Psalmet 34:1-22
Psalmet 34:1-22 Psalmet Gegërisht - Konstandin Kristoforidhi 1872 (PSGEKK1872)
Kam me bekuem Zotinë mbë qish do kohë, lavdurimi i ati ka me qenunë kurdo ndë gojët t’eme. Shpirti em do të mburretë mbë Zotinë, të butëtë kanë me ndëgjuem, edhe kanë me u gëzuem. Madhënoni Zotinë bashkë me mue, edhe le të naltoimë bashkë emënin’ e ati. Kërkova Zotinë, edhe më ndëgjoi, edhe më shpëtoi prei gjithë frikavet mia. Shtinë sytë mb’atë, edhe u ndritnë, edhe faqet’ e atyne s’u turpënuenë. Kyi i vobegu thërriti, edhe Zoti e ndëgjoi, edhe e shpëtoi prei gjithë shtrëgimevet ati. Engjulli i Zotit ve ushtërinë rreth atyneve qi e kanë frikë, edhe i ruen. Ngjinoni edhe shifni, se Zoti asht’ i mirë. Lum ai njeri qi shpëren mb’atë. Droni Zotinë, o shenjtënit’ e ati,se s’u mengon gja atyne qi druejën’ atë. Këlysht’ e leonëvet kanë nevojë edhe kanë uni, por ata qi kërkojënë Zotinë, s’u mengon as ndonji gja e mirë. Eni, o dielm, më ndëgjoni: kam me u mësuem frikën’ e Zotit. Qish asht’ ai njeri qi dëshëron jetë, edhe do ditt të gjata, për me pamë të mira? Ruei gjuhënë tande prej së keqesë, edhe buzët’ e tua prei të folunit gënjeshtrë. Hiqu prei së keqesë, edhe ban mirë, lyp paqtim, edhe ndiq atë. Syt’ e Zotit janë mbi të dreitët, edhe veshët’ e ati mbë të bërtitunit e atyne. Faqeja e Zotit ashtë kundrë atyne qi bajënë keq, për me bierrë të përmendunit’ e atyne prei dheut. Të dreitëtë thërritnë, edhe Zoti i ndëgjoi, edhe i shpëtoi prei gjithë shtrëngimevet atyne. Zoti ashtë ngjat atyne qi kanë zemërën’ e thyeme, edhe shpëton të përvumitë ndë shpirt. Shtrëngimet’ e të dreitit janë shumë, por Zoti ka me e shpëtuem prei gjithë këtyne. Ai ruen gjithë eshtënat’ e ati, as nji prei këtyne s’ka me u thyem. E keqeja ka me vramë fajtorinë, edhe ata qi kanë mëni të dreitinë, kanë me u bamë fajtorë. Zoti shpërblen shpirtin’ e shërbëtorëvet vet, edhe gjith’ ata qi shpërejënë mb’atë s’kanë me u shkretuem.
Psalmet 34:1-22 Bibla Shqip "Së bashku" 2020 (me DK) (AL1)
E bekoj ZOTIN në çdo kohë, lavdërimi i tij përherë në gojën time. Në ZOTIN mburret shpirti im, le të dëgjojnë skamnorët e le të gëzojnë. Madhërojeni ZOTIN bashkë me mua, le ta lartësojmë së bashku emrin e tij. E kërkova ZOTIN e ai m'u përgjigj, nga të gjitha tmerret më çliroi. E panë e u ndriçuan, fytyrat e tyre nuk u turpëruan. Ja, ky skamnor thirri dhe ZOTI e dëgjoi, nga të gjitha fatkeqësitë e çliroi. Engjëlli i ZOTIT bën roje rreth atyre që e druajnë dhe i shpëton. Shijoni e shihni se i mirë është ZOTI. Lum ai njeri që gjen strehë tek ai! Druajeni ZOTIN, o të shenjtët e tij, se atyre që e druajnë, nuk u mungon asgjë. Luanët mbeten të pangopur e të uritur, por atyre që kërkojnë ZOTIN, nuk do t'u mungojë asnjë e mirë. Ejani, o bij, e dëgjomëni, drojën e ZOTIT do t'ju mësoj. Kush është ai njeri që e dëshiron jetën, që dëshiron të shohë ditë të mira? Ruaje, pra, gjuhën prej së keqes e buzët prej fjalëve mashtruese. Largohu nga e keqja e bëj të mirën, kërko paqen e rend pas saj. Sytë e ZOTIT janë mbi të drejtët veshët e tij e dëgjojnë klithmën e tyre. Fytyra e ZOTIT u kundërvihet keqbërësve, për ta fshirë prej dheut kujtimin e tyre. ZOTI i dëgjon ata që i përgjërohen, prej të gjitha fatkeqësive i çliron. ZOTI është pranë zemërthyerve, të dërrmuarit në shpirt i shpëton. Të shumta janë mundimet e të drejtit, por ZOTI e çliron prej të gjithave. Ai i ruan tërë kockat e tyre, asnjë prej tyre nuk do të thyhet. E keqja do ta vrasë të paudhin, ata që urrejnë të drejtin do të ndëshkohen.
Psalmet 34:1-22 Bibla Shqip 1994 (ALBB)
Unë do ta bekoj Zotin në çdo kohë; lëvdimi i tij do të jetë gjithnjë në gojën time. Shpirti im do të krenohet me Zotin; njerëzit e përulur do ta dëgjojnë dhe do të gëzohen. Lartojeni Zotin bashkë me mua, dhe të lëvdojnë të gjithë emrin e tij. Unë e kërkova Zotin, dhe ai m'u përgjigj dhe më çliroi nga të gjitha tmerret e mia. Ata e shikuan atë dhe u ndriçuan, dhe fytyrat e tyre nuk u turpëruan. Ky i pikëlluar klithi dhe Zoti e plotësoi, e shpëtoi nga të gjitha fatkeqësitë e tij. Engjëlli i Zotit zë vend rreth atyre që kanë frikë prej tij dhe i çliron. Provojeni dhe shihni sa i mirë është Zoti; lum ai njeri që gjen strehë tek ai. Kini frikë nga Zoti, ju shenjtorë të tij, sepse asgjë nuk u mungon atyre që kanë frikë prej tij. Luanët e vegjël vuajnë nga mungesa e madhe dhe nga uria, por atyre që kërkojnë Zotin nuk u mungon asgjë. Ejani, o bij, dëgjomëni; unë do t'ju mësoj frikën e Zotit. Cili është ai njeri që dëshiron jetën dhe do ditë të gjata për të parë të mirën? Mbaje gjuhën tënde larg së keqes dhe buzët e tua të mos thonë gënjeshtra. Largohu nga e keqja dhe bëj të mirën, kërko paqen dhe siguroje. Sytë e Zotit janë mbi të drejtët dhe veshët e tij janë të vëmendshëm të kapin britmën e tyre. Fytyra e Zotit është kundër atyre që sillen keq, për të çrrënjosur kujtimin e tyre nga faqja e dheut. Të drejtët bërtasin dhe Zoti i dëgjon dhe i çliron nga të gjitha fatkeqësitë e tyre. Zoti qëndron afër atyre që e kanë zemrën të thyer dhe shpëton ata që e kanë frymën të dërmuar. Të shumta janë vuajtjet e njeriut të drejtë, por Zoti e çliron nga të gjitha. Ai i ruan tërë kockat e tij, dhe asnjë prej tyre nuk copëtohet. Ligësia do të vrasë të keqin, dhe ata që urrejnë të drejtin do të shkatërrohen. Zoti shpengon jetën e shërbëtorëve të tij, dhe asnjë nga ata që gjejnë strehë tek ai nuk do të shkatërrohet.