Joaancha Laenai 20
20
Ohane baiha ichanaa Cana Coaunera Calaohi Jesosone
(Mt 28.1-10; Mr 16.1-8; Lc 24.1-12)
1Semana nunuhe tomiho cojoanonaa bana nocohejeriin cuhin, jaiti nocohetoojoaane jana turuhin coaraa Mariha Maadala benene jana, inae fueraene nii ajeri jachu. 2Nii jaunte soroneein jelaiha uhin, Fedoro, canu, naaonjoainihacaanune rai biha uhe. “Aanca chaainti cana curuaanaa. Chu chaainti amaaureta”, 3naain biha canacaanu raina jaun coaraa cuhacaanu.
4Nii jaun, ita jiniichaain soroneein cuhin coaraa cuhacaanune jana, Fedoro reroriin cuhin, turuhin 5metoroaain coaracaaunne janate, cuu ne cona. Nena laaen enohin coaraeneeun.
6Nii janate canu caaijie turuhin, enohin, coaraa Fedorone jana, cuu ne jaberoco conaauru. 7Nii janate nejelau ne nii Cana Coaunera Calaohi Jesocurisito couturi cona, nejelau maromarorinohineein seeque.
8Nii janane canu netonai enohin coaracaaunne jaun, ichanaa Cana Coaunera Calaohi Jesocurisitone esenetaaun. 9Cana Coaunera Quiricha Inoaesi cuhane besihane jana niqui, “Naaonjoanrichaaine quete aite”, naain coitucusinaaunlu. Nena canacaanu nota que coaracaanune jaun, caohachaain coitucuhin esenetaacaanu.
10Nitohaneein coaracaanune bihane nenaanajau cauha cuhacaanu.
Oo caje ichanaain ecooca Jesosone
(Mr 16.9-11)
11Nii janate cuu nii ajeri jachu rohan nedaain chanaechanaje Mariha Maadala bene. Chanaaechanajeein metoroaain nii ajeri jachu coaraane jana, 12cuu laurujua laurujuaaure Cana Coaunera letonocuru anjeraauru somanerei que cajionequin Cana Coaunera Calaohi Jesocurisito jaberoco teeuruhane jaaun, leinjiin couturi nichajai que, leeocha tijia nichajai que naaojoain.
13Niichurute: “Chate coisiita”, naauruhane jana:
“Carai curuaanaa jaberoco amaauruhane jaunna coisiunra. Chu chaainti amaain teeureta”, naane baiha, 14jaotoroaain janori nichajai coaraa Marihane jana, rai chujuhaca Cana Coaunera Calaohi Jesocurisitone jana, acanihane coitucuene.
15Nii jana: “Chana coisiite ene. Chana arii”, naa Jesocurisitone jana:
“Nii enuha inaa beraicha niha”, beein: “Ii amaaine, carai nii amaain teeine jaa jelai beeune coanicha”, naa Marihane janate:
16“Mariha”, naa Jesocurisitone jana, najaoracaain rautaain Jesoso coaraain:
“Raboni”, nae Mariha.
“Cacha relaera”, naanete aite Ebereeo ere cuhane.
17Niritiin coineteein mucunaa jeriha Marihane jana: “Caiha neeu. Jauriaa coa cadadaara, jaiti iniin Ofa coaraenihanune jaunra. Chajaaincha cacoelaichaauru rai canu benihunra. Jaitina iniin, Ofa Cana Inaca Cana Coaunera rene iniha cureeunnicha”, naa Cana Coaunera Calaohi Jesocurisitone jaun, 18nii Cana Coaunera Calaohi aina nerelanaa nichaanune rai biha uhe Mariha Maadala bene.
Aina nerelanacauru rai ecooca Jesosone
(Mt 28.16-20; Mr 16.14-18; Lc 24.36-49)
19Tomiho cojoanonaa bana nihana jaunna, nii cojoanotiin cuhane ita taojiacaanu nii Cana Coaunera Calaohi Jesocurisito aina nerelanaa nichaanune, caohatiin acuujua fuhin Jorioocuru coasiha.
Nii janate enohin, canacaanu cataaun neeoritiin: “Raotojoeein rachoojoeein neeuchera”, nae canacaanu rai Jesocurisito.
20Niritohane baihate, biji que curabo cure, jaleri que rejoon cure, naaonjoain coaarate canacaanu que.
Nii jaunna rachoojihacaanu aina nerelanaa nichaanune, coaiteen canacaanu aina nihana jaun.
21Nii baihate nacoauneein: “Raotojoeein rachoojoeein neeuchera. Charijieein teeinti, caletoae Ofa, nirijieeinne caa inara letoaunra”, nae canacaanu rai Cana Coaunera Calaohi Jesocurisito.
22Niritiinte canacaanu couturi jiririin: “Cana Coaunera suujue raauchera. 23Chunei osaaona que inara suujua acatequichenena, canu netonai nii osaaona que casuujua acatereeunnicha. Jana aineeichene, canu netonai airihaaunnita”, nae canacaanu rai Jesocurisito.
“Tomasi, caa canu biji larijia cuhane ii biji couturi enoaain coaraau”, naa Jesosone
24Nii janate, inae amuha Cana Coaunera Calaohi Jesocurisitone jana, turuha uhe Tomasi, nii fafione neein, niicha curuaateeuri. Nii Tomasite Jesocurisito aina nerelanaa nichaanune lechoonca coroataja ne.
25Turuha Tomasine janate: “Cana Curuaanaa coaracaanura”, naain bihacaanu Tomasi raine janate:
“Biji larijia que curabo cure coaracaaunne banaachane, esenetareeunni. Chaaen cuhane canu biji couturi enoaain, chaaen jaleri que rejoon cure cuhane canu biji couturi enoaain, naaonjoain coaracaaunne banaachane nainereeunni esenetaanunera”, nae Tomasi, rai bihacaanune jana.
26Nii baihate fosa janoniane cuhane, coaiteen jelaiha nacoauneein ita taojiacaanune janate laaen, canacaanu aina ne Tomasi. Nii jana caohatiin fueraa bacuujuane saijieein enohin canacaanu cataaun neeoritiin: “Raotojoeein, rachoojoeein neeuchera”, nae canacaanu rai Jesocurisito.
27Nii baihate: “Tomasi, caa canu biji larijia cuhane, ii biji couturi enoaain coaraau. Chaenchu caa canu jaleri que rejoon cure cuhane, ii biji couturi enoaain coaraain esenetaachaau, baaso coacuelanaala”, naa Jesocurisitone jana:
28“Canu Curuaanaa Cana Coaunera”, naa Tomasine jana:
29“Inae laaen Canu esenetaai ichaajenihane coaraaine jaun. Raotojoeeinte niha cuurureein, catohaneein nihanune coaraelanaala quesenetaeraauru”, nae rai Jesocurisito.
Esenetaaichene coinate, laenanohineein ne caa erenaa
30Itolere ichaainte coaarate Cana Coaunera Calaohi Jesocurisito. Nete satiin laenanohineein nene caa quiricha cuhane. 31Cana Coaunera Calaohineein niha Jesosone esenetaaichene coinate, laenanohineein ne, esenetaaichene, ichaonaa caohacha, chabana nitajeniha cachane jaan raaichene coina.
Aktualisht i përzgjedhur:
Joaancha Laenai 20: URA
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2005, 2024, Wycliffe Bible Translators, Inc.