Luke 4
4
1အင်းမာနောက်သယ် ကိုယ်တော်ယေရှုကော ဉာဏ်အလင်းတော်နောက်တူတူ ငါကဲ့အယ် ဂျော်ဒန်မြစ်လားအယ် လီဟာမ်းကဲ့အယ် ဉာဏ်အလင်းတော်ကာ့ ဦးဆောင်မှုနောက် တီတ်ဆာလာပ် အပေါ်ကာကာ့ ပေါက်ခါသာတုန်းငါး လာမ်မာ့။ 2အင်းမာနေရား မာရ်နတ်ကာ့ ဖြားယောင်းသွေးဆောင်နော်ကာလည် မာန်းရာပ်ပေါင်း လေးဆယ် ခံနောမာ့။ အင်းမာ့မာန်းရာပ်အတွင်းနား ကိုယ်တော်ယေရှုကော မဟာအစာလည် ဟာမ်းအရောက်ရယ် လင်းမီကယ်မာ့ အင်းမာ မာန်းရာပ်ဖူမ် ဆွန်မာန်စန်းနော တအား ရောက်ခေါ့ပ်တင်းနီမာ့။ 3မာရ်နတ်ကော ကိုယ်တော်ယေရှုလည် “နာန်ငေါ ဘုရားရှင်ငါ ဆာငေါက်သော် အင်းကာသလောင်ဆီလည် ပေါင်မုန့်ထာလိတ် ငေါကဲ့အယ် အမိန့်အီရာမ်နိတ်” ရယ် ငေါမာ့။ 4အင်းညယ်ငေါဝမ်ရီ ကိုယ်တော်ယေရှုကော “ကျမ်းစာပါအာ တီတ်ဆာကော ရောက်တီမ် ကြအာဟာနန်း အသက်ဆိုင်းကဲ့လင်းငါးဟီပ်အို ငေါကဲ့အယ် ရေးလောပေးမာ့” ငေါကဲ့အယ် မိန့်နောမာ့။ 5အင်းမာစီးရာပ်သော် မာရ်နတ်ကော ကိုယ်တော်ယေရှုလည် စုတ်ကာကာ တောင်ထိပ်စုတ်အား ကော်ဝမ်ကဲ့အယ် ကမ္ဘာပေါ်ဝါး ငါကားကာ တိုင်းပြည်ဖူမ်အားလုံးနယ် တအောင်းဟာအတွင်းနား ပြလောမာ့။ 6မာရ်နတ်ကော ကိုယ်တော်လည် “ငါ့နန်း အီပေးကားကာ့ အင်းကာ့ တန်ခိုးအာဏာ အားလုံးနောက် ဘုန်းစည်းစိမ်ဖူမ်နယ် ငါအီကာပ်ကားဟီမ်နန်း အီရင်ကယ်မာ့ နာန်နန်းငါအီနာ့။ 7အင်းသယ် ငါလည် ဟလာမ်းငေါပ်ကယ်အယ် ဝယ်လော်ဝမ်နော် အင်းကာ့အားလုံးနယ် နာန်နန်း အီနာ့” ငေါကဲ့အယ် ငေါမာ့။ 8အင်းညယ်ငေါဝမ်ရီ ကိုယ်တော်ယေရှုကော “ကျမ်းစာပါအာ နာန်ငါ အရှင်ထာကာကာ့ ဘုရားရှင်နယ်ဟာ ဝယ်လော်ထော်ပ်ကား၊ ဟီမ်ငါ အမှုတော်လည်ဟာ ထမ်းဆောင်နော်ထော်ပ်ကား ငေါကဲ့အယ် ကျမ်းစာပါအာ ရေးလောပေးမာ့” ငေါကဲ့အယ် မာရ်နတ်သယ် ဖြေလောဟာမ်းမာ့။ 9အင်းမာနောက်သယ် မာရ်နတ်ကော ကိုယ်တော်ယေရှုလည် ဂျေရုဆလင်မြို့ဝါးမာ့ ဗိမာန်တော်ကာ့ စုတ်ခမ်ဆုံး နေရာပါအာ ကော်ဝမ်ကဲ့အယ် “နာန်ငေါ ဘုရားရှင်ငါ ဆာငေါက်သော် အင်းကာနေရားအယ် ခုန်နောလက်လာမ်နိတ်။ 10နာန်ငေါ ကနာမုကားယို။ မဟာအောမ်ကယ်လိုးငေါနော ကျမ်းစာပါအာ ‘ဘုရားရှင်ငေါ် နာန်နယ် ကာကွယ်လောတီမ် ဟမန်းနာပ်သယ် အမိန့်အီပေးရီမာ့။ 