पेरेरित 18
18
पावल कोरिन्थ सहरमा
1ओख्रोपाछु पावल एथेन्स सहर छाडिकनि कोरिन्थमा जाइक्। 2उथि ओंइ पोन्टस इलाकामा जर्मलो अकिलास नाउँको एउटा यहुदिके भेटाइक्। बड्को राजा कलउडियसइ सभइ यहुदिहान्के रोम सहरभि निस्किकनि जाए आग्या देलो कारनइ, अकिलास भर्खर आफ्नो दुल्हि पिरिस्किलासिन इटालिया देसभि आउलो रहिक्। पावल उनहान्के भेटे जाइक्। 3उनहान्इ पाल बनालार धन्दा गरिकनि जिबन चलातरहाइ। पावल उनहानसाङहे बिसिक क्यारेकनि उ पनि उनहानजस्ने पाल बनालार धन्दा गरिकनि जिबन चलातरहिक। 4हरेक बार्ना दिनमा पावल सभाघरमा जाइकनि येसुमा बिस्वास गरुस् कहिकनि यहुदि र अरु जातहान्सिन तर्क बितर्क गर्तरहिक र उनहान्के बुझाए कोसिस् गर्तरहिक।
5सिलास र तिमोथि माकेडोनिया इलाकाभि आउलोपाछु पावल पुरे समय बचन पर्चारको धन्दामा लागिक। ओंइ यहुदिहान्के “येसु ज खिरिस्ट हो” कलाहार कुराको सबुत देहेके लागि उनहान्के सुनातरहिक। 6तर उनहान्इ बिरोध गरिकनि ओख्रो बदनाम गरे लाग्वाइ, तब पावलइ आफ्नो लुगाको धुलो झार्तिहि उनहान्के कहिक्, “यदि परमेस्वरको दन्ड ताहानमा पर्निसिन, ताहान आफि ज जिम्मा लेहे पर्ताइ, उ दोस मर्हाइ नालाग्ताइ। मइ निर्दोस बाटिन। आबभि मइ अरु जातहान्ठुँ जितिन।” 7तब पावल उथिभि परमेस्वरको पुजा गर्लार तितस युस्तस नाउँ होख्लो अरु जातको मानिसको घरमा जाइक्। ओख्रो घर सभाघरको छेउमा ज रहिक्। 8सभाघरको मुख्य सासक किरिस्पस र ओख्रो सभइ परिवारइ पर्भुमा बिस्वास गर्वाइ। कोरिन्थिहानमध्ये पनि धेरेइ पावलको सिछा सुनिकनि बिस्वास गर्वाइ र बप्तिस्मा लेहाइ।
9एक रात पावलइ दर्सन देखिक्। पर्भुइ पावलके कहिक्, 10“झिनडराहइ, लाभि झिनबिसहइ बरु सुसमाचार पर्चार गर्तिहि भोहइ। क्यारेकनि मइ तोरो साथमा बाटिन। कुन्हुँइ तोर्हाइ आक्रमन गरिकनि हानि गरे नासक्ताइ, क्यारेकनि इ सहरमा मोरो धेरे मानिसहान बाटाइ।” 11एस्के पावल परमेस्वरको बचन सिखातिहि एक बर्स छउ महिनासम्म उनहान्सिन बिसिक।
12जब गलियोन कलार मानिस अखइया इलाकाको बड्को हाकिम होखिक, तब यहुदिहान एके मनको होखिकनि पावलके छोप्वाइ र ओख्राइ बड्को हाकिमको आघु फइसला गरे आनिक। 13र कहाइ, “इ मानिसइ धर्म नियमको बिरुध परमेस्वरको पुजा गरे मानिसहान्के उस्काइधार्ताइ।”
14पावल बोले लाग्लो रहिक्, तर ओइबेरा गलियोनइ यहुदिहान्के कहिक्, “यहुदिहान हो, यदि इ कुन्हुँ ननाम्रो मतलब बड्को अपराधको कुरा होख्लो होख्नि त मइ ताहान्को कुरा सुने ठिके होख्लारिक।” 15तर इ झगडा चाहिँ सब्दहान, नाउँहान र ताहान्के आफ्ने धर्म नियमको बारेमा होख्लो कारनइ ताहान आफि ज मिलाओ। इ कुराको फइसला मइ नागर्तिन। 16अनि गलियोनइ उनहान्के फइसला गर्लार हाकिमको आघुभि बाइर निस्काइदिहिक। 17तब उनहान सभइ सभाघरको मुख्य सासक सोस्थेनेसके छोपिकनि फइसला गर्लार हाकिमको आघु पिट्वाइ। तर गलियोनइ उ कुरामा केइ वास्ता नागरिक।
पावल एन्टिओखिया सहरमा फर्कलो
18पावल कोरिन्थ सहरमा अझि धेरे दिनसम्म बिसिसक्लोपाछु। तब बिस्वासि दाजिभाइहान्सिन छुट्टि होखिकनि उ पानि जाहाजमा चढिकनि सिरिया इलाका जाइक्। ओख्रोसिन पिरिस्किला र अकिलास पनि रहाइ। एउटा भाखलको कारनइ ओंइ किङ्किरिया सहरमा आफ्नो केस खउरिक।#गन्ति ६:१८ 19जब उनहान एफिसस सहरमा आइपुग्वाइ, तब पावलइ पिरिस्किला र अकिलासके ओइथि छाडिदिहिक। आफिचाहिँ एउटा सभाघरमा पिसिकनि यहुदिहान्सिन छलफल गरे लागिक। 20यहुदिहान्इ ओख्राइ अझइ केइ दिन बिसे कहि बिन्ति गर्वाइ, तर उ नामानिक। 21बरु, उनहान्सिन छुट्हेते खेरि ओंइ कहिक्, “परमेस्वरको इच्छा होख्नि मइ फेरि ताहान्ठुँ फर्कि आउतिन।” ओख्रोपाछु उ एफिससभि पानि जाहाजमा चढिकनि जाइक्।
22जब पावल कइसरिया सहरमा आइपुगिकनि उप्रो उक्लिकनि येरुसलेममा गिहिक, तब मन्डलिको बिस्वासिहान्सिन भेटघाट गरि बिन्ति गरिकनि एन्टिओखिया सहरपट्टि ओघ्रिक। 23उ केइ दिन उथि बिसिकनि उथिभि निस्कि गलातिया र फिर्गियाको इलाकाहान्को ठउँहान्मा जाइकनि सभइ बिस्वासिहान्के बिस्वासमा बलियो बनालार काम गरिक्।
अपोल्लोसइ एफिसस सहरमा प्रचार गर्लो
24ओइबेरा अलेक्जेन्डरिया सहरमा बिस्लाहार अपोल्लोस नाउँको एउटा यहुदि एफिसस सहरमा आइक। उ नाम्रोसिन बोले सक्लार र धर्मसास्त्रको धेरे ग्यान रहिक्। 25ओंइ मुक्ति देलाहार पर्भु येसुको बारेमा सिछा पाउलो रहिक्। र जारे ज जोसिलो होखिकनि येसुको बारेमा ठिक ठिकसिन बोल्तिहि सिखातरहिक्। तर ओंइ युहन्नाको बप्तिस्माको बारेमा मात्र जान्लो रहिक्। 26तर ओंइ बोल्लो कुरा सुनिकनि सभाघरमा नाडराइकनि बोले लागिक। तर ओख्रो बोल्लो कुरा सुनिकनि पिरिस्किला र अकिलासइ ओख्राइ आफ्नो घरमा आन्वाइ र परमेस्वरको मुक्तिको अर्थको बारेमा अझि नाम्रोसिन थाहा पाउस् कहिकनि ठिकसिन बुझाइदेहाइ। 27अपोल्लोस अखइया इलाकामा जाए मन गर्ते बिस्वासि दाजिभाइहान्इ ओख्राइ उथि जाए हउसला देहाइ, र ओख्राइ सुइकार गरुस् कहि उथिको बिस्वासिहान्के चिट्ठि लेखिक्। अपोल्लोस उथि पुगिकनि पर्भुको अनुगर्हभि बिस्वास गर्लाहारहान्के धेरे साहेता गरिक्। 28क्यारेकनिसिन ओंइ धर्मसास्त्रको बचनभि येसु ज खिरिस्ट हो कलार कुरा देखाइकनि यहुदिहान्के सभइको आघु सबुत दिहिकनि बक्कि बन्द गराइदिहिक।
Aktualisht i përzgjedhur:
पेरेरित 18: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.