पेरेरित 3
3
पतरुसइ लङ्डाके सन्चो बनालो
1एक दिन पतरुस र युहन्ना मझानो तिन बजेपट्टि पर्थनाको बेरामा मन्दिरमा जितिहि रहाइ। 2ओइबेरामा मन्दिरको भित्र पिस्लाहारसिन सुन्दर नाउँ कलार गेटमा जर्म देखिको एक जना लङ्डाके मानिसहान्इ बोकिकनि आनिधार्लो रहाइ। ओइ मन्दिरमा आउलाहार मानिसहान्सिन भिख मागे मानिसहान्इ ओख्राइ दिन दिनके ओइथि धारिदेतरहाइ। 3जब ओंइ पतरुस र युहन्नाके मन्दिरभित्र पिसे लाग्लो देखिक्, तब उनहान्सिन भिख मागिक्। 4अनि पतरुस र युहन्नाइ ओख्राइ एकटक लगाइकनि चाहिकनि पतरुसइ ओख्राइ कहिक्, “ओइ, हामिपट्टि चाहइ!” 5उनहानभि केइ पाउतिन कि कलार आस गरिकनि ओंइ ध्यान लगाइकनि उनहान्के चाहिक। 6तब पतरुसइ कहिक्, “सोनो चादि त मइसिन नाटि, तर मइसिन ज्या बाटि, मइ तोर्हाइ ओइ देतिन। नासरतको येसु खिरिस्टको नाउँमा भोहइ!” 7र पतरुसइ ओख्रो दाहिन्या हात छोपिकनि ओख्राइ उठाइक, अनि तुरुन्ते ओख्रो गोडहान र गोलिगाठामा तागत आइक। 8तब जुरुक्क उठिक उ ठेढाइक् र भोए लागिक, भउतिहि र बुरुक्क बुरुक्क उफ्रतिहि परमेस्वरको पर्सम्सा गर्तिहि उनहान्सिन मन्दिरभित्र पिसिक। 9तब सभइ मानिसहान्इ ओख्राइ भोइधार्लो र परमेस्वरको पर्सम्सा गरिधार्लो देख्वाइ। 10र उनहान्इ मन्दिरको सुन्दर नाउँ कलार गेटमा भिख मागे बिसिधार्लार एइ ज हो कहिकनि ओख्राइ चिन्वाइ र कहाइ, “इ कस्के भउलार होखिक?” कहि अचम्म मान्तिहि जारे ज छक्क पर्वाइ।
मन्दिरमा पतरुसको प्रचार
11सन्चो होख्लो मानिसके पतरुस र युहन्नाइ छोपिकनि साङ्साङे भउलो देखिकनि सभइ मानिसहान जारे अचम्म मान्तिहि सोलोमन नाउँको पेडिमा साङ्हे दुगर्ले उनहान्ठुँ आवाइ। 12इ देखिकनि पतरुसइ मानिसहान्के कहिक्, “ए, इजराएलको मानिसहान हो, ताहान इ कुरामा क्यारे छक्क पर्ताओ? हामि आफ्नो सक्ति र भक्तिइ हामि एख्राइ भोए सक्लार बनालो जस्ने क्यारे हाम्राइ ताहान्इ ट्वाल्ल परिकनि चाहाताओ? 13अबराहाम, इसहाक, याकुब र हाम्रो पुर्खाको परमेस्वरइ आफ्नो सेबक येसुके आदर पाउलार योग्य बनाइक्, जख्राइ ताहान्इ चाहिँ छोपाइदेहो, र पिलातसइ ओख्राइ छाड्लार निधो गर्ते पनि ताहान्इ ओख्राइ ओख्रे सामु असुइकार गरो।#प्रस्थान ३:१५ 14तर ताहान्इ पबित्र र धर्मि मानिसके असुइकार गरिकनि, एक जना ज्यानमाराके छाडिदेलाहार माग गरो,#मति २७:१५-२३; मर्कुस १५:६-१४; लुका २३:१३-२३; १९:१२-१५ 15र जिबन देलाहारके ताहान्इ मारो, तर परमेस्वरइ ओख्राइ मर्लोभि जिउते बनाइक्। इ कुराको हामि गवाहि बाट्हुँ। 16येसुको नाउँमा गर्लो बिस्वासइ र ओख्रो नाउँइ ताहान्इ देख्लो जान्लो इ मानिसके बलियो बनाइक्। येसुभि पाउलो बिस्वासइ इ मानिसके ताहान सभइको आघु पुरे सन्चो बनाइक्।
17“ए दाजिभाइहान हो, मर्हाइ थाहा बाटि, ताहान्इ अन्जानमा एस्नो गरो, र ताहान्को सासकहान्इ पनि ओस्ने गर्वाइ। 18परमेस्वरको खिरिस्टइ दुख भोगे पर्ताइ कहि परमेस्वरइ पहिलिहि ज सभइ अगमबक्ताको मुखभि कलो अगमबाडि ओंइ एस्के पुरा गरिक्। 19उसिगर्ते आफ्नो आफ्नो पापके मानिकनि परमेस्वरपट्टि फर्को तब ताहान्को पाप माफ होख्ताइ, र परमपर्भुको उपस्थितिमा आनन्दको समय आउस्, 20र ओंइ ताहान्को लागि पहिलिहि ज छान्लो खिरिस्ट, मतलब येसुके पठाइदेताइ। 21परमेस्वरइ पहिलिभि आफ्नो पबित्र अगमबक्ताहान्भि बोल्लो सभइ कुरा फेरि नयाँ नाबनाउनज्यालसम्म खिरिस्ट स्वर्गमा ज रहेपर्ताइ। 22मोसाइ कहिक्, ‘परमपर्भु परमेस्वरइ मर्हाइ उठालो जस्ने ताहान्को दाजिभाइहान्को माझोभि एक जना अगमबक्ता ताहान्को लागि उठाताइ। ओंइ ताहान्के ज्या ज्या कताइ उ सभइ कुरा ताहान्इ मानेपर्ताइ।#ब्यवस्था १८:१५,१८ 23तर ओइ अगमबक्ताको बोलि नासुन्लाहार जत्का हरेकके परमेस्वरको मानिसहान्को माझोभि छुट्हेयातात् र नस्ट होख्तात्।’#ब्यवस्था १८:१९
24“समुएलभि लिहिकनि ओख्रो पाछाको सभइ अगमबक्ताहान जत्काइ बोल्लाटाइ, उ सभइ एइ दिनहान्को बारेमा घोसडा गर्लाटाइ। 25अनि परमेस्वरइ ओइ अगमबक्ताहान्भि ताहान्को पुर्खाहान्सिन गर्लो बाचा ताहान्को लागि पनि हो, जुन बाचा परमेस्वरइ ताहान्को पुर्खा अबराहामसिन एस्के कहिकनि बाधिक, ‘तोरो सन्तानभि धर्तिको सभइ परिवारइ आसिस पाउतात्।’#उत्पति २२:१८ 26ताहान हरेकके आफ्नो दुस्ट धन्दाभि फर्काइकनि ताहान्के आसिस देहे कहिकनि परमेस्वरइ आफ्नो सेबक येसुके उठाइक र सभइकते पहिलि ताहान्ठुँ पठाइक्।”
Aktualisht i përzgjedhur:
पेरेरित 3: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.