Wikhikən 8
8
1Sesohs əlihe wocok tan liwiso Olipiye.
2Ehcehkwak, ospaswiw apc pəkətiye kci himiyewikwamək. Msiw pəmawsowinowək petapasiniyal. Sesohs həpesso, otəkehkima.
3Notowikhikhəticik naka Palosiyək otəliphawal ehpilicil tan eyilit, tanil liwihkwehla wapələlohkewakənək, toci osahkelaniya epahsiw.
4'Tiyawal: Notəkehkikemit, wət ehpit kisiwihkwehla wapələlohkewakən ikək; limskowah otapcilokan.
5Nit Mowis təlitplomkonopən ətplotəmowakən ikək nit elewolticik pənapskwahapənikp. Kenok kil kekwtitəm?
6Weci nit itəmotit otokwetskolawal, witaman oliyeniyac kekwse weci kisimsihatit. Kenok Sesohs citowamkweso, otəlowikənilc ewikhikəhtakw ktakəmikok.
7Elinkohci papehcimatit pehkahkwikapoweso, 'tiya: Nət kilowaw tan skat lahkəmiksowakən ehtikw, nət təmkewe pənapskw təkəmac!
8Toci apc Sesohs citowamkweso, ewikhikəhtakw ktakəmikok.
9Nekəmaw notəmotit, weci onmacit pəlomot oməshono wawikowak, ntiyapasowək, eyankohci ntiyapasowək tan elikətənhətihtit. Sesohs ənkikanəkəla, naka ehpit sehke epahsiw.
10Toci Sesohs pehkahkwikapowesit, kətama wenil onəmiyawiyəl tepəkt ehpilicil, toci 'tiyal: Ehpit, tan otəlesoltiniya wehketkək mesimskəