पेरेरित 16
16
पावल र सिलाससिन तिमोथिको भेट
1पावल डर्बि सहर होख्ले लुस्त्रामा आइक। उथि तिमोथि नाउँ होख्लो एक जना बिस्वासि रहिक्। उ एउटा बिस्वासि यहुदि बेटिको छउना रहिक् तर ओख्रो बुबा चाहिँ गिरिक रहिक्। 2लुस्त्रा र आइकोनियनको बिस्वासि दाजिभाइहान्इ तिमोथिके नाम्रो मानिस हो कहि मान्तरहाइ। 3पावलइ ओख्राइ साङ्हे लेगे इच्छा गरिक्। उ ठउँहान्मा रलो यहुदिहान्के समस्या नाहोखुस् कहिकनि पावलइ ओख्रो खतना गरिक्। क्यारेकनि ओख्रो बुबा गिरिक हो कलार कुरा यहुदिहान्के थाहा रहिक्। 4तब उनहान सहर-सहरको बाट होखिकनि जिते उनहान्इ येरुसलेमको पेरेरितहान र एल्डरहान्इ गर्लो निधोहान इनहान्के पालन गर्हेउ कहि सुनाइदेहाइ। 5एस्के मन्डलिहान बिस्वासमा बलियो होख्तिहि र सङ्ख्यामा दिन दिन्ने बढ्तिहि गेहाइ।
पावलइ माकेडोनिया गेलार दर्सन देखिक्
6पबित्र आत्माइ पावल, सिलास र तिमोथिके यसिया इलाकामा बचन पर्चार गरे रोक्लो कारनइ उनहान फिर्गिया र गलातिया इलाका होखिकनि जावाइ। 7माइसियाको इलाकामा पुग्लोपाछु उनहान्इ बेथानिया इलाकापट्टि गेलार बिचार गर्वाइ। तर येसुको आत्माइ उनहान्के जाए नादिहिक्। 8उसिगर्ते उनहान माइसिया इलाका होख्ले तोर्आस सहरमा गेहाइ। 9राति पावलइ एउटा दर्सन देखिक्, माकेडोनिया इलाकाको एक जना मानिस ठेढाइकनि ओख्राइ बिन्ति गरिधार्लो रहिक्, “एइथि ज पारो माकेडोनिया इलाकामा आइ, र हाम्राइ साहेता गर्हइ।” 10जब पावलइ इ दर्सन देखिक्, तब तुरुन्ते हामि माकेडोनिया जाए तयार होख्हुँ क्यारेकनि उथिको मानिसहान्के सुसमाचार प्रचार गरे परमेस्वरइ हाम्राइ बोलालो होछ कहि हामि इ बिस्वास गर्हि।
लिडियाको बिस्वास
11तोर्आसभि पानि जाहाजमा चढिकनि हामि सामोथार्के ठुठिपट्टि गिहि र अर्कना दिन नियापोलिस सहरमा आइपुग्हुँ, 12उथिभि हामि माकेडोनियाको इलाकाभि मुख्य सहर फिलिप्पिपट्टि जाहुँ। उ रोमिहानको अधिनमा रहिक्। उथि हामि केइ दिनसम्म बिस्हुँ। 13बार्नाको दिनमा सहरको गेटभि बाहिर खोलाको छेउमा जाहुँ, क्यारेकनि उथि पर्थना गर्लार ठउँ बाटि कहि हामिइ अनुमान गर्लो रहुँ, र बट्हेलो बेटिहान्सिन बोलिचालि गरे लाग्हुँ। 14अनि थिआटिरा सहरको लिडिया नाउँ होख्लो भाँटा रङको लुगा बेच्लार एउटा बेटि रहिक्। उ परमेस्वरको पुजा गर्लार बेटि रहिक्, र पावलइ कलो बोलि ओंइ मन लगाइकनि सुनिक। अनि पर्भुइ ओख्रो मन फेरिदिहिकनि ओंइ बिस्वास गरिक्। 15जब उ र ओख्रो घरको सभइ जनाको बप्तिस्मा होखिक्, तब ओंइ हाम्राइ बिन्ति गरिक्, “यदि ताहान्इ मर्हाइ साच्चिको एउटा पर्भुको बिस्वासि ठान्ताओ कनि मोरो घरमा आइकनि बिसो।” ओंइ हाम्राइ कर गरिक्।
पावल र सिलास जेलमा
16एक दिन हामि पर्थना गर्लार ठउँमा जितिहिरहुँ, तब एक जना नोकरनि छुडियाके हामि भेट्हुँ। ओंइ दुस्ट आत्माको सक्तिभि मानिसहान्को जोखना चाहिकनि आफ्नो मालिकहान्को लागि धेरे कमाइकनि आन्तरहिक। 17उ छुडियाइ चिच्याइतिहि पावल र हाम्राइ पच्छ्याइक, “इ मानिसहान सभइ कते माहान परमेस्वरको सेबक हो। इनहान्इ ताहान्के मुक्तिको बाटको घोसडा गर्तात्।” 18ओइ धेरे दिनसम्म एस्ने गरिधारिक। तब पावलके दिक्क लागिकनि फनक्क फर्कि ओइ दुस्ट आत्माके कहिक्, “येसु खिरिस्टको नाउँमा मइ तोर्हाइ आग्या गर्तिन, इ छुडियाभि निस्किकनि बाइर जाइघाल।” अनि ओइ दुस्ट आत्मा ओइ बेरामा ज निस्किघालिक। 