San Juan 2
2
Tembuchakua enga Kana Galilea úkorhepka
1Tanimu jurhia jimbo, Kana, jini Galilea anapu ma iretarhu, tembuchaku ma úkorhespti. Jesusiri nánde jémba jima jámaxapti, 2ka Jesusintuksï imani tembuchakuarhu imeri jurhengorherichani jinguni ióarhiantaaspti. 3Ka enga na kauikua xántkuepkia, Jesusiri amamba Jesusini arhispti:
–Kauikuaksï xántkuerastia.
4Jesusi arhispti:
–Nana, ¿Andirinisï ísï arhijki? Jucheti jurhiata nótki niárasïndi.
5Amamba arhiaspti imechani engaksï jatsiratspeni jápka:
–Kurhajcha je néna engaksïni inde arhijka.
6Kuímu erhakua k'uísï tsakapuerichaksï jima jarhaspti, itsï jatakua, engaksï judiouecha pímbinhaxetarantani arhimetaparini úrempka. Táchani k'uísï, itsï kuímu k'amukuachani isï jatasïrempti. 7Jesusi arhiaspti jántspirichani:
–Indeni k'uísïchani uinirantaa je.
Píptsïtaasptiksï, 8ka Jesusi arhiaspti:
–Iásï p'ita jeia sáni, ka páku je tembuchakua úrini 9Tembuchakua úri ts'émuspti itsïni enga kauikua úntskatepka, no mítetini nani uéraspi, járhojpirichajkuksï mítespti, jimbokaksï imasï itsïni p'itapka. Jimbosï tembuchakua úri tembuchani uandajpapti 10ka arhini:
–Iápuru isï kauikua ambakiti urheta íntsperanhasïndi ka enga na kauinhajkia, arisku jásï kauikua jiájkani ínstperanhasïndia. Ka t'úri ambakiti kauikua tátsekua intspexakaia.
11Indeni jimbo, enga jini Kana Galilea Jesusi úpka, uénaspti milagru xarhatani enga jimbo k'érikua xérpepka ka engaksï jimbo jurhengorheri jémbecha mintsinharhipka.
12Jimajku, nánde jémba ka erachi jémbecha ka jurhengorheri jémbechani jinguni, Kafarnaumi niraspti ka namoni jurhiaksï jima jarhaspti.
¡Ásï maiaperakua úntsï je jucheti Táteri k'umanchekuani!
13Ka jimboka janoxapkia páskua, enga judiouecheri k'uínchekueka, Jesusi Jerusaleni niraspti. 14Ka k'éri tiósïo exeaspti úakasï ka karichi ka jipunhi atarantstichani, ka imechani engaksï jima uaxakatini jápka enga tumina mójtakutsperanhantajka. 15Ísï exerini, Jesusi sïndariri k'uikirhpetarakua ma úkorhespti, ka tiósïo iámendu petantaaspti, imani ambe jinguni engaksï atarantani jápka. Tumina mójtakutspitichani píjtsïtakua k'uanindurhikuaspti ka tumina k'uanintskakuani. 16Jipunhi atarantstichani arhiaspti:
–¡Petantsï je indeni ambe ixu! ¡Ásï jucheti Táteri k'umanchekuani maiaperakua úntsï je!
17Jimajkanksï jurhengorhericha miántaspti karakatani enga arhijka: “Kurhunhentaaka chéti k'umanchekuani kuajpenhchani.”
18Judiouechaksï kurhamarhespti:
–Xérajtsïni, ¿Andi náki juramukua jimbori ísï ambe úsïnki?
19Jesusi arhiaspti:
–Xerentsï je íni tiósïoni, ka ji tanimu jurhia jimbo úntaaka.
20Judiouechaksï arhispti:
–I tiósta Tsimani ekuatse ka kuímu uéxurhini jimbo únhasti ¿Nénajturi tanimu jurhia jimbo úntaa?
21K'óru, tiósta enga Jesusi arhikuekani jápka; imeri anhanhatakuanisï arhini jápti. 22Jimboksïsï jurhengorheri jémbecha jiájkani enga tsíntapka, indeni uandakuani miántapti, ka Karakatani ka Jesusiri uandakuechanksï jakajkuspti.
Jesusi mintsitechani sési mítetspesti
23Enga Jesusi, páskueri k'uínchekuarhu Jerusaleni jámani jápka, milagruechanksï exearini uánekua jakajkukuspti. 24K'óru Jesusi, imechani no mintsinharhiasïrempti jimboka iámendu míteaspka 25No uétarhesïrempti eska nema aiangupiringa néna járhanhaspi, jimboka ima mintsitechani sési mítekuaspka.
Aktualisht i përzgjedhur:
San Juan 2: BI-PURHE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Biblia en P´urhépecha, Michoacán, México © Sociedad Bíblica de México, A.C.