i vuka vu Za̱ka̱yimbi

(Mar. 7:24-30)

21Yesu u ka̱sa̱kpa̱ ubuta̱ u nan lo, ɗa u banai a ukambu u Taya n Sida. 22Ana u yawai, vuka vu KanaꞋana vi yoku vu na vi ɗe ida̱shi u ta̱wa̱i wa̱ ni, n yoroli, “Vuzagbayin, Maku ma Dawuda, pana asuvayali a̱ va̱! Wunla̱i u gbani-gbani wi ta̱ ɗe a kutakacika mekere ma̱ va̱ n a̱bunda̱i.”

23Amma Yesu u keɓece yi ili ba. Mukumitoni n ni n ta̱wa̱i wa̱ ni ɗa o folonoi ni, “Loko vuka va vu laza. Wi ta̱ o kutono tsu n yoroli.”

24Yesu u danai, “Mpa a̱ suku mu ta̱ wa aza a Israila koci! I ta̱ an ushiga wu nlala n na m puwa̱nka̱i.”

25Ɗa vuka va vu ta̱wa̱i u Yesu ɗa u kuɗa̱ngi wa̱ ni, ɗa u danai, “Vuzagbayin, ɓa̱nka̱ mu!”

26Ɗa Yesu wu ushuki, “U gaꞋan a ɗika ilikulyaꞋa i muku e neke nsheꞋe ba.”

27Ɗa u danai, “E, Vuzagbayin, amma ko nsheꞋe n ci lyaꞋa ta̱ awazali a na a̱ yikpa̱i.”

28Ɗa Yesu wu ushuki, “Avu vuka, vi neke ta̱ ka̱ɗu ka̱u! Mi ta̱ a kuyaꞋanka wu ili i na vu folonoi.” A ayin a nan lo a ta na derere ɗa mekere ma̱ ni mo potsoi.

Yesu u potsokpoi uma n a̱bunda̱i

(Mar. 7:31-37)

29Ɗa Yesu u ka̱sa̱kpa̱i ubuta̱ wa, ɗa u banai a̱ ka̱kina̱ ka Mala ma̱ Ga̱lili. U kumbai gaɗi vu kusan ɗa u da̱sa̱ngi ɗe. 30Ka̱bunda̱i ka uma ka banai ɗe nu nkutsuma̱, n a̱yimba̱, n ebebe, koɓolo n aza a na i n iɓa̱lishi kakau dem. Ɗa a zuwai le kelime ke Yesu ɗa u potsokpoi le ra̱ka̱. 31Yaba dem u yaꞋin mereve n ili i na we enei ɗa u panai. Ebebe gogo na i ta̱ a kuyaꞋan kadanshi, nkutsuma̱ feu n walai, ɗa kpamu a̱yimba̱ e enei. Dem vi le a̱ gita̱i kucikpa Ka̱shile ka aza a Israila.

Yesu u nekei uma a̱kpa̱n a̱ na̱shi ilikulyaꞋa

(Mar. 8:1-10)

32Yesu u ɗekei mukumitoni n ni a̱ ubuta̱ u te, ɗa u dana le, “M pana ta̱ asuvayali a uma a nam pa. I ta̱ na koɓolo nu mpa ali ayin a tatsu, a buwa ta na n ili i na a kulyaꞋa ba. N ciga n loko le a laza n kambulu ba. Ta lo a̱ lima̱ a uye kafu a yawa a kpaꞋa.”

33Ɗa a̱ ushuki, “Ubuta̱ u nam pa kakamba kaꞋa. Te ɗai ci a̱ kuciya̱ tsuwaꞋa tsu na tsa kuyawa ka̱bunda̱i ka uma ka nam pa?”

34Yesu we ecei, “Burodi vi yain vu ɗai yi n vu ɗa?”

Ɗa a̱ ushuki, “Vi cindere n adan a wawaꞋa kenu.”

35Yesu u danai uma a a̱ da̱sa̱ngu a iɗika. 36U ɗikai burodi vi cindere n adan a, ɗa u cikpai Ka̱shile. Ɗa u wansasai u nekei mukumitoni n ni, ɗa ele tamkpamu e nekei uma a. 37Ɗa ra̱ka̱ vi le a lyaꞋi ɗa a̱ cuwa̱i. Ɗa mukumitoni n ni n shatangi mbana m gbagbaꞋin n cindere n alyashi a na a buwai. 38Ali a na a lyaꞋi ilikulyaꞋa ya i ta̱ uma a̱kpa̱n a̱ na̱shi (4,000), babu biꞋi a̱ma̱ci m muku. 39Ana e pecemgbenei n ka̱bunda̱i ka uma ka, ɗa Yesu u uwai a kpantsu ɗa u pasai mala ma. U yawai ɗevu n likuci i Magada.

Trenutno izabrano:

Matiyu 15: asgNT

Istaknuto

Podijeli

Kopiraj