เห่ขุทวาลู่ 11
11
บาเบล หี่ทูแถ่โล
1เด๊อ กูลู๋ เคเนอ, ล๋อ แกแย โอ่ เด๊อ เห่ขุ เออต๊าบ่า ลอเนอหม่า, โหง่ โอ่แพ๊ เต๊อเจ่อ แพ๊ เร๊อ เหย่ซี เฮ๊เบ่ แซ่ แพ๊ ลู. 2เบ๊อะ เหย่ซี โอ่ เด๊อ เก่ ซิเถ่ ตากยา เร๊อ อา แฮ เบ๊อะเนอ, เหย่ซี จว๊าแม๊เถอะ ตอกู เด๊อ ชินาร์#11:2 ชินาร์เก่ หม่า เต๊เห่เห่ เร๊อ อู เอ๊ เน๊อ บาเบลเก่. เก่กู โต๊โผะ, เร๊อ เหย่ซี จว๊าโอ่ แลแค เบ๊อะเนอ.
3เร๊อ เหย่ซี เฮ๊ เกอเร๊อ ลู เตเพร เน๊อ เตเพร เน๊อ, “จว๊า เป จว๊าแบ๊ โหร่ลู เห่ลีกล่อ เร๊อ โคร่เพรอแร๊ อา โป๊,” เร๊อ อา แบ๊แถ่ หี่ทูแถ่โล เออ เน๊อ เห่ลีกล่อ เร๊อ แซ่ฮู๊ เห่ลีกล่อ เก่ จิจือหม่า ลู อาเงเนอ, อา นอเอ่ แลแค เตอีเต๊อเจ่อ เด๊อ อาแซ๊ เน๊อ โตโซ เนอ. 4โทเร๊อ เหย่ซี เฮ๊ แลแค เน๊อ, “จว๋า เปช๊อโอ่หนิ วีดุ ตีวี เร๊อ เป่ ช๊อแถ่ หนิ หี่ทูแถ่โล เด๊อ อา แถ่โล โต่ เด๊อ ม๊อขุ เตเม โป๋, เป เก่ เม ฮู๊เนอ ตื๊อเร๊อ เปมุยโลเทอโลเก่ ปา, โทโต่ เป โอ่ปีชี จว๊าโพร๊จว๊าแพร ปา ลู เด๊อ เห่ขุ เออต๊าบ่า โต่ เฮ๊อ.”
5เร๊อ จอแปแหร่ ตูจูเพร แฮแล แม๊เถอะ วี เน๊อ หี่ทูแถ่โล เด๊อ อา ทวาแพ๊ แกแยเห่ขุพู๊ เออ เต๊เห่ ด๋า ช๊อแถ่ เกอเร๊อ ช๊าเหล่ เออเนอ. 6เร๊อ อา เฮ๊ เน๊อ, “แม๊มอ, แกแย เออเต๊เห่ อา เก่ โอ่แพ๊ โตเมวเจ่อ แพ๊, อา เก่ เฮ๊เบ่ แพ๊ เต๊อเจ่อ แพ๊ เร๊อ อา เก่ เป๊อแถ่ เม เต ฮู๊เออ เฮ๊เนอหม่า ช๊าโหน่ปา เหย่ซี ซิหยื่อ เม เต อิเตเต๋ เบ่เบ่ อา เก่ เมทวาแถ่เบ๊ แลแค ปา. 7จว๊า, เป แฮแล เมแต๊แกล่ แลแก ล๋อ เหย่ซี โหง่ เร๊อ นอ ซิเง ปา แต่ เหย่ซี เตเพร เน๊อ เตเพร อาโหง่ แต่เหม่ โป๊.”
