Luke 5
5
1ရာ့ပ်အာလည် ကိုယ်တော်ယေရှုကော ဂင်နေသရက်အိုင်a နောက်ထံပါအာ စာပ်ကဲ့အယ် လင်းငါးကာအချိန်နယ် တီတ်ဆာပရိသတ်ဖူမ်ငေါ် ဘုရားရှင်ငါနှုတ်ကပါတ်တော်ဖူမ်နယ် သပ်ချီးတီမ် ဟီမ်ငါ ပတ်ပတ်လည်ပါအာ စုလောကဲ့ထုတ်ချီးရီမာ့။ 2စီးရာပ်သော် ကိုယ်တော်ယေရှုကော ဝေးဟာမ်ဆသယ်ရာ ဆိုက်သောပေးကားက သမ်းငါလင်ငါးကာ လှေကယ်ဟူပ်သယ် ယူပ်မူဝမ်မာ့။ သမ်းငါလင်ငါး ဟီမ်နာပ်ကော လှေစုတ်အားအယ် ဆာပ်ကဲ့အယ် သမ်းငါလင်ငါးကာ ပိုက်သယ် ဖောကဲ့လင်းဟီးမာ့။ 3အင်းမာချိန်နယ် ကိုယ်တော်ယေရှုကော အင်းမာလှေကယ်ဟူပ်ပါအာမာ့ ရှိမုန်ငါလှေစုတ်အားဟေကဲ့အယ် လှေလည် ဝေးဟာမ်ဆသယ်နောက် နည်းနည်းဟာခွာလောတီမ် မိန့်နောမာ့။ စီးရာပ်သော် ကိုယ်တော်ကော လှေစုတ်အားထောင်းကဲ့အယ် တီတ်ဆာဖူမ်နယ် ဟောပြောသွန်သင်နောမာ့။ 4ကိုယ်တော်ကော တီတ်ဆာလာပ်သယ် ဟောပြောလောစီးရာပ်သော် ရှိမုန်နယ် “ဝေးဆူပ်ကားဘက်လာ လှေလည် လှော်လောကဲ့အယ် သမ်းငါလင်တီမ် နာန်ငါသမ်းငါလင်ငါးကာ့ ပိုက်သယ်ချလာမ်နိတ်” ငေါကဲ့အယ် မိန့်နောမာ့။ 5ရှိမုန်ရီ “ဆရာ အလေဆူလာပ်ကော နာပ်သားမာပ် နာန်ကြည်လော်ဝါ ပင်ပင်ပန်းပန်းညယ် ကြိုးစားလောဟီးရီ သမ်းငါ နူဝါဟာမ်း လူရီယိုး။ အင်းညယ်ငေါဝမ်ရီ ဆရာ စီမ်းညောက်ကယ်မာ့ သမ်းငါလင်ငါးပိုက်သယ် ထပ်သောကဲ့အယ် ငါဆူ ချဟာမ်းနာပ်” ငေါကဲ့အယ် ပြန်နောကဲ့အယ် ဖြေဟာမ်းမာ့။ 6အင်းမာညယ်နောက် သမ်းငါလင်ငါးကာ ပိုက်သယ် ချလာမ်စန်နော် ဟီမ်နာပ်ကော ပိုက်ကွန်ဖူမ် ဆိတ်ခပ်စာပ်အာမ်ကွန်းနယ် သမ်းငါဖူမ်နည်းကြီစ်ရယ် လင်ဟီးမူမာ့။ 7အင်းသယ် ဟီမ်နာပ်ကော အခြားလှေစုတ်အားမာ့ အပေါင်းအပါဖူမ် ကူညီလောရင်ကွန်နယ် အချက်ပြလောကဲ့အယ် ကော်ဝမ်မာ့။ အင်းမာ တီတ်ဆာလာပ် ထုတ်ချီးရီကယ်အယ် လှေကယ်ဟူပ်စလူန်းပါအာ သမ်းငါဖူမ် စာမ်းငါမ်စန်နော် ဟီမ်နာပ်ကာ လှေဖူမ်ငေါ လူမ်ဟတ်စာပ်အာမ်ကွန်းနယ် လင်းမာန်မာ့။ 8အင်းမာအဖြစ်ပျက်ဖူမ်နယ် ယူပ်မူဝမ်စန်းနော ရှိမုန်ပေတရုbကော ကိုယ်တော်ယေရှုကာ့ သာပဲရား ဝယ်လော်ကယ်အယ် “အရှင်၊ ငါဆူကော ဒုစရိုက်အပြစ်နံငါးဟီမ်ထာကယ်မာ့ ငါဆူပါအာအယ် ပူပေးရာမ်စာပ်ဆွမ်” ငေါကဲ့အယ် လျှောက်တင်နော်မာ့။ 9မဟာအောမ်ကယ်လိုးငေါနော ပေတရုနောက် ဟီမ်ငါ အပေါင်းအပါလာပ်ကော ဟီမ်နာပ်လင်ကဲ့အယ် လူကားကာ့ သမ်းငါဖူမ်ငေါ နန်တင်းကယ်မာ့ အန်းနောကဲ့ အဆွန်စောမ်ညယ် လင်းဟီးရာမ်ကယ် ထာမာ့။ 10ရှိမုန်ငါ့အပေါင်းအပါ ထာကာကာ့ ဇေဗေဒဲကာဆာ ကယ်ဟော ယာကုပ်နောက် ယောဟန်နာပ်ရီး အန်းနောဟီးရာမ်မာ့။ အင်းမာနောက်သယ် ကိုယ်တော်ယေရှုကော ရှိမုန်နယ် “ကစာပ်အာ့။ ရာ့အယ် စားလောကဲ့အယ် နာန်ငေါသမ်းငါလင်ဟပ်ကားအစား တီတ်ဆာဖူမ်နယ်c ငါကာ့တပည့်ဖူမ် ထာရီကွန်းနယ် စုလောကဲ့အယ် အီထော်ပ်ကား” ငေါကဲ့အယ် မိန့်နာန်မာ့။ 11အင်းမာနောက်သယ် ဟီမ်နာပ်ကော လှေဖူမ်နယ် ကမ်းစုတ်အား တူန်းဟေစီရာပ်သော် အရာအားလုံးနယ်သက်ပေးကဲ့အယ် ကိုယ်တော်ယေရှုကာ နောက်အား လီရာပ်ချီးမာ့။ 12အင်းမာနောက်သယ် ကိုယ်တော်ယေရှုကော မြို့တစ်မြို့ပါအာ ငါကဲ့အယ် လင်းငါးအချိန် အနာကြီးရောဂါစွဲကပ်dသောကားကာ့ ဟော်လောဝါ ဟော်ဝါငါမာ့။ ဟီမ်ငေါ ကိုယ်တော်ယေရှုလည် ယူပ်မူဝမ်စန်းနော ဟီမ်ငါမန်းနားဝပ်သောကဲ့အယ် “အရှင်၊ အရှင် အလိုငါဝမ်းနော ငါဆူကာ ရောဂါလည် မီမ်ဟာမ်းကွန်းနယ် ကုလောကဲ့အယ် အီရင်နာ့” ငေါကဲ့အယ် လျှောက်သောမာ့။ 13အင်းမာနောက်သယ် ကိုယ်တော်ကော ထော်လည် လာရာမ်းစီးရာပ်သော် အင်းမာဟီမ်နယ် ထာကယ်အယ် “ငါအလိုငါမာ့၊ မီမ်ဟာမ်းစန်ညုပ်” ငေါကဲ့အယ် မိန့်နာနောက် ချက်ချင်း အင်းမာဟီမ်ငါ အနာကြီးရောဂါကော် မီမ်ဟာမ်းငါမ်မာ့။ 14အင်းမာနောက်သယ် ကိုယ်တော်ကော ဟီမ်နယ် အင်းကာညယ် ရောဂါမီမ်ဟာမ်းငါကာအကြောင်းနယ် ဟင်နယ်ဟာမ်း အငေါညာပ်တီမ် မိန့်နောစီးကဲ့အယ် “ပုရောဟိတ်သာပ်ပါအာ လာမ်ကဲ့အယ် နာန်ငါရောဂါကော် အမှန်တကယ်ဟာမ် မီမ်ဟာမ်းပါတ် ငေါကားလည် ပြလာလိတ်။ အင်းမာနောက်သယ် နာန်ငါ အနာကြီးရောဂါ မီမ်ဟာမ်းပါတ် ငေါကားလည် တီတ်ဆာလာပ် မီမ်းဟော်ကွန်နယ် မောရှေပညတ်ကျမ်းအတိုင်းညယ် ပူဇော်လောကားအမှုလည် အောမ်နိတ်။ အင်းညယ်မားလည် နာန်ငါရောဂါ မီမ်ဟာမ်းပါတ် ငေါကားကာလည် တီတ်ဆာလာပ် မီမ်းဟော်ဟိကာ” ငေါကဲ့အယ် မိန့်နောမာ့။ 15အင်းညယ်ငေါဝမ်ရီ ကိုယ်တော်ယေရှုကာ့ သတင်းငေါ နေရာဒေသအရပ်ရပ်ပါအာ ပိုလောကဲ့အယ် ပျံ့နောဝမ်ကယ် တီတ်ဆာပရိသတ်ဖူမ်ငေါ် ကိုယ်တော် ဟောပြောလောကားလည် သပ်တီမ်နောက် အနာရောဂါဖူမ် ကုလောကား ခံနောမူတီမ် စုလောကဲ့အယ် ထုတ်ချီးရီမာ့။ 16အင်းညယ်ငေါဝမ်ရီ ကိုယ်တော်ကော တီတ်ဆာလာပ် အပေါ်ကာကာ့ အရပ်လာ ဟီမ်ဆွမ်းတစ်ပါးဟာ ပူပေးရီကယ်အယ် ဆုစိမ်မယ် လီဟာမာ့။ 17ရာပ်အာလည် ကိုယ်တော်ယေရှုဟောပြောလောကဲ့အယ် လင်းငါးအချိန်နယ် ဂါလိလဲပြည်၊ ယုဒပြည်၊ ဂျေရုဆလင်မြို့ဖူမ်ပါအာမာ့ ထိန်ဖူမ်ပါအာအယ် လီဟီးကားကာ ဖာရိရှဲeဖူမ်နောက် ကျမ်းထောကား ဆရာဖူမ်နာပ်ရီး အင်းမာနေရား ထောင်းကဲ့လင်းဟီးမာ့။ ဘုရားရှင်ငေါ် ကိုယ်တော်နန်း တီတ်ဆာလာပ်ကာ့ အနာရောဂါဖူမ် မီမ်ဟာမ်းစီမ်းရင်ငါကာ တန်ခိုးတော်လည် အီပေးမာ့။ 18အင်းမာအချိန်နယ် တီတ်ဆာကြအာကော လေဖြတ်သောကားကာ တီတ်ဆာဟော်ဝါလည် ဆလောင်းစုတ်အားသာမ်ကဲ့အယ် ကျဉ်းနား လာဆာမ်စီးရာပ်သော် ကိုယ်တော်ကာ မန်းနား ချလောတီမ်ကြိုးစားလောဟီးမာ့။ 19အင်းညယ်ငေါဝမ်ညီ တီတ်ဆာဖူမ် နံတင်းကယ်မာ့ ကျဉ်းနားဆာမ်တီမ် လမ်းသမ်ငါးလူဟာဝိုးသယ်မာ့ ကျဥ်းခေါင်မိုးစုတ်အား ဟေစီးရာပ်သော် အမိုးလည် ခွာလောကဲ့အယ် တီတ်ဆာလာပ်ကာ့ အလယ်ရာငါကားကာ့ ကိုယ်တော်ယေရှုကာ့ မန်းနား ဆလောင်းကတောမ်နောက်တူတူ အက်ဆာ လျှောလောလက်လာမ်မာ့။
20ကိုယ်တော်ကော ဟီမ်နာပ်ကာ့ ယုံကြည်ချက်ကော ကြီးမားလောကားလည် ယူပ်မူဝမ်စန်းနော လေဖြတ်သောကားဟီမ်နယ် “မိတ်ဆွေ၊ နာန်ငါ ဒုစရိုက်အပြစ်ဖူမ်နယ် ခွင့်လွှတ်သောကဲ့အီရာပ်” ငေါကဲ့အယ် မိန့်နာန်မာ့။ 21အင်းမာချိန်နယ် ဖာရိရှဲလာပ်နောက် ကျမ်းထောကား ဆရာလာပ်ကော “ ဘုရားရှင်နယ် စော်ကားလောကဲ့အယ် သပေါက်ကားကာ အင်းကာတီတ်ဆာကော ဟင်သယ်။ ဘုရားရှင်တစ်ပါးဟာနိုက် ဒုစရိုက်အပြစ်ဖူမ်နယ် ခွင့်လွှတ်သောကဲ့အယ် အီရင်ငါး” ငေါကဲ့အယ် တွေးလောကဲ့အယ် လင်းဟီးမာ့။ 22အင်းညယ်ငေါဝမ်ညီ ကိုယ်တော်ကော ဟီမ်နာပ် အင်းကာညယ် တွေးလောကဲ့လင်းငါးလည် မီမ်းဟော်ကယ်မာ့ အင်းမာဟီမ်နာပ်သယ် “နီမ်ငေါ မဟာအောမ်ကယ် အင်းကာညယ် တွေးလောထော်ကာသယ်။ သမာ့ လွယ်လောဟန်သယ်။ 23‘နာန်ငါ ဒုစရိုက်အပြစ်ဖူမ်နယ် ခွင့်လွှတ်သောဝါပ်’ ငေါကားနာန် အင်းညယ်အဟီပ်ရယ် 'ယုတ်ကဲ့အယ် လမ်းလျှောက်သောစာ့' ရယ် ငေါကားနာန်။ 24အင်းညယ်ငေါဝမ်ရီ တီတ်ဆာကာ့ဆာfကော အင်းကာ့ ကမ္ဘာလောကပါအာ ငါကားကာ့ ဒုစရိုက်အပြစ်အားလုံးနယ် ခွင့်လွှတ်သောကဲ့ အီရင်ငါးကာ့ အခွင့်အာဏာငါမာ့ ငေါကားလည် နီမ်မီမ်းဟော်ကွန်နယ် ငါပြလော့ပ်နာ” ငေါကဲ့အယ် မိန့်နောစီးရာပ်သော်၊ အင်းမာ လေဖြတ်သောကားဟီမ်နယ် “နာန်နယ် ငါငေါနာ့ပ်၊ ယုတ်စာ့ပ်၊ နာန်ငါ ဆလောင်းနယ် လာကဲ့အယ် ကျဥ်းမာ လာမ်ဟာမ်းနိတ်” ငေါကဲ့အယ် မိန့်နောမာ့။ 25အင်းမာညယ်မိန့်နာနောက် အင်းမာဟီမ်ငေါချက်ချင်း တီတ်ဆာအားလုံးငါမန်းနား စာပ်ကဲ့အယ် ဟီမ်အက်ကယားရီကာ ဆလောင်းနယ် စီမ်းနောစီးရာပ်သော် ဘုရားရှင်နယ် ချီးမွမ်းနောစီးကဲ့အယ် ဟီမ်ငါကျဥ်းမာ လာမ်ဟာမ်းမာ့။ 26အင်းမာအဖြစ်ပျက်သယ် ယူပ်မူကားကာ တီတ်ဆာအားလုံးငေါ ကစာပ်ကယ်အယ် အန်းနောဟီးစာပ်ရယ် ဘုရားရှင်နယ် ချီးမွမ်းနောဟီးမာ့။ အင်းမာနောက်သယ် ဟီမ်နာပ်ကော ကစာပ်စာပ်ရယ် “ထူးဆန်းနောကဲ့အယ် အန်းနောမီးကားကာ့ဖူမ်နယ် ယေမာပ်အာ အလေယူပ်မူဟီးမူဝါပ်” ငေါကဲ့အယ် အချန်းချန်းငေါဟီးမာ့။ 27အင်းမာဖူမ် ထာစီရာမ်စန်နော် ကိုယ်တော်ယေရှုကော အင်းမာနေရားအယ် ပူပေးဟာမ်းကဲ့အယ် လေဝိကော်ကားကာ အခွန်ကောက်တီတ်ဆာဟော်ဝါကော အခွန်ကောက်သောကားကာ့ တဲနား ထောင်းကဲ့လင်းငါးကာလည် ယူပ်မူကယ်မာ့ ကိုယ်တော်ရီး “ငါနောက်အား ရာပ်တိတ်” ငေါကဲ့အယ် မိန့်နာန်မာ့။ 28အင်းသယ် လေဝိကော ဟီမ်ငါ အခွန်ကောက်အလုပ်သယ် စွန့်လွှတ်သောစီးရာပ်သော် ယုတ်ကဲ့အယ် ကိုယ်တော်ကာနောက်အား လာပ်မာ့။ 29အင်းမာနောက်သယ် လေဝိကော ကြီးကျယ်လော်တင်နော်ကာကာ့ ရောက်ကားအူကားပွဲနောက် ဟီမ်ငါကျဥ်းမား ကိုယ်တော်နန်း ဧည့်ခံနောမာ့။ အင်းမာ့နေရား တခြားအခွန်ကောက်ဖူမ်နောက် နှာမ်ဖူမ်ရီး ဟီမ်နာပ်နောက်တူတူ ရောက်မောက်အာပ်ချီးမာ့။ 30အင်းမာချိန်နယ် ဖာရိရှဲလာပ်နောက် ဟီမ်နာပ်ပါအာမာ့ ကျမ်းထောကား ဆရာလာပ်ကော ကိုယ်တော်ကာ တပည့်တော်လာပ်သယ် “နီမ်ငေါ အင်းကာ့အခွန်ကောက်သောကားဟီမ်နာပ်၊ ဒုစရိုက်အပြစ်သားဖူမ်နောက် မဟာအောမ်ကယ် တူတူရောက်မောက်ချီးကားသယ်” ငေါကဲ့အယ် အပြစ်သာမ်ဟီးမာ့။ 31ကိုယ်တော်ယေရှုကော ဟီမ်နာပ်သယ် ဖြေလောဟာမ်းငါးကော “ဇလားကဲ့လင်းငါးကာ့ တီတ်ဆာနန်းငေါ ဆရာဝန်လိုလော့ကာယို။ အဇလာရယ် လင်းငါးကာ တီတ်ဆာလာပ်ချာ ဆရာဝန်လိုလော့ကာ။ 32အင်းမာတိုင်းမန်း ဖြောင့်မတ်သောကား တီတ်ဆာလာပ်ခနန်း ငါလီကားယို။ အင်းညယ်ငေါဝမ်ရီ ဒုစရိုက်အပြစ်သားလာပ်သယ် နောင်တသံဝေဂ လူစီမ်းကာပ်ကယ်ဟာ ငါလီကားထာမာ့” ငေါကဲ့အယ် မိန့်နောမာ့။ 33အင်းမာနောက်သယ် ကြအာတီတ်ဆာလာပ်ကော ကိုယ်တော်ယေရှုလည် “ဝေးငဟူပ်ကာမင်္ဂလာ ဆရာယောဟန် ငါတပည့်ဖူမ်ငေါ် ရောက်ကား ရှောင်နောကဲ့အယ် ဆုစိမ်ငါးလည် အမာပ်စာပ် အောမ်ဟီးမာ့။ ဖာရိရှဲလာပ်ကာ့တပည့်ဖူမ်ရီ အင်းမာတိုင်းမန်း အောမ်ဟီးမာ့။ အင်းညယ်ငေါဝမ်ရီ နာန်ငါ တပည့်လာပ်ကော် အမြဲတမ်းရယ် ရောက်ချီးအူဟီးကဲ့အယ် အခြားတီတ်ဆာလာပ်ညယ် မဟာအောမ်ကယ် ရောက်ကားအရှောင်နော်ဟီကာသယ်” ငေါကဲ့အယ် စီမ်ညူဟီးမာ့။ 34ကိုယ်တော်ယေရှုကော “မင်္ဂလာပွဲလီကားဟီမ်နာပ်သယ် သတို့သားနောက်တူတူ ငါကားကာအချိန်နယ် ရောက်ကားရှောင်နောကွန်းနယ် နီမ်အောမ်ဟီးရင်နှေး။ အင်းမာညယ် ဟင်ဟာမ်း အောမ်ရင်နိုး။ 35အင်းညယ်ငေါဝမ်ရီ သတို့သားလည် ဟီမ်နာပ်ပါအာအယ် ကော်ဝမ်ငါးခံနောထော်ကာ အချိန်နယ်ငေါက်သော် ဟီမ်နာပ်ကော ရောက်ကားရှောင်နော ဟိကာ” ငေါကဲ့အယ် မိန့်နောမာ့။ 36စီးရာပ်သော် ကိုယ်တော်ယေရှုကော ဟီမ်နာပ်သယ် ပုံဥပမာကြအာ ငေါကားကော “ဟင်ဟာမ်း ဟူမ်ကာမ်ငါ့ အပေါက်သယ် ကဖောက်တီမ် ဟူမ်ညားလည် လာဆိတ်ခပ်ကာဟီပ်ယို။ အင်းညယ် ကဖောက်အာမ်မာငေါက်သော် ဟူမ်ညားရီး ပျက်စီးလောကဲ့အယ် ကဖောက်ပေကာ ဟူမ်ညားကော ဟူမ်ကာမ်နောက် လိုက်ဖက်သော့ကာဟီပ်ယို။ 37စပျစ်ဝိုင်ညားလည် သားရေဘူးကာမ်ပါအာ ဟင်ဟာမ်းစာန်းငိုး။ အင်းမာညယ် စာန်းပါတ်သော် စပျစ်ဝိုင်ညားကော သားရေဘူးလည် ဟော့ပ်စီမ်းရင်ကယ်မာ့ စပျစ်ဝိုင်ရီး မာဟူမ်မာန်ကဲ့အယ် သားရေဘူးရီး ပျက်စီးလာမ်ကား။ 38အင်းသယ် စပျစ်ဝိုင်ညားလည် သားရေဘူးညားပါအာဟာ စာန်းထော်ပ်ကား။ 39နီမ်ငေါ ‘စပျစ်ဝိုင်ကာမ်ငေါ ပိုလောကဲ့အယ် အူမီးမာ့’ ရယ် ငေါကားသယ်မာ့ စပျစ်ဝိုင်ကာမ်နည်ဟာ အူကဲ့အယ် စပျစ်ဝိုင်ညားလည် အူကာပ်ချီးစောမ်းဟပ်ကာယို” ငေါကဲ့အယ် မိန့်နောမာ့။
Aktualisht i përzgjedhur:
Luke 5: ktpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.