पेरेरित 23
23
1पावलइ माहासभापट्टि एकटक लगाइकनि चाहिक, र कहिक्, “दाजिभाइ हो, आजको दिनसम्म ज परमेस्वरको आघु निर्दोस जिबन जिउलाटिन।” 2इ सुनिकनि बड्को पुजारि हननियाइ पावलको नजिके ठेढाइलो मानिसहान्के ओख्रो मुखमा हिर्काए आग्या दिहिक्। 3तब पावलइ हननियाके कहिक्, “बाइर बाइर नाम्रो देखालार, भित्र कप्टि मन होख्लो तइ! परमेस्वरइ पनि तोर्हाइ हिर्कात्यास्। तइ धर्म नियम कते बाहिर रहिकनि मोरो फइसला गरे बिसिकनि क्या धर्म नियमको उल्टा मर्हाइ हिर्काए हुकुम देतेर्?”#मति २३:२७-२८
4अनि छेउमा ठेढाइलारहान्इ कहाइ, “क्या तइ परमेस्वरको बड्को पुजारिको बेजत गर्तेर्?”
5तब पावलइ कहिक्, “दाजिभाइ हो, उ बड्को पुजारि हो कलार कुरा मर्हाइ थाहा नारहिक्। धर्मसास्तर्मा त लेखेलाटि, ‘तइ आफ्नो जनताको सासकको बारेमा ननाम्रो झिनबोल।’”#प्रस्थान २२:२८
6तब माहासभामा एउटा दल सदुकि र आर्को दल फरिसिहान होछ कलार थाहा पाइकनि पावलइ बड्को सोरमा कहिक्, “दाजिभाइ हो, मइ त फरिसिहान्को छउना फरिसि ज हो। मर्लोहान फेरि जिउते होख्तात् कलार कुरामा आस धार्लो कारनइ मोरो मुद्दा चलिधार्लाटि।”#पेरेरित २६:५; फिलिपि ३:५
7ओंइ एस्नो कहिसक्लोपाछु फरिसिहान र सदुकिहान्मा भनाभन होखिक, र माहासभा दुइ दल होखिक। 8क्यारेकनि सदुकिहान मर्लोभि जिउते नाहोख्ताइ। र स्वर्गदुत, आत्मा कलार केइ पनि नाटि कहि कतात्। तर फरिसिहान उ सभइ मान्तात्।#मति २२:२३; मर्कुस १२:१८; लुका २०:२७ 9उथि बेस्के हल्ला मच्चिहिक, र फरिसि दलको कुन्हुँ धर्म गुरुहान ठेढाइकनि इसि कतिहिँ घम्साघम्सि होखे लागिक, “इ मानिसमा हामिइ केइ ननाम्रो नाभेटाताहुँ। यदि आत्मा वा स्वर्गदुतइ एख्राइ एस्नो कलो हो कनि क्या त?”
10उथि बड्को झगडा होखिसक्लोपाछु उनहान्को हातभि पावल लुछालुछ पारिकनि मार्बाइ कहि डरइ सेनापतिइ सिपाहिहान्के तर जाइकनि पावलके उनहान्को माझोभि जबरजस्तिसिन आनिकनि ब्यारेकभित्र लेगे कहि आग्या दिहिक्।
11ओइरात पर्भुइ ओख्रो नजिक ठेढाइकनि कहिक्, “साहस गर्हइ, पावल, क्यारेकनि जस्के तइ येरुसलेममा मोरो बारेमा गबाहि देहेर, ओस्ने तइ रोम सहरमा पनि गबाहि देहेपर्ताइ।”
पावलके मार्लार दाउ
12बेहान उज्यालो होखिसक्लोपाछु यहुदिहान एकजुट होखिकनि पावलके नामारुनज्याल केइ नाखाए र नापिए कसम खावाइ। 13इ जाल गर्लाहार मानिसहान चालिस जना कते पनि धेरे रहाइ। 14उनहान्इ मुख्य पुजारिहान र अगुवाहान्ठुँ जाइकनि कहाइ, “पावलके नामारुनज्याल केइ नाखइताहुँ कहि हामिइ कसम खइलाटाहुँ। 15उसिगर्ते ताहान र माहासभा मिलिकनि सेनापतिके अनुरोध गरो, र पावलको मुद्दाको फइसला अझि ठिकसिन होखेपर्ताइ कलार बाहाना बनाइकनि पावलके झिकाहइ। अनि उ इथि आउलार बित्तिके हामि ओख्राइ मारे तयार रताहुँ।”
16तर पावलको भान्जइ इ जाल थाहा पाइकनि ब्यारेकभित्र जाइ पावलके सुनाइदिहिक। 17तब पावलइ कप्तानहानमध्य एक जनाके बोलाइकनि कहिक्, “इ तन्हेयारिके सेनापतिठुँ पुगाइदेओ, क्यारेकनि एख्राइ ओख्रोसिन केइ कहे बाटि।” 18उसिगर्ते कप्तानइ पावलको भान्जके सेनापतिठुँ पुगाइकनि कहिक्, “बन्दि पावलइ मर्हाइ बोलाइकनि इ तन्हेयारिके तोरोठुँ लेगे कलाटि, तोर्हाइ कहेपर्लार केइ कुरा बाटि भन।”
19सेनापतिइ ओख्रो हात छोपिकनि एकपट्टि लेगि एकान्तमा सुध्याइक्, “तइ मर्हाइ कलार कुरा क्या हो?”
20ओंइ कहिक्, “यहुदिहान्इ पावलको बारेमा अझि नाम्रोसिन बुझे निहुँ गरि काल्हेक ओख्राइ माहासभामा आनिदेओ कहि तोरोसिन अनुरोध गर्लार बिचार गर्लाटाइ। 21तर तइ उनहान्को कुरा झिनमान्हेस्, क्यारेकनि उनहानमध्ये चालिसकते पनि धेरे मानिसहान्इ पावलके नामारुनज्याल केइ नाखइलार र नापिउलार कसम खाइकनि ओख्राइ मारे ढुकिकनि बिस्लाटाइ, र आब उनहान तोरो आग्याको आस गरि तयारिमा बाटाइ।”
22उसिगर्ते सेनापतिइ ओइ तन्हेयारिके इसि कहि आग्या दिहिकनि पठाइक्, “तइ मर्हाइ इ खबर देलो कुरा कुन्हुँके पनि झिनकहेस्।”
पावलके बड्को हाकिम फेलिक्सठुँ पठाहेलो
23अनि सेनापतिइ कप्तानहानमध्य दुइ जनाके बोलाइकनि कहिक्, “आज राति ठिक नउ बजे ज दुइ सय जना पइदल भउलार सिपाहिहान, सतरि जना घोडा चढ्लार सिपाहिहान र दुइ सय भाला बोक्लो सिपाहिहान कइसरिया सहरसम्म जाए तयार पारि धार्हइ। 24र पावलको लागि पनि घोडा तयार पारि धार्हइ, र ओख्राइ नाम्रोसिन बड्को हाकिम फेलिक्सठुँ पुगाहइ।” 25अनि सेनापतिइ बड्को हाकिमके एस्नो किसिमको चिट्ठि पनि लेखिक्,
26“माननिय बड्को हाकिम फेलिक्स, कलउडियस लुसियसको तर्फभि बिन्ति। 27इ मानिसके यहुदिहान्इ छोपिकनि मारे खोज्लो रहाइ, तर इ रोमि नागरिक होछ कलार मइ थाहा पाइकनि सिपाहिहान्सिन उथि पुगि एख्राइ छुटाइन। 28क्या कारनइ दोस लगालो होछ कहि बुझ्लार इच्छाइ मइ एख्राइ यहुदिहान्को माहासभामा आनिन, 29उनहान्इ आफ्नो धर्म नियमको चित्त नाबुझ्लो बारेमा एख्राइ दोस लगालो होछ। तर मारे अथवा थुने पर्लार केइ दोस मइ नाभेटाइन। 30इ मानिसके मारे कहि यहुदिहान्इ जाल खेलाइतिहि बाटाइ कहि मइ खबर पाइकनि, र एख्राइ तुरुन्ते तोरोठुँ पठालाटिन। अनि एख्रो बिरुधमा दोस लगालारहान्के पनि तोरोठुँ बयान देहे कहि आदेस गर्लाटिन।”
31उसिगर्ते आदेस पाउलो अनुसार सिपाहिहान्इ पावलके राते रात एन्टिपाटिर्स सहरसम्म पुगावाइ। 32अर्कना दिन सिपाहिहान्इ पावलके घोडचढि सिपाहिहान्को जिम्मामा छाडिकनि ब्यारेक फर्कवाइ, 33कइसरियामा पुगिसक्लोपाछु घोडचढि सिपाहिहान्इ बड्को हाकिमके चिट्ठि देहाइ र पावलके पनि ओख्रो आघु हाजिर गरावाइ। 34उ चिट्ठि पढिसक्लोपाछु बड्को हाकिमइ पावलके सुध्याइक्, “तइ कुन इलाकाको हो?” अनि पावलइ “किलिकिया इलाकाको हो।” कहिकनि कहिक्। 35अनि ओंइ कहिक्, “उसिकनि तोर्हाइ दोस लगालारहान आउलोपाछु तोरो मुद्दा सुन्तिन।” अनि ओंइ पावलके हेरोदइ बनालो दरबारमा धारे कहि हुकुम दिहिक्।
Aktualisht i përzgjedhur:
पेरेरित 23: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.