Masmur 29
29
Vambunin AMISY raen no repe rai
1Masmur Daud po ratoe.
Kangkamambe AMISY Ai!
Inya, kotaro wana no munijo Manunggara,
wakangkamambe Apa kovo ntiti rai muno Apa vambunine rai.
2Wakangkamambe AMISY Apa tamo ntitije rai,
weye AMISY Opamo dandinit weti wabeaje Ai.
3AMISY anamote ngkin no mayane von,
Amisy titi anamote ravari maisyare katitir,
AMISY anamote ranauni ntamijo nawanane vone rai.
4AMISY anamote ngkin, Apa vambunine ntairi rai,
AMISY anamote ngkin, Apa kovo ntitije ntairi rai.
5AMISY anamote mbambunin, mo inyo arase radaut,
muno mo inyo aras no no munijo Libanon rabibiti.
6Wepi Po unato no no munijo Libanon raveti nsasopati
maisyare lembu tuvane sasopati wemaisy.
Muno unato Siryon nsotove maisyare bantene tuvane sotove wemaisy.
7AMISY anamote ngkin, ivake muje rai.
8AMISY anamote mbambunin, mo anoko ngkanembe rambayar,
muno mo anoko kanen Kades rambayar tavon.
9AMISY anamote mbambunin, mbewar inyo ngkakiwae ngkomati,#29:9 Aneme so ama ine mbe jirumbe wemi ratayao mamaisyo ayao Ibrani rarijati. Ayao Amisy TB mo ratoe taiso: AMISY anamote mbewar ti rusa wanya mbaki rainye mbaki.
umba anamote mo inyo wao raveti mpopan.
Weramu nai Yavaro Amisy Yerusalem, anugano Amisye wo raura seo ware:
‘‘Tugae, AMISY ararin!’’
10AMISY Apa vambunine obom ntiti rave
ti be akarive manayam akoe rai.
Wepirati bambunin dave
be akarive ntoa nuge nuganui.
11Syare AMISY Po vambunine raunande taune Apa kawasae mansai,
muno Po kovo saumane raugaje mansanuga rai.
Aktualisht i përzgjedhur:
Masmur 29: yva
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)