Masmur 28
28
AMISY Opirati darino rinaora
1Masmur Daud po ratoe.
Sya AMISY, Winyirati syo nawain,
Winyirati sya unato oram inamamavube rai,
syare vemo Nyo rinaranivi vayave inya.
Weye ranivara Winyo rinaranivi vayave,
weamo risyamo indati maisyare vatano syasyo no aipapo amani ate rai wemaisy.
2Syare Nyo sya ana danajo raraniv,
arono rui inamumbe to no Nya Yavaro ndandinit,#28:2 Ayao Ibrani ama ine mare Tanoano Ndandini Dave namirati ntami no Yavaro Amisye ama uga.
muno inaneme raijaseo syo winawain
indamu Nyo inapaya irati kakai rai.
3Vemo Nyo inararambe usya vatano mamune matavon inya,
indamu vemo Nyo mangke raugaje rinai jirati
vatano awa ana udave ngkakainoanive umaso mautan inya.
Onawamo awa ayao nsaumano awa arakove mai,
weramu manatantonave mamune raijo mai vayave.
4Syare Nyo mangke raugaje mai awa ana udave rai,
mamaisyo awa ana udave ti ngkakainoanive rarijati.
Syare Nyo mangke raugaje mai mamaisyo awa ana udave rai,
Nyo mangke rasakinavo mai indamu mamaisyo mai.
5Weye AMISY Apa ana dave me, anakotaro danari aneme rai me,
omainyamo wo ama kove ratantona kobe ramu.
Weti indati Po mataopon,
muno Po maijaseo akato jewen.
6Kangkamambe AMISY Ai,
weye Opirati Po sya ana danajo raraniv to.
7AMISY Opirati sya vambunine nsawa Ai muno darino rinaora,
maisyare naite apa vakano po raijaro aora ramaisy;
Opirati syanave ntindimu Ai.
Po sopambe rinai weti inanuga so rananibe,
weti rikinyo ransyerane rai syo kove raura seo Ai.
8AMISY Opirati Po vambunine raunande Apa kawasae mai,
muno be yambe irati akari titi napirati Po atayao ti manino mbovove rauvaro akari raije ai.#28:8 Vatane sopamo Daud, opirati be akari titive Israel mai.
9Syare Nyo Nya kawasae mapaya irati marova mai,
muno Nyo kove raugaje irati vatano Nyo matayao terave indamu Nya ura maije mai.
Syare Nyo mansayaranande maisyare vatano po maero domba makume wemaisy,
muno Nyo makepano naneme rai ntoa nuge nuganui.
Aktualisht i përzgjedhur:
Masmur 28: yva
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)