लुका 23
23
येसु पिलातसको आघु
(मति २७:१,२,११-१४; मर्कुस १५:१-५; युहन्ना १८:२८-३८)
1अनि माहासभाको सभइ सदस्यहान उठ्वाइ र येसुके पिलातसठुँ लेग्वाइ। 2उनहान्इ ओख्राइ दोस लगातिहि कहाइ, “एइ आफिके मुक्ति देलाहार राजा खिरिस्ट हो कहि कताइ, र कइसरके कर तिरे नापर्ताइ कहि हाम्रो देसको मानिसहान्के भड्काइधार्लो हामिइ भेटाहुँ।”
3तब पिलातसइ ओख्राइ सुध्याइक्, “क्या तइ यहुदिहान्को राजा हो?”
येसुइ जबाफ दिहिक्, “तइ आफि ज ओस्ने कतेर।”
4अनि पिलातसइ मुख्य पुजारिहान र उथि भिडको मानिसहान्के कहिक्, “इ मानिसमा मइ केइ दोस नाभेटातिन्।”
5तर उनहान्इ बेस्के चिच्याइतिहि कहाइ, “एइ गालिलभि सुरु गरिकनि, सभइ यहुदिया र इ ठउँसम्म बचन दिहिकनि मानिसहान्के भड्कातिहिबाटि।”
हेरोदको आघु येसु
6तब इ सुनिकनि पिलातसइ सुध्याइक्, “क्या इ मानिस गालिलको हो?” 7येसु हेरोदको इलाकाको मानिस हो कलाहार थाहा पाइकनि पिलातसइ ओख्राइ हेरोदठुँ पठाइदिहिक्। ओइबेरा हेरोद पनि येरुसलेमहि रहिक्। 8येसुके देखिकनि हेरोद जारे खुसि होखिक् क्यारेकनिसिन ओइ येसुको बारेमा सुन्लो रहिक् र ओख्राइ भेटे धेरे दिनभि इच्छा गर्लो रहिक्, र ओख्रो अचम्मको धन्दा गर्लो चाहे ओइ रहर गर्लो रहिक्। 9हेरोदइ येसुके धेरे पर्स्न सुध्याइक्, तर ओइ केइपनि जबाफ नादिहिक। 10मुख्य पुजारिहान र धर्म गुरुहानचाहिँ ठेढाइकनि येसुके एकहोरो दोस लगाए लाग्वाइ। 11तब हेरोद र ओख्रो सिपाहिहान्इ मिलिकनि येसुके खिसि गर्ले बेजत गर्वाइ, र राजाइ लगालार जस्ने लुगा लगाइकनि पिलातसठुँ ज फर्काइ देहाइ। 12ओइ दिनभि हेरोद र पिलातस साखा होख्वाइ क्यारेकनि उनहान पहिलि दुस्मन रहाइ।
येसुके मर्लार दन्ड देलो
(मति २७:१५-२६; मर्कुस १५:६-१५; युहन्ना १८:३९—१९:१६)
13तब पिलातसइ मुख्य पुजारिहान, अगुवाहान र मानिसहान्के बोलाइकनि 14उनहान्के कहिक्, “मानिसहान्के भड्काइक कहि ताहान्इ एख्राइ मोरोठुँ आन। मइ ताहान्के आघु एख्राइ धेरे कुरा सुध्याइन् तर केइ दोस नाभेटाइन। 15हेरोदइ पनि दोस नाभेटाइकनि एख्राइ फेरि हामिठुँ ज पठाइदिहिक्। चाहो, एख्राइ मर्लार दन्ड देहे पर्लार एइ केइ धन्दा नागर्लाटि। 16उसिगर्ते मइ एख्राइ कोर्रा लगाइकनि छाड्देतिन्।” 17[यहुदियाको चलन अनुसार निस्तार चाडको बेरामा रोमि सासक पिलातसइ एउटा कइदिके छाड्देहे पर्तरहिक्।]#२३:१७ कुन्हुँ कुन्हुँ मुल सोरतहान्मा [यहुदियाको चलन अनुसार निस्तार चाडको बेरामा रोमि सासक पिलातसइ एउटा कइदिके छाड्देहे पर्तरहिक्।] लेखेलो नापाहेताइ।
18तर सभइ मानिसहान्इ चिच्याइले कहाइ, “एख्राइ मार्हइ, बरु हाम्रो लागि बारब्बाके छाड्दिहि।” 19(बारब्बाचाहिँ सहरमा हुल दङ्गा मचालार र मानिसहान्के मार्लो मुद्दामा जेलमा थुनेलो रहिक्।)
