लुका 7
7
रोमि कप्तानकर बिस्वास
(मति ८:५-१३)
1येसुन मान्छेल्को भिडकाइ सिछ्या दिसक्ल पछि कफर्नहुम सहरनाइ जाइले। 2उछि रोमि कप्तानकर एकदम मया गर्ल नोकर बिरामि हकिके मरइ आँट्ल रइल। 3कप्तानिन येसुकर बारेनाइ सुन्लपछि “मोर नोकरलाइ आइके बिसेक पार्देउ” बाजिके यहुदि अगुवाल्काइ येसुकर उछि बिन्ति गरइ पाठाइल्याक। 4ह्व यहुदि अगुवालत येसुकर उछि आइके बिन्ति गर्तिन बाज्ला, “रोमि कप्तान साँच्चिनइ तोर सायता पाइनार योग्यकर आछ। 5किनारइभने होइनिन हाम्रो जातिल्काइ मया गर्छइ र हाम्रो लागि सभाघर पुनि बानाइदिलाछ।”
6येसु होल्कोसिन जाइले। येसु कप्तानकर घर नजिकइ आइपुग्तिन कप्तानिन आफ्ने साथेकख्यानकाइ येसुकर उछि इन्खा खबर बलिके पाठाइले, “हे पर्भु, दुख जुनगर, मुइ तुइलाइ आफ्ने घरनाइ लाकाइनार योग्यकर बइने, 7मुइ आफि पुनि तोर अगाडि आइ योग्यकर बइने। तर उछ्यान ने तुइनिन आग्या गर्दिक, र मोर नोकर बिसेक हकिहाल्छइ। 8किनारइभने मुइ आफि पुनि हाकिमको अधिननाइ बस्नार मानुस हो, अनि मोर अधिननाइ सिपाइलत आछत। मुइ एउटोलाइ ‘जा’ बल्छिन अनि ह्व जाइछइ, अर्कोलाइ ‘आबे’ बल्छिन अनि ह्व आइछइ, मोर नोकरलाइ ‘ह्य गर’ बल्छिन होइनिन गर्छइ।”
9ह्य कुरो सुनिके येसु छक्क पर्ले अनि आफ्ने पछि लाग्लाइ मान्छेल्को भिडकाइ हेर्तिन बल्-ल्याक, “मुइ तोराल्काइ बल्छु, इन्खा बड्खो बिस्वास गर्नार मानुस ता मुइ इज्राएलनाइ पुनि देख्ल बइने।”
10अनि कप्तानिन पाठाइलाइ मान्छेलत फर्किके घरनाइ आइपुग्तिन होल्किन ह्व नोकरलाइ बिसेक हकिसक्ल भेट्टाइला।
येसुन बिद्दुइकर बेटाकलाइ जिउँते पार्ल
11केइ समय पछि येसु नाइन सहरनाइ जाइले। येसुकर चेलालत र आने बड्खो मान्छेल्को भिड पुनि येसुकर पछि लाग्ला। 12येसु सहरकर गेट नजिकइ आइपुग्तिन खेर, एउटो मुर्दालाइ बोकिके मालामिलत जाइतिन रइला। मर्ल मानुस चाइ एउटि बिद्दुइकर एउटो मात्र बेटाक रइल। बिद्दुइसिन सहरकराइ एकदम बड्खो मान्छेल्को भिड जाइलाइ रइला। 13बिद्दुइकर दुख देखिके पर्भुकर मन दयान भरिके आल्ते र बिद्दुइलाइ बलल्ते, “तुइ जुनकाँन।” 14अनि अगाडि जाइके येसुन घारालाइ छुइले र लास बोक्नाराइ टक्क अडिला। येसुन बाज्ले, “ए छोडारि, मुइ तुइलाइ बल्छु, उठ।” 15उत्तिने खेर मर्ल छोडारि उठिके बस्ले र बाजइ थाल्ले। येसुन ह्व छोडारिलाइ होक्रि आमेकलाइ जिम्मा लाइदिल्ते।
16इन्खा सक्ति देखिके सेब्बाइ मान्छेलत छक्क पर्तिन डाराइला अनि परमेसोरकर पर्सन्सा गर्तिन बाज्ला, “एउटो बड्खो अगमबक्ता हाम्रो माजनाइ देखा पर्लाछ” र “परमेसोर आफ्ने जनकाइ बाचाइ आइलाछ।”
17येसुन ह्व छोडारिलाइ जिउँते पार्ल खबर यहुदिया छेत्रभरि र वरिपोरिकर सेब्बे छेत्रनाइ फिँजल्ते।
बप्तिस्मा दिनार युहन्नाकर परस्न
(मति ११:२-१९)
18युहन्नाकराइ चेलाल्किन पुनि येसुन गर्ल सेब्बे कुरो आफ्ने गुरुलाइ सुनाइला। 19अनि युहन्नान आफ्ने चेला मद्दे दुइटाल्काइ पर्भुकर उछि ह्य सोदइ पाठाइले, “हाइनिन आस गर्ल खिरिस्ट तुइ ने हो कि हाइनिन आने कसइको बाट हेरुँ?”
