Ichanohichuru 12
12
Saantiaao sohin jaohinte, caresero cuhane Fedoro enohaaure.
1Nii bana jetaote, Jesocurisito ranojoihunru aina nejeratihane nunuheteein, tabaauru mucuerate jetao, Isaraelitaauru curuaanaa reey Erodesi. 2Nitohaneein jetaote, sabere que, Joaan nejera Saantiaao sohin joaerate. 3Nii rautatiin, coaracuruha Jorioocurune jaun jetaote, Fedoro netonai mucuerate Erodesi. Jorerera colane ichanohin faan quihuruhane jaan beseta cojoanonaacuru bana jetaote, nitohaneein Fedoro mucuure. 4Nii mucuerateein raeratihane baiha jetaote, Fedoro enoaerate caresero cuhane Erodesi. Nitohaneein caresero cuhane enoaerateein jetaote, caohatiin beraichate. Jena lauriin, jenaananain, nenacaauru soondarooru que, ita rerohererojoeein caohatiin beraihuruha le laurichuru cajene coina, letoanajae, nii Fasocoa beseta bitohariin, satiin coarajeeurera notaracae, caresero caje rocohin, coaraain chatohaneein teeuruhane coina. 5Nitohaneein caresero cuhane caohatiin beraichaain niha Fedorone tonohanau jetaote, ita taojiaain, rai Cana Coaunera bajaaure mainajeein Jesocurisito ranojoihunru.
Caresero Caje Fedoro mitaa Cana Coaunerane
6Nii jaun jetaote, eresinejeeonriin lanajeeca, satiin coarajiha cachane notaracae, chatohaneein Fedoro tihanerai niha Erodesine jana jetao, coroatajai soondarooru cataaun, jeranu cadena que cosiin sinitoha Fedorone jana, acuujua nihacuru neein beraihuruha soondaroorune jana jetaote, 7-8rai letono anjera letoae jetao, Cana Coaunera. Nii jaun jetaote, luhecotariin, Fedoro rohan neeoritoha Cana Coaunera letono anjerane jana jetao, jiichoo rijijieein conoe, caresero cuhane. Nii jana jetaote, sinitoha Fedorone jana, jaleri dada dadariin nocoaain jetao:
“Chajaain nimichuura”, naa Cana Coaunera letono anjera, Fedoro raine rijieeoritiin jetao, rai biji caje nejasajasariha nii biji ichora cadenane jana jetao: “Chajaaojoaain nimihuritiin ichajione jiaain, ii safato jiaain, canu jiniichotaaura”, naa, nii Cana Coaunera letono anjerane jana jetaote, nii aitohane rijijieein jiniichotae jetao, Fedoro.
9Nitohaneein jetaote, mituha cue, Cana Coaunera letono anjera caaijie cuhin, coetacaineein cuhin, mituha cuhane esenetaelanaala, “Nechu jataain sini anuu jecha aite”, naain. 10Nitohaneein cuhin jetaote, jauriaanejeein acuujua beraicha caje situure. Nii leeocha caje situhin jetaote, nii coata que bacuujuane jaun, turuuruhane jana jetao, raajenihane nejoracae, nii coata que bacuujuanaa, naain aerene nenaa enonaanaja rijia bacuujua. Nitohaneein mituhin, le cocoaantaain bero cuhane cuujueeru baiha jetaote, jelai Fedoro ratiriin amuhe Cana Coaunera letono anjera.
11Nii jaun jetaote, nainacori Fedoro. Nainacoriin jetaote: “Esinaete, rauhijiriin letono anjera letoae Cana Coaunera. Jataain caque necosuujuaain, canasineene rijitoha Erodesi aina Jorioocurune janate, nabana chatohaneein caetecuruhane coataa, letono anjera letoae Cana Coaunera, canu ichoteratihane coinara”, nae jetao Fedoro.
12Nitohaneein, inae nainaain jetaote, Joaan Maroconeein curuajai neba Mariha rene turuha cue. Nii jana jetaote, cuu najiniha, nii Mariha loreri asaae, ita taojiaain, Cana Coaunera bajaa neeure arajiin cachaauru. 13Nii jana jetaote turuhin, nii aerene nenaa enonaanaja rijia acuujua faofaorihane jana jetao: “Cacha aite”, naain, coaraa cue leeinjiin ranuna Rodee. 14Nii jetaote, Fedoro ere nihane aonaain jetao, coroaena caun jetao, nii acuujua joracae lanaala soroneein biha cue: “Fedoro te aitera”, naain. 15Nii jana jetaote: “Esinaena aitohite”, naauruhane jana jetao:
“Esinae rauhijiriin acate aicha”, naane jana jetao:
“Rai suujuete jerihane ai caihara”, naaure.
16Nii tonohanau jetaote, nii bacuujuaniha neein, nii acuujua faofaonijianae, acaauru bajaebajajeein Fedoro. Nii jaun jetaote, nii acuujua joracaain coaracuruhane jana, esinae aca nihana jaun, cuu nesoonetiin coarajeeure. 17Nii jana jetaote, acaauru rai, biji sarasarari, nabana tonaain ereeuruhane coataa. Nitohaneein jetaote:
“Naaonjoaainte, caresero caje, canu mitaerateein, canu ichoterate, Cana Coaunerara. Caritiin, Saantiaao rai benichuchera. Satiin, cana nejeraauru Jesocurisito coitucuurera rai netonai beeuchete, coitucuuruhine”, naain beratihane baiha jetaote, jelai caje mituhin jetao, amuhe Fedoro.
18Nii jana jetaote, jano jana, cuu neniha Fedorone jaun, nesoonetiin: “Cha quena nerurujuae, caa aansai”, naain jetao, acaauru suujua auhacaain nererojoecaaure nii beraihurera soondarooru. 19Nitohaneein, nenihane jaun jetaote, arihuruhane coina, acaauru letoaa nii curuaanaa Erodesine jana, nitohaneein Fedoro arihuruhane jana, eruurenihane jaun, nii beraihurera choae nalutiaain jetao, acaauru sohin joaerate jetao Erodesi. Nii baiha jetaote, nii Jodea batane caje mituhin Sesareeau ichaoha cue jetao Erodesi.
Oha Erodesine
20Tiro, Sidoon, naaonjoaain cocoaichacuru aina jetaote, niqui obaje Isaraelitaauru curuaanaa reey Erodesi. Nii jana jetaote, ita suujuau tacaain:
“Coanete, atiin rene turuhin raotojoeein erenaa neeinera”, naain jetao, jauriaanejeein, nii que jaurii nere tonoraera Balasito rene turuhin jetao, ereeure nii curuaanaa Erodesi rai, nii, Erodesiicha beraai atane cajeecha quinacai rajein ichaaoruha, nii Tiro, Sidoon naaonjoaain cocoaichacurune jaun. Nii jaun jetaote, nii curuaanaa Erodesi rai:
“Coanete, nii cachaauru coroatajanena neeinera”, naa nii Erodesi que jaurii Balasito najaun jetao, 21“Banajian uunite coaana neeinera”, nae jetao, nii curuaanaa Erodesi. Nii jaun jetaote, nii aitohane bana, rene netaojiaauruhane jana jetaote, curuaanaa nihane cajione jiaain jetao, nii curuaanaa nihane nelauriana jaan rori choae nelauriaain jetao, ereereje Erodesi. 22Nii jana jetaote:
“Coatiha caritiin erenaa nainihei, cana rijijieein cachata. Caate cana chosinera”, naaure jetao, ehequiin satiin nii cuu nere aonajeeurera cachaauru, nechu jataain acaauru belaiha Erodesine coina. 23Nii jana, coroaeca Erodesine jaun jetaote, nii rijieeoritiin, letono anjera letoae Cana Coaunera, nichoae cunai nalutiaane coina. Nii jaun jetaote, cunaitein corihanohin rihano jitanojoineein ohe, Cana Coaunera nujuaneein coroaeca ne jaun.
24Nii jana jetaote, inae jelai amuritoheriin, Cana Coaunera ere coitucuhajeein cuujeeure cachaauru, itolere sacutaain, amuhemujueein beebejeeuruhane jaun.
25Nii jana jetaote, inae Jerosaleeun, niicha ichanenu nainaauruha najaun jetao, Antioquiha cauha cuure, Berenabeen aina Saorocuru, acaauru jiniichaain “Maroco”, naain acaauruacha curuaatei- Joaan amaain.
Aktualisht i përzgjedhur:
Ichanohichuru 12: URA
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2005, 2024, Wycliffe Bible Translators, Inc.