मत्ती 16
16
अचम्मको कामको माग
(मर्क. 8:11-13; लूक. 12:54-56)
1फरिसीनको समुह और सदुकीनको समुह आए, और बाको जाँच करन स्वर्ग मैसे एक शक्तिशाली चमत्कार दिखाएदे करके बासे माँग करीं। 2तओ बा बिनके जबाफ दइ, “संझा होतहए तओ तुम कहेकर्त हओ, कल दिन अच्छो होन बारो हए, काहेकी बादर लाल हए। 3और सुबेरे कहात हओ, आज आँधी आबैगी काहेकी बादर लाल और धुम्लो हए। तुम बादरको अवस्था देखके दिन कैसो हुइहए करके छुट्टेयन जानत हओ, पर समयको चिन्हको अर्थ खोलन नाए जानत हओ, 4खराब और व्यभिचारी पिढी शक्तिशाली काम मागत हएं, पर योनाको शक्तिशाली चमत्कार बाहेक और चिन्हा बिनके नाए देहओं।” और बिनके छोडके बा चलोगओ।
फरिसीनको समुह और सदुकीनको समुहको खमिर
(मर्क. 8:14-21)
5येशूके चेला अपन सँगमे पुगन बारो खानु लैजान भुलगए रहएं, और नैयाँमे बिनके सँग एकए रोटी रहए। 6येशू बिनसे कही, “ध्यान देओ, फरिसीनको समुह और सदुकीनको समुहको खमिरसे होसियार रहियओ।”
7बे आपसमे सल्लहा करन लागे, “हमर सँग रोटी नैयाँ बहेमारे बा कही हुइहए।”
8येशू जा बात पता पाएके कही, “ए अबिश्वासी! रोटी नाए हए कहिके काहे तुम सल्लहा करत हओ? 9का तुम हबए नाए बुझत हओ? पाँच हजारके ताहीं पाँच रोटीकी बात तुमके हबए याद नैयाँ? तुम कित्नो डलैया बटोरे रहओ? 10और चार हजार आदमीनके ताहीं सात रोटी रहएं तओ कित्नो डलैया तुम बटोरे रहओ? 11मए तुमसे, रोटीको बारेमे नाए कहो हओं करके तुम काहे नाए बुझत हओ? पर मए त फरिसीनको समुह और सदुकीनको समुहको खमिरसे होसियार रहियओ कहिके कहो हओं।” 12तओ बे बुझीं, कि बा रोटीको खमिर नाए पर फरिसीनको समुह और सदुकीनको समुहको शिक्षासे होसियार रहन कही हए।
पत्रुसको स्वीकार
(मर्क. 8:27-30; लूक. 9:18-26)
13येशू कैसरिया फिलिप्पी सहरके ढिँगैके गाउँमे आओ, बा अपन चेलनसे पुँछी, “आदमी, आदमीको लौंणाके कौन हए कहिके कहात हएं?”
14चेला बाके जबाफ दइं, “कोइ कहात हएं बप्तिस्मा देन बारो यूहन्ना, कोइ एलिया, और कोइ यर्मिया और कोइ अगमबक्ता मैसे कोइ एक जनै हुइ सकत हए।”
15बा बिनसे पुछी, “तुम मोसे का कहात हओ मए कौन हओं?”
16सिमोन पत्रुस जबाफ दइके बासे कही, “तुम ख्रीष्ट हओ, जीवित परमेश्वरको लौंणा।”
17येशू बिनसे कही, “योनाको लौंणा सिमोन, तुम धन्य हओ। काहेकी आदमीको शरीर और खुनसे जा प्रकट नाए भओ हए, पर स्वर्गमे होन बारो मिर दौवासे प्रकट भओ हए। 18मए तुमसे कहात हओं, कि तुम पत्रुस हओ। मए मिर मण्डली जा चट्टान उपर स्थापित करंगो, और पातालको फाटक बो उपर बिजय नाए हुइपए हए। 19मए तुमके स्वर्गको राज्यको चाभी देमंगो। जो तुम पृथ्वीमे बाँधैगे, सो स्वर्गमे बँधजाबैगो, और जो तुम पृथ्वीमे खोलैगे, सो स्वर्गमे खुलजएहए।” 20बा ख्रीष्ट हए कहिके कोइके नाए बतामएं कहिके येशू चेलनके कडा चेतावनी दइ।
अपनी मृत्युके बारेमे येशूकी भबिष्यबाणी
(मर्क. 8:31-33; लूक. 9:22)
21येशूके कैसे यरूशलेम सहरमे जानपणैगो, और यहूदी अगुवनको समुह और मुखिया यहूदी पुजारी और मोशाको नियम कानुन सिखान बारेसे बहुत कष्ट भोगन पणैगो, मरन पणैगो और तिसरो दिनमे जिन्दा हुइके उठन पणैगो करके येशू बहे बेरासे अपन चेलनके बातनलागो।
22पत्रुस बाके एक घेन लैजाएके डाँटन लागो, “परमेश्वर अइसो नाए करए, प्रभु! तुमर उपर अइसो कभु नाए हुइहए।”
23तओ घुमके बा पत्रुससे कही, “ए शैतान, मिर ठिनसे हटजा। तए मिर ताहीं बाधा होत हए। काहेकी तए परमेश्वरके बातमे नाए पर तए आदमीनके बातमे ध्यान देतहए।”
चेलनके करन बारो त्याग
(मर्क. 8:34-9:6; लूक. 9:23-27)
24तओ येशू अपन चेलनसे कही, “कोइ मिर पिच्छु आनके इच्छा करैगो कहेसे बो अपनी इच्छन्के त्यागए और अपन क्रूस उठाएके मिर चेला बननके ताहीं आबए। 25काहेकी जौन अपन प्राण बचानके इच्छा करत हए, बो बोके खोबैगो। पर मिर और अच्छो समाचारके ताहीं अपन प्राण गुमान बारो, बो बचाओ जाबैगो। 26सारा संसार पाएके फिर अपन प्राण खोबैगो कहेसे, आदमीके का फाइदा हुइहए? और आदमी अपन प्राणके सट्टामे का दइ पएहए? 27काहेकी आदमीको लौंणा अपन दौवाके महिमामे अपन स्वर्गदूत सँग अएहए, और बो बेरा बा हरएक आदमीनके बोको काम अनुसार प्रतिफल देहए। 28नेहात्तओ, मए आदमीको लौंणा, तुमसे कहात हओं, तुम मैसे बहुत आदमी जौन हियाँ ठाणे हओ, तुम परमेश्वरको राज्यके अपना मरनसे अग्गु शक्तिके सँग आत देखैगे।”
Aktualisht i përzgjedhur:
मत्ती 16: THRNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.