LUKA 22
22
Jisua that hrang lam an ngaitua
(Mt 26.1-5; Mk 14.1-2; Joh 11.45-53)
1Khan, bai chol koploi Kût, Ferkân Kût an iti kha a hong nâi tâka.#Fes 12.1-27 2Ochai inlalhai le Dân irchutirtuhai khan vântâng mipui an chihai sikin inrûka that hrang lam an ngaituaa.
Juda’n Jisua incheltir a tum
Mt 26.14-16; Mk 14.10-11)
3Sômhleihnihai laia kop sa, Juda, Iskariota an itihtu sûnga Setan a lûta. 4Khanchu, a va fea, Ochai inlalhai le ulian hruaituhaiin an ichel hrang lam a van sîrpuihaia. 5Anni khan a sân an lei lôma, sum pêk hrang an inkung ta. 6Ama khom khan sa a tia, mipui om loi laia incheltirna zoro’nchum a zong tâka.
Ferkân kût bu sinsiam
(Mt 26.17-25; Mk 14.12-21; Joh 13.21-30)
7Bai chol kop loi Kût ni, Ferkân Kûta belrate an that nî chu a hong tunga. 8Khanchu, Petera le Johana kha a tîra, “Ferkân Kût khalâi bu ei inêk hrang va sinsiam roi,” a tia. 9Anni khan “Khôn mo va sinsiam inlân ni inuam?” an tia. 10Ama khan, “Irngai u ta, khopuia nin va lûtin pa inkhat bêla tui chôiin nangni irtongpui a ti; a lûtna ina zui lût roi. 11Khan, in neipupa kuang, ‘Irchutirtu’n ki irchutirhai leh Ferkân Kût khalâi kin nêkna hrang chontan kha kho hin mo a ti,’ ti roi. 12Ama khan chontan chuanchung irzat tak; itinrêng omsai, nangni inkhîk irhmu a ti. Kha khan sinsiam roi,” a tia. 13Khanchu an fea, an kuang a insîr lam ang tak khan an va hmua, Ferkân Kût khalâi bu kha an sinsiam tâka.
Rengpa zânbu
(Mt 26.26-30; Mk 14.22-26; 1 Kor 11.23-25)
14Khan, a fâk zoro’n chu ama le a irchutirhai khan khalâi kha an ot tâka. 15An kuang, “Ki tuang mân hi Ferkân Kût khalâi bu hi nangni otpui ki nuam tak tak a ni. 16Nangni ki hril, Pathian Rama a tak tak a tung mâka chu hi khalâi bunêk hi fa ta no ning,” a tia. 17Khanchu, khilât a lâka, Pathian kuang lômthu an sîr zoiin, an kuang, “Hi hi la unglân, irsem roi. 18Nangni ki hril, atûn ata Pathian Ram a zuang tung mâka chu, hi uain tui hi in nôk ta no ning,” a tia. 19Khan, bai a lâka, Pathian kuang lômthu an sîr zoiin a khoia, an kuang a pêkhaia, “Hi hi ki taksa a ni, nin ta hranga pêk a ni; nin ni inhriat maina hrangin hi ang hin tho ngai roi,” a tia. 20Zân bu nêk zoia chu khaang dênin khilât a lâka, “Hi khilât hi ki thisena thuthung thar, nin ta hranga suak chu a ni.#Jer 31.31-34 21Khannisianlân, irngai u ta, a nin cheltir hrangtu chu hi maichâma hin a ot chian a ni.#Ipn 41.9 22Mihriam Nâipa hi Pathian inkung angin a ife hrang a ni, aniachu, an cheltirtu hrang mihriam chung chu a rik e,” a tia. 23Anni khan an laia khaanga tho hrang kha tu tak mo a ini hrang tâk, tiin an indon irhlôma.
Tu mo roiinpui tak hrang
24Khan irchutirhai laia tu mo roiinpui tak ni ni, ti thu irsêlna a hong suaka.#Mt 18.1; Mk 9.34; Lk 9.46 25Ama khan an kuang, “Jentailhai rênghai chu inlal an irti tak taka, an chunga irchamneituhai lakin, ‘Hruaitu sa,’ ti irhming an irphuaa.#Mt 20.25-27; Mk 10.42-44 26Khannisianlân, nangni laia chu khaang khan ni mah. Nin laia roiinpui tak chu a chîn tak angin om sianlân, hruaitu tak kha sinthopu angin om ual ri se.#Mt 23.11; Mk 9.35 27Tu mo roiinpui ual, khalâi ottu mo a sinthotu mo? khalâi ottu kha mo ni no ni? Khannisianlân, keima’n chu sinthotu angin ki iom kêng.#Joh 13.12-15
28“Intakna ki tong sûngin nangni’n nin ni ompuia. 29Ka pa’n ram a ni inkung pe ang dênin kei khomin ram nangni kin kung pe; 30khanchu, ki rama chu ki maichâma fâkin, in nin ta, rêngtoihmuna toiin Israel nam sômhleihnihai chunga roirêl pe nin ti.#Mt 19.28
Petera’n phil hrang thu Jisua’n a lei insîr
(Mt 26.31-35; Mk 14.27-31; Joh 13.36-38)
31“Simon, Simon, irngai ta! Setana’n butak le bu irsi sensâi hrang, bu’n sêp anga nangni fiaa, a sa le a sia nangni theithâk hrangin, Setana’n phalna a hmu tâk. 32Khannisianlân, ni iamna a boi nona hrangin nang ki chongchai pe. Khan, ni hong irhei nôk tika chu ni urênghai indet ro,” a tia. 33Ama khan, “Rengpa, ni kuang chu intângna ina lût hrang le thi hrang khomin fe sa mai ki’rphal,” a tia. 34Ama khan, “Peter, nang ki hril, ‘Ama kha inhre ma ung’ tia voithum ni ni phil mâka chu a vuan zân âr khuang no ni,” a tia.
Sum choli, hmarsahai, le khandaihai chôi thu
35Jisua’n an kuang, “Sum choli, hmarsatehai, kekokhai chôi loia nangni ki tîra khan, thil irsam nin nei moh?” a tia. Anni khan, “Nei viat ma ung,” an tia.#Mt 10.9-10; Mk 6.8-9; Lk 9.3; 10.4 36Ama khan, “Atûn chu sum choli neipu’n chu chôi sianlân, hmarsate khom chôi ri se; khandai nei loi chu a puan zuar sianlân, irchôk ri se. 37Nangni ki hril, ‘Ama chu mi sual laia an tep sa ta,’ ti Pathian Lekha thu chu ki chunga tung ngêt hrang a ni. Ki chungthu an irziak kha tung irkip hrang a ni ta” a tia.#Isa 53.12 38Anni khan, “Rengpa, en ta, hin khandai inhni a om e,” an tia. Ama khan, “A ruk ta,” a tia.
Oliv tânga chongchai
(Mt 26.36-46; Mk 14.32-42)
39Khan, ama kha a suaka, a tik danga angin Oliv tânga khan a fea, a irchutirhai khom khan an zui saa. 40A hmun a va tungin chu an kuang, “Thêmnaa nin lût nona hrangin chongchai roi,” a tia. 41Lung dêng phâk ten vêla, a bingin a va fea, khûksadelin a chongchaia. 42“Ka pa, sa ni ti’n chu, hi khilât hi ni lapai pe roh, khannisianlân, keima ircham ni loiin nangma ircham ni ual ri se,” a tia. 43Irvân ata vântîrtôn inkhat inhartir hrangin a kuang a zuang inlâra. 44A zâm a’rzal tak taka, a’rthân kha thisen zung lian tak angin a zunga.
45A chongchai zoiin chu irchutirhai kuang a honga, an beidong inmusu kha a hong hmua, an kuang, “Ithoa mo nin inmusu? 46Thoi unglân, thêmnaa nin lût nona hrangin chongchai roi,” a tia.
Jisua chel thu
(Mt 26.47-56; Mk 14.43-50; Joh 18.3-11)
47Khan, a la chong lai takin mipui an hong tunga, sômhleihnihai laia kop Juda an iti khan mah a hong hruaia, tum hrangin Jisua a hong pana. 48Khannisianlân, Jisua’n a kuang, “Juda, Mihriam Nâipa hi i tumin mo, ni incheltir hrang?” a tia. 49A kôla mihai khan thil hong tung hrang kha an hmu’n, “Rengpa, khandai irlek kin ti duah?” an tia. 50An laia inkhatin chu Ochai inlal tak siahlo mikuar chang tianga a sât thâkpai pea. 51Jisua’n a sâma, “A ruk ta,” a tia. A mikuar kha a tôn pea, an damtir ta.
52Ochai inlalhai, Tempil hruaituhai le upa honghai kuang khan, Jisua’n, “Khandai le hêmvuak chôiin hrâtlâksong chel hrang ang dênin nin hong ipût mo? 53A nitin, Tempila nin laia ki om ngai lai khan ni chel mak chêia; khannisianlân, inthim irchamneina’n roi a rêl lai hin nin sintho zoro a ni,” a tia. #Lk 19.47; 21.37
Petera’n Jisua a phil
(Mt 26.57-58,69-75; Mk 14.53-54,66-72; Joh 8.12-18,25-27)
54Jisua an chel tâka, Ochai inlaltak ina an hruai lût ta; Petera khan hla vit ata a zuia. 55Khan kholaia mei an thoa, an toi irbuka, Petera khom kha an laia khan a toi saa. 56Mei vâra a toi laiin siahlo dôngmate inkhatin a hong hmua, a en vong vonga, “Hi pa khom hi a kuanga om sa a ni hi te,” a tia. 57Ama’n, “Nupang, ama chu inhre ma ung,” a tia, a phila. 58Kha hnungin mi dangin a hong hmu nôka, “Nang khom hi, an laia mi ni ni hi te,” a tia. Petera’n, “Mihriam, kei chu ni viat ma ung,” a tia. 59Dârkâr khat vêl hnunga chu mi dangin, “Hi pa khom hi a kuanga kop sa kha a ni ngêt hi te, Galili mi a ni hi,” a ti ngita. 60Petera khan, “Mihriam, ni thu’nsîr kha inhre viat ma ung,” a tia. A chong mai lai takin âr a khuang zôia. 61Rengpa chu a hong irheia, Petera kha a ena. Petera khan, ‘A vuan zân âr a khuang mân nangin voi thum ni phil ni ti,’ Rengpa’n a kuanga a lei iti kha an hriat suaka. 62Pên tiang a suaka, a chap irhniak bop bop tâka.
Jisua nuiza siamna’n an hmang, an inbên
(Mt 26.67-68; Mk 14.65)
63Jisua cheltuhai khan nuiza siamna’n an hmanga, an inbêna, 64A mit an tuama, “Tu mo nang an bên, ti ro?” an tia. 65Chong saloi tak takin an ngoa.
Sanhedrin makunga Jisua a ngîr
(Mt 26.59-66; Mk 14.55-64; Joh 18.19-24)
66Khan, khua a vârin chu vântâng upahai, Ochai inlalhai le Dân irchutirpuhai kha an irbuka; an Sanhedrin-ah khan Jisua kha an hong hruaia. 67A kuang, “Krista ni ni lele’n chu nin hril roh,” an tia. Ama khan, “Nangni hril khom inlân, iam ual no chin nia, 68Chong nangni irdon khom inlân ni sâm ual no chin ni. 69Khannisianlân, atûn ata chu Mihriam Nâipa hi Pathian sinthotheina chang tiang toi ta a ti,” a tia. 70Khan an rêngin, “Nang hi Pathian Nâipa ni ini mo?” an tia. Ama’n, “Ni nih, nin ni ti khate,” a tia. 71Anni’n, “Inhriatpuitu dang tu mo ei la innang hrang? Eini ngeiin a chongbâi suak ata ei inhriat tâk hi te,” an tia.
Trenutno izabrano:
LUKA 22: HRACLBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
