मत्ती 8
8
कोहड़ीया नु ठीक करले
(मरकुस 1:40–45; लूका 5:12–16)
1जिसे बेले ईशु पहाड़ा कनु तले उतरला, तां हेक बङी भीड़ ओचे भांसु टुरती पली। 2ते ङेखा, हेक कोहड़ी, गोढु आतीकर ओनु प्रणाम करले ते केहले, “हे प्रभु, अगर तु चाहवी, तां मनु शोद्ध कर सग़ी।”
3ईशु ने आपणा हाथ बढ़ाती कर ओनु छूले ते केहले, “मैं चाहवे तु शोद्ध हुती जा।” ते ओ तुरन्त कोहड़ कनु शोद्ध हुती गेला।
4ईशु ने ओनु केहले, “ङेख, कानु कहीं ना किहो, पर जती कर आपणे आप नु याजक नु ङिखाण ते जको चढ़ावा मूसा भविष्यवक्ता ने ठहराला छै ओ भेंट चढ़ा, ताकि लौका चे वास्ते ग़वाही हो।”
रोमी सूबेदार चा भरोसा
(लूका 7:1–10)
5जिसे बेले ईशु कफरनहूम मां आला, तां हेक रोमी सूबेदार ओचे गोढु आतीकर ओकनु बिनती करली, 6“हे प्रभु, माया हेक दास घरा मां लकवे ची बिमारी लारे ब़ोहत ङुखी पला।”
7बल्ति ईशु ने रोमी सूबेदारा नु केहले, “मैं आती कर ओनु ठीक करी।”
8रोमी सूबेदारा ने उत्तर ङिला, “हे प्रभु, मैं ऐस लायक कोनी कि तु माई छत्ते तले आ, पर सेर्फ मुँहा लारे केहती ङे तां माया दास ठीक हुती जई। 9कांकि मैं वी प्रायधीन इन्सान छै, ते सिपाही माये अधीन छी। जब मैं हेके नु किहे, ‘जा,’ तां ओ चाह्ला जाये, ते ङुजे नु किहे, ‘आ,’ तां ओ आती जाये। ते जब आपणे कुई दासा नु किहे, ‘ईं कर,’ तां ओ करे।”
10ईं सुणती कर ईशु नु अचम्भा हुला, ते जको ओचे भांसु आवी पलते वानु केहले, “मैं तम्हानु सच्च किहे पला कि मैं इस्राएल मां वी इसड़ा विश्वास कोनी ङेखला। 11#लूक 13:29 ते मैं तम्हानु किहे पला कि पूरब ते पक्षिम कनु ब़ोहत से लौक आती कर अब्राहम ते इसहाक ते याकूब चे लारे स्वर्ग़ चे राज़ मां ब़ेसे। 12#मत्ती 22:13; 25:30; लूक 13:28पर इस्राएली लौक जको आपणे आप नु नरीकारा चे पूत समझी, वे ही लौक ब़ाहरु अन्धारे मां नाखती ङिले जाये, जिठे रोवणे ते ङांत पीसणे हुवी।” 13ते ईशु ने रोमी सूबेदारा नु केहले, “जा, जिंवे दुधा विश्वास छै, यूंही दुधे वास्ते हो।”
ते ओचा सेवक ओही बेले ठीक हुती गेला।
ईशु ने बिमारा नु ठीक करले
(मरकुस 1:29–34; लूका 4:38–41)
14ईशु जिसे बेले पतरस चे घरे आला,तां ओणे ओची सासवे नु बुखारा मां पले ङेखले। 15ईशु ने विचा हाथ छूला ते विचे बुखार उतरती गेले, ते वा उठती कर ओची सेवा-टहल करु लाग़ली।
16जब आथण हुले तब वे ओचे गोढु ब़ोहत से लौका नु आणले जाये मां दुष्टात्मा हुतीया, ते ईशु ने वा दुष्टात्मा नु वचना लारे काढ़ती छोड़ले, ते सब बिमारा नु ठीक करले।
17ताकि जको वचन यशायाह भविष्यवक्ता चे जरिये लिखला गेलता ला ओ पूरा हो, “कि ओणे अम्चीया कमजोरीया नु आपणे उपर गेहती गेलीया, ते अम्चीया बिमारीया नु चती गेले।”
ईशु चे भांसु टुरणे चा मोल
(लूका 9:57–62)
18ईशु ने जब आपणे चारो ओर हेक बङी भीड़ ङेखली तां झील चे ओस पार चैला नु जाणे ची आज्ञा ङिली। 19तब हेक शास्त्रीया ने ओचे गोढु आती कर ओनु केहले, “हे गुरु, जिठे-किठी तु जाये, मैं दुधे भांसु टुरती पड़ी।”
20ईशु ने ओनु केहले, “लोमड़ीया चीया घौरा ते आसमाना चे पखीयां चे बसेरे हुवी, पर मैं इन्सान चे पूता वास्ते ठोङ मेहलणे ची वी जग़हा कोनी छै।”
21हेक नेरे चैले ने ओनु केहले, “हे प्रभु, मनु पेहले जऊं ङे कि आपणे ब़ा नु दफनाती ङिये।” 22ईशु ने ओनु केहले, “तु माये भांसु टुरती पड़, ते मुड़दा नु आपणी मुड़दी दफनाऊ ङे, कांकि वाकनु हमेशा चा जीवन कोनी।”
लहरा नु ते अन्धारी नु शान्त करने
(मरकुस 4:35–41; लूका 8:22–25)
23जिसे बेले ओ ब़ेड़ी उपर चढ़ला, तां ओचे चैले ओचे भांसु टुरती पले। 24ते ङेखा, झील मां हेक इसड़ा बङा तुफान ऊठला कि ब़ेड़ी लहरा लारे ढिकिजु लाग़ली, ते ईशु नूहला पलता ला। 25बल्ति चैला ने गोढु आती कर ओनु जग़ाले ते केहले, “हे प्रभु, अम्हानु बचा! अम्ही नाश हुले जऊं।”
26ईशु ने वानु केहले, “हे अल्पविश्वासी लौक, कां ङरा पले?” बल्ति ओ खड़ा हुती कर अन्धारी नु ते पाणीया नु दड़काले, ते सब शान्त हुती गेले।
27ते वे अचम्भा करती कर किहुं लाग़ले, “ईं किसड़े इन्सान छै कि अन्धारी ते पाणी वी ऐची आज्ञा मनी।”
ईशु गदरेनियो चे देशा मां
(मरकुस 5:1–20; लूका 8:26–39)
28जिसे बेले ओ नेरे पासु गदरेनियो चे देशा मां पुज़ला, तां ङोन इन्साने जाये मां दुष्टात्मा हुतीया कब्रा महु निकलते हुले ओनु मिड़ले। वे इतने खतरनाक हुते कि कुई ओ मार्ग़ा कनु जा ना सग़ते। 29वाणे रौल मचाती कर केहले, “हे नरीकारा चा पूत, अम्चे दुधे कनु का काम? का तु समय कनु पेहले अम्हानु ङोख ङिऊं इठे आती गेला?”
30वाकनु कोच्छ दूर हेक बङा सूअरा चा झोण्ड चरे भीलता। 31दुष्टात्मा ने ओनु ईं केहती कर बिनती करली, “अगर तु अम्हानु काढ़ी, तां सूअरा चे झुन्डा मां भेज़ती ङे।”
32ईशु ने वानु केहले, “जावा,” वे निकलती कर सूअरा मां रम्मती गेले, ते ङेखा, सारा सूअरा चा झोण्ड कड़ाड़े उपर कनु झटपट पाणीया मां जती पला ते ब़ुङती मरती गेला।
33वांचे आजड़ी द्रोड़ती कर गेले वाणे शहर ते गांवा मां जती कर सारीया बाता ते जाये मां दुष्टात्मा हुतीया वांचा सारा हाल केहती सुणाला। 34तब सारे शहरा चे लौक ईशु नु मिलणे वास्ते निकलती आले, ते ईशु नु ङेखती कर बिनती करली कि, “अम्ची हद्दी कनु ब़ाहर चाह्ला जा।”
Aktualisht i përzgjedhur:
मत्ती 8: ODR
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
CC BY-NC-ND 4.0