LUKA 17
17
Sual
(Mt 18.6-7,21-22; Mk 9.42)
1Khan, Jisua’n a irchutirhai kuang, “Tûknahai hi om no thei ni mah, khannisianlân, an omtirtu chung chu a rik e, 2Hi mi chîntehai laia inkhat khom hi an tûktir nêkin chu bu nôina lung lianpa a ringa inhlitira, tuikhangliana inthâk ni sian a ta hrangin sa ual a ti.
3“Irdîn roi, ni urêngin ni chunga thil a tho’nsualin chu hril roh, a’rletin chu ngaidam roh.#Mt 18.15 4Sûn khata ni chunga voisari thil a tho’nsualin voisari ‘Ki’rlet e,’ tia nangma tiang a hong irheiin chu ni ingaidam hrang a ni,” a tia.
Iamna
5Tirtônhaiiin Rengpa kuang khan, “Kin iamna nin det pe roh,” an tia, 6Rengpa khan, “Ancham ru malkhat dôr iamna nei unglân chu, hi thingtheimu kung kuanga hin ‘Irphôiin lân, tuikhangliana irson roh,’ ti nin ta, nin thu zôm a ti,” tiin a sâma.
Siahlo sintum
7Nangni laia tukhomin mâni siahlo nei sian, irnêng tuka fe mo, kêlbelra ena fe mo a hong kîr le, “Hongin lân, bu hong ot zôi roh,” tu mo lei ti hrang? 8Khasikin, ki bu nêk hrang siam ro, irsiamin lân, ki nêk zoi mâka chu ni don ro; kha zoi tika nêk ni ti, a iti loi hrang mo ni ma? 9Nin thu anga a tho sikin nin siahlo chu lômthu nin hril ngai mo? 10Khaang dênin nangni khom thupêk murdi nin tho zoi zit hnung khomin, “Siahlo takirtâi loi ei ni, ei itho tum kêng ei itho a ni, ti roi,” a tia.
Phâr sômkhat a indam thu
11Khan, Jisua Jerusalem a pan pumin Samari le Galili ramria a fea. 12Khua inkhata a lûtin chu, phâr sômkhat an honga; hla vita an ngîra; 13an khêka, “Jisua, Hruaitupa, lung nin kham ro,” an tia. 14Anni kha a hong hmuhaiin chu, “Fe ta unglân ochaihai van entir roi,” a tia. Khaanga an fe lai khan an hong irthiang tâka.#Lev 14.1-32 15An laia inkhat khan a dam tâk ti ar hriat zoi le chu, irhai inring taka Pathian inpâk pumin a hong kîr nôk tâka. 16Jisua ke bula khan a van boka, lômthu an sîr tâka. Kha mi kha Samari mi a ni. 17Jisua khan a lei chongpuia, “Mi sômkhat kha nin irthiang infâi zit mo ni ma? Kuakhai kha khôn mo an om tâk? 18Ithoa mo, hi ram dang mi vai hin, Pathian inpâk hrangin a hong ikîr nôk?” a tia. 19Khanchu, a kuang, “Thoiin lân, fe roh, ni iamna hi ni dampuina a ni,” a tia.
Pathian Ram zuang tung
(Mt 24.23-28,37-41)
20Farisaihaiin Pathian Ram zuang tung hrang zoro an irdonin chu, Jisua’n an kuang, “Pathian Ram zuang tung chu mita hmu zât ni mah. 21Tûte’n, ‘En ro, hi hin kêng a om,’ ‘So son kêng a om,’ ti no nihai. Irngai u ta, Pathian Ram chu nin laia hin a iom chian a ni,” a tia.
22A irchutirhai kuang khan, “Mihriam Nâipa hring lai sûnhai hi sûn khatte lua nin ihmu nuam nî la hong om a ti, khannisianlân, hmu no chin ni. 23Nin kuang, ‘En u ta, so so mani, hi hi mani,’ la ti an ti; en hrangin fe suak no unglân, zuihai sa no roi. 24Irvâna kôlirtêkin kôlkung ata kôlkung dênin a ivâr ngai ang kha a ni, Mihriam Nâipa zuang Ni chu la nih a ti. 25Khannisian, atûnlai mihai hin la hnôl an ta, thil tamtak a ituang masa hrang a ni.
26“Nova zoro laia thil om dân ang khan Mihriam Nâipa zuang hrang nia khom a la iom hrang a ni.#Irp 6.5-8 27Nova irkuanga a lût ni dên khan mihai khan an fâkin an ina, dôngma pasal an irneia; tui a hong liana, an rênga a hong ithat irhmanghai tâk kha.#Irp 7.6-24
28Khaang dênin Lota dam laiin thil a iom kha; an fâkin an ina, an irchôka, an zuara, thil an phuna, in an sina;#Irp 18.20-33; 19.25 29Khannisianlân, Sodom khua ata Lota a suak ni khan irvân ata mei le kât a thoa, an rêngin a thathai zita. 30Mihriam Nâipa a zuang tika chu khaang dên khan a ini hrang a ni. 31Kha tika chu in chunga mi an omin chu in sûnga a neinun la hrangin chum no ri se.#Mt 24.17-18; Mk 13.15-16 32Loia om chu kîr ta no ri se. Lota dôngma inhre mai roi.#Irp 19.26 33Tukhom mâni hringna inzôk nuam ka kaiin chu inchân a ta, tukhom mâni hringna inchân ka kaiin chu inzôk a ti.#Mt 10.39; 16.25; Lk 9.24; Joh 12.25
34“Nangni ki hril, kha ni zâna khan mi inhni zâlhmun khata zâl an ta, inkhat chu ihruai ni a ta, inkhat chu mâksan ni a ti. 35Nupang inhni’n bu suk an ta, inkhat chu ihruai ni a ta, inkhat chu mâksan ni a ti. 36Mi inhni loia fe khom inkhat ihruai ni a ta, inkhat mâksan ni a ti,” a tia.
37Irchutirhai khan, “Rengpa, khôn mo?” an tia. Jisua’n, “Sa ruak omna kipa raikosohai khom omkhôm an ti,” a tia.
Trenutno izabrano:
LUKA 17: HRACLBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