11ဟီမ်နာပ်ကော နာန်ငါ သာဖူမ်နယ် သလောင်ဆီဖူမ်နောက် ထာဝမ်ကဲ့အယ် ကနာမူပါအာအယ် ကာကွယ်လောတီမ် ဟီမ်နာပ်ကာ့ထော်နောက် နာန်နယ် ဖင်ပေ့ကာ’ ရယ် ငေါပေးမာ့ဟီပ်ယိုလေး” ငေါကဲ့အယ် ငေါမာ့။ 12အင်းမာချိန်နယ် ကိုယ်တော်ယေရှုရီး “ကျမ်းစာပါအာ နာန်ငါ အရှင်ထာကာကာ့ ဘုရားရှင်နယ် စမ်းသပ်သောမို ငေါကဲ့အယ် ရေးလောပေးမာ့” ငေါကဲ့အယ် မိန့်နောမာ့။ 13မာရ်နတ်ရီး ကိုယ်တော်ယေရှုလည် နည်းအမျိုးမျိုးနောက် ဖြားယောင်းနောစီးရာနောက် ကိုယ်တော်ယေရှုပါအာအယ် လာမ်ဟာမ်းကဲ့အယ် နောက်တစ်ချိန် အခွင့်ကလန်နယ် လေးကဲ့လင်းမာ့။ 14စီးရာပ်သော် ကိုယ်တော်ယေရှုကော ဉာဏ်အလင်းတော်နောက်တူတူ ဂါလိလဲပြည်ရာ ပြန်နောကဲ့အယ် ကြွလောဟေမာ့။ ကိုယ်တော်နောက် ပတ်သက်သောကား သတင်းငေါ အရပ်ဒေသအနှံ့ ပျံ့နောကဲ့အယ်လင်းမာ့။ 15ကိုယ်တော်ယေရှုကော ဓမ္မာရုံဖူမ်ပါအာ တီတ်ဆာအားလုံးနယ် ဟောလောကဲ့အယ် လင်းစန်းနော တီတ်ဆာအားလုံးငေါ ဟီမ်နယ် ချီးမွမ်းနောဟီးမာ့။ 16အင်းမာစီးရာပ်သော် ကိုယ်တော်ယေရှုကော ဟီမ်တုန်းရီကာကာ့ နာဇရက်မြို့ပါအာ လာမ်ဟာမ်းမာ့။ အူန်းပူစ်မာန်းရာပ်သယ် ဟီမ်ငေါ လာမ်နေကျအတိုင်း ဓမ္မာရုံပါအာ လာမ်ကဲ့အယ် အင်းမာနေရား ဟီမ်ငေါ ကျမ်းစာကြေတီမ် ယုတ်အာမ်မာ့။ 17တီတ်ဆာဟော်ဝါဟော်ဝါကော ကိုယ်တော်ယေရှုနန်း ကတောမ်ပေကာကာ့ ပရောဖက်ဟေရှာယကျမ်းစာလည် အီရာမ်ကယ်မာ့ အောက်အာမ်စန်နော် အင်းမာကျမ်းပိုဒ် ရေးလောပေးကားနေရာလည် ယူပ်မူကယ်မာ့ ကြေရာမ်မာ့။ 18“ဘုရားရှင်ငါ ဉာဏ်အလင်းတော်ကော် ငါနောက်တူတူ ငါကဲ့အယ်လင်းမာ့။
မဟာအောမ်ကယ်လိုးငေါနော အပေါ်ဟာကား ဟီမ်နာပ်သယ် မင်္ဂလာသတင်းကလန်နယ် ဟောလောတီမ်
ငါလည်ဘုရားရှင်ငေါ် ရွေးလောပေးမာ့။ ထောင်လက်ကားကာ တီတ်ဆာဖူမ် လော်ပ်တော်ဟာမ်မူကွန်နယ်၊ မီပ်တူ အယူပ်မူကားကာ့ ဟီမ်နာပ်သယ် မီပ်တူယူပ်မူဟာမ်းကွန်းနယ်နောက် ဒုက္ခဆင်းရဲ ခံစားလောကဲ့အယ် လင်းထော်ကာဟီမ်နာပ် အင်းမာဒုက္ခပါအာအယ် လော်ပ်သော်စီမ်ကာ ငေါကားကာ့ အကြောင်းနယ် ဆောမ်းတီမ် ဘုရားရှင်ငေါ် ငါလည်သာပ်လီမာ့။ 19အင်းကာ့ အချိန်ငေါ် ဘုရားရှင်ငေါ် ဟီမ်ငါ့မဟာဂရုဏာလည် ပြလောမာ့ ငေါကားအကြောင်းနယ် ဟောလောကားကာ့ အချိန်ထာမာ့” ငေါကဲ့အယ် ထာမာ့။ 20အင်းမာနောက်သယ် ကိုယ်တော်ယေရှုကော ကျမ်းစာလည် ကတောမ်ကယ်အယ် ဓမ္မာရုံအကူဟနန်း အီဟာမ်းကဲ့အယ် ထောင်းငမ်မာ့။ ဓမ္မာရုံပါအာငါကားကာ တီတ်ဆာအားလုံးငေါ ကိုယ်တော်ယေရှုလည် ယူစာပ်စာပ်ရယ် လင်းဟီးမာ့။ 21အင်းမာစီးရာပ်သော် ကိုယ်တော်ကော တီတ်ဆာလာပ်သယ် “နီမ်သာပ်မူကားကာ ကျမ်းပိုဒ်ကော ယေမတ်အာ တကယ်ထာရီရန်း” ငေါကဲ့အယ် မိန့်နောမာ့။ 22အင်းမာနေရား ငါကဲ့လင်းငါးကာ တီတ်ဆာဖူမ်ငေါ ကိုယ်တော်လည် ချီးကျူးလောဟီးကဲ့အယ် ကိုယ်တော် မိန့်နောကားဖူမ်နယ် အန်းနောဟီးစာပ်ရယ် “မာဟီမ်ငေါ ယောသပ်ကာ့ ဆာဟီပ်အိုလေး” ငေါကဲ့အယ် အချန်းချန်းငေါဟီးမာ့။ 23ကိုယ်တော်ယေရှုရီး “ရှီစ်ဆရာကော် ကိုယ်ကာနောက်ကိုယ် အရာမ်ရှီစ်ကုလောတီမ် လိုလောမာ့ ငေါကားကာ့ စကားပုံနယ် နီမ်ငေါ အမှန်တကယ်ဟာမ် ငေါဟိကာ။ အင်းမာပြာန်နယ် နီမ်ငေါ ‘ကပေရနောင်မြို့ဝါး ကိုယ်တော်အောမ်မီမာ့ ငေါကဲ့အယ် အလေ သာပ်မူရီကားအမှုဖူမ်နယ် နာန်ဟဲရီကာကာ့မြို့ ထာကာကာ့ အင်းကာနေရားရီး အောမ်နိတ်’ ငေါကဲ့အယ် နီမ်ငေါ ငါလည် ငေါဟိကာ။ 24အင်းညယ်ငေါဝမ်ရီ နီမ်နယ် ငါအမှန်ငေါထော်ဝမ်နော် သမာ့ ပရောဖက်သယ်ဟာမ် ကိုယ်ဟဲရီကာမြို့ပါအာမာ့ တီတ်ဆာဖူမ်ငေါ လက်ခံနော်ဟီယို။ 25ငါထပ်သောကဲ့အယ် အမှန်ငေါရယ်ငေါနော ပရောဖက်ဧလိယ လက်ထက်မားလည် အစ္စရေးပြည်ရာ မုဆိုးမဖူမ် နည်းကြီစ်ငါမာ့။ အင်းမာအချိန်ငါ ဆမ်ပီးပဲရယ် မိုးခေါင်နောကယ်မာ့ တိုင်းပြည်ကာ့ နေရာတိုင်းငါး ရောက်ခေါပ်ကား အူဟောပ်ကား ဒဏ်နယ် ခံနောဟီးထော်မာ့။ 26အင်းညယ်ငေါဝမ်ရီ ဘုရားရှင်ငေါ် ဧလိယလည် အစ္စရေးပြည်ရာမာ့ မုဆိုးမလာပ်ပါအာ ကူညီလောတီမ် အသာပ်ရယ် ဇိဒုန်ဒေသနောက် ထံငါးကာ့ ဇရတ္တမြို့ဝါးမာ့ ဂျူးလူမျိုးအဟီပ်ကာကာ့ မုဆိုးမဟော်ဝါလည် ကူညီလောတီမ် သာပ်လီမာ့။ 27ပရောဖက်ဧလိရှဲကာ့ ခေတ်လားရီး အစ္စရေးပြည်ရာ အနာတုန် ရောဂါသယ်ဖူမ် နည်းကြီစ်ရယ် ငါမာ့။ အင်းညယ်ငေါဝမ်ရီ ဟီမ်နာပ်ပါအာမာ့ ဆီးရီးယားပြည်သား ဂျူးလူမျိုးအဟီပ်ကာကာ့ နေမန်ငါပန်းနယ် သမာ့ဟီမ်နယ်ဟာမ်း ကုလောကဲ့အယ် အီရီယိုး” ငေါကဲ့အယ် မိန့်နီမာ့။ 28အင်းမာချိန်နယ် ဓမ္မာရုံနားမာ့တီတ်ဆာအားလုံးငေါ ကိုယ်တော်ယေရှု သပေါက်ကားလည် သာပ်မူဟီးစန်းနော တအားတုန်ရယ် ဒေါသထွက်သောဟီးကယ်မာ့ 29ဟီမ်နာပ်ကော ယုတ်ကဲ့အယ် ကိုယ်တော်ယေရှုလည် မြို့ပြာန်ငါ ငါပ်ပူဟီးကဲ့အယ် ကမ်းပါးတောင်တုန်ငါအယ် ထိုလောလက်တီမ် မြို့တည်လောကားကာ့ တောင်ထိပ်ပဲပင်းနား ကော်ဟီးရာမ်မာ့။ 30အင်းညယ်ငေါဝမ်ရီ ကိုယ်တော်ယေရှုကော တီတ်ဆာဖူမ် ကြာပ်ကြားပါအာအယ် ပလာပ်ကယ်အယ် ကြွလာမ်မာ့။ 31အင်းမာစီးရာပ်သော် ကိုယ်တော်ကော ဂါလိလဲပြည်ပါအာမာ့ ကပေရနောင်မြို့ဝါးလာမ်ကဲ့အယ် အူန်းပူစ်မာန်းရာပ်သယ် ဓမ္မာရုံငါး တီတ်ဆာဖူမ်နယ် ဟောလောမာ့။ 32ကိုယ်တော်ကော အခွင့်အာဏာနောက် ဟောပြောသွန်သင်နောကယ်မာ့ တီတ်ဆာအားလုံးငေါ ဟီမ်ငါ ဟောပြောချက်ဖူမ်နယ် အန်းနောတင်းဟီးရာမ်မာ့။ 33အင်းမာ့ဓမ္မာရုံငါး စိတ်ဆလား ဆာမ်ငါးခံနောထော်ကာတီတ်ဆာ ဟော်ဝါငါမာ့။ အင်းမာဟီမ်ငေါ ကိုယ်တော်လည် 34“နာဇရက်မြို့သား ယေရှု၊ နာန်ဆွမ်းအလေဆူလာပ်သယ် မဟာအောမ်ကယ်အယ်သယ်။ အလေဆူလာပ်သယ် ဖျက်ဆီးလောတီမ် လီကားနာန်။ နာန်ဆွမ်း ဟင်ထာမာ့ငေါကားလည် အလေဆူမီမ်းဟော်မာ့။ နာန်ငေါ ဘုရားရှင်ငါ မြင့်မြတ်သောကားဆာ ငေါကားလည် မီမ်းဟော်မာ့” ငေါကဲ့အယ် ကလူပ်ကား အသံနောက်ငေါမာ့။ 35အင်းညယ်ငေါဝမ်ရီ ကိုယ်တော်ယေရှုကော စိတ်ဆလားလည် “ဆီမ်နိတ်၊ ဟီမ်ပါအာအယ် ပူဝမ်စာ့” ငေါကဲ့အယ် အမိန့်အီရာမ်မာ့။ အင်းမာနောက်သယ် စိတ်ဆလားကော အင်းမာဟီမ်နယ် တီတ်ဆာလာပ်ကာအလယ်ရာ ကာစုတ်အား လာတလေးကဲ့အယ် အကနာစီမ်ညယ် ဟီမ်ပါအာအယ် ပူဝမ်မာ့။ 36ဓမ္မာရုံပါအာမာ့ တီတ်ဆာလာပ်ကော အန်းနောဟီးကဲ့အယ် “အင်းကာကော မညယ်ကာ့ စကားသယ်။ ဟီမ်ငေါ ဟီမ်ငါ တန်ခိုးတော်နောက် အခွင့်အာဏာနောက် စိတ်ဆလားလာပ်သယ် အမိန့်အီရာမ်စန်းနော အင်းမာစိတ်ဆလားလာပ်ကော် တီတ်ဆာလာပ်ပါအာအယ် ပူဟီးရီမာ့” ငေါကဲ့အယ် အချန်းချန်းငေါကဲ့လင်းဟီးမာ့။ 37အင်းမာစီးရာပ်သော် ကိုယ်တော်နောက် ပတ်သက်သောကားကာ သတင်းဖူမ်ငေါ် ပတ်ဝန်းကျင်ဒေသ ကြအာလုံးပါအာ ပျံ့နှံ့နောဝမ်မာ့။ 38ကိုယ်တော်ယေရှုကော ဓမ္မာရုံငါးအယ်ပူရီကဲ့အယ် ရှိမုန်ငါ့ ကျဥ်းမား ကြွလာမ်ငါကာအခါလည် ရှိမုန်ငါ နီကော တအားတုန်းရယ် ကနာဟာကဲ့အယ် လင်းကယ်မာ့ တီတ်ဆာလာပ်ကော ဟီမ်ဟနန်း ကုလောကဲ့အီတီမ် ကိုယ်တော်ပါအာ စိမ်ဟီးမာ့။ 39အင်းသယ် ကိုယ်တော်ကောအင်းမာယာပ်ရှီနောက် ထံပါအာ စာပ်ကဲ့အယ် ကနာဟာကားလည် မီမ်ဟာမ်းကွန်းနယ် အမိန့်အီရာမ်ငါးနောက် အင်းမာ့ ယာပ်ရှီကော ဇလားဟာမ်းစန်နော် ချက်ချင်းယုတ်ကဲ့အယ် ဟီမ်နာပ်ခနန်း ရောက်တီမ်အူတီမ်ဖူမ် ပြာန်နောကဲ့အယ် အီမာ့။ 40စမီစ်ဆာမ်ငါး အချိန်ထုတ်အာမ်စန်းနော ရောဂါအမျိုးမျိုး စွဲကပ်သောကဲ့အယ်လင်းငါးကာ့ အဇလာကာ့ တီတ်ဆာဖူမ်အားလုံးနယ် ကိုယ်တော်ပါအာ ကော်ဟီးရီစန်နော် ကိုယ်တော်ယေရှုကော အင်းမာ အဇလာကာ့ တီတ်ဆာ ဟော်ဝါစီကာ့စုတ်အား ဟီမ်ငါ့ထော်လည် သာမ်ကဲ့အယ် ရောဂါဖူမ်နယ် မီမ်ဟာမ်းစီမ်းမာ့။ 41စိတ်ဆလားဖူမ်ရီ တီတ်ဆာလာပ်ပါအာအယ် ပူဟီးရီကယ်အယ် “နာန်ငေါ ဘုရားရှင်ငါ ဆာထာမာ့” ငေါကဲ့အယ် ရမ်းဟီးမာ့။ အင်းညယ်ငေါဝမ်ရီ ကိုယ်တော်ယေရှုကော ကယ်တင်ရှင် မေရှိယ ထာမာ့ ငေါကားလည် ဟီမ်နာပ်မီမ်းဟော်ကယ်မာ့ ကိုယ်တော်ယေရှုကော ဟီမ်နာပ်သယ် အင်းမာညယ် အရမ်းဟီးတီမ် အမိန့်အီရာမ်မာ့။ 42နောက်သယ်ကာ့ မာန်းရာပ် ဟလာမ်းလားဝမ်စန်နော် ကိုယ်တော်ကော တီတ်ဆာလာပ် အပေါ်ကာကာ့ အရပ်လာ ပူပေးရာမ်မာ့။ အင်းညယ်ငေါဝမ်ရီ တီတ်ဆာ ပရိသတ်သာပ်ကော် သမ်ညာပ်ချီကယ်အယ် ဟောပ်တောစန်းနော ဟီမ်နာပ်ပါအာအယ် အပူဝမ်ညယ်လင်းကွန်းနယ် တောင်းပန်ဟီမာ့။ 43အင်းညယ်ငေါဝမ်ညီ ကိုယ်တော်ကော “ငါကော တခြားမြို့ဖူမ်ပါအာမာ့ တီတ်ဆာဖူမ်နယ်ရီး မင်္ဂလာသတင်းကလန်ထာကာကာ့ ဘုရားရှင်ငါ သာသနာတော် အကြောင်းနယ်ဟောလောထော်ပ်ခူမ်း။ မဟာအောမ်ကယ်လိုးငေါနော အင်းကာညယ် ဟောလောတီမ် ဘုရားရှင်ငေါ် ငါလည် သာပ်လီကားထာမာ့” ငေါကဲ့အယ် မိန့်နောမာ့။ 44စီးရာပ်သော် ကိုယ်တော်ယေရှုကော ယုဒပြည်ပါအာမာ့ ဓမ္မာရုံဖူမ်ပါအာ ဆက်သောကဲ့အယ် ဟောပြောလီမာ့။
Aktualisht i përzgjedhur:
Luke 4: ktpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.