8ฮู๊เนออาขว่าอาคยา, จอแปแหร่ ตูจูเพร แฮแล เม ปีชี จว๊าโพร๊ จว๊าแพร แก เหย่ซี เด๊อ เห่ขุ ต๊าบ่าลอ, เร๊อ อา ช๊อแถ่ ทวาปา เหย่ซี วีดุ เนอตีวี โต่. 9เบ๊อะเนอเค, จอแปแหร่ ตูจูเพร เมชีแล๊ ลอ แกแย ล๋อ ปลี เด๊อ เห่ขุ เออต๊าบ่า อาโหง่ อาขว่าอาคยา, อู เอ๊แกลู วี เนอตีวี อามุย เน๊อ วีบาเบล #11:9 บาเบล หม่า อาพราแซ่ เน๊อ “เมซู๊ซ๊า เมลูโพร๊ลูแพร.”ฮู๊เนอเร๊อ เป๊อแถ่ เบ๊อะ วีบาเบล เนอเรอ จอแปแหร่ ตูจูเพร เม ปีชี จว๊าโพร๊จว๊าแพร แก เหย่ซี เด๊อ เห่ขุต๊าบ่า ลอ.
เพเชม อากลุยอาแล ตากาแล โต่เด๊อ เพอับราฮัม
10เออหม่า เตราม๊าราแดหนิ เพเชม อากลุยอาลุ๊ย เต๊เห่ อาหรี่อาแกเฮ๊อ.
เบ๊อะ เทอซิ บา โทเฮ๊อ เนอหน่า, เร๊อ เพเชม โอ่ เฮ๊อ อาหน่า เตเย เบ๊อะเนอ, อา พู๊โอ่แล เกอเร๊อ คูอารปัคชาด. 11เบ๊อะ เพเชม พู๊โอ่แล เกอเร๊อ โทเฮ๊อ คูอารปัคชาด เบ๊อะเนอ, อา โอ่ เป่แฮโป่ อาหน่า แงเย เร๊อ อา พู๊โอ่แล หนิ โป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
12เบ๊อะ คูอารปัคชาด หน่า โอ่เฮ๊อ โซเชอ เน๊อ แงหน่า เบ๊อะเนอ, อา พู๊โอ่ เกอเร๊อ คูเชลาห์. 13เบ๊อะ คูอารปัคชาด พู๊โอ่ เกอ เร๊อ โทเฮ๊อ คูเชลาห์ เบ๊อะเนอ, อา โอ่ เป่แฮ โป่ อาหน่า ลุยเย เน๊อ โซหน่า เร๊อ อา พู๊โอ่ หนิโป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
14เบ๊อะ เพเชลาห์ หน่า โอ่เฮ๊อ โซเชอ เบ๊อะเนอ, อาพู๊โอ่แล หนิ เร๊อ คูเอเบอร์. 15เบ๊อะ อา พู๊โอ่แล เกอเร๊อ โทเฮ๊อ คูเอเบอร์ เบ๊อะเนอ, อา โอ่ เป่แฮโป่ อาหน่า ลุยเย เน๊อ โซหน่า เร๊อ อา พู๊โอ่ หนิโป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
16เบ๊อะ เพเอเบอร์ หน่า โอ่ เฮ๊อ โซเชอ เน๊อ ลุยหน่า เบ๊อะเนอ, อาพู๊โอ่ หนิ คูเปเลก. 17เบ๊อะ อา พู๊โอ่แล เกอเร๊อ โทเฮ๊อ คูเปเลก เบ๊อะเนอ, อา โอ่ เป่แฮโป่ อาหน่า ลุยเย เน๊อ โซเชอ เร๊อ อา พู๊โอ่ หนิโป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
18เบ๊อะ เพเปเลก หน่า โอ่ เฮ๊อ โซเชอ เบ๊อะเนอ, อา พู๊โอ่แล เกอ เร๊อ คูเรอู. 19เบ๊อะ อา พู๊โอ่แล เกอเร๊อ โทเฮ๊อ คูเรอู เบ๊อะเนอ, อา โอ่ เป่แฮ โป่ อาหน่า เนอเย เน๊อ ลุยซว๊าต๊าหน่า เร๊อ อา พู๊โอ่ หนิโป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
