Matiu 6
6
La gauru la visuli soio tegiteu ale pou la savelela
1“Amuto ge baumuli amutou, amuto umala ge igo la vulovulo mutou ale taritigi soio te la mata giteu la valalua me hatavivile veia egite ge hiloa, veia egite ge vei tataho amutou veia amutou la tahalo me la tavile la lotu sesele. Mai amuto ge igoa mai ele, amuto kama ge sau tola la mapa la vulovulo mutou ale taritigi ele oata te La Tahalo Uru.
2“Mai amuto ge suli egiteu ale pou la savelela la vaabila tamutou, amuto umala ge veipalea mai la tahalo ale pusu la vaivai, veia la rere mutou ge tali. Mai egiteu la valalua la visigologolola, egite igoa oilo te la luma la lotu, oio tai te la mata vasosole la gauru, veia la valalua me hatavivile ge vaisale egiteu. Ale eau vei seselea mutou, la mapa giteu eiala moli ele, mai la vei tatahola, egite sau tola kaluvutia. Oata te La Tahalo Uru egiteu la mapa ge ouka. 3Eala moli mai amuto ge suli egiteu ale pou la savelela, umala virere taitali la isamu ovola veia ge veipala la vulomu ale eme igoa giteu, taritigi eme ge igo kokovu molia. 4Eala eia matagaga mai ele veia eau masagea veia la visuli tamutou eia ge tabuli kokovu tataho mai ele, isa kama ge rovia. Mai ge mai ele, La Tahalo Uru eia rovia la igogolu tomi ale amuto igo kokovua, eia ge kolia soio tamutou mai la vulo mutou ale taritigi ele.
La gauru la kilaka
(Luk 11:2-4)
5“Mai amuto masagea veia amuto ge kaka, amuto umala ge igoa mai egite la valalua la visigologolola, egite magiri oilo te la luma la lotu, oio tai te la mata vasosole la gauru, veia la valalua me hatavivile ge hilo egiteu, eala moli eau vei seselea mutou, la mapa giteu eiala moli ele, mai la vei tatahola, egite sau tola kaluvutia, la mapa giteu isa lou ge ouka, 6Eala moli mai amuto masagea veia amuto ge kaka, amuto ge goilo te la luma tamutou isasasa, amuto ge goilo te la kapiutu ale soililo kililili, amuto ge kapi robo la mata, amuto ge pou kokovu mai ele ge kaka tavu e Tama mutou, ale etato kama hililoa. Me e Tama mutou eia hilohilo la igogolu tomi ale etato igo kokovua, eia ge hilome, eia ge vibalavame. 7Mai amuto ge kaka, amuto umala ge vikara bulalahu mai egite la valalua ale egite kama rovi la lotu, la vuhula egite gabutalea veia la kilaka tegiteu ale malau pepeho, La Tahalo Uru ge lolo egiteu. 8Amuto umala mulimuli la vulovulo giteu ele, la vuhula e Tama mutou eia rovitia la golugolu tomi me la visuli tomi ale amuto savelea. Amuto souka kaka, eala moli eia rovitia veia ge suli amutou oio vola.
9“Mai amuto ge pou te la kilaka, amuto ge kaka maie:
Tama miteu, eme pou oata te la ilo la lage,
taritigi amite ge togo la isamu,
10taritigi veia la valalua me hatavivile tomi
ge roromuli la masasagala taume,
mai tai egiteu la angelo oata te la ilo la lage
egite roromuli tatahome.
11Taritigi eme ge abia miteu la ilali
ale koramuli amiteu te la haro ale igoie.
12Eme ge vimavulaha amiteu te la iruru tamiteu
mai sesele amiteu vimavulaha egiteu
ale igoti la iruru soio tamiteu.
13Eme umala ge sugu taro amiteu
soio te la gima tamiteu,
eia soukama ge tovo lalai la tautaulailo tamite.
Eala moli eme ge vimahuli amiteu
taro la limale Satan.
(La Viputumulila taume, la vagagarila taume,
la matagagala taume, eme sekela moli sau tolea,
la tapasila ge ouka. Amen.)
14“Mai sesele amuto ge vimavulaha taro la iruru tegiteu la valalua me hatavivile ale egite igotia soio tamutou, e Tama mutou oata te la ilo la lage eia ge vimavulaha taro tai la iruru tamutou ale amuto igotia. 15Eala moli mai amuto kama ge vimavulaha taro la iruru te la valalua me hatavivile, e Tama mutou tai kama ge vimavulaha taro tai la iruru tamutou.
La vulovulo la peremula
16“Mai amuto ge peremu veia ge vitikumu lou la kilaka me la lotu tamutou soio te La Tahalo Uru mai ele, amuto umala ge mata miale mai egiteu la tahalo la visigologolola. Egite mata miale veia la valalua me hatavivile ge hilo egiteu veia egite peremu, egite vei tataho egiteu ovola veia egite la tahalo la lotu sesele. Eala moli eau vei seselea mutou, la mapa giteu eiala moli ele, egite sau tolatia, mai la vei tatahola te la valalua me hatavivile, egite kati ge sau tola lou la mapa te la peremula tegiteu, oukati. 17Eala moli la vimari taku ovola, eia maie: Mai eme ge peremu veia eme ge vitikumu la kilaka taume, taritigi eme ge litu la lagumu, eme ge abiri la ivumu, sibili, 18eme ge mata kaseka mai ele veia egite ge hilome veia eme kama peremu, eala moli e Tama mutou oata, ale etato kama hililoa, eia ge hiloa, eia rovia. La Tahalo Uru ale hililo la igogolu tomi ale etato igo kokovua, eia moli ge kolia soio taume mai la vulomu ale taritigi ele.
La tilalau ale sesele
(Luk 12:33-34)
19“Amuto umala ge vagari veia ge tau vikapopo la golugolu ale taritigi te la mahulila tamutou ale igoie omai te la maututula veia ge suli la mahulila tamutou mai ele. La vuhula la iraragila tamutou ale maie ge kaleso, la sasabe me kososuke tai ge koroa, egite la tahalo la pakalila tai ge sile soilo la luma ge pakali taia, eme kati ge sau tolea. 20Eala moli eia taritigi pepeho veia amuto ge tau vikapopo la iraragila ale koramuli la pulolou tamutou oata te la ilo la lage, la vuhula la tilalau te la kalulu mutou mai ele, eia sesele, eia kama ge kaleso, e kososuke me la sasabe tai kama ge koroa, la tahalo la pakalila tai kama ge sile la luma ge goilo ge pakalia, la vuhula eia la tilalau ale tabuli talime oata te la ilo la lage, eia kama ge kaluvu. 21Eala moli la gabutatalala taume eia ge tivura moli soio te la mautu ale la iraragila taume tabuli oio vola.
La mata gatou eia la matagaga te la vovo gatou
(Luk 11:34-36)
22“La mata gatou, eia la matagaga te la vovo gatou, mai la mata gatou eia matagaga tigi, eia maiti la vovo gatou tomi eia matagaga tataho, etato maroka tigi. 23Eala moli mai la mata gatou eia kama matagaga, eia mai ale igo maligoma la vovo gatou tomi, etato kama koramulia ge maroka. Me mai tai ele, mai la mari taume oilo te la gabutatalala taume eia kama la mari ale sesele, mai la matagaga te la kalulu, ale la matamu mai ale masosori moli, eme pou te la maligoma. Tio me la maligoma taume ele eia ge uru pepeho!
Etato kama koramulia ge gabu vauru La Uru veia ge gabu vauru tai la ilabi la uati
(Luk 12:22-31; 16:13)
24“Eia kama koramulia veia la tahalo isasa eia ge la bilalaha te la mulugaluga ilua. La vuhula eia ge roromuli isasa, me isasa eia ge muku pilea. Me eia ge suli tataho la igogolu te isasa, me isasa eia ge igo silaha taroa. Mai tai ele, amuto kama koramulia veia amuto ge la bilalaha te La Tahalo Uru, eala moli la gabutatalala tamutou ge uru te la ilabi la uati.
Etato ge piligi taro la vulovulo la hate ragala me la gabutala papaila
25“Eala, la vimari taku soio tamutou eia maie: Umala amuto ge gabutala papai te la pulolou tamutou te la mahulila ale amuto sau tolea omai te la maututula, veia amuto ge vei mago ‘Etato ge abi la ilali ove? Etato ge liu la rova?’ Eala moli amuto umala gabutatala papapai te la mahulila te la vovo mutou veia amuto la kairobola ouka. La mahulila moli ale amuto sau tolatia eia taritigi, la gabutala papaila tamutou te la paa muli la ilali, eia ge vailo buruko lou amutou, amuto kamati ge pou la sagegela te la mahulila ale taritigi La Tahalo Uru abitia mutou. La kulikuli tai ale etato kisia te la kabili gatou, eia mai la golu bulalahu moli. La vovo gatou moli ale etato vagari veia ge tovo roboa, eia la paga ale sesele, eia taritigi, eala moli la kulikuli ale ge kisia me la kairobola tai, eia la golu bulalahu. 26Mai amuto ge hilo egiteu la malumalu, egite kama galugalu la ilali, egite kama ababi la ilali veia ge tau raragia veia egite ge alia te la imamala la vitolo. Eala moli e Tama mutou oata eia ababia giteu la ilali, me amuto gabutala mave, La Tahalo Uru eia kama ge gabu vauru amutou kara polo la vibaumulila tetala soio tegiteu la malumalu, ia? 27Ere tamutou eia koramulia veia ge gabutatala la mahulila tetala veia eia ge solo loua veia eia ge mahuli malau lou bakisi? Ouka gologolo. Etato mahuli moli oio te la masasagala te Tama gatou.
28“Me ilava amuto gabutala vagarito la kairobola tamutou ale amuto ge kaia veia amuto ge abi la kairobola ale taritigi oiove veia ge tokoromo la vovo mutou ovola e? Mai amuto ge gabutala la sese la obobu ale oio te la tia la hohoi, egite kama igo isa la igogolu, egite kusi bulalahu moli, 29eala moli eau veia mutou, la tokoromola tegiteu eia marasa pepeho kara polo la marasa la tokoromola te la uru e Solomon alaurati. 30Eia sesele, igoie la obu eia sese, mai galigeli la sesela ge talulu, egite ge pigia sotalo te la havi. Me amuto gabutala mave, amuto soioge veia La Tahalo Uru eia kama ge abia mutou la tokoromola me la kairobola ale koramuli la mahulila tamutou, veia la vibaumulila tetala soio tamutou eia kama ge kara polo la vibaumulila tetala soio te la sese la obobu, ia? La vuhula amuto kama la golu bulalahu mai egiteu la sese la obobu ale sese moli bakisi goio talulu lou. Amuto kama tahola la tautaulailo ale uru te la gabutatalala tamutou, ouka gologolo, la tautaulailo tamutou eia bisi agi! 31Eala eau kama masagea veia amuto ge gabutala papai mago ‘Etato ge abi la ilali ove? Etato ge liu la rova? Etato ge abi tai la kairobola oiove?’. 32Eia kama koramulia veia amuto ge gabutala papai mai ele, la vuhula egiteu la valalua la maligoma moli egite gabu tikumu la ilali, la lalu me la tokoromola tegiteu maie. Eala moli e Tama mutou oata, eia rovitia la savelela tamutou, me la golu ale mave amuto gege ovola. 33Eala moli la golu isa moli sekela eia tikumu kara polo egiteu la golugolu tomi aleie, veia amuto ge paa muli vagari seselea veia amuto ge taholea, eia maie: Taritigi amuto ge rovi pala muga la pulolou la matagagala te La Tahalo Uru, me la vulovulola tai ale matata, tiele eia ge abia mutou la ilali, la lalu, la kulikuli tai, ale koramuli la pulolou tamutou. 34Eala amuto umala ge gabutala papai la haro ale galigeli veia amuto ge mahuli mave ovola, la vuhula amuto soukama ge bole la iloburukola ale uru pepeho, la vuhula la gabutala papaila te la haro isasa eia koramuliti la haro moli aleie, ale galigeli ge la gabutala papaila ale isapolo lou ge sibitala koramuli la haro ale galigeli. Eala amuto ge pou moli la sagegela te la haroharo tomi, umala ge gabutala papai.
Trenutno izabrano:
Matiu 6: nakNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1983, Wycliffe Bible Translators, Inc. All rights reserved.