20पिलातसइ येसुके छाड्लार इच्छा गर्तिहि उनहान्के फेरि सम्झाइक्। 21तर उनहान यस्के चिच्याइतिहि कहाइ, “कुरुसमा झुन्डाहइ, ओख्राइ कुरुसमा झुन्डाहइ।”
22पिलातसइ उनहान्के तिन चोटिमा फेरि कहिक्, “क्यारे? इ मानिसइ क्या ननाम्रो गर्लाटि र? मइ त एख्राइ मार्लार दन्ड देहे पर्लार कुन्हुँ दोस नाभेटाइन, उसिगर्ते मइ एख्राइ कोर्रा लगाइकनि छाड्देतिन्।”
23तर उनहान झन बड्को सोरमा चिच्यातिहि एख्राइ कुरुसमा झुन्डाए ज पर्ताइ कहेलाग्वाइ। एस्के उनहान्इ जित्वाइ। 24अनि पिलातसइ उनहान्को माग पुरा गर्लार फइसला सुनाइक। 25पिलातसइ हुल दङ्गा मचालार र मानिसहान्के मार्लार मुद्दामा जेलमा पर्लो कइदि बारब्बाके छाडिदिहिक। तर येसुके चाहिँ उनहान्के इच्छामा छाडिदिहिक।
येसुके कुरुसमा झुन्डयालो
(मति २७:३२-४४; मर्कुस १५:२१-३२; युहन्ना १९:१७-२७)
26सिपाहिहान्इ येसुके लेग्तिहि गर्ते, गाउँभि सहरपट्टि आइधार्लो सिमोन नाउँको कुरेनिमा बिस्लार मानिसके छोप्वाइ। अनि ओख्राइ येसुइ बोक्लो कुरुस बोके लगाइकनि येसुको पाछु भोए लगावाइ।
27मानिसहान्को बड्को भिड येसुको पाछु लागिक्। ओइ भिडमा ओख्रो लागि रउले र सोक गर्ले भोइधार्लो बेटिहान पनि रहाइ। 28उनहान पट्टि फर्किकनि येसुइ कहिक्, “येरुसलेमको छउनिहान हो, मोरो लागि झिन रोहेउ, तर ताहान आफ्ने लागि र आफ्नो बच्चाहान्को लागि रोहेउ। 29क्यारेकनिसिन एस्नो दिन पनि आउताइ, जब मानिसहान्इ कतात्, ‘धन्ये बाझिहान र बच्चा नापाउलारहान र दुध नाख्वाउलार बेटिहान।’ 30तब उनहान्इ पाहाडके कतात्, ‘हामिउप्रो खसइ।’ अनि डाडाहान्के कतात्, ‘हाम्राइ पुर।’#होसे १०:८; प्रकास ६:१६ 31रुख हरियो होख्ते त उनहान्इ डढेलो लगाताइ कनि, सुखाइलो बेरा झन क्या गर्बाइ?”
32तब उनहान्इ दुइटा अपराधिहान्के पनि ओख्रोसिन मारे लेग्वाइ। 33जब उनहान “खप्परे” कलाहार ठउँमा आवाइ, उथि उनहान्इ येसुके कुरुसमा झुन्डावाइ र ओइ अपराधिहानमध्येमा एउटाके ओख्रो दाहिन्यापट्टि र आर्कोके देब्र्यापट्टिको कुरुसमा झुन्डावाइ। 34येसुइ कहिक्, “बुबा, इनहान्के माफ गर्दिहि, इनहान्इ ज्या गरिधार्लाटाइ उनहान्के थाहा नाटि।” अनि सिपाहिहान्इ चिठ्ठा घालिकनि येसुको लुगाके भाग लगावाइ।#भजनसङग्रह २२:१८
35मानिसहान ठेढाइकनि चाहिधर्लो रहाइ। यहुदि अगुवाहान्इ येसुके खिसि गर्तिहि कहाइ, “एइ अरुके त बचाइक, आब परमेस्वरइ छान्लो खिरिस्ट हो कनि आफिके पनि बचाउस।”#भजनसङग्रह २२:७
36अनि सिपाहिहान पनि आइकनि येसुके अङ्गुरको आमिलो जाँड ख्वाउतिहि खिसि गर्वाइ,#भजनसङग्रह ६९:२१ 37र कहाइ, “तइ यहुदिहान्को राजा हो कनि आफिके बचाहइ।”