19तर ओख्रो मालिकहान्इ आफ्नो कमाइको आस मर्लो देखिकनि पावल र सिलासके छोपिकनि घिसार्ले सहरको चोकमा सासकहान्ठुँ लेग्वाइ। 20अनि पावल र सिलासके सहरको हाकिमहान्ठुँ आनिकनि कहाइ, “इ मानिसहान यहुदिहान हो, इनहान्इ हाम्रो सहरमा गडबड गरिधार्लाटाइ। 21इनहान्इ एस्नो एस्नो रितिरिवाजहान सिखातात्, जुन हामि रोमिहान्को नियमअनुसार सुइकार गरे वा माने नाम्रो नाटि।” 22तब भिडहान एकजुट होखिकनि पिटे गेहाइ। सहरको हाकिमहान्इ उनहान्को लुगा च्याथिकनि हुर्याइदेहाइ, र उनहान्के लठ्ठिइ पिटे आग्या देहाइ।
23अनि बेस्के लठ्ठिइ पिटिकनि उनहान्के झ्यालखानामा थुनिदेहाइ, र झ्यालखानाको हाकिमके इ कइदिहान्के नाम्रोसिन चाहातिहि गर्हेउ कहि अर्हाइक। 24एस्नो हुकुम पाइकनि जेलको हाकिमइ उनहान्के झ्यालखानाको भित्र कोठामा लेगि उनहान्को गोड ठेड्कोमा घालिदेहाइ।
25तर लगभग आधा रातमा पावल र सिलास पर्थना गर्तिहि परमेस्वरको भजन गितगातिहि रहाइ, र अरु कइदिहान्इ सुनिधार्लो रहाइ। 26तब एक्कासि एउटा बड्को भुइचालो जाइक्। झ्यालखानाको जग हल्लिक, र तुरुन्ते जम्मइ दइलहान खुलिक, र सभइको डोराहान फुक्लिक। 27तब झ्यालखानाको हाकिम निन्द्राभि जागिक, झ्यालखानाको दइलहान खोलेलो देखिकनि कइदिहान सभइ भागिसकिक कहि सोचिकनि ओंइ आफिके मारे तरवार निस्काइक। 28तर पावलइ बड्को सोरइ एस्के कतिहिँ चिच्याइक, “तइ आफिके केइ हानि झिन गर्हइ, क्यारेकनि हामि सभइ एइथि बाट्हुँ।”
29इ सुनिकनि झ्यालखानाको हाकिमइ ढेभ्रि मागिकनि दुगर्ले भित्र आइक, अनि डरइ थरथराइले पावल र सिलासको आघु घोप्टो परिक्। 30उनहान्के बाहिर आनिकनि ओंइ कहिक्, “उदार पाएके मइ क्या गरेपर्ताइ?”
31अनि उनहान्इ कहाइ, “पर्भु येसुमा बिस्वास गर्हइ, अनि तइ र तोरो परिवारइ उदार पाउतात्।” 32अनि पावल र सिलासइ झ्यालखानाको हाकिमके र ओख्रो घरमा होख्लो सभइ मानिसहान्के पर्भुको बचन सुनावाइ। 33तब रातिको ओइ बेरामा ज हाकिमइ पावल र सिलासके लेगिकनि उनहान्को घाउ धोइदिहिक्। अनि हाकिम र ओख्रो परिवारको सभइ जनाइ तुरुन्ते बप्तिस्मा लेहाइ। 34र हाकिमइ उनहान्के घरमा आनिकनि उनहान्को आघु खइलाहार चिज धारिदिहिक, र परमेस्वरमा बिस्वास गरिन कलार कुरामा ओख्रो सभइ परिवारसिन उ आनन्दित होखिक्।
35अर्कना दिन बेहानो सहरको हाकिमहान्इ सिपाहिहान्के इ आदेस दिहिकनि पठाइक्, “उ मानिसहान्के छाडिदेओ।”
36तब झ्यालखानाको हाकिमइ पावलके इ कुरा सुनाइक, “सहरको हाकिमहान्इ ताहान्के छाड्देहे आदेस देलाटाइ। उसिगर्ते आब निस्किकनि नाम्रोसिन जाओ।”
37तर पावलइ उनहान्के कहिक्, “हामि रोमि नागरिकके बिना दोस उनहान्इ मानिसहान्को आघु पिट्वाइ र झ्यालखानामा पनि थुन्वाइ, र आब हाम्राइ कुन्हुके थाहा नादिहिकनि निस्काए खोज्तात्? इ होखे नासक्ताइ। उनहान आफि आउस र हाम्राइ निस्काइकनि लेगुस्।”
38अनि सिपाहिहान जाइकनि सहरको हाकिमहान्के इ बोलि सुनावाइ। पावल र सिलास त रोमि नागरिक होछ कलार सुनिकनि उनहान डरावाइ। 39उनहान आइकनि पावल र सिलाससिन माफ माग्वाइ, र उनहान्के बाहिर लेग्वाइ र सहर छाडिकनि जाए बिन्ति गर्वाइ। 40उनहान झ्यालखानाभि बाहिर निस्कि सक्लोपाछु लिडियाको घरमा गेहाइ, र बिस्वासि दाजिभाइहान्सिन भेटघाट गरिसक्लोपाछु उनहान्के हउसला दिहि बिदा होख्वाइ।
Aktualisht i përzgjedhur:
पेरेरित 16: BOTE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.