Luk 21
21
La vaabila te la tavile la baharu soio te La Tahalo Uru
(Mark 12:41-44)
1Goio, e Iesus ga mata soio, eia hilo egiteu la tahalo la vuliti, egite pipigi la vaabila tegiteu soilo te la tilalau la uati ale tabuli te la mata la luma la lotu. 2Eala moli eia goio hilo vuti la tavile la baharu isa uru, e maura morivava sesele, eia pigi la uati ilua moli. 3Tio e Iesus hiloa mai ele, eia goio veia maie mago “Eau vei seselea mutou, la tavile la morivava aleie, la vaabila tetala eia muga tegiteu la vaabila tomi ale egite pigitia, 4la vuhula egiteu la tahalo la vuliti, egite pigi moli la piligi la uati ale tegiteu, eala moli e maura la baharu ele, eia pigi tomiti la uati ilua tetala ale ge koramuli eia te la iloto la ilali tetala.”
La vikararala te Iesus te la luma la lotu veia egiteu la gima ge lobea
(Matiu 24:1-2; Mark 13:1-2)
5Egiteu la valalua la vimari te Iesus isahari, egite hilo la luma la lotu, eia marasa pepeho, egite karutu sesele. Egite veia la uati ale ururu egite tigitila, egite taritigi pepeho, me egiteu la vaabila tai ale la valalua vaababi La Uru oio vola, egite taritigi sesele. Eala moli e Iesus goio veia giteu mago 6“La luma ale uru amuto hilotia igoie, ge mulimuli egiteu la valalua la gima ge gomai ge loke momomo taroa, me la uatati ale ururu ovola, egite kati ge vitabuli tatalu lou, egite ge tabuli marapa tomi.”
La iloburukola me la iligiligi ge sibitala
(Matiu 24:3-14; Mark 13:3-13)
7Tio, egiteu la valalua la vimari te Iesus, egite goio tahia mago “Tahalo La Vimari, gaisa sesele la merera taume tomi ele ge puru? Me la irovilala ale mave sesele ge sibitala pala muga, eia ge veipalea veia la imamala ale, eia hagagaviti?”
8Goio, e Iesus kolia giteu maie mago “Amuto ge mata rara tigi, egiteu isahari ale kama kokora soukama gomai ge tutugolo amutou, amuto ge tilo te la merera tegiteu ele. La valalua usu ge guvi seseke tavu amutou, egite ge veia mutou mago ‘Eau e Kraist’, uka egite ge veia maie mago ‘La imamala koramuliti ale la tapasi la haro ge sibitala, e Kraist ge guvi rivu lou loata.’ Eala moli amutou umala ge mulimuli egiteu ele. 9Umala amuto ge taga, mai amuto ge lolo la rere la vaubila me la vikokuela eia sibitalati. La marapala tomi mai ele ge sibitala pala muga, mulimuli ovola la tapasi la haro ge sibitala.”
10Tio, e Iesus vei kaluvutia giteu la merera tetala mai ele, eia goio solo lou la vikararala tetala soio tegiteu, mago “La gale isa, eia ge hiliti tavu la gale isapolo, egiteu la galegale tomi ge vaubi rivu lou legiteu mai ele. 11E malugulugu usu ge umu, la vitololola uru tai ge sibitala, ge pigi robo la maututula tomi. 12Eala moli pala muga tegiteu la irovilala tomi ele, egiteu la valalua la gima ge hiliti, egite ge lao tola pala muga amutou, egite ge viligi sesele amutou, egite ge vimagiri amutou te la vigagiala te la lumaluma la lotu tomi te la maututula, egite ge lapu amutou soio te la luma la kilisi. Egite ge loloa veia amuto valolo te la isagu, egite ge lapu amutou soio te la vigagiala tegiteu la mulugaluga. 13Ale taritigi moli, la vuhula amuto ge valolo egiteu te la valolo ale taritigi te la isagu. 14Eala moli umala amuto ge gabutatala papapai te la merera ale amuto ge tao robo le amutou ovola. 15Eau ge abia mutou la merera ale taritigi me la mari ale sesele, egiteu la gima tamutou kama koramulia ge tahi taroa. 16Egiteu e tatama mutou, e tatila mutou, egiteu tai e tabarabara mutou, egite tomi ele ge veipala amutou soio tegiteu la gima, egiteu e valalua mutou tomi, egiteu e vikilipilipi mutou tai, egite tomi ele ge igo moli amutou tomi mai ele. Egite ge bili taro tai isahari tamutou ele. 17La valalua tomi ge gima amutou te la isagu, 18eala moli isa tamutou kama ge vilua, 19la vuhula mai amuto ge magiri vagari, eia koramulia mai ele veia eau ge vimahuli la kalulu mutou.
E Iesus vei matagagea giteu la sululula te Ierusalem
(Matiu 24:15-21; Mark 13:14-19)
20“Mai mulimuli amuto ge hilo e Ierusalem, egiteu la valalua la vaubi ge gali roboa, amuto ge matagaga tigi tataho mai ele veia eia kamati ge tabaa, la mautu e Ierusalem ge sululu. 21Te la imamala ale, eia taritigi pepeho veia egiteu la valalua me hatavivilele Iudea, egite ge hele soata la goegove. Taritigi egiteu ale pou oluma, egite ge hele. Egiteu tai ale pou orivo, taritigi veia egite ge hele moli, egite umalati ge golumaluma. 22La vuhula la imamala ale, eia la imamala la kiloli la iruru, ale La Uru ge vipuru sesele la merera tetala tomi ovola. 23E maura miteu e hatavivile ale so visususu e latatu giteu te la imamala alele, egiteu tai ale savulatu, egite ge hele mave? La tilali ge uru sesele te la gale e Iudea, me la igototolola te La Tahalo Uru ge pigi robo la valalua me hatavivile tomi tetala. 24Isahari tegiteu ge peho te la vaubila, isahari tegiteu lou, egite la gima ge lao tola egiteu, egite ge lapu egiteu soio te la mautu ale malau. Egiteu la valalua la maligoma ge soa kuru la mautu e Ierusalem, kara ale la imamala tegiteu ge kaluvu.
La guluvi te Latu La Tahalo
(Matiu 24:29-31; Mark 13:24-27)
25“La irovilala isahari ge sibitala tai oata te la haro, te la taio, me tegiteu la matatabu. La valalua me hatavivile tomi te la gale isahari, egite ge ilo buruko sesele, la mago ge gasi gegeru lahu, la sualo ge uru sesele. 26La valalua me hatavivile ge taga pepeho sesele, egite ge pou tali la rova sesele ale ge sibitala, eia ge pigi robo la maututula tomi. La vagagarila ale sau tola la mori oata, eia ge malugu tomi. 27Te la imamala moli ale, e Latu La Tahalo ge sibitala loata te la tuluvu la mori isa uru, vikapopo me la vitokoromola me la vagagarila ale uru pepeho. 28Mai egiteu la papaga tomi alele ge sibitala, amuto ge hiliti, ge taga soata la mori, la vuhula la imamala hagagavi moliti ale La Tahalo Uru ge vimahuli amutou ovola.”
La vikarara la tilovo te Iesus te la obu ale taro, eia tututuvu rivu lou
(Matiu 24:32-35; Mark 13:28-31)
29E Iesus veia giteu la vikarara la tilovo isa lou maie “Amuto ge gabutatala egiteu la obobu tomi ale vavua, mai la keme. 30Amuto ge hiloa veia mai egite taroti, me egite goio tututuvu rivu lou, tio amuto ge rovi matagagea mai ele veia eia mahatiti, la leavala kaluvuti. 31Tio ge mai tai ele, mai amuto ge hilo tomi la merera tomi taku eia ge puruti, tio amuto ge rovia veia la guluvi te la pulolou la matagagala te La Tahalo Uru eia hagagaviti. 32La merera tomi taku ge puru harari moli soio, amutou la tuvu la valalua ale igoie, amuto soukama ge peho, amuto ge hilo pala mugatia. 33La mori me la magasa ge kokovu, eala moli la merera taku ge tabuli moli mai ele, eia kama ge kokovu.”
E Kraist tutu tolea giteu la valalua la vimari tetala veia egite ge mata rara
34E Iesus goio solo lou la vikararala tetala soio tegiteu la valalua la vimari tetala, mago “Amuto ge mata rara tigi. La kalulu mutou soukama tilo te la vulovulo ale kama kokora mai la iliu pauala, la alipeila, me la gabutatala papaila te la vovo. Kama taritigi veia e Latu La Tahalo ge guvi, eia ge hilo vuti amutou oio tegiteu la vulovulo ale mai ele. 35Eau vei matagagea mutou mai ele, la vuhula la haro ale, eia ge sibitala karutu moli, eia ge vitilo la valalua me hatavivile te la maututula tomi mai la mai. 36Amuto ge mata rara te la haroharo tomi. Amuto ge pou tavu la kilaka veia La Tahalo Uru ge abia mutou la vagagarila veia amuto ge koramulia ge vulo taro tomi la viluala te la imamala ale kama kokorale, eia hagagaviti, veia amuto ge maroka moli te la lagule Latu La Tahalo te la haro alele.”
37Tio, e Iesus eia goio pou tabaa bakisi oio e Ierusalem mai ele. Te la haroharo tomi alele, eia vimarimari egiteu la valalua me hatavivile oio te la luma la lotu, me te la logologo tomi alele eia ge bebeua soio te la gove e Oliva, eia goio mamavuta ovola. 38Me te la kavikokoki tomi, la valalua me hatavivile, egite gua kavikoki tatavu loua soio te la luma la lotu veia egite ge lolo lou la vimari tetala oio volao.
Trenutno izabrano:
Luk 21: nakNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1983, Wycliffe Bible Translators, Inc. All rights reserved.
