मत्ती 4
4
यीसू गी परख
(मरकुस 1:12-13; लूका 4:1-13)
1फेर पवितर आत्मा यीसू नै बन उजाड़ में लेगी कै सैतान बिंगी परख कर सकै। 2अर यीसू गो चाळीस दिन अर रात गो बरत राखेड़ो जद बिनै भोत तकड़ी भूख लागी। 3जद परखण आळो बिंगै कनै आयो अर केयो, “जे तूं परमेसर गो बेटो है तो आं पथरां नै के रोटी बणज्यै।” 4यीसू केयो, “आदमी रोटी ऊं जींवंतो कोनी रेवै, पण परमेसर गै मूं ऊं निकळेड़ै बचन ऊं जींवंतो रेवै।”#व्यवस्ता विवरण 8:3
5फेर सैतान बिनै यरुसलेम गै पवितर नगर में ले जा'गे मिन्दर गै गुमट पर खड़यो कर'गे केयो। 6“जे तूं परमेसर गो बेटो है तो नीचै छाळ मारज्या।” क्यूंकै पवितर सासतर में इंया लिखेड़ो है,
“बो तनै संभाळण खातर सुरगदूतां नै घालैगो
कै तेरै पगां गै पथर गी नां लागै
अर बे तनै हातो हात चक लेवैगा।”#भजन संगिता 91:11-12
7यीसू उतर दियो कै, “पवितर सासतर में इंया बी लिखेड़ो है कै तूं आपगै प्रभु परमेसर गी परख ना करी।”#व्यवस्ता विवरण 6:16 8फेर सैतान बिनै ऊंचै प्हाड पर ले जा'गे सारो संसार दिखायो कै देख कितो सुणो अर मोटो है। 9जे तूं मेरै आ'गै झुकगे मनै प्रणाम करै तो ओ सारो संसार तनै दे देऊंगा। 10यीसू बोल्यो, “सैतान दूर होज्या मेरूं।” पवितर सासतर केवै, “तूं आपगै प्रभु परमेसर गी सेवा अर आराधना कर।”#व्यवस्ता विवरण 6:13 11ओ सुणगे सैतान बठूं उड़ग्यो अर सुरगदूत आगे बिंगी देखभाळ करण लागग्या।
यीसू गी सेवा करण गी सरुवात
(मरकुस 1:14,15; लूका 4:14,15,31)
12यीसू नै जद ठा लागग्यो कै यूहना पकड़िजग्यो तो पाछो गलील परदेस आ'ग्यो। 13अर बो नासरत छोडगे कफरनहूम में आ'ग्यो। झिको झील गै किनारै जबलून अर नपताली गै देस में है। 14ओ इंया होयो कै परमेसर गी बात बताण आळै यसयाह गै द्वारा केयेड़ो बो बचन पूरो करयो।
15“जबुलून अर नपताली गै देस,
झील गै रा ऊं यरदन नदी गै पार,
गेर यहुदियां गै देस गलील में।
16झिका लोग अंधेरै में रेंवता हा
बां एक म्हान जोती देखी।
अर मोत होण आळी जिग्यां में रेण आळा लोगां पर
चानणो होयो।”#यसयाह 9:1-2
17बिं टेम ई यीसू मसी परचार करणो सुरू करयो कै मन बदळो क्यूंकै सुरग गो राज नेडै़ ई है।
यीसू गै द्वारा पेला चेला नै चुण्यो जाणो
(मरकुस 1:16-20; लूका 5:1-11; यूहना 1:35-42)
18जद यीसू गलील झील कनूं जाण लागरयो तो बो दो भाईयां समौन झिको पतरस कुहावै अर बिंगै भाई अंद्रियास नै झील में जाळ फेंकता देख्यो। बे मछली पकड़ण आळा हा। 19यीसू बानै केयो, “मेरै लारै आओ। मैं थानै आदमियां नै किंया भोळा करणा है मैं थानै सिखाऊंगा।” 20बे हातो हात जाळ छोडगे बिंगै लारै चाल पड़या। 21फेर बो आ'गै चाल पड़यो अर बण देख्यो कै जबदी गो बेटो याकूब अर बिंगो भाई यूहना आपगै पिता सागै जाळ ठीक करै हा। यीसू बानै बी हेलो मारयो 22अर बे बिं टेम ई आपगी किस्ती अर आपगै पिता नै छोडगे बिंगै लारै चाल पड़या।
यीसू द्वारा लोगां गी बीमारियां दूर करणी
(लूका 6:17-19)
23यीसू सारै गलील परदेस गै सतसंग घरां में सुब समाचार गो परचार करतो अर बीमार लोगां नै ठीक करतो फिरतो हो। 24अर सारै सीरिया परदेस में बिंगी बडाई होण लागगी अर लोग सारै बीमार लोगां नै झिका हरेक तरियां गी बीमारी ऊं अर ओपरी आत्मा ऊं दुखी हा अर लकवै गै मारेड़ा अर दोरां गा मरीज हा बानै बिंगै कनै ल्याण लागग्या अर यीसू बानै ठीक कर देवंतो हो। 25ईंखातर गलील अर दिकापोलिया#4:25 दस सैहरां गो एक सैहर, यरुसलेम अर यहुदिया अर यरदन नदी गै पार ऊं लोगां गी मोटी भीड़ बिंगै लारै होगी।
Aktualisht i përzgjedhur:
मत्ती 4: BGQ
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 (Active), Wycliffe Bible Translators, Inc. All rights reserved. © WIn Publishing Trust