Luke 14
14
1ဥပုသ်နိန့် တစ်ရက်မာ ကိုယ်တော်ယေရှုက ဖာရိရှဲတိ၏ဂေါင်းဆောင်တစ်ယောက် အိမ်ကို အစားအစာသုံးဆောင်ဖို့ လားရေအခါ ဖာရိရှဲတိနန့် ကျမ်းတတ်ဆရာတိက ကိုယ်တော်ကို အရီးစိုက်လို့ စောင့်ကြည့်နီကတ်ပါရေ။ 2ယင်းနီရာမာ ကိုယ်လက်နာရောဂါ ခံစားနီရရေ လူတစ်ယောက်က ကိုယ်တော်ရှိ့မာ ဟိလီရေ။ 3ကိုယ်တော်က ဖာရိရှဲတိနန့် ကျမ်းတတ်ဆရာရို့ကို “ဥပုသ်နိန့်မာ အနာရောဂါတိကို ကောင်းစီစွာက ပညတ်တော်နန့် ညီလား၊ မညီလား” လို့ မိန်းတော်မူရေ။ 4ယေကေလည်း ယင်းသူရို့က ပြန်လို့မဖြေဘဲ နီကတ်ပါရေ။ ယေတွက်နန့် ကိုယ်တော်က ယင်းရောဂါသည်ကို လက်နန့်တို့ဗျာလ် ကုသပီးပနာ သူ့အိမ်ကို ပြန်လွတ်လိုက်ပါရေ။ 5ယေပြီးကေ ကိုယ်တော်က သူရို့ကို “ဥပုသ်နိန့်မာ သင်ရို့ထဲက သင်ရို့၏အသျှေ ယေမှမဟုတ် နွား ရီတွင်းထဲကို ကျလားခကေ ဥပုသ်နိန့်ဖြစ်လို့ မဆွဲတင်ဘဲနီဖို့လား” လို့ မိန့်တော်မူရေ။ 6ယေကေလည်း သူရို့က ထိုအရာတိနန့် ပတ်သတ်လို့ ဇာတစ်ခုလေ့ပြန်လို့ မပြောနိုင်ကတ်ပါဗျာလ်။ 7ဖိတ်ကြားခြင်းခံထားရရေ တစ်ခြားအာဂန္တုတိက အရီးပါရေနီရာမာ ထိုင်ဖို့ ရွီးချယ်နီစွာကို ကိုယ်တော် မြင်ရေအခါ ပုံဥပမာတစ်ခုကို မိန့်တော်မူလီရေ။ 8ကိုယ်တော်က “တစ်ယောက်ယောက်က သင့်ကို သမက်တက်ပွဲကိုဖိတ်ကေ အရီးပါရေနီရာမာ မထိုင်ကတ်ပါကေ့။ ဇာအတွက်နန့်ဆိုကေ သင့်ထက် အရီးပါသူကို ဖိတ်ထားချင် ဖိတ်ထားနိုင်ရေအတွက် နန့်ဖြစ်တေ။ 9တကယ်လို့ ယင်းလူရောက်လာကေ သင်ရို့နှစ်ယောက်စလုံးကို ဖိတ်ထားသူက သင့်ဘားကိုလာပြီးကေ ‘သင့်နီရာကို ဒေသူ့ကို ပီးလိုက်ပါ’ လို့ လာပြောရေအခါမှ သင်က အရှက်ရဗျာလ် အရီးမပါရေ နီရာမာ လားထိုင်ရလိမ့်မေ။ 10ယေကေလည်း သင်ရို့က သမက်တက်ပွဲကို လားရေအခါ အရီးမပါရေနီရာမာထိုင်နီကေ သင့်ကို ဖိတ်ထားသူက သင်ဘားကို လာပနာ ‘မိတ်ဆွီ၊ အရီးပါရေနေရာမာ လာထိုင်ပါ’ လို့ လာပြောရေအခါ သင်က အရာအာဂန္တုတိရှိ့မာ ဂုဏ်ယူစရာ ဖြစ်ပါလိမ့်မေ။ 11ဇာတွက်နန့်ဆိုကေ မိမိကိုယ်ကို အမွန်းတင်ရေလူတိုင်းက နှိမ့်ချစွာကို ခံရပြီးကေ မိမိကိုယ်ကို နှိမ့်ချရေလူတိုင်းကလည်း ချီးမွမ်းစွာကို ခံရဖို့အတွက်နန့် ဖြစ်တေ” လို့ မိန့်တော်မူလီရေ။ 12ယေပြီးကေ ကိုယ်တော်က သူ့အားဖိတ်ထားရေလူကို “သင်က နီခင်းစာ ယေမှမဟုတ် ညစာ စားဖို့အတွက် ဖိတ်ရေအခါ သင်၏မိတ်ဆွီတိ၊ မိသားစုတိ၊ အမျိုးတိနန့် ချမ်းသာရေ အိမ်နားပါးချင်းတိကို မဖိတ်ပါကေ့။ သင် ယင်းပိုင်လုပ်ကေ ယင်းလူတိက သင့်ကို ပြန်လို့ဖိတ်ဗျာလ် ကျွေးကတ်ပါလိမ့်မေ။ 13ယင်းအစား သင်က အစားအသောက်ကျွေးမွေးရေအခါ ဆင်းရဲသားတိ၊ ကိုယ်အင်္ဂါချို့ယွင်းသူတိ၊ မစွမ်းပြင်းသူတိ၊ မျက်ကန်းတိကို ဖိတ်ပါ။ 14သင် ယင်းပိုင်လုပ်ကေ သင့်က မင်္ဂလာဟိလိမ့်မေ။ ဇာတွက်နန့်ဆိုကေ သင်ဖိတ်ထားသူတိက သင့်ကို ပြန်လို့ မကျွေးမွေးနိုင်ရေအတွက်နန့် ဖြစ်တေ။ ယေကေလည်း ဘုရားသျှင်က ဖြောင့်မတ်သူတိ သီပြီးကေအသက်ပြန်ရင်လာစီရေအချိန်မာ သင့်ကို ကောင်းကျိုးချမ်းသာပြန်ပီးပါလိမ့်မေ” လို့ မိန့်တော်မူလီရေ။ 15ကိုယ်တော်နန့်တတူ စားပွဲမာ ထိုင်နီရေ အာဂန္တုတိထဲက တစ်ယောက်က ယင်းပိုင် မိန့်တော်မူစွာကို ကြားရေခါ ကိုယ်တော်ကို “ဘုရားသျှင်၏သာသနာတော်ထဲ စားပွဲသောက်ပွဲမာ စားသောက်ခွင့် ရရေလူက မင်္ဂလာဟိပါရေ” လို့ လျှောက်လီရေ။ 16ကိုယ်တော်က ယင်းသူ့ကို “လူတစ်ယောက်က စားပွဲသောက်ပွဲကြီးကို ပြင်ဆင်ပနာ အာဂန္တုအများကြီးကို ဖိတ်ထားပါရေ။ 17စားပွဲသောက်ပွဲကျင်းပဖို့ အချိန်ကျလာရေအခါ သူက သူ့အငှါးသားတစ်ယောက်ကို ဖိတ်ထားရေလူတိဘားကို လွတ်ပြီးကေ ‘အဂု အားလုံး အလိုက်သင့်ဖြစ်နီဗျာလ်အတွက်နန့် စားပွဲသောက်ပွဲကို လာကတ်ပါ’ လို့ ပြောခိုင်းလိုက်လီရေ။ 18ယေကေလည်း သူရို့အားလုံးက အကြောင်းအမျိုးမျိုးပြပြီးကေ မလာနိုင်ရေအကြောင်းကို ပြောကတ်ပါရေ။ ပထမတစ်ယောက်က ‘ငါ လယ်တစ်ကွက် ဝယ်ထားလို့ ယင်းလယ်ကို မဖြစ်မနီ လားကြည့်ရဖို့သိ။ ကျွန်တော် မလာနိုင်ဗျာလ်ဖြစ်လို့ အားနာစရာကောင်းလားဗျာလ်’ လို့ ပြောလီရေ။ 19အရာတစ်ယောက်က ‘ငါ နွားဆယ်ကောင်ဝယ်ထားရေ ယင်းနွားတိကို လားပနာ စမ်းကြည့်ရဖို့သိ။ ကျွန်တော် မလာနိုင်ဗျာလ်ဖြစ်လို့ အားနာစရာကောင်းလားပါဗျာလ်’ လို့ ပြောလီရေ။ 20အရာတစ်ယောက်ကလည်း ‘ကျွန်တော်က အဂုပင် မယားယူလိုက်သိ ဖြစ်လို့ မလာနိုင်သိပါ’ လို့ ပြောလိုက်ပါရေ။ 21အငှါးသား ပြန်လာပနာ ယင်းအကြောင်းအရင်းတိကို သူ၏သခင်အား ပြောပြလီရေ။ ယေခါ အိမ်သျှင်က ကောင်းကောင်းမာန်ပါလားပနာ သူ့အငှါးသားကို ‘မြို့ထဲကလမ်းမတိနန့် လမ်းကြားတိကို အယင်လားဗျာလ် ဆင်းရဲသားတိ၊ ကိုယ်အင်္ဂါချို့ယွင်းသူတိ၊ မစွမ်းပြင်းသူတိနန့် မျက်ကန်တိကို အယင်လားပြီးကေ ခေါ်ခပါ’ လို့ ခိုင်းလိုက်လီရေ။ 22ယင်းအငှါးသား ပြန်ရောက်ရေခါ ‘သခင်ခိုင်းရေအတိုင်း လုပ်ပြီးပါဗျာလ်။ ယေကေလည်း အရာလူတိအတွက် နီရာတိအများကြီးကျန်ပါသိရေ’ လို့ ပြောလီရေ။ 23ယေခါ သခင်ကလည်း ‘ယင်းပိုင်ဆိုကေ မြို့ပြင်က လမ်းတိနန့် တောလမ်းကြားတိဟိ လူအားလုံးကို ငါ့အိမ်ပြည့်အောင် မရမကခေါ်ခပါ။ 24သင့်ကို ငါ ပြောမေ။ ငါ အယင်ဆုံး ဖိတ်ထားရေလူတိထဲက တစ်ယောက်လေ့ ငါ့ပြင်ဆင်ထားရေ အစားအသောက်တိကို မြည်းခွင့် ရလိမ့်မေမဟုတ်’ လို့ အငှါးသားကို ပြောထားလီရေ” လို့ ဆိုပနာ မိန့်တော်မူပါရေ။ 25ယေပြီးကေ လူထုပရိတ်သတ်အများကြီးက ကိုယ်တော်နန့်တတူ လိုက်ပါလာရေအခါ ကိုယ်တော်က လှည့်လို့ကြည့်ဗျာလ် ယင်းသူရို့ကို 26သင်ရို့က ငါ့တပည့်တိဖြစ်ချင်ကေ “သင်ရို့က ကိုယ့်အမိဖ၊ မယား၊ သား၊ သမီး နန့်ညီအစ်ကို မောင်နှမတိအပါအဝင် ကိုယ့်ကိုယ်ကိုထက်တောင် ငါ့ကို ပိုလို့သျှစ်သင့်ရေ။ ယင်းပိုင် မဟုတ်ကေ သင်ရို့က ငါ၏တပည့်တော် ဖြစ်လိမ့်မေမဟုတ်။ 27ကိုယ့်လက်ဝါးကပ်တိုင်ကို ကိုယ်ထမ်းဗျာလ် ငါ့နောက်က မလိုက်နိုင်ကေ ငါ့တပည့်တော် မဖြစ်နိုင်ပါ။ 28သင်ရို့ထဲက တစ်ယောက်ယောက်က မျှော်စင်တစ်ခုကို ဆောက်ဖို့ဆိုကေ ယင်းမျှော်စင်ပြီးအောင် ဆောက်ဖို့အတွက် ဒင်္ဂါးလောက်ငမှု ဟိ မဟိကို သိအောင် ပထမဆုံး ထိုင်ဗျာလ် ဇာလောက်ကုန်ဖို့ဆိုစွာကို မတွက်ဘဲမနီ။ 29တကယ်လို့ ယင်းပိုင် မတွက်ထားကေ သူက အုပ်မြစ်ချပြီးကေ မျှော်စင်ကိုပြီးအောင် ဆောက်နိုင်ဖို့ မဟုတ်ပါ။ ယင်းချင့်ကို မြင်ရေလူတိလည်း သူ့ကို သရော်ပနာ 30‘ဒေသူက မျှော်စင်ကို စလို့ဆောက်နိုင်ကေလည်း ပြီးအောင် မဆောက်နိုင်လား’ လို့ ပြောကတ်လိမ့်မေ။ 31ယင်းပိုင်ဗျာလ် ဘုရင်တစ်ပါးက သူ့ကို တိုက်ဖို့လာရေ စစ်သည်အင်အား နှစ်သောင်းဟိရေ ဘုရင်ကို သူ၏စစ်သည်အင်အား တစ်သောင်းနန့် ပြန်တိုက်လို့ ရ၊ မရ ဆိုစွာကို အယင်ဆုံးထိုင်လို့ မစဉ်းစားမဆုံးဖြတ်ဘဲ နီလိမ့်မေမဟုတ်။ 32တကယ်လို့ မတိုက်နိုင်ကေ သူကိုလာပနာ တိုက်ရေဘုရင်က အဝီးမာဟိနီစိုင် သူ၏သံတမန်တိကို စီလွှတ်ပြီးကေ စစ်ပြေငြိမ်းချမ်းရေးစကားကို ကမ်းလှမ်းရလိမ့်မေ။ 33ယင်းနည်းတိုင်းဗျာလ် သင်ရို့မာဟိသမျှ ပစ္စည်းဥစ္စာတိကို မစွန့်လွတ်နိုင်သမျှ ငါ၏တပည့်တော် မဖြစ်ပါနိုင်” လို့ မိန့်တော်မူလီရေ။ 34ကိုယ်တော်က ဆက်ပြီးကေ “ဆားက ကောင်းမွန်ပါရေ။ ယေကေလည်း ဆားက အငံဓါတ် ပျောက်လားကေ ပြန်လို့ငံအောင် ဇာပိုင်လုပ်နိုင်ဖို့လဲ။ 35ယင်းဆားက မြီကြီးအတွက်ဖြစ်စီ၊ မြီဩဇာအတွက်ဖြစ်စီ အသုံးမဝင်လို့ အပြင်ကို စွန့်ပစ်လိုက်လိမ့်မေ။ နားဟိပြီးကေ နာယူနိုင်ရေလူတိ အာရုံစိုက်လို့ နားထောင်ကတ်ပါ” လို့ မိန့်တော်မူလီရေ။
Aktualisht i përzgjedhur:
Luke 14: ntpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.