Logoja YouVersion
Ikona e kërkimit

लुका 20

20
येसुको अधिकारमा पर्‌स्‍न
(मति २१:२३-२७; मर्‌कुस ११:२७-३३)
1एक दिन येसुइ मानिसहान्‍के मन्‍दिरमा बचन सिखाइ धार्‌लो रहिक्। उनहान्‍के परमेस्‍वरको नाम्‍रो खबर प्‌रचार गरिधार्‌लो रहिक्, मुख्‍य पुजारिहान्‍सिन, धर्‌म गुरुहान र अगुवाहान ओख्‍रोठुँ आवाइ 2र ओख्‍राइ सुध्‍यावाइ, “हाम्‍राइ कहि, कख्‍रो अधिकार पाइकनि इ धन्‍दा गर्‌तेर? तोर्‌हाइ इ अधिकार कुनि दिहिक्?”
3येसुइ उनहान्‍के जबाफ दिहिक्, “मइ पनि ताहान्‍के एउटा पर्‌स्‍न सुध्‍यातिन। मर्‌हाइ कहो, 4युहन्‍नाके बप्‍तिस्‍मा देलाहार अधिकार स्‍वर्‌गभि पाउलो रहिक् कि मानिसभि?”
5इ सुनिकनि उनहान आफि आफि बोले लाग्‍वाइ, “‘स्‍वर्‌गभि’ कनिसिन ओइ कबि, ‘ताहान्‍इ युहन्‍नाके क्‍यारे बिस्‍वास नागरो?’ 6फेरि ‘मानिसभि’ कनिसिन इथि होख्‍लो सभइ मानिसहान्‍इ हाम्‍राइ पाथरइ हिर्‌कातात्, क्‍यारेकनिसिन युहन्‍ना अगमबक्‍ता हो कहि इनहान्‍इ बिस्‍वास गर्‌तात्।” 7उसिगर्‌ते उनहान्‍इ येसुके कहाइ, “हाम्‍राइ थाहा नाटि काहाँभि आउलो हो।”
8तब येसुइ उनहान्‍के कहिक्, “उसिकनि मइ कुन अधिकारइ इ धन्‍दा गरिधार्‌लाटिन, ताहान्‍के नाकतिन।”
मालिक र अधिया गर्‌लाहारको उखान
(मति २१:३३-४६; मर्‌कुस १२:१-१२)
9येसुइ मानिसहान्‍के इ उखान कहिक्, “एक जना मानिसइ अङ्‌गुर खेत रोपिक, र अधिया गर्‌लाहारहान्‍के दिहिकनि धेरे दिनको लागि परदेस जाइक्।#यसइया ५:१ 10फर पाकिकनि टिप्‍लार बेरा होखिक्, कहि आफ्‍नो बख्‍रा लेहे ओइ एउटा नोकरके पठाइक्। तर ओख्‍राइ उनहान्‍इ पिटिकनि रित्‍ते हात फर्‌काइ देहाइ। 11ओइ फेरि आर्‌को नोकरके पठाइक्, तर उनहान्‍इ ओख्‍राइ पनि पिट्‌वाइ, र खिसि गरि रित्‍ते हात फर्‌काइ देहाइ। 12ओइ तेस्‍रो नोकरके पठाइक्, तर उनहान्‍इ ओख्‍राइ पनि घाइते बनाइकनि बाहिर निस्‍काइ देहाइ। 13अङ्‌गुरको मालिकइ कहिक्, ‘मइ क्‍या गरुँ? आब मइ आफ्‍नो छउनाके पठातिन, सायद उनहान्‍इ ओख्‍राइ आदर गर्‌बाइ।’ 14तर अधिया गर्‌लाहारहान्‍इ ओख्‍रो छउनाके देखिकनि एक आर्‌कोके कहे लाग्‍वाइ, ‘इ त ओख्‍रो हकवाला हो। हामि एख्‍राइ मारहुँ र एख्‍रो सम्‍पति हाम्‍रो होख्‍ताइ।’ 15उनहान्‍इ ओख्‍राइ अङ्‌गुर बारिको बाहिर पट्‌टि लेगिकनि मार्‌वाइ।
“आब अङ्‌गुरको मालिकइ उनहान्‍के क्‍या गर्‌बि? 16उ आइकनि अधियाहान्‍के मार्‌बि, र अङ्‌गुरको बारि अरुकहान्‍के देबि।”
तब इ सुनिकनि मानिसहान्‍इ कहाइ, “एस्‍नो कन्‍हुँ झिन हखोस!”
17येसुइ उनहान्‍के चाहातिहि कहिक्, “धर्‌मसास्‍त्‌रमा लेखेलो कुराको अर्‌थ क्‍या हो त?
“‘जुन पाथर घर बनालारहान्‍इ काम नालाग्‍ताइ कहिकनि हुराइदेलो पाथर ज,
घरको कोनोको मुख्‍य पाथर बनिक्।’#भजनसङग्‌रह ११८:२२
18“ओइ पाथर उप्‍रो खस्‍लारहान सभइ चकनाचुर होख्‍तात् र जख्‍रो उप्‍रो ओइ पाथर खस्‍ताइ ओख्‍राइ प्‍याच्‍च पारदेताइ।”
कर तिर्‌लारको बारेमा पर्‌स्‍न
(मति २२:१५-२२; मर्‌कुस १२:१३-१७)
19तब इ उखान उनहान्‍को बिरुधमा कलो रहिक्, कहि बुझिकनि धर्‌म गुरु र मुख्‍य पुजारिहान्‍इ ओइबेरा येसुके छोपे खोज्‍वाइ। तर उनहान मानिसहान्‍सिन डरावाइ। 20उनहान्‍इ दाउ चाहे लाग्‍वाइ। इमान्‍दार होख्‍लो बाहाना गर्‌लाहार जासुसहान्‍के उनहान्‍इ येसुठुँ पठावाइ। येसुइ कलो बोलिमा ओख्‍राइ फसाइकनि हाकिम र रोमि सासकहान्‍को हातमा ओख्‍राइ छोपाइदेहे दाउमा रहाइ। 21जासुसहान्‍इ येसुके सुध्‍यावाइ, “गुरु, हाम्‍राइ थाहा बाटि तइ साच्‍चिको कुरा बोल्‍तेर र सिखातेर। कुन्‍हुँके पनि भेदभाब नागर्‌तेर, तर परमेस्‍वरको बाट सत्‍यसिन सिखातेर। 22आब कहि, हामि कइसरके कर बुझाए ठिक बाटि, कि नाटि?”
23तर उनहान्‍को फटाहा बिचार बुझिकनि येसुइ उनहान्‍के कहिक्, 24“मर्‌हाइ एउटा सिक्‍का देखाओ त। इथि कख्‍रो छाप र कख्‍रो नाउँ बाटि?”
उनहान्‍इ कहाइ, “कइसरको।”
25तब येसुइ कहिक्, “उसिगर्‌ते ज्‍या कइसरको हो कइसरके ज देहो, र ज्‍या परमेस्‍वरको हो परमेस्‍वरके ज देहो।”
26मानिसहान्‍को आघु उनहान्‍इ बोलिमा येसुके फसाए नासक्‍वाइ, र ओख्‍रो जबाफमा अचम्‍म होखि लाभि बिस्‍वाइ।
मर्‌लोभि जिउते होख्‍लार बारेमा पर्‌स्‍न
(मति २२:२३-३३; मर्‌कुस १२:१८-२७)
27केइ सदुकिहान येसुठुँ आवाइ, उनहान्‍इ मानिस मर्‌लोभि जिउते होख्‍ताइ कहिकनि बिस्‍वास नागर्‌तरहाइ, उनहान्‍इ येसुके सुध्‍यावाइ,#पेरेरित २३:८ 28“गुरु, मोसाइ हाम्‍रो लागि धर्‌मसास्‍त्‌रमा लेख्‍देलो रहिक्, कुन्‍हुँ मानिसको बिहा होख्‍लो दाजि बिनासन्‍तान मर्‌निसिन भइयाकइ ओख्‍रो दुल्‍हिके बिहा गरिकनि दाजिको सन्‍तान बनादेहे पर्‌ताइ।#ब्यवस्‍था २५:५ 29एउटा परिवारमा सात जना दाजिभइया रहाइ। जेठारोइ एउटा दुल्‍हि आनिकनि बिनासन्‍तान मरिक्। 30तब माइलाइ ओइ भोजिके बिहा गरिक्, अनि बच्‍च नाजर्‌मतिहि उ मरिक्। 31र साइलाइ पनि बिहा गरिक्। ओस्‍ने गरि साते जना भाइहान्‍इ पालेसिन बिहा गर्‌वाइ, उनहान बिनासन्‍तान मर्‌वाइ। 32पाछाभि ओइ बेटि पनि मरिक्। 33आब, मर्‌लोभि जिउते होख्‍ते ओइ बेटि कख्‍रो दुल्‍हि होख्‍ताइ? क्‍यारेकनिसिन उ साते जनाको दुल्‍हि होख्‍लो रहिक्।”