20เบ๊อะ เพเรอู หน่า โอ่เฮ๊อ โซเชอ เน๊อ เนอหน่า เบ๊อะเนอ อา พู๊โอ่แล เกอเร๊อ คูเสรุก. 21เบ๊อะ อาพู๊โอ่แล เกอเร๊อ โทเฮ๊อ คูเสรุก เบ๊อะเนอ, อา โอ่ เป่แฮ โป่ อาหน่า เนอเย เน๊อ โซซว๊าต๊าหน่า เร๊อ อาพู๊โอ่แล หนิ โป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
22เบ๊อะ เพเสรุก หน่า โอ่เฮ๊อ โซเชอ เบ๊อะเนอ, อา พู๊โอ่แล เกอเร๊อ คูนาโฮร์. 23เบ๊อะ อา พู๊โอ่ เกอเร๊อ โทเฮ๊อ คูนาโฮร์ เบ๊อะเนอ, อา โอ่ เป่แฮ โป่ อาหน่า เนอเย เร๊อ อา พู๊โอ่แล หนิโป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
24เบ๊อะ เพนาโฮร์ หน่า โอ่เฮ๊อ เนอเชอ เน๊อ ลุยซว๊าต๊าหน่า เบ๊อะเนอ, อา พู๊โอ่แล เกอเร๊อ คูเทราห์. 25เบ๊อะ อา พู๊โอ่ เกอเร๊อ โทเฮ๊อ คูเทราห์ เบ๊อะเนอ, อา โอ่ เป่แฮ โป่ อาหน่า เตเย เน๊อ เช๊อลุยซว๊าต๊าหน่า เร๊อ อาพู๊โอ่แล หนิโป่ อาพู๊เพรคู เต๊เห่ เน๊อ อาพู๊เพรเหมาะ เต๊เห่.
26เบ๊อะ เพเทราห์ หน่าโอ่ เฮ๊อ โซซว๊าเตอเชอ เบ๊อะเนอ, อา พู๊โอ่แล เกอเร๊อ คูอับราม, คูนาโฮร์ เน๊อ ฮาราน.
เพเทราห์ อากลุยอาลุ๊ยเต๊เห่ อาหรี่อาแก
27เออหม่า เตราม๊า ราแด หนิ เพเทราห์ อากลุยอาลุ๊ย เต๊เห่ อาหรี่อาแกเฮ๊อ เพเทราห์ พู๊โอ่แล เกอเร๊อ คูอับราม, คูนาโฮร์ เน๊อ คูฮาราน. เร๊อ เพฮาราน พู๊โอ่แล หนิ แฮเง โป่ คูโลท. 28เบ๊อะ เพฮาราน เซอแก เด๊อ วีอูรา, บาเบลเก่กู, เบ๊อะ วี เด๊อ อา โอ่เป๊เจ่แล เกอเร๊อ เนอตีวี เบ๊อะเนอ, อาเพ เพเทราห์ โอ่เซอเพรปา แพ๊. 29โทเร๊อ คูอับราม เน๊อ คูนาโฮร์ เกอติเร๊อ อา ตาหี่ตาเพร๊ แลแค. คูอับราม อาเม เร๊อ อามุย เน๊อ เหมาะซาราย. คูนาโฮร์ อาเม เกอลาติ เร๊อ อามุย เน๊อ เหมาะมิลคาห์, เร๊อ เหมาะมิลคาห์ หม่า เพฮาราน อาพู๊เพรเหมาะ. เพฮาราน เออเนอหม่า เหมาะมิลคาห์ เน๊อ เหมาะอิสคาห์ อาเพ เฮ๊อเฮ๊อ. 30เหมาะซาราย เนอ อา โชพู๊ดื่อ อาเง อาขว่าอาคยา, อา พู๊โอ่ เกออู เตเพร่ว โต่.
31เพเทราห์ โอ่ เบ๊อะ วีอูรา, บาเบลเก่กู เนอเร๊อ อา เอ๊หนิ อาพู๊ คูอับราม เน๊อ อาแด่ เหมาะซาราย เน๊อ อาเลอ เพฮาราน อาพู๊ คูโลท เร๊อ อา เถ่แกล่จว๊า แลแค เด๊อ คานาอันเก่. หม่าแน๊เรอ เบ๊อะ เหย่ซี จว๊าโต่ ปาแพ๊ เด๊อ วีฮาราน เบ๊อะเนอ, อา โอ่ แลแค เบ๊อะเนอ.
32เพเทราห์ หน่า โอ่ เนอเย เน๊อ แงหน่า เร๊อ อา เซอแก เบ๊อะ วีฮาราน อากูเนอ.
Aktualisht i përzgjedhur:
เห่ขุทวาลู่ 11: EKTNTGEN
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr