1. Mose 15
15
O Devel penell, te dell lo o Abrames čaven oun i them
1Koy pal moukas o baro Devel o Abrames leskri gole te shounell oun penas ap leste: “Ma traash, Abram! Me rikrau mire vasta pral toute. Oun me hom touke i baro bravlepen.”
2Koy penas o Abram: “Miro ray, baro Devel, hoy kameh man te dell? Man hi kek čave. Me te merau, lell halauter, hoy man hi, o Eliyeser, ko vell dran o foro Damaskus. 3Man dal tou kek čaven. Oun miro pralstouno boudepaskro lell pal mande halauter, hoy miro hi.”
4Koy penas o baro Devel ap o Abrameste: “Na-a, kova lell gar, hoy tiro hi. Tou veh dad i čavestar. Oun tiro čavo lell halauter, hoy tiro hi.” 5Oun o Devel anas les vin oun penas: “Dik an o bolepen! Oun dik i bolepangre momlia! Nay peneh tou, har boud kolla hi? Yaake boud menshe venna toutar.”
6Oun o Abram patsas o baro Debles. Oun doleske kras o Devel les čačo glan peskre yaka.
7Oun o baro Devel penas ap leste: “Me hom o baro Devel, kay anom tout dran o foro Our, hoy an o them Kaldea hi. Kava them, kay tou kanna hal, dau tout, te vell kova tiro them.”
8Koy penas o Abram: “Miro ray, baro Devel, har djinau me, te vell kava them miro?”
9Koy penas o Devel ap leste: “An mange i terni groumni – triin bersh phouro, i bouzni – triin bersh phouro oun i bakro – triin bersh phouro, i divyi tauba oun i vavar tauba!”
10Oun yob anas leske kol tsele firhen oun činas len mashkral khetne. Oun čivas yek kotar ap kay rig, ko vavar kotar ap koy rig. Kokres i čirkle činas yob gar an kotya. 11Koy van divye čirkle oun moukan pen ap kol moule firhende te perell. Oun o Abram tradas len krik.
12Har o kham tele djas, sovas o Abram zoreles dren. Oun ap leste vas bari daar. Oun rati vas troul leste. 13Oun o Devel penas ap o Abrameste: “Čačepah, tou djiness: Tire menshe, kay toutar venna, venn vi-themarya an i them, kay gar lengro hi. Oun i menshe an ko them djan zoreles ap lende oun krenn boudepangre lendar. Oun yon hounte boudrenn lenge 400 (star-sheel) bersha. 14Kolla, kay krenn lendar boudepangre, lenn i phagi mandar. Koy pal djan tire menshe vin baro bravlepah. 15Oun touke penau me: Te mereh, soveh barhtelo dren. An i mishto phourepen veh tou paskedo.
16Oun pal star menshengro phourepen venna tire menshe kate pale. Koy doosh kolendar, kay kanna kate djivenn – kolla hi i Amorarya – hi kanna gar bares doha, te tradap len vin.”
17Oun har o kham tele djas oun rati vas, dikas o Abram i bob, dran koleste i yagakro dourho pre djas. Oun yag djas mank kol kotya mass. 18Yaake das o baro Devel o Abrameste ap ko dives peskro lab, oun penas: “Tire čaven, kay toutar venna, dau me kava them mank o lengsto pani o themestar Egiptia oun o baro lengsto pani Eufrat. 19Oun kolla, kay an kava them khere hi, dau me an tiro vast: i Kenarya, i Kenasarya, i Kadmonarya, 20i Hetarya, i Perisarya, i Refayarya, 21i Amorarya oun i Kanaanitarya, i Girgasharya oun i Yebousarya.”
Aktualisht i përzgjedhur:
1. Mose 15: Sint-Man2024
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.