Luke 13
13
1ယင်းအချိန်မာ လူတစ်ချို့ရို့က ကိုယ်တော်ယေရှုဘားကို လာပြီးကေ ပိလတ်ဘုရင်ခံက ဘုရားသျှင်ကို ပူဇော်နီရေ ဂါလိလဲပြည်သားတစ်ချို့ကို စစ်သီတိ စီလွှတ်ပနာ သတ်ခိုင်းခစွာကို လျှောက်တင်ကတ်လီရေ။ 2ယေခါ ကိုယ်တော်က “ယင်းလူတိက ဂါလိလဲပြည်မာဟိရေ အရာလူတိထက် ပိုလို့အပြစ်ကြီးနီလို့ ဒေပိုင်မျိုးအသက်ခံရစွာလို့ သင်ရို့ထင်လား။ 3ယင်းပိုင် မဟုတ်ပါ။ သင်ရို့ကို ငါ ပြောချင်စွာက သင်ရို့အားလုံးလည်း သင်ရို့၏အပြစ်ဒုစရိုက်ကနီ နောင်တသံဝေဂ မရကေ ယင်းပိုင်သီရလိမ့်မေ။ 4ရှိလောင်ရီကန်အနားမာဟိရေမျှော်စင် ပြိုကျ ရေခါ လူတစ်ဆယ့်သျှစ်ယောက် အထက်ကို ဖိမိလို့ သီခကတ်ရရေ။ ယင်းသူရို့က ဂျေရုဆလင်မြို့မာ နီထိုင်ရေ အရာလူတိအားလုံးထက် ပိုလို့အပြစ်ဒုစရိုက်များရေလို့ သင်ရို့ထင်နီကတ်လာ။ 5ယင်းပိုင် မဟုတ်ပါ။ သင်ရို့ကို ငါ ပြောချင်စွာက သင်ရို့အားလုံးကလည်း သင်ရို့၏အပြစ်ဒုစရိုက်တိကနီ နောင်တသံဝေဂ မရကေ ယင်းပိုင် သီရပါလိမ့်မေ” လို့ မိန့်တော်မူရေ။ 6ယေပြီးကေ ကိုယ်တော်က ပုံဥပမာနန့် မိန့်တော်မူလီရေ။ ကိုယ်တော်က “လူတစ်ယောက်၏စပျစ်ခြံမာ စိုက်ထားရေ သဖန်းပင်တစ်ပင် ဟိပါရေ။ သူက ယင်းသဖန်းပင်မာ အသီးလားရှာရေခါ အသီးတစ်လုံးလေ့ မတွိ့ရပါ။ 7ယေတွက်နန့် သူက ဥယျာဉ်မှူးကိုခေါ် ပြီးကေ ‘ငါက သုံးနှစ်ပတ်လုံး ဒေသဖန်းပင်မှ အသီးကို လားရှာကေလည်း မတွိ့ရပါ။ ဒေသဖန်းပင်ကို ခွက်ပစ်လိုက်ပါ။ ဒေသဖန်းပင်က မြီထက်မာ အကျိုးမဟိ နီရာယူနီရေ’ လို့ ပြောပါရေ။ 8ယေကေလည်း ဥယျာဉ်မှူးက ‘ဒေအပင်ကို အရာတစ်နှစ်လောက်ထားပါဖိ၊ ကျွန်တော် ဒေအပင် ပတ်ပတ်လည်က မြီတိကို ဆွပြီးကေ မြီဩဇာ ထည့်ကြည့်ပါမေ။ 9ယင်းပိုင်ဆိုကေ လာဖို့နှစ်မာ အသီး သီးချင် သီးပါလိမ့်မေ။ တကယ်လို့ အသီး မသီးခါမှ ခွတ်ပစ်ပါမေ’ လို့ ပြောလီရေ” ဆိုဗျာလ် မိန့်တော်မူရေ။ 10ဥပုသ်နိန့် တနိန့်မာ ကိုယ်တော်က ဓမ္မာရုံတစ်ခုမာ ဟောပြောသွန်သင်တော်မူပါရေ။ 11ယင်းနီရာမာ တစ်ဆယ့်သျှစ်နှစ်ကြာအောင် မကောင်းဆိုးဝါးကိုင်ထားလို့ မကျိုင်းမမာဖြစ်နီရေ မမာ့တစ်ယောက်ဟိနီရေ။ သူမက ခါးကုန်းဗျာလ် တတည့်မရပ်နိုင်ပါ။ 12ကိုယ်တော်က ယင်းမမာ့ကိုမြင်ရေခါ သူမကိုခေါ်ဗျာလ် “ကလွေမယ်၊ သင်က အဂု မကျိုင်းမာစွာကနီ လွတ်မြောက်ဗျာလ်” လို့ မိန့်တော်မူလီရေ။ 13ယေပြီးကေ ကိုယ်တော်က လက်ကို သူမဘားမာ တင်လိုက်ရေခါ ချက်ချင်းပင် သူမ၏ခါးစွာ တတည့်ဆန့်နိုင်ဗျာလ် ဘုရားသျှင်၏ဂုဏ်တော်ကို ချီးမွမ်းပူဇော်လီရေ။ 14ယေကေလည်း ဥပုသ်နိန့်မာ ကိုယ်တော်က အနာရောဂါကိုကောင်းလားစီလို့ ဓမ္မာရုံတာဝန်ခံက မာန်ပါပနာ လူထုပရိတ်သတ်တိကို “အလုပ်လုပ်တေရက် ခြောက်ရက်ဟိရေ။ ယင်းရက်တိမာ အနာရောဂါကောင်းစီဖို့ လာကတ်ပါ။ ဥပုသ်နိန့်မာ မလာကတ်ပါကေ့” လို့ ပြောလီရေ။ 15ယေခါ ကိုယ်တော်က “သူတော်ကောင်းအကွန်ဆောင်နီရေလူတိ၊ သင်ရို့အားလုံးက ဥပုသ်နိန့်မာ သင်ရို့မာဟိရေ နွားတိ ယေမှမဟုတ် မြည်းတိကို တဲထဲမှ ကြိုးဖြီပြီးကေ ရီတိုက်ဖို့ ခေါ်လားကတ်တေ မဟုတ်လား။ 16ယင်းပိုင်ဆိုကေ တစ်ဆယ့်သျှစ်နှစ်ပတ်လုံး မာရ်နတ်ကိုင်ထားစွာခံရရေ အာဗြဟံ၏သမီး ဒေမမာ့ကိုလည်း ဥပုသ်နိန့်မာ လွတ်ပီးသင့်ရေ မဟုတ်လား” လို့ ပြန်လို့မိန့်တော်မူရေ။ 17ကိုယ်တော်မိန့်တော်မူလိုက်ရေအခါ ကိုယ်တော့်ကိုဆန့်ကျင်နီသူ အားလုံးကလည်း အရှက်ရစီခပါရေ။ ယေကေလည်း လူထုပရိတ်သတ်ကြီးက ကိုယ်တော် ပြုလုပ်ခရေအံ့ဖွယ်အမှုကိစ္စတိအတွက် ဝမ်းသာအားရကတ်လီရေ။ 18ယေပြီးကေ ကိုယ်တော်က “ဘုရားသျှင်၏သာသနာတော်က ဇာအရာနန့်တူလဲ။ ယင်းအရာကို ငါ ဇာချင့်နန့်နှိုင်းပြရဖို့လဲ။ 19ယင်းချင့်က မုန်ညှင်းစိbနန့်တူရေ။ လူတစ်ယောက်က အစိကိုယူပနာ မိမိဥယျာဉ်မာစိုက်ပါရေ။ ယင်းအစိက အပင်ကြီးဖြစ်လာဗျာလ် ငှက်တိကလည်း အကိုင်းအခက်တိမာ အသိုက်တည်လို့နီကတ်ပါရေ” လို့ မိန့်တော်မူရေ။ 20ကိုယ်တော်က ဆက်ပြီးကေ “ဘုရားသျှင်၏သာသနာတော်ကို ဇာအရာတိနန့် ထပ်လို့နှိုင်းပြရဖို့လဲ။ 21ယင်းချင့်ရေ တဆီးနန့်တူပါရေ။ မမာ့တစ်ယောက်က တဆီးအနည်းသျှေကို ယူပြီးကေ ဂျုံမှုန့်အများကြီးနန့်ရောဗျာလ် နယ်လိုက်ရေအခါ မုန့်နှစ်တစ်ခုလုံး ပွားလားစီပါရေ” လို့ မိန့်တော်မူလီရေ။ 22ယေခါ ကိုယ်တော်က ခရီးစိုင်တစ်လျှောက်လုံးမာဟိရေ မြို့ရွာတိက လူထုပရိတ်သတ်တိကို ဟောပြောသွန်သင်ယင်း ဂျေရုဆလင်မြို့ကို ကြွလီရေ။ 23လူတစ်ယောက်က ကိုယ်တော်ကို “အသျှင်၊ လူအနည်းသျှေရာ ကယ်တင်စွာခံရပါဖို့လား” လို့ လျှောက်တင်လီရေ။ ကိုယ်တော်ကလည်း 24“သင်ရို့က ကျဉ်းနီရေတန်းခါးပေါက်နန့်တူရေ ဘုရားသျှင်သာသနာတော်ထဲကို ဝင်နိုင်ဖို့ ကြိုးစားကတ်ပါ။ သင်ရို့ကို ငါ ပြောမေ။ လူတိအများကြီးက ယင်းတန်းခါးပေါက်မှ ဝင်နိုင်ဖို့ ကြိုးစားကေလည်း သူရို့က မဝင်နိုင်ကတ်ပါ။ 25အိမ်သျှင်က ထလာပနာ တန်းခါးပိတ်လိုက်ကေ သင်ရို့က အပြင်မာ ရပ်ဗျာလ် တန်းခါးကို ခေါက်ပနာ ‘ဆရာ၊ တန်းခါးဖွင့်ပီးပါ’ လို့ ပြောရလိမ့်မေ။
ယေကေလည်း အိမ်သျှင်က ‘သင်ရို့ ဇာကလာစွာကို ငါမသိ’ လို့ ပြန်လို့ပြောလိမ့်မေ။ 26ယေခါ သင်ရို့က ‘ကျွန်တော်ရို့ရေ သင်နန့်တတူ စားသောက်ခဖူးပါရေ။ သင်က ကျွန်တော်ရို့၏မြို့ဟိလမ်းတိမာလည်း ဟောပြောသွန်သင်ခဖူးပါရေ’ လို့ ပြန်လို့ပြောကတ်လိမ့်မေ။ 27ယေခါ သူက ‘သင်ရို့ ဇာအရပ်ကလာမှန်း ငါမသိ။ အဆိုးအရွားတိ၊ ငါ့ဘားက လားလီကတ်’ လို့ ပြောလိမ့်မေ။ 28သင်ရို့ အပြင်ကိုနှင်ထုတ် ခံရရေအချိန်မာ ဘုရားသျှင်၏သာသနာတော်ထဲမာ အာဗြဟံc၊ ဣဇက်၊ ယာကုပ်နန့် ပရောဖက်တိကို မြင်ရရေအခါ သင်ရို့က ယင်းနီရာမာ အံကြိတ်ပနာ ဝမ်းနည်းပက်လက် ငိုကတ်ရလိမ့်မေ။ 29လူတိက အရှိ့၊ အနောက်၊ တောင်၊ မြောက်အရပ်တိက လာဗျာလ် ဘုရားသျှင်၏သာသနာတော် အထဲဟိ အခြားသူတိနန့်တတူ ထိုင်လို့ စားသောက်ကတ်လိမ့်မေ။ 30အဂု လူတိအတွက် အရီးမပါသူတိက ဘုရားသျှင်အတွက် ကောင်းကောင်းအရီးပါသူတိဖြစ်လာဗျာလ် အဂု လူတိအတွက် အရီးပါသူတိက ဘုရားသျှင်အတွက် အရီးမပါသူတိ ဖြစ်ကတ်လိမ့်မေ” လို့ မိန့်တော်မူလီရေ။ 31ယင်းအချိန်မာ ကိုယ်တော်ယေရှုဘားကို ဖာရိရှဲတစ်ချို့ရောက်လာပြီးကေ “အုပ်ချုပ်သူဟေရုဒ်က သင့်ကို သတ်ချင်နီလို့ ဒေနီရာက အဝီးကို ထွက်လားလီပါ” လို့ လျှောက်တင်လီရေ။ 32ယေခါ ကိုယ်တော်က ယင်းသူရို့ကို “လိမ်ပနာ လှည့်စားတတ်တေ ခဲဝါနန့် တူရေ ယင်းဟေရုဒ်ကို လားပြောကတ်ပါ။ ငါက ဒေနိန့်နန့် နက်ဖန် မကောင်းဆိုးဝါးတိကို နှင်ထုတ်ပနာ မကျိုင်းမာသူတိကိုလည်း ကျိုင်းမာစီပြီးကေ သုံးရက်မြောက်တေနိန့်မာ ငါ့အမှုကိစ္စ ပြီးလိမ့်မေလို့ လားပြောကတ်ပါ။ 33ယေကေလည်း ပရောဖက်တိရေ ဂျေရုဆလင်မြို့မှအပ တစ်ခြားအရပ်မာ မသီသင့်ရေအတွက်နန့် ငါက ဒေနိန့်၊ နက်ဖန်နန့် သန်ဖက်ခါအထိ ငါခရီးဆက်လို့လားရဖို့သိ” လို့ မိန့်တော်မူပါရေ။ 34ကိုယ်တော်က ဆက်ပြီးကေ “အို ဂျေရုဆလင်မြို့သားရို့၊ ငါက သင်ရို့အတွက် ကောင်းကောင်း ဝမ်းနည်းပူဆွီးရရေ သင်ရို့က ပရောဖက်တိကို အခါခါသတ်ခကတ်တေ။ သင်ရို့ဘားကို ဘုရားသျှင်စီလွှတ်တေ အခြားသူရို့ကိုလည်း ကျောက်ခဲနန့် ပစ်ခကတ်တေ။ ကြက်မက သူ၏ကြက်သျှေတိကို အတောင်အောက်မာ ကာကွယ်ထားရေပိုင် ငါကလည်း သင်ရို့ကို အကြိမ်ကြိမ်အခါခါ ကာကွယ်ချင်ခကေလည်း သင်ရို့က ငါ့ကို အလိုမဟိကတ်။ 35ကြည့်ကတ်ပါ၊ သင်၏ဗိမာန်တော်ကလည်း စွန့်ပစ်စွာကိုခံရလိမ့်မေ။ သင်ရို့က ‘အသျှင်၏အခွင့်အာဏာနန့် ကြွလာသူစွာ မင်္ဂလာဟိပါရေ’ လို့ ပြောလာဖို့အချိန် မရောက်ခင်အထိ သင်ရို့ ငါ့ကို အရာတစ်ကြိမ် မြင်တွိ့ရဖို့ မဟုတ်” လို့ မိန့်တော်မူလီရေ။
Aktualisht i përzgjedhur:
Luke 13: ntpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.