Lukah 3
3
Napapatomana hi Yohanih Pembaptih
(Mat. 3:1-12; Mrk. 1:1-8; Yoh. 1:19-28)
1Ta ɗalu habulu limma dounaka napareahana hi Kaihar Tiberiuh, Pontiuh Pilatuh anaʄaʄi gubernur ta loaɗa Yudea. Jaka hi Herodeh namaʄaʄi raja ta loaɗa Galilea. Manga hi Pelipuh anguwuana hi Herodeh namaʄaʄi raja ta tana Iturea ʄaka ta Trakonitih. Hi Lihaniah namaʄaʄi raja ta tana Abilene. 2Ɗama ʄaʄi imam#3.2 Imam ʄiayak natou nama ta paɗuana hi Alla ʄaka na tourara. ɓakul hi Hanah ʄaka hi Kayapah. Ta doungu nou ʄella hi Alla ana patomanya nawini-Na napaledinya lahi Yohanih, na anana hi Hakaria ta maraɗa karah. 3Jiayaka hi Yohanih nahalaku ta haguꞌul loaɗa loku Yordan ʄaka napatomanya na lii waling lahi Alla. Nakawulang hi Yohanih, “Hariayay waling ta doku-jalam, ʄaka kaku ihum, kana poahi-poɗahgimija ɗa doku-jalami hi Alla.” 4Mearana napatuli ta huratun hi nabi Yehaya:
“Einya natou nama kawulangu ta maraɗa karah,
hadianya larangi hi Moiri,
paluruhunya larangi-Na.
5Nama pa oꞌakung ɓoaninya,
na letin nama ʄaga peʄaruya kana lijak.
Na larangi nama kaleagu paluruhuya,
ʄaka na larangi nama kajoꞌak palijakuya.
6Kaɗa ita ɗa tou ta pinu-tana
gikineina hi Moiri Alla ana pamanumaraha ɗa tourara.’ ”
7Ɗangu ɗa tou ɗama aming lahi Yohanih ɗa karei ihu. Jiaɗinguka hi Yohanih napanewi lahi ɗuɗa, “Nyiami tou nama irrak nama patanogu maddungu! Geara nama winagimi amihigil waling ta hukunguna hi Alla nama aming? 8Mupatekapanya napata morikumu nama kalung kapiku itagunya na tada hariam nama patetekang! Abi wimi oatakang, ya nyiama ɓokumanya hi Abraham. Wigugim: Waling ta watu hei hi Moiri Alla napiak ana wolunya wallana hi Abraham! 9Hi Alla enga geahana ana hukunya natou dama buhang paharia waling ta doku-jalan ʄaka dama woluya nama kalung, mearana natou nama hadia kataaka papogu wainya na pingi ai dama eingu wuana ʄaka hina leꞌaya ta api.”
10Natou ɗangu ɗapatutur lahi Yohanih, “Atonoukanaka gananyah napawoluma nyiama?”
11Nagapiya, “Gearaya nama eingu ɗua bella koapina, woanya dama einguna; ʄaka gearaya nama eingu pa anguna, woa ʄellanya dama eingun.”
12Ami ʄellaja ɗama tagu karei hikatiku lahi Yohanih ka ihuma awiɗ, ʄaka ɗapatutur, “To gurr, gananyah napawoluma nyiama?” 13Nagapiya hi Yohanih, “Abi karei palopahɗing walingu napalanga ɓotah.”
14Ei ʄellaja ɗa ʄawa-bani ɗama patutur, “Gikinoukamaka nyiama? Ganaɗikanyaka nahawoluma?”
Nagapiya hi Yohanih, “Abi parimaɗingu ʄaka abi palapiɗingu, rekanaka na kanyuru napakollim ta morikum.”
15Ta rahi nou ʄella, naɗangu natou nama patutur ta atiɗa daʄiakaɗiya hi Yohanih nei, na Karituh, Raja nama Pamanumara? 16Jiayaka hi Yohanih napanewi bolluja, “Nyouwa nama ihu waigimi wei, ʄiaɗinguka einyah baaru nama hilu aming nama reihi kuaha waling lahi nyouwa. Naɓukaru letuɗanya na larru tarawihi-Na, nyouwa dama moaɗamaya. Ta rahi ana pa ihu tou, napawarahuha waingu Hangahu Harri ʄaka nahipuha waingu api. 17Ta limma-Na einya natipi nama peabunya na pari lapaku ana warah. Nama warah nakehaya hina tauya ta lepit, nakapeana hina tauya ta api dama hilu beɗa!”
18Tonounaka hi Yohanih ana waingu ɗangu pata panunga-papeakangun ta tou ɗangu, ta rahi ana patomanya na Lii Kalung.#3.18 Na Lii Kalung napapatomana hi Yohanih pembaptih ya, witinanya hi Karituh napapaturana hi Alla kana pamanumaraha ɗa tourara. 19Laka atonouɗin hi Yohanih nabaninya hi Herodeh, kaɗang hi Herodeh ana paheiliya hi Herodiah na arawei angwuana, ʄaka kaɗang ngaladukaɗa nahawoluna hawanguk hi Herodeh nama irrak. 20Hi Herodeh nataba ʄellapah nahawoluna nama irrak lapakung napatamanya hi Yohanih ta gallu.
Hi Yehu ihu wainya wei
(Mat. 3:13-17; Mrk. 1:9-11)
21Adaɗi natamah ta gallu hi Yohanih, einya hangi laɗɗu na ihuha ɗa tou ɗangu ʄaka hi Yehu aminya manga hina ihuʄellaya. Na mengaka hi Yehu pa ihuya, tangirun ana habayang tawehananyaka na awang, 22ʄaka na Hangahu Harrina hi Alla napurung lahi Ɗunna nama pahaɗa noung ta manu burru. Manga ranguɗanyaka na liina hi Alla, nama wina, “Jiaɗiwuka na anag napareihi namu-Gu, nama patuꞌang ta ati-Gu.”
Nalarrih ʄaʄiɗ ɗa apu-ɓokuna hi Yehu
(Mat. 1:1-17)
23Ta kawunga pahalakunanya nakerangu-Na ta pinu-tana, hi Yehu langa tillumbulu dounaka. Wiɗanya, hi Yehu anananya hi Yuhup, hi Yuhup anananya hi Eli, 24hi Eli anananya hi Matat, hi Matat anananya hi Lewi, hi Lewi anananya hi Malki, hi Malki anananya hi Yanai, hi Yanai anananya hi Yuhup, 25hi Yuhup anananya hi Matica, hi Matica anananya hi Amoh, hi Amoh anananya hi Nahum, hi Nahum anananya hi Hehli, hi Hehli anananya hi Nagai, 26hi Nagai anananya hi Maat, hi Maat anananya hi Matica, hi Matica anananya hi Himei, hi Himei anananya hi Yohek, hi Yohek anananya hi Yoda, 27hi Yoda anananya hi Yohanan, hi Yohanan anananya hi Reha, hi Reha anananya hi Zerubabel, hi Zerubabel anananya hi Healtiel, hi Healtiel anananya hi Neri, 28hi Neri anananya hi Malki, hi Malki anananya hi Adi, hi Adi anananya hi Koham, hi Koham anananya hi Elmadam, hi Elmadam anananya hi Er, 29hi Er anananya hi Yehua, hi Yehua anananya hi Elieher, hi Elieher anananya hi Yorim, hi Yorim anananya hi Matat, hi Matat anananya hi Lewi, 30hi Lewi anananya hi Himeon, hi Himeon anananya hi Yehuda, hi Yehuda anananya hi Yuhup, hi Yuhup anananya hi Yonam, hi Yonam anananya hi Elyakim, 31hi Elyakim anananya hi Melea, hi Melea anananya hi Mina, hi Mina anananya hi Matata, hi Matata anananya hi Natan, hi Natan anananya hi Daut, 32hi Daut anananya hi Ihai, hi Ihai anananya hi Obed, hi Obed anananya hi Boah, hi Boah anananya hi Halmon, hi Halmon anananya hi Nahahon, 33hi Nahahon anananya hi Aminadab, hi Aminadab anananya hi Admin, hi Admin anananya hi Arni, hi Arni anananya hi Hehron, hi Hehron anananya hi Pereh, hi Pereh anananya hi Yehuda, 34hi Yehuda anananya hi Yakub, hi Yakub anananya hi Ihak, hi Ihak anananya hi Abraham, hi Abraham anananya hi Terah, hi Terah anananya hi Nahor, 35hi Nahor anananya hi Herug, hi Herug anananya hi Rehu, hi Rehu anananya hi Peleg, hi Peleg anananya hi Eber, hi Eber anananya hi Halmon, 36hi Halmon anananya hi Kenan, hi Kenan anananya hi Arpakhad, hi Arpakhad anananya hi Hem, hi Hem anananya hi Nuh, hi Nuh anananya hi Lamek, 37hi Lamek anananya hi Metuhalah, hi Metuhalah anananya hi Henok, hi Henok anananya hi Yared, hi Yared anananya hi Mahalaleel, hi Mahalaleel anananya hi Kenan, 38hi Kenan anananya hi Enoh, hi Enoh anananya hi Het, hi Het anananya hi Adam, hi Adam pawoluna hi Alla.
Aktualisht i përzgjedhur:
Lukah 3: wnk
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Wycliffe Bible Translators, Inc. All rights reserved.