Luke 4
4
1ယေပြီးကေ ကိုယ်တော်ယေရှုက ဉာဏ်အလင်းတော်နန့်တတူ ဟိနီပြီးကေ ဂျော်ဒန်မြစ်ကနီ ပြန်လာဗျာလ် ဉာဏ်အလင်းတော် ဦးဆောင်မှုနန့် တောကန္တာရထဲကို ကြွလားလီရေ။ 2ယင်းနီရာမာ ကိုယ်တော်ယေရှုက မာရ်နတ်ဆွဲဆောင်စွာကို ရက်ပေါင်းလေးဆယ်အကြာ ခံခရပါရေ။ ယင်းရက်တိမာ ကိုယ်တော်ယေရှုက တစ်ခုလေ့မစားဘဲ နီရေအတွက်နန့် ယင်းနိန့်ရက်တိကျော်လွန်လားရေခါ ကောင်းကောင်းဝမ်းဆာလာပါရေ။ 3မာရ်နတ်က ကိုယ်တော်ကို “သင်က ဘုရားသျှင်၏သားတော်မှန်ကေ ဒေကျောက်တုံးကို မုန့်ဖြစ်စီလို့ အမိန့်ပီးလိုက်ပါ” လို့ ပြောလီရေ။ 4ယေခါ ကိုယ်တော်ယေရှုက “ကျမ်းစာမာ ‘လူက အစာတစ်ခုတည်းအတွက် အသက်ရင်နီစွာ မဟုတ်’ လို့ ရီးထားပါရေ” လို့ မိန့်တော်မူပါရေ။ 5ယေပြီးကေ မာရ်နတ်က ကိုယ်တော်ကို ကောင်းကောင်းမြင့်ရေ တောင်ထိပ်ထက်ကို ခေါ်လားပြီးကေ ကမ္ဘာပေါ်ဟိ တိုင်းနိုင်ငံအားလုံးကို တနားသျှေနန့် ပြလိုက်ပါရေ။ 6ယေပြီးကေ မာရ်နတ်က ကိုယ်တော်ကို “ဒေတိုင်းနိုင်ငံတိအားလုံးကို အုပ်ချုပ်ဖို့ တန်ခိုးအာဏာနန့် သူရို့၏ဘုန်းစည်းစိမ်တိအားလုံးကို ငါ ပီးမေ။ ဇာတွက်နန့်ဆိုကေ ယင်းအရာတိက ငါ့ကို ပီးထားပြီးသားဖြစ်လို့ ငါ ပီးချင်သူ အသူ့ကိုမဆို ငါ ပီးနိုင်ရေ။ 7ယေတွက်နန့် သင် ငါ့ကို ဦးညွှန့်ရှိခိုးကေ ဒေအရာအားလုံးကို သင့်ကို ငါ ပီးမေ” လို့ ပြောလီရေ။ 8ယေကေလည်း ကိုယ်တော်ယေရှုက မာရ်နတ်ကို “ကျမ်းစာမာ ‘သင်၏အသျှင်ဖြစ်တေ ဘုရားသျှင် တစ်ပါးတည်းကိုရာ ရှိခိုးကိုးကွယ်ဖြစ်ပြီးကေ သူကိုရာ အလုပ်အကျွေးပြုရဖို့’ လို့ ရီးထားပါရေ” လို့ ပြန်လို့ ပြောလိုက်ပါရေ။ 9ယေခါ မာရ်နတ်က ကိုယ်တော်ကို ဂျေရုဆလင်မြို့ဟိ ဗိမာန်တော်၏အမြင့်ဆုံး နီရာကို ခေါ်လားပြီးကေ “သင်က ဘုရားသျှင်၏သားတော်မှန်ကေ ဒေနီရာက ခုန်ဆင်းလိုက်ပါ။ 10ကျမ်းစာထဲမာ ‘ဘုရားသျှင်က သင့်ကို စောင့်ရှောက်ဖို့အတွက် သူ၏သမ္မာဒေဝါနတ်တိကို မိန့်မှာထားလိမ့်မေ။ 11သင်၏ခြီထောက်တိကို ကျောက်တုံးတိနန့်မတိုက်မိအောင် သူရို့၏လက်တိနန့် ရွက်ထားပါလိမ့်မေ’ လို့ ရီးထားရေအတွက်နန့် သင် နာရလိမ့်မေ မဟုတ်” လို့ ပြောလီရေ။ 12ယေကေလည်း ကိုယ်တော်က “ကျမ်းစာထဲမာ 'သင်၏အသျှင်ဖြစ်တေ ဘုရားသျှင်ကို မစမ်းသပ်ရ' လို့ ဖော်ပြထားပါရေ”လို့ ပြန်လို့မိန့်တော်မူလီရေ။ 