34तब येसुइ उनहान्‍के कहिक्, “इ युगको मानिसहान बिहा गर्‌तात् र बिहा गराइदेतात्। 35तर आउलाहार युगमा जाए योग्‍य होख्‍लो मानिसहान र मर्‌लोभि जिउते होखे योग्‍य होख्‍लारहान्‍इ बिहा नागर्‌तात्, बिहा पनि नागराइदेतात्। 36अनि उनहान फेरि नामर्‌तात्। उनहान स्‍वर्‌गदुतहान जस्‍ने हो, मर्‌लोभि फेरि जिउते होख्‍लो कारनइ उनहान परमेस्‍वरको सन्‍तान हो। 37तर मर्‌लोभि जिउते होख्‍तात् कहि मोसाइ जरिधार्‌लो झाङको बखानमा परमपर्‌भुके अबराहामको परमेस्‍वर, इसहाकको परमेस्‍वर र याकुबको परमेस्‍वर कहिकनि पुकारिक।#प्‌रस्‍थान ३:६ 38उ मर्‌लोहान्‍को परमेस्‍वर नाहो, तर जिउतेहान्‍को परमेस्‍वर हो, क्‍यारेकनिसिन ओख्‍रो लागि सभइ जिउते बाटाइ।”
39कुन्‍हुँ कुन्‍हुँ धर्‌म गुरुहान्‍इ कहाइ, “गुरु, तइ नाम्‍रे कहेर।” 40अनि ओख्‍राइ कुनुहि पनि पर्‌स्‍न सुध्‍याय आट नागर्‌वाइ।
खिरिस्‍ट कख्‍रो छउना
(मति २२:४१-४६; मर्‌कुस १२:३५-३७)
41येसुइ उनहान्‍के सुध्‍याइक्, “खिरिस्‍ट दाउदको छउना हो कहि उनहान्‍इ कस्‍के कहे सक्‍तात्? 42क्‍यारेकनि भजनको कितापमा दाउद आफिइ कलाटि,
“परमपर्‌भुइ मोरो पर्‌भुके कहिक्,
‘तइ मोरो दाहिन्‍या हातपट्‌टि बिस।#भजनसङग्‌रह ११०:१
43मइ तोरो दुस्‍मनहान्‍के तोरो गोडको पइतला तर नाआनुनज्‍याल सम्‍म।’”
44“दाउदइ ओख्‍राइ पर्‌भु कताइ कनि, फेरि उ कस्‍के दाउदको छउना होखिक्?”
धर्‌मगुरुहान्‍को बिरुधमा चेतावनि
(मति २३:१-३६; मर्‌कुस १२:३८-४०)
45सभइ मानिसहान्‍इ सुनि धार्‌लो बेरा येसुइ आफ्‍नो चेलाहान्‍के कहिक्, 46“धर्‌म गुरुहान्‍भि होसियार बिसहेउ, उनहान ढेङो लुगा लगाइ भोए मन परातात् र बजारमा मानिसहानभि सम्‍मान गर्‌लो रुचातात् अनि सभाघरहान्‍मा र भोज भतियारमा बिसेके आदरको ठउँ खोज्‍तात्। 47उनहान्‍इ बिधुवाहान्‍को घरबारहान लुट्‌तात् र देखाएके लागि ढेङो ढेङो पर्‌थना गर्‌तात्, इनहान्‍इ ज बड्‌को सजाए पाउतात्।”

Aktualisht i përzgjedhur:

लुका 20: BOTE

Thekso

Ndaje

Copy

None

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr