लुका 5
5
येसुकर पइलो चेलालत
(मति ४:१८-२२; मर्कुस १:१६-२०)
1एक दिन येसु गनेसरेत तालकर#५:१ गनेसरेत ताल अथवा गालिल ताल छेउनाइ ठडाइधर्ल रइल। मान्छेल्को भिड परमेसोरकर सिछ्या सुनइलाइ ठेलाठेल गरिधर्लाइ रइला। 2येसुन तालकर छेउनाइ दुइटो लाउ देख्ले। माछ मार्नाराइ लाउकर छेउनाइ जाल धोइ धर्लाइ रइला। 3एउटो लाउचाइ सिमोनकर रल्ति। येसु होइ लाउनाइ चडिके सिमोनलाइ लाउ अलि ओभ्रउने पेलाइ लाल्ते र बसिके मान्छेल्को भिडकाइ सिछ्या देइ लाग्ले।#मति १३:१-२; मर्क ३:९-१०;४:१
4सिछ्या दिसक्लपछि येसुन सिमोनलाइ बलल्ते, “लाउ गइरो दिसउँने लाकाइके माछ मारइलाइ जाल हिर्काउ।”
5ह्य सुनिके सिमोनिन येसुलाइ बलल्ते, “गुरु, हाइनिन रातभोरि जाल खेलाइले, एउटि पुनि माछ बइपाइले। तर तुइनिन बल्छस भने मुइ जाल हिकाइछु।”#युह २१:३ 6जाल हिर्काइतिन यत्ता धेरइ माछ पर्ला कि जाल ने फाट्तेठि हकल्ते।#युह २१:६ 7अनि होल्किन अर्को लाउनाइ हक्लाइ साथेकख्यानकाइ इसारा गरिके सघाइ बालाइल्याक। होलत आइके माछ झिकइ थाल्ला। झिक्तिन-झिक्तिन धेउटो लाउ माछन भरिके लाउ ने डुब्तेठि हकल्ते। 8ह्य देखिके सिमोन पत्रुसिन येसुकर अगाडि घोप्टो परिके बाज्ले, “हे पर्भु, मुइ पापि आछु, मुइबान बद्दुर बस!”
9यत्रा धेरइ माछ पर्ल देखिके सिमोन र होक्र साथेकलत छक्क पर्ला। 10र सिमोनसिन मिलिके काम गर्नाराइ जब्दियाकर बेटाकलत याकुब र युहन्ना पुनि छक्क पर्ला। येसुन सिमोनलाइ बलल्ते, “जुनडाराउ, अबसिन तुइ माछ बया, तर मान्छेल्काइ आठाइके परमेसोरकर राज्यनाइ आन्नारआछस।”
11ह्य सुनिके होल्किन लाउ डेङ्गानाइ आन्ला अनि सेब्बे कुरो छाडिके येसुकर पछि लाग्ला।
येसुन कुस्ठरोगिलाइ बिसेक पार्ल
(मति ८:१-४; मर्कुस १:४०-४५)
12एक दिन येसु एउटो सहरनाइ रइल। ह्व सहरनाइ कुस्ठरोग#५:१२कुस्ठरोग यहुदि चलन अन्सार ह्य रोग लाग्ल मानुसलाइ असुद्द बाज्तेला र ह्य रोगबान बिसेक हकइलाइ चाइ सुद्द हक्ल बाज्तेला। लाग्ल एउटो मानुस रइल। येसुलाइ देखिके ह्व कुस्ठरोग लाग्ल मानुसिन येसुकर अगाडि घोप्टो परिके इत्तिके बिन्ति गर्ले, “गुरु, तुइनिन चाइलइ भने मुइलाइ बिसेक पारइ सक्छस।”
13येसुन ह्वउप्रान हात धरिके बाज्ले, “मुइ चाइछु, तुइ बिसेक हक।” र उत्तिने खेर होक्र कुस्ठ रोग बिसेक हकिहालल्ते। 14येसुन होलाइ आग्या दितिन बलल्ते, “ह्य कुरो कुनुल्काइ जुन्बल्खन, तर पुजारिकर उछि जाइके तुइ बिसेक हक्ल आफिलाइ देखाउ। मोसान आग्या गर्ल जिन्खाए बलि चाराइके सेब्बाल्काइ तुइ बिसेक हक्ल पर्मान दिक।”#ले १४:१-३२
15ह्व दिनसिन येसुकर चर्चा झन फइलितिन जाल्ते अनि बड्खो मान्छेल्को भिड येसुकर सिछ्या सुनइ र आफ्ने रोगबान बिसेक हकइ आइ थाल्ला। 16तर येसुचाइ एकान्त ठउँनाइ पार्थना गरइ जाइतेल।
येसुन पछ्यघातिलाइ बिसेक पार्ल
(मति ९:१-८; मर्कुस २:१-१२)
17एक दिन येसुन घर भित्र मान्छेल्काइ सिछ्या दिधर्ल रइल। केइ धर्म-गुरुलत र फरिसिलत पुनि येसुकर छेउनाइ बसिधर्लाइ रइला। होलत चाइ गालिल र यहुदिया छेत्रकर सेब्बे गाउँ र यरुसलेम सहरबान पुनि आइलाइ रइला। येसुसिन बिरामिल्काइ बिसेक पार्नार परमपर्भुकर सक्ति रल्ति। 18केइ मान्छेल्किन एउटो पछ्यघाति बिरामिलाइ ओछ्यानेसुदा बोकिके आन्ला। होल्किन होलाइ घरभित्र येसुकर अगाडि पुराइ आँट गर्ला। 19तर मान्छेल्को भिडिन गर्तिन होल्किन बिरामिलाइ येसुकर नजिक लाकाइ बइसक्ला। होइ हुदान होलत घरकर छानाउप्रान चड्ला र छाना उधारिकइ बिरामिलाइ ओछ्यानेसुदा बिस्तारइ येसुकर अगाडि झार्ला। 20ह्व मान्छेल्को इन्खा बिस्वास देखिके येसुन ह्व बिरामिलाइ बलल्ते, “ए साथि, तोर पाप छेमा हक्लाछि।”
21येसुन बाज्ल ह्य कुरो सुनिके धर्म-गुरु र फरिसिल्किन मनमननाइ बिचार गरइ लाग्ला, “परमेसोरकर निन्दा गर्नार ह्य कुन हो? परमेसोरिन पो पाप छेमा गरइ सक्छइ। मान्छेन पुनि पाप छेमा गरइ सक्छइ र?”
22होल्को मनकर कुरो था पाइके येसुन बाज्ले, “तोरा किनारइ इन्खा बिचार गर्छो? 23ह्व पछ्यघातिलाइ ‘तोर पाप छेमा हकल्ते’ बलइ कि ‘उठिके हिन’ बलइ कुन्टो चाइ सजिलो आछि? 24तर ह्य धर्तिनाइ मानुसकर बेटाकलाइ#५:२४ मानुसकर बेटाक येसुन कतिपल्ट आफिलाइ “मानुसकर बेटाक” बाज्तेल। मान्छेल्को पाप छेमा गर्नार अधिकार आछि बाजिके तोरा जानो।” अनि येसुन ह्व पछ्यघाति बिरामिलाइ बलल्ते, “मुइ तुइलाइ बल्छु, अब उठ र आफ्ने ओछ्यान बोकिके घर जा।”
25ह्व मानुस जुरुक्क उठ्ले अनि आफ्ने ओछ्यान बोकिके परमेसोरकर पर्सन्सा गर्तिन घर जाइले। 26होलत सेब्बाइ अचम्म मान्ला र परमेसोरकर इन्खा सक्ति देखिके डाराइला। होल्किन परमेसोरकर पर्सन्सा गर्तिन बाज्ला, “आज हाइनिन कइले बइदेख्ल अचम्मकर कुरो देख्ले।”
येसुन लेबिलाइ चेला हकइ बालाइल
(मति ९:९-१३; मर्कुस २:१३-१७)
27ह्व पछि येसु बाइर निस्किके बाट्नाइ जाइतिन रइल। लेबि#५:२७ लेबि ह्यलाइ मति बाजिके पुनि चिन्छे, नाउँ हक्ल एउटो कर उठाइनार मानुसलाइ कर उठाइनार ठउँनाइ बसिधर्ल देख्ले। येसुन होलाइ बलल्ते, “मोर पछि लाग।” 28अनि लेबिन सेब्बे कुरो छाड्ले र उठिके येसुकर पछि लाग्ले।
29ह्व पछि लेबिन येसुकर लागि आफ्ने घरनाइ बड्खो भोज तयार गर्ले। ह्व भोजनाइ धेराइ कर उठाइनाराइ र आने थुप्राइ मान्छेलत पुनि आइलाइ रइला। 30फरिसिलत र होल्को समुहकराइ धर्म-गुरुल्किन गनगनाइतिन येसुकर चेलाल्काइ बल्-ल्याक, “किनारइ तोरा कर उठाइनाराइ र पापिल्कोसिन बसिके खाइछो?”#लुक १५:१-२
31येसुन होल्काइ बल्-ल्याक, “डाक्टर सद्देल्काइ बया, तर बिरामिल्काइ चाइछइ। 32उन्खाए ने मुइ धर्मातिल्काइ बया, तर पापिल्काइ आफिन गर्ल पाप मानिलिके परमेसोरदिसउने फर्को बाजिके बालाइ आइल हो।”
उपबास सम्बन्धि परस्न
(मति ९:१४-१७; मर्कुस २:१८-२२)
33केइ मान्छेल्किन येसुलाइ बल्ला, “बप्तिस्मा दिनार युहन्नाकराइ चेलालत बेला-बेलानाइ उपबास बस्छत र पार्थना गर्छत। फरिसिकराइ चेलालत पुनि उन्खाए गर्छत, तर तोर चेलालत चाइ उपबास बइबसत, खाइनार पिनार मात्र गर्छत।”
34येसुन होल्काइ बल्-ल्याक, “केति ब्याउला जन्तिल्को साथनाइ हकुन्जेल जन्तिल्काइ तोरा उपबास बसइ लाइ सक्छो? 35तर इन्खा दिन पुनि आइछि, ह्व बेला ब्याउला होल्कोबान छुट्टाइनार आछ, अनि होलत उपबास बस्नारआछत।”
36येसुन फेरि पुनि अर्को उदारन बाज्ले, “कुन्नुल्किन पुनि नयाँ लुगा च्यातिकइ पुरानो लुगानाइ बइटालत। यदि टालिहाल्लो भने नयाँ लुगा पुनि बिग्रिछि र नयाँ टालो पुरानो लुगासिन पुनि बइमिलि। 37उन्खाए ताजा अङ्गुरकर मद्य पुरानो छालाकर थइलो#५:३७ छालाकर थइलो ह्व बेला अङ्गुरकर मद्य छाउरिकर छालाबान बानाइल भाडा वा थइलोनाइ धर्तेला। ह्य लाइ मसक पुनि बाज्छत। नाइ धर्छत र? यदि धरिहाल्लो भने पुनि थइलो फाट्छि अनि मद्य पुनि खेर जाइछि। 38ताजा अङ्गुरकर मद्य चाइ नयाँ छालाकर थइलोनाइ ने धरइपर्छइ। 39अनि कुन्नुल्किन पुनि पुरानो अङ्गुरकर मद्य खाइके ताजा अङ्गुरकर मद्य खाइनार इछ्या बइगरत। होइनिन बाज्छइ, ‘पुराने स्वाद आछि।’”
Aktualisht i përzgjedhur:
लुका 5: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.