38“इ यहुदिहान्को राजा हो” कहि पाटिमा लेखिकनि ओख्रो कपारको उप्रो कुरुसमा झुन्डाइदेलो रहाइ।
39ओख्रोसिन कुरुसमा झुन्डयालो अपराधिहानमध्ये एउटाइ खिसि गर्तिहि कहिक्, “क्या तइ खिरिस्ट नाहो र? तइ आफिके र हाम्राइ बचाहइ।”
40ओख्राइ हप्कातिहि आर्को अपराधिइ जबाफ दिहिक्, “तोर्हाइ परमेस्वरको डर नालाग्ताइ? तइ पनि ओख्रो जस्ने दन्ड भोगि धार्लाटेर। 41हामि त नानाम्रो धन्दा गर्लो कारनइ ठिके दन्ड पाहुँ, तर एइ त ओस्नो केइ नानाम्रो धन्दा नागर्लाटि।” 42अनि ओइ येसुके कहिक्, “येसु, तइ आफ्नो राज्येमा आउतेखेरि मराइ पनि सम्झेस्।”
43येसुइ ओख्राइ कहिक्, “साच्चि मइ तोर्हाइ कतिन, आजे तइ मोरोसिन स्वर्गमा होख्तेर।”
येसु मर्लो
(मति २७:४५-५६; मर्कुस १५:३३-४१; युहन्ना १९:२८-३०)
44मझानोको बार बज्लो रहिक्, ओइबेराभि तिन बजेसम्म देसभरि अन्धार होखिक्। 45घामको उज्यालो कम होखिक् र मन्दिरको पर्दा माझोभि च्याथिकनि दुइ चिरा होखिक्।#प्रस्थान २६:३१-३३ 46तब येसुइ बड्को सोरमा चिच्याइकनि कहिक्, “बुबा, मइ मोरो आत्मा तोरो हातमा धार्तिन।” ओत्के कहिकनि ओइ आफ्नो परान त्यागिक।#भजनसङग्रह ३१:५
47एस्नो घटना देखिकनि सिपाहिहान्को नाइक्याइ परमेस्वरको पर्सम्सा गर्तिहि कहिक्, “साच्चिके इ मानिस धर्मि होछ।”
48र घटना चाहे आउलो मानिसको भिडइ इ सभइ देख्वाइ, र दुखि होखि रउतिहि र सोक गर्ले घर फर्कवाइ। 49तर ओख्राइ चिन्लारहान र गालिलभि ओख्रो पाछु पाछु आउलो बेटिहान्इ दुस्सिभि ठेढाइकनि इ घटना चाहिधर्लो रहाइ।
येसुको लासके चिहानमा धार्लो
(मति २७:५७-६१; मर्कुस १५:४२-४७; युहन्ना १९:३८-४२)
50योसेफ नाउँ होख्लो एक जना नाम्रो र इमान्दार मानिस रहिक्। उ माहासभाको सदस्य पनि रहिक्। 51यहुदिहान्को अरिमाथिया सहरको मानिस रहिक्। ओइ उनहान्को सल्लाहा र धन्दामा सहमत नारहिक्। ओइ परमेस्वरको राज्येको बाट चाहिधर्लो रहिक्। 52ओंइ पिलातसठुँ जाइकनि येसुको लास मागिक्। 53अनि ओंइ येसुको लासके कुरुसभि तर झारिक्, अनि सुतिको लुगामा मेरिकनि पाथरमा खोपिकनि बनालो एउटा चिहानमा धरिक। ओइ चिहानमा कन्हुँ पनि कुन्हुँको लास नाधार्लो रहिक्। 54बार्ना दिनको तयारि गर्लार दिन रहिक्, र बार्ना दिन सुरु होखे लाग्लो रहिक्।
55गालिलभि येसुसिन आउलो बेटिहान योसेफको पाछु पाछु गेहाइ र चिहानमा येसुको लासके धार्लो देख्वाइ। 56तब उनहान घर फर्किकनि मिठो गन्धाइलार तेल र सेन्ट तयार गर्वाइ।
धर्म नियमको अनुसार उनहान्इ बार्ना दिन मान्वाइ।#प्रस्थान २०:१०; ब्यवस्था ५:१४
Aktualisht i përzgjedhur:
लुका 23: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.