20अनि होल्किन येसुकर उछि आइके बाज्ला, “बप्तिस्मा दिनार युहन्नान हाइलाइ ह्य सोदइ पाठाइलाछ, ‘हाइनिन आस गर्ल खिरिस्ट तुइ ने हो कि हाइनिन आने कसइको बाट हेरुँ?’”
21होइ बेला येसुन धेराइ रोगि, बिरामि र भुत लाग्लाल्काइ पुनि बिसेक पार्ले र धेराइ अन्धालत पुनि देख्नाराइ हक्ला। 22अनि येसुन युहन्नाकर चेलाल्काइ बल्-ल्याक, “तोराल्किन जे देख्लाछो र सुन्लाछो, जाइके युहन्नालाइ बल्दिक—अन्धाल्किन देख्छत, लङ्गडालत हिन्छत, कुस्ठ रोगिलत बिसेक हक्छत, बइराल्किन सुन्छत, मर्लाइ जिउँते हक्छत र दुखि-गरिबकिन परमेसोरकर सुसमचार सुन्तिन आछत।#यस ३५:५-६;६१:१ 23साँच्चि ने मोर बारेनाइ सङ्का बइगर्नार मानुसिन आसिस पाइछइ।”
24युहन्नान पाठाइलाइ चेलालत फर्किलपछि येसुन भिडकाइ युहन्नाकर बारेनाइ बल्-ल्याक, “तोरा केइ बइहक्नार उजाड ठउँनाइ केति हेरइ जाइलाइ रइलो? केति बातासिन हल्लाइल निगाले बाँसलाइ? 25यदि बया हो भने केति हेरइ जाइलाइ रइलो? केति मजार-मजार लुगा लाइल मानुसलाइ हेरइ? मजार-मजार लुगा लाइनाराइ र मोज-मस्ति गर्नाराइ मानुसलत ता राजदरबारनाइ बस्लाइ हक्छत। 26तोरा केति हेरइ जाइलाइ रइलो? केति अगमबक्तालाइ? मुइ तोराल्काइ बल्छु, तोराल्किन अगमबक्ता भन्दा पुनि बड्खो मानुसलाइ देख्लाछो। 27किनारइभने युहन्नाकर बारेनाइ धर्मसास्तरनाइ परमेसोरिन इत्तिके बाज्लाछ,
‘हेर, मुइ मोर दुतलाइ तोर अगि-अगि पाठाइनारआछु।
अनि होइनिन तोर बाट तयार पार्नारआछ।’#मला ३:१
28मुइ तोराल्काइ बल्छु, ‘बेटिबान जन्मिलाइ मद्दे युहन्नाभन्दा बड्खो मानुस आने कुनु बइने। तर परमेसोरकर राज्यनाइ जुन सेब्बाइभन्दा स्यान्खो आछ, ह्व युहन्नाभन्दा पुनि बड्खो हक्छइ।’”
29अनि सेब्बाइ मान्छेलत र कर उठाइनारकिन पुनि येसुकर सिछ्या सुनिके परमेसोरकर सत्यतानाइ बिस्वास गर्ला, किनारइभने होल्किन युहन्नाबान बप्तिस्मा लिलाइ रइला।#मति २१:३२; लुक ३:१२ 30तर फरिसिलत र धर्म-गुरुल्किन युहन्नाबान बप्तिस्मा बइलिला र होल्किन परमेसोरकर योजनालाइ पुनि इन्कार गर्ला।
31येसुन बाज्ले, “ह्य पुस्ताकराइ मान्छेल्काइ मुइ केतिसिन दाँजइ? होलत किन्खा आछत? 32होलत ता बजारनाइ बसिके इन्खा कुरो गर्नाराइ छानाछुनिलत जिन्खाए आछत। होलत आफि-आफिनाइ इत्तिके बाज्छत,
‘हाइनिन तोराल्को लागि बाँसुरि बाजाइदिले,
तर तोरा बइनाच्लो।
हाइनिन दुखकर गित गिदाइले
तर तोरा बइकान्लो।’
33अनि बप्तिस्मा दिनार युहन्ना आइले, ह्व धेरइजसो उपबास बस्तेल र मात्नार चिज बइखाइतेल, तोराल्किन ‘होलाइ भुत लाग्लाछ’ बाज्लो। 34मानुसकर बेटाक खाइतिन र पितिन आइले, अनि तोराल्किन दोस लाइतिन बाज्छो, ‘हेरो, एउटो घिचुवा, जँडे, कर उठाइनाराइ र पापिल्को साथेक!’ 35परमेसोरबान बुद्दि पाइनारकिन ने परमेसोरकर बुद्दिलाइ ठिक ठहराइछत।”
पापि बेटिलाइ छेमा
36एउटो फरिसिन येसुलाइ भात खाइ बालाल्ते, र येसु होक्र घरनाइ जाइके खाइ बस्ले। 37ह्व सहरनाइ एउटि पापि बेटि रइलि। येसु फरिसिकर घरनाइ भात खाइ आइलाछ बल्ल सुन्ले, र होइनिन एउटो सिङ्गमरमरकर सिसिनाइ अत्तर#७:३७ अत्तर सेब्बे थरिकर जडिबुट्टि मिसाइके बानाइल एक पर्कारकर बासनादार तेल, ह्य सेन्ट जिन्खाए हक्छि। लिके ह्व घरनाइ आइपुग्लि।#मति २६:७; मर्क १४:३; युह १२:३ 38ह्व पछाडिबान आइके येसुकर गोडछेउनाइ ठडाइके कान्तिन येसुकर गोड आँसुन भिजाइदिल्ते र आफ्ने कापालकर बारिन पुछ्तिन गोडनाइ मइँ खाइके#७:३८ गोडनाइ मइँ खाइ यहुदिल्को चलन अन्सार सेवाढोग (स्वागत) गर्तिन गोडनाइ मइँ खाइनार चलन रल्ति, अत्तर लाइ लाग्लि। 39ह्य देखिके येसुलाइ बालाइनार फरिसिन मनमने बाज्ले, “यदि ह्य मानुस साँच्चि ने अगमबक्ता हो भने ता होलाइ छुइनारि बेटि किन्खा हो बाजिके हेइनिन जान्नाल, किनारइभने ह्य ता पापि बेटि हो।”
40ह्य था पाइके येसुन फरिसिलाइ बलल्ते, “ए सिमोन, मुइ तुइलाइ केइ कुरो बलइआछ।”
होइनिन बाज्ले, “गुरु, बाज।”
41येसुन बाज्ले, “एउटो साउकर दुइटाइ रिनिलत रइला। एउटोन पाँच सय चाँदिकर सिक्का र अर्कोन पचास चाँदिकर सिक्का लाकाइलाइ रइला। 42तर होल्किन ह्व रिन तिरइ बइसक्ल पछि साउनिन धेउटाल्को रिन मिना गर्दिल्याक। अब बाज्ते, कुन्टोन्चाइ साउलाइ बढ्ता मया गर्नारआछ?”
43सिमोनिन बाज्ले, “मोर बिचारनाइ बढ्ता रिन मिना पाइनारिन।”
येसुन होलाइ बलल्ते, “तुइनिन ठिक बाज्लइ।”
44अनि येसुन बेटिदिस फर्किके सिमोनलाइ बलल्ते, “ह्य बेटिलाइ हेरि ते। मुइ तोर घरनाइ आइनाइ, तर तुइनिन मुइलाइ गोड धोइलाइ पानिसम्म बइदिलइ, तर हेइनिन ता मोर गोड आँसुन भिजाइदिलि र आफ्ने बारिन पुछ्लि। 45तुइनिन मुइलाइ मइँ खाइके स्वागत बइगर्लइ, तर हेइनिन ता मुइ आइलसिन ने मोर गोडनाइ मइँ खाइ छाड्लि बइने। 46तुइनिन मोर कापालनाइ तेल बइलाइदिलइ, तर हेइनिन ता मोर गोडनाइ अत्तर लाइदिलि। 47होइ हुदान मुइ तुइलाइ बल्छु, हेक्र धेरइ पाप छेमा हकिसक्लाछि। किनारइभने हेइनिन मुइलाइ धेरइ मया देखाइलि। थोरे पाप छेमा हक्ल मानुसिन चाइ थोरे मया गर्छइ।”
48येसुन ह्व बेटिलाइ बलल्ते, “तोर पाप छेमा हकिसक्लाछि।”
49उछि खाइ बस्लाइ मान्छेल्किन आफि-आफिनाइ बाजइ लाग्ला, “पाप छेमा गर्नार ह्य कुन हो?”
50तर येसुन ह्व बेटिलाइ बलल्ते, “तोर बिस्वासिन तुइलाइ बाचाइलाछ्यास। अब ढुक्कसिन जा।”
Aktualisht i përzgjedhur:
लुका 7: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.