Tegagia 1
1
Ondae Ue Ala mokogagio langi ka tolino saru ihino
1:1–2:3
1Amba-ambano Ondae Ue Ala mokogagio langi ka tolino. 2Tolino napi hina tadeno ka nahi te'atora. Worikidi tumutuwio tahi malua, ka penaa mempori-Do Ue Ala da menae-naea i wawo uwoi.
3 #
2Kor. 4:6
Mepau Iramo Ue Ala, ”Gagimo mewine.” Ka i'amba mewine atuu gagiomo. 4Dokitao Ue Ala mewine atuu moiko, Doponsiaomo wanta atuu ka worikidi. 5Doneeakono Ue Ala mewine atuu meene ka worikidi atuu wongi. Gagiomo ngkiniwia ka gagiomo mo'oru, onaemo oleo ko'aasa.
6 #
2Pet. 3:5
Mepau Iramo Ue Ala, ”Gagiomo longkuno langi a ntonga luwuno uwoi, monsiao uwoi inso a uwoi.” 7Ka Do'amba Ue Ala mokogagio longkuno langi ka Doponsiao uwoi anu i totono ka totono longkuno langi atuu inso a uwoi anu i wawono. Ka gagiomo kanatuu. 8Doneeakono Ue Ala longkuno langi atuu langi. Gagiomo ngkiniwia ka gagiomo mo'oru, onaemo oleo ko'orua.
9Mepau Iramo Ue Ala, ”Asalakono uwoi anu itotono langi tepumpu a asa po'ianga ranta tengkita anu motu'ia.” Ka gagiomo kanatuu. 10Ka do'amba Ue Ala numeeakono anu motu'i atuu wita, ka tepumpuano uwoi atuu Doneeakono tahi. Dokitao Ue Ala nine luwuno atuu moiko.
11Mepau Iramo Ue Ala, ”Asalakono ka ituwu a wita luwuno tumba mongura: pinopaho anu mehasiliako wukuno ka mperupa-rupa keuno wunga ngkeu anu mehasiliako wua anu mewuku i tolino.” Ka gagiomo kanatuu. 12Wita mbo'u moluarako luwuno tumba mongura mperupa-rupa pinopaho anu mehasiliako wukuno ka mperupa-rupa keu anu mehasiliako wua mewuku. Dokitao Ue Ala nine luwuno atuu moiko. 13Ka i'amba gagiomo ngkiniwia ka gagiomo mo'oru; onaemo oleo ko'otolu.
14Mepau Iramo Ue Ala, ”Gagiomo luwu parewa pompokomewine a longkuno langi ka iponsiao meene inso a wongi. Asalakono luwuno parewa pompokomewine atuu gagi petondoni anu montiso luwuno tempo, luwuno oleo ka luwuno ta'u. 15Asalakono luwuno parewa atuu gagi pompokomewine a longkuno langi ka ipokomewineo tolino.” Ka gagiomo kanatuu. 16Dopokogagio Ue Ala orua parewa pompokomewine anu langkai: pompokomewine anu lalu langkai ka ipabawaio meene ka pompokomewine anu lalu kodei ka ipabawaio woongi. Dopokogagio mbo'u luwuno anano wula. 17Donaao Ue Ala luwuno atuu a longkuno langi ka ipokomewineo tolino, 18ka ipabawaio meene ka wongi, ka iponsiao mewine inso a wongi-wongi. Dokitao Ue Ala nine luwuno atuu moiko. 19Ka i'amba gagiomo ngkiniwia ka gagiomo mo'oru; onaemo oleo ko'opaa.
20Mepau Iramo Ue Ala, ”Asalakono uwoi muluarako anu tuwu anu mpengowo, ka asalakono anu tuwu mepani mpenee-nee i wawontolino telaloio longkuno langi.” 21Ka Do'amba Ue Ala mokogagio luwuno kondehora ntahi anu langkai ka mperupa-rupa anu tuwu penggowo, anu linuarakono uwoi, saru mperupa-rupa anu tuwu mepani. Dokitao Ue Ala nine luwuno atuu moiko. 22Doronsoo Ue Ala luwu atuu, pau-Do, ”Impo'ulemo ka intetiangimo hadio saru mebuketio uwoi a ntahi, ka asalakono manu-manu a wita tetiangi hadio.” 23Ka i'amba gagiomo ngkiniwia ka gagiomo mo'oru; onaemo oleo ko'olima.
24Mepau Iramo Ue Ala, ”Asalakono wita moluarako mperupa-rupa anu tuwu, pinotuwu ka kondehora anu melele ka mperupa-rupa kondehora mo'ila.” Ka gagiomo kanatuu. 25Dopokogagio Ue Ala mperupa-rupa kondehora mo'ila, mperupa-rupa pinotuwu ka mperupa-rupa kondehora melele a wita. Dokitao Ue Ala nine luwuno atuu moiko.
26Mepau Iramo Ue Ala, ”Moikoomo Topokogagio mia montonda gambara-To, kana rupa-To, ka dopabawaio luwuno bou a ntahi ka manu-manu i laro meene, a mpinotuwu ka asa wawontolino, saru a luwuno kondehora anu melele a wita.” 27#Teg. 5:1-2; Mat. 19:4; Mrk. 10:6; 1Kor. 11:7Dopokogagio Ue Ala mia montonda gambara-Do, montonda gambara-Do Ue Ala Dopokogagio; tama ka beine Dopokogagi ira. 28Ondae Ue Ala rumonso ira, ka mepau ndi ondae, ”Ipo'ulemo ka itetiangi hadio! Buketiomo ka pokopetuuduomo tolino! Ipabawaimo luwuno bou a ntahi, manu-manu i laro meene ka luwuno kodehora melele a wita.”
29Mepau Iramo Ue Ala, ”Kitaomo, Kuweeakomiu luwuno pinopaho anu mehasiliako wukuno i asa wawontolino ka luwuno keu anu wuano mewuku. Luwuno atuu gagi kaangamiu. 30Sine a luwuno kondehora mo'ila, luwuno manu-manu i laro meene ka luwuno kondehora anu melele a wita, luwuno kondehora anu hinao penaano atuu, Kuweako ira luwuno pinopaho molowulu gagi kaangado.” Ka gagiomo kanatuu. 31Dokitao Ue Ala luwuno anu pinokogagi-Do atuu, mengkaa tedoa moiko. Ka i'amba gagiomo ngkiniwia ka gagiomo mo'oru; onaemo oleo ko'onoo.
Aktualisht i përzgjedhur:
Tegagia 1: XMZ
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr