Tegagia 3
3
Mia tedonta a laro hala ka poko'ariano
3:1-24
1 #
Meng. 12:9; 20:2 Ule onaemo anu lalu pande i olono luwuno kondehora mo'ila anu pinokogagi-Do Ue Ala. Ule motaeakono beine atuu, ”Manasa Ondae Ue Ala mepau, ’Si kaano wuano luwuno keu a bonde andio,’ menteeke?” 2Sumangki beine atuu a ule, ”Wuano luwuno keu a bonde andio moiko kikaano, 3sine mongkona wua inso a ngkeu anu kongko i tonga-tongano bonde, Ondae Ue Ala mepau: Si kaano ke maupo dumanggio, te'ingka mate komiu.” 4Sine, ule motaeakono beine atuu, ”Mentee ntu'u nahi komiu mate. 5Tendeano, Doto'orio Ue Ala, nine tempono ikaano matamiu ta te'ungkahi, ka komiu gagi kana Ondae Ue Ala, tumo'orio mongkona anu moiko ka anu mosa'o.” 6Ikitao beine atuu nine wua ngkeu atuu moiko ba ikinaa ka tekosi kikitaano. Ka mbo'u, keu atuu mompadii aroa hangano mompowee ponto'ori. Ka i'amba mo'opu wuano ka ikaano; ipoweeakono mbo'u tamano anu perongano, ka tamano mbo'u kumaano. 7Ka i'amba te'ungkahiomo matado orua ira ka doto'orio nine kolambe-lambe ira. Doposombu ira lewe ngkeu ara ka doweweuo kembido.
8Tempono dorongeo suara-Do Ue Ala anu melempa-lempa a bonde owowa oleo, mia atuu ka beineno mewuni inso i aro-Do Ue Ala i olodo keu a laro bonde.
9Ondae Ue Ala moboio mia atuu, ka Dopepau, ”Isuakoke?” 10Onae sumangki, ”Tempono kurongeo suara-Miu a bonde, gagi aku doito, hangano kolambe-lambe aku, onaemo ka kupewuni.” 11Pau-Do, ”Isemake pauakomu nine omue kolambe-lambe? Nde ukaanoke wuano keu anu Ku'ontoo ba ikinaa?” 12Sumangki mia atuu, ”Beine anu Iweeakune i horiku, onaemo anu moweeakune wuano keu atuu, ka kukaano.” 13#2Kor. 11:3; 1Tim. 2:14Mepau Iramo Ue Ala a beine atuu, ”Hapa anu wineweumu andio?” Motae beine atuu, ”Ule atuu anu popandei aku, ka kukaano.” 14Ka i'amba Ondae Ue Ala mepau a ule atuu, ”Hangano moweweukomo kanatuu, tetotonaakomo i olodo luwuno pinotuwu ka i olodo luwuno kondehora mo'ila. Omue komelempaako kompomu ka awu wita ta kaangamu asa ntinuwumu. 15#Meng. 12:17Aku moweweu pe'iwalia i olomu ka beine andio, i olodo inulemu ka inuleno; inuleno ta puroo ulumu, ka omue kotumungkuo tundono.” 16Mepau Ira a beine atuu, ”Aku mokohadioo pe'iseimu tempono umentia; upe'ana komompemahaki; po'eheno aroamu te'aro a ntamamu, sine onae ta pabawaiko.” 17#Ibr. 6:8Ka Do'amba mepau ndi Adama, ”Hangano omue merorongeakono pauno beinemu ka mongkaa wuano keu anu umari Kuparentaakomu: Si kaano, ka tetotonaaomo wita hangano wineweumu atuu. Kome'i'isei mo'ungke kaangamu inso a wita atuu asa ntinuwumu. 18Tongangkura rui ka ewo rui ira mentuwu a witamu, ka pinopaho a lere ta gagi kaangamu; 19saru te'iti ko'isomu mo'ungke kaangamu, ranta ka upekule gagi wita, hangano inso i ra'ai u'inala. Hangano omue awu wita, komekule gagi awu wita.”
20Mia atuu numeeakono beineno i Hawa, hangano onae gagi ine a luwuno anu tuwu.
21Ondae Ue Ala moweweuakono i Adama ka beineno lemba meloe inso a ngkuli, ka Do'amba mokonaako ira.
22 #
Meng. 22:14 Mepau Iramo Ue Ala, ”Menteeano mia gagiomo kana asa inso ndi Ontae, tumo'orio mongkona anu moiko ka anu mosa'o. Kanandio-andio, kasi mansa tumandeo kaeno ka ipo'ala mbo'u wuano keu tuwua atuu kumaano, ka ituwu ranta nahina tampulaano.” 23Onaemo pu'uno Ondae Ue Ala sumaario inso a bonde Paradesi ka i'anggao wita insoano i'inala. 24Dosaario mia ka i sabaano oleo bonde Paradesi Donaa ira kerubi saru ponai anu langano tesiarawo, anu dumagaio sala lumako a ngkeu tuwua.
Aktualisht i përzgjedhur:
Tegagia 3: XMZ
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr