1 i Kronikave 16:8-36
1 i Kronikave 16:8-36 Bibla Shqip "Së bashku" 2020 (me DK) (AL1)
Përlëvdoni ZOTIN, thirreni emrin e tij, shpallni mes popujve veprat e tij. Këndojini atij e thurini lavde, kumtoni të gjitha mrekullitë e tij. Krenohuni me emrin e tij të shenjtë, e zemra i ngazëlleftë kujtdo që kërkon ZOTIN. Kërkojeni ZOTIN e fuqinë e tij, kërkoni përherë fytyrën e tij. Kujtoni mrekullitë që bëri, çuditë e gjykimet e gojës së tij, o pasardhës të Izraelit, shërbëtorit të tij, bij të Jakobit, të zgjedhurit e tij. Ai është ZOTI, Perëndia ynë, mbi mbarë dheun vendimet e tij. Kujtojeni përherë besëlidhjen e tij, fjalën që urdhëroi për një mijë brezni, besëlidhjen që bëri me Abrahamin, premtimin që i dha Isakut. Ia caktoi si rregull Jakobit, Izraelit si besëlidhje përjetë, kur tha: «Ty do të ta jap tokën e Kanaanit si pjesë të trashëgimisë suaj», kur ishit të hequr në numër, të paktë e ardhacakë, tek endeshin nga një komb te tjetri, nga një mbretëri te një tjetër popull. Nuk lejoi t'i shtypte askush, mbretërit për hir të tyre i qortoi: «Mos m'i prekni të vajosurit, profetët e mi mos i lëndoni». Le t'i këndojë ZOTIT dheu mbarë, shpëtimin e tij përditë kumtoni. Ndër kombe rrëfejeni lavdinë e tij, mrekullitë e tij ndër popuj mbarë, se i madh është ZOTI e fort i lavdërueshëm, më i tmerrshëm se të gjithë perënditë. Se mbarë perënditë e popujve janë të kotë, por ZOTI bëri qiejt. Shkëlqim e madhështi para tij, në vendin e tij fuqi e hare. Jepini ZOTIT, o familjet e popujve, jepini ZOTIT lavdi e fuqi, jepini ZOTIT lavdinë e emrit të tij! Kushtojini fli e dilni para tij, adhuroni ZOTIN veshur me shkëlqim. Le të dridhet para tij mbarë toka, se botës i vë themel e ajo nuk do të trandet. Le të ngazëllejë qielli e të gëzojë toka, le të thuhet ndër popuj: «ZOTI mbretëron». Le të ushtojë deti me gjithçka në të, e fusha me gjithçka në të le të galdojë. Atëherë do të brohorasin pemët e pyllit para ZOTIT që vjen për ta gjykuar tokën. Përlëvdoni Zotin, se është i mirë, se mirësia e tij mbetet përjetë. Thoni: «Shpëtona, o Perëndi i shpëtimit tonë, mblidhna e çlirona nga kombet, që ta falënderojmë emrin tënd të shenjtë, të mburremi duke të të lavdëruar. Bekuar qoftë ZOTI, Perëndia i Izraelit, nga mot e përgjithmonë!». Mbarë populli u përgjigj: «Amen» e «Lavdi Zotit».
1 i Kronikave 16:8-36 Bibla Shqip 1994 (ALBB)
Kremtoni Zotin, kujtoni emrin e tij; bëjini të njohura veprat e tij midis popujve. Këndojini atij, lëvdoheni, mendoni të gjitha mrekullitë e tij. Lëvdohuni me emrin e tij të shenjtë; u gëzofshin zemrat e të gjithë atyre që kërkojnë Zotin! Kërkoni Zotin dhe forcën e tij, kërkoni vazhdimisht fytyrën e tij! Kujtoni mrekullitë që ka bërë, çuditë e tij dhe gjykimet që kanë dalë nga goja e tij, ju, o stërnipa të Izraelit, shërbëtorit të tij, o bij të Jakobit, të zgjedhurit e tij! Ai është Zoti, Perëndia ynë; gjykimet e tij i gjejmë mbi të gjithë tokën. Mos harroni kurrë besëlidhjen e tij, fjalën e tij të urdhëruar për një mijë breza, besëlidhjen e lidhur me Abrahamin, betimin që i ka bërë Isakut, që ia konfirmoi Jakobit si një statut dhe Izraelit si një besëlidhje të përjetshme, duke thënë: "Unë do t'ju jap vendin e Kanaanit si pjesë e trashëgimisë suaj". kur nuk ishin veçse një numër i vogël, fare i pakët dhe të huaj në vend. Kur shkonin nga një komb në një tjetër, nga një mbretëri në një popull tjetër, ai nuk lejoi që ndokush t'i shtypte; përkundrazi dënoi disa mbretër për dashurinë që ushqente për ta, duke thënë: "Mos prekni të vajosurit e mi dhe mos u bëni asnjë të keqe profetëve të mi". Këndojini Zotit, o banorë të të gjithë tokës, lajmëroni çdo ditë shpëtimin e tij! Shpallni lavdinë e tij midis kombeve dhe mrekullitë e tij midis tërë popujve! Sepse Zoti është i madh dhe i denjë të lëvdohet në kulm; ai është më i tmerrshmi nga tërë perënditë. Sepse tërë perënditë e kombeve janë idhuj, kurse Zoti ka krijuar qiejt. Shkëlqimi dhe madhëria janë para tij, forca dhe gëzimi ndodhen në banesën e tij. Jepini Zotit, o familje të popujve, jepini Zotit lavdi dhe forcë. Jepini Zotit zulmin që i takon emrit të tij, çojini oferta dhe ejani para tij. Bini përmbys para Zotit në shkëlqimin e shenjtërisë së tij; dridhuni para tij, o banorë të të gjithë tokës! Po, bota është e qëndrueshme dhe nuk do të tundet. Le të gëzohen qiejt dhe toka, dhe le të thonë kombet: "Zoti mbretëron". Le të gjëmojë deti dhe tërë ato që janë në të; atëherë tërë drurët e pyllit do të lëshojnë britma gëzimi përpara Zotit, sepse ai vjen të gjykojë tokën. Kremtoni Zotin, sepse ai është i mirë, sepse mirësia e tij vazhdon përjetë. Thoni: "Shpëtona, o Perëndi i shpëtimit tonë! Na mblidh dhe na çliro nga kombet, me qëllim që të kremtojmë emrin tënd të shenjtë dhe të mburremi se të kemi lëvduar". I bekuar qoftë Zoti, Perëndia i Izraelit, nga amshimi në amshim! Dhe tërë populli tha: "Amen", dhe lëvdoi Zotin.