13မာရ်နတ်ကလည်း ကိုယ်တော်ကို နည်းမျိုးစုံနန့်ဖြားယောင်း ဆွဲဆောင်ပြီးကေ ကိုယ်တော်ယေရှုဘားက ထွက်လားခဗျာလ် အရာတစ်ချိန် အခွင့်အရီးကောင်းကို စောင့်နီလီရေ။ 14ယေပြီးကေ ကိုယ်တော်ယေရှုက ဉာဏ်အလင်းတော်၏တန်ခိုးတော်နန့် ဂါလိလဲပြည်ကို ပြန်လို့ကြွတော်မူပါရေ။ သူ၏ဂုဏ်သတင်းတိကလည်း နီရာတကာကို ပြန့်လားလီပါရေ။ 15ကိုယ်တော်က ဓမ္မာရုံတိမာ ဟောပြောသွန်သင်ရေခါ လူထုပရိသတ်ကြီးက သူ့ကို ချီးမွမ်းကတ်လီရေ။ 16ယေပြီးကေ ကိုယ်တော်ယေရှုက သူကြီးလာရေအရပ်ဖြစ်တေ နာဇရက်မြို့ကို ကြွတော်မူရေ။ ဥပုသ်နိန့်မာ ကိုယ်တော်က လားနီကျအတိုင်း ဓမ္မာရုံကို လားပြီးကေ ယင်းနီရာမာ သူက ကျမ်းစာဖတ်ဖို့ ရပ်လီရေ။ 17ယေပြီးကေ ကိုယ်တော်ကို ပရောဖက်ဟေရှာယ၏ကျမ်းစာလိပ်အား ပီးလိုက်လီရေ။ ကိုယ်တော်က ယင်းကျမ်းစာအုပ်ကို ဖွင့်လိုက်ရေခါ ယင်းကျမ်းပိုဒ်ကို တွိ့လီရေ။ ကိုယ်တော်က 18“အသျှင်၏ဝိညာဉ်တော်က ငါနန့်တတူ ဟိတော်မူရေ။ ဇာတွက်နန့်ဆိုကေ ဆင်းရဲသားတိအတွက် မင်္ဂလာသတင်းကောင်းကို ဟောပြောဖို့ ဘုရားသျှင်က ငါ့ကို ရွီးချယ်ထားရေအတွက်နန့် ဖြစ်တေ။ ဘုရားသျှင်က အချုပ်ကျနီသူတိ ကင်းလွတ်ခွင့် ရစီဖို့၊ မျက်ကန်းတိ ပြန်မြင်စီဖို့၊ ဖိနှိပ်ခံရသူတိ လွတ်မြောက်စီဖို့နန့် 19ဒေအချိန်ကာလရေ ဘုရားသျှင်က သူ၏လူမျိုးတိကို သူ၏မဟာကရုဏာတော်ကို ပြသဖို့ အချိန်ကာလဖြစ်စွာကို ကြေငြာဖို့ ငါ့ကို စီလွှတ်လိုက်စွာ ဖြစ်တေ” လို့ ဖတ်ပြလီရေ။ 20ယေပြီးကေ ကိုယ်တော်က ကျမ်းစာလိပ်ကို ပိတ်ဗျာလ် ဓမ္မာရုံတာဝန်ခံကို ကမ်းပီးလိုက်ပြီးကေ ထိုင်လိုက်လီရေ။ ဓမ္မာရုံဟိ လူအများရို့ကလည်း ကိုယ်တော်ကို စစိနနာကြည့်နီကတ်ပါရေ။ 21ယေပြီးကေ ကိုယ်တော်က သူရို့ကို “သင်ရို့ နာယူလိုက်ရရေကျမ်းစာပိုဒ်က ဒေနိန့်မာပင် အမှန်တကယ် ဖြစ်လာဗျာလ်” လို့ မိန့်တော်မူပါရေ။ 22လူအများရို့က ကိုယ်တော်ကို ချီးမွမ်းကတ်ပနာ ကိုယ်တော်၏နှုတ်က ထွက်လာရေ အံ့ဖို့ကောင်းရေစကားတိကို အံ့ဩနီကတ်လီရေ။ သူရို့က “ဒေလူက ယောသပ်၏သား မဟုတ်လား” လို့ ပြောကတ်လီရေ။ 23ယေတွက်နန့် ကိုယ်တော်ကလည်း “သင်ရို့က ငါ့ကို ‘ဆီးဆရာက ကိုယ့်ကိုယ်ကို အယင်ကုဖို့လိုရေ’ လို့ ဆိုရေ ဆိုရိုးစကားအတိုင်း ‘ကပေရနောင်မြို့မာ သင်ပြုလုပ်ခရေအရာတိကို ငါရို့ကြားခရရေအတိုင်း သင်၏မြို့ဖြစ်တေ ဒေနီရာမာလည်း ပြုလုပ်ပါ’ လို့ ဧကန်မုချ ပြောကတ်လိမ့်မေ” လို့ မိန့်တော်မူပါရေ။ 24ကိုယ်တော်က ဆက်ပြီးကေ “သင်ရို့ကို ငါ အမှန်ပြောမေ ဇာပရောဖက်ကိုမဆို ကိုယ့်ကြီးပြင်းရေမြို့က လက်မခံကတ်။ 25ငါ အရာအမှန်ပြောရကေ ပရောဖက် ဧလိယလက်ထက်မာ သုံးနှစ်ခွဲလောက် မိုးခေါင်ရေအတွက်နန့် တစ်တိုင်းပြည်လုံး အငတ်ဘေးဒဏ်ခံရရေခါ အစ္စရေးပြည်မာ မုဆိုးမတိအများကြီး ဟိခပါရေ။ 26ယေကေလည်း ဘုရားသျှင်က ဧလိယကို အစ္စရေးပြည်မာဟိရေ ဇာမုဆိုးမတိဘားကိုမဆို ကူညီဖို့ မစီလွှတ်ဘဲ ဇိဒုန်ပြည်ထဲက ဇရတ္တမြို့မာဟိရေ ဂျူးလူမျိုးမဟုတ်ရေမုဆိုးမတစ်ယောက်ဘားကို ကူညီဖို့ စီလွှတ်ခပါရေ။ 27ပရောဖက်ဧလိရှဲလက်ထက်မာလည်း အစ္စရေးပြည်ထဲမာ အနာကြီးရောဂါသည်အများကြီး ဟိပါရေ။ ယေကေလည်း ဘုရားသျှင်ကသူရို့ထဲက တစ်ယောက်ကိုလေ့မကုသခဘဲ ဆီးရီးယားပြည်ဟိ ဂျူးလူမျိုးမဟုတ်ရေ နေမန်ဆိုသူတစ်ယောက်ကိုရာ ကုသပီးခပါရေ” လို့ မိန့်တော်မူပါရေ။ 28ဓမ္မာရုံထဲဟိ ဓမ္မာရုံထဲဟိ လူအများရို့ကလည်း ကိုယ်တော်ပြောရေစကားတိကို ကြားရရေအခါ ကောင်းကောင်းမာန်ပါလားကတ်လီရေ။လူအများရို့ကလည်း ကိုယ်တော်ပြောရေစကားတိကို ကြားရရေအခါ ကကောင်းမာန်ပါလားကတ်လီရေ။ 29ယေတွက်နန့် သူရို့က ထလို့ ကိုယ်တော်ကို မြို့ပြင်သို့နှင်ထုတ်ကတ်ဗျာလ် တောင်စောင်းနားက တိုးချဖို့ မြို့တည်ရေတောင်ထိပ်အစွန်းကို ခေါ်လားကတ်လီရေ။ 30ယေခါ ကိုယ်တော်က လူအကျိုင်လိုက်ကြားထဲမှ ဖြတ်လားဗျာလ် ကြွတော်မူရေ။ 31ယေပြီးကေ ကိုယ်တော်က ဂါလိလဲပြည်ဟိ ကပေရနောင်မြို့ကိုလားဗျာလ် ဥပုသ်နိန့်မာ ဓမ္မာရုံဟိလူအများကို ဟောပြောသွန်သင်လီရေ။ 32ကိုယ်တော်က အခွင့်အာဏာနန့် ဟောပြောသွန်သင်ရေအတွက်နန့် လူတိက သူ၏သွန်သင်ချက်တိကို အံ့ဩချီးမွမ်းကတ်လီရေ။ 33ယင်းဓမ္မာရုံမာ မကောင်းဆိုးဝါးပူးကပ်ခံနီရရေ လူတစ်ယောက် ဟိလီရေ။ ယင်းလူက ကိုယ်တော်ကို 34“နာဇရက်မြို့သား ယေရှု၊ သင် ကျွန်တော်ရို့ကို ဇာလုပ်ပါဖို့လဲ။ ကျွန်တော်ရို့ကို ဖျက်ဆီးဖို့ ကြွလာစွာလား။ သင်ဇာသူလဲ ဆိုစွာကို ကျွန်တော်သိပါရေ။ သင်က အမြင့်မြတ်ဆုံးဘုရားသျှင်၏သားတော် ဖြစ်တေ” လို့ အသံကျယ်ကျယ်နန့်အော်လို့ ပြောလီရေ။ 35ယေခါ ကိုယ်တော်ယေရှုက မကောင်းဆိုးဝါးကို “တိန်းဖိ၊ သူဘားက ထွက်လီ” လို့ အမိန့်ပီးလိုက်တေ။ ယေပြီးကေ မကောင်းဆိုးဝါးက ယင်းလူကို လူတိအလယ်ကောင်မာ မြီထက်ကို လှဲချလိုက်ပြီးကေ မနာစီဘဲနန့် ထွက်လားလီပါရေ။ 36လူအများရို့က အံ့ဩလားကတ်ပြီးကေ “ဒေချင့်က ဇာပိုင် စကားတိလဲ။ ဒေသူက တန်ခိုးအာဏာနန့် မကောင်းဆိုးဝါးတိကို အမိန့်ပီးလိုက်စွာနန့် သူရို့က ထွက်လားရပါကာ” လို အချင်းချင်း ပြောနီကတ်လီရေ။ 37ယေပြီးကေ ကိုယ်တော်၏သတင်းတိကလည်း ထိုဒေသဟိနီရာတိုင်းကို ပျံ့နှံ့လားလီရေ။ 38ကိုယ်တော် ဓမ္မာရုံက ထွက်လာပနာ ရှိမုန်၏အိမ်ကို ကြွရောက်တော်မူရေအချိန်မာ ရှိမုန်၏ယောက္ခမက အပြင်းဖျားနီလို့ လူတိက သူမကို ကုသပီးဖို့ ကိုယ်တော်ယေရှုကို လျှောက်တင်ကတ်ပါရေ။ 39ယေတွက်နန့် ကိုယ်တော်က သူမအနားကို လားရပ်ဗျာလ် အဖျားရောဂါကို ကောင်းအောင် အမိန့် ပီးလိုက်လီရေ။ ယေပြီးကေ သူမက ချက်ချင်း ထဗျာလ် သူရို့ကို စလို့ စားစရာတိနန့် လောကွပ်လုပ်လီရေ။ 40နီဝင်ရေအချိန်ကိုရောက်ရေခါ လူတိက ရောဂါအမျိုးမျိုးစွဲကပ်နီရေ ရောဂါသည်အားလုံးကို ကိုယ်တော်ဘားကို ခေါ်လာကတ်လို့ ကိုယ်တော်က ရောဂါသည် တစ်ယောက်ချင်းစီ အထက်မာ လက်ကိုတင်လို့ သူရို့ကို ကောင်းအောင်ကုသပီးလီရေ။ 41မကောင်းဆိုးဝါးရို့ကလည်း ဝင်ပူးနီရေလူတိဘားက “အသင်က ဘုရားသျှင်၏သားတော်ဖြစ်ပါရေ” လို့ ဟစ်အော်ပနာ ထွက်လားကတ်လီရေ။ မကောင်းဆိုးဝါးတိက ကိုယ်တော်ယေရှုကို မေရှိယအသျှေင်ဖြစ်စွာကို သိနီရေအတွက်နန့် ကိုယ်တော်က သူရို့ကို စကားပြောခွင့် မပီးခပါ။ 42အရာတစ်ရက် မိုးလင်းရေအခါ ကိုယ်တော်က လူသျှင်ကင်းရေနီရာကို ထွက်လားလီပါရေ။ လူထုက ကိုယ်တော့်ကို နီရာတိုင်းမာ လိုက်လို့ရှာကတ်ပြီးကေ ရှာတွိ့လားရေခါ သူရို့ဘားက ထွက်မလားဖို့ ကိုယ်တော်ကို တောင်းပန်ကတ်လီရေ။ 43ယေခါ ကိုယ်တော်က “ငါက အရာမြို့တိမာလည်း ဘုရားသျှင်၏သာသနာတော်အကြောင်း မင်္ဂလာသတင်းကောင်းကို ဟောပြောရဖို့သိ။ ဇာတွက်နန့်ဆိုကေ ဒေပိုင်ဟောပြောဖို့အတွက် ဘုရားသျှင်က ငါ့ကို စီလွှတ်ခစွာဖြစ်တေ” လို့ မိန့်တော်မူပါရေ။ 44ယေပြီးကေ ကိုယ်တော်ယေရှုက ယုဒပြည်တစ်ပြည်လုံးဟိ ဓမ္မာရုံတိမာ ဆက်ဗျာလ် ဟောပြောသွန်သင်လီရေ။
Aktualisht i përzgjedhur:
Luke 4: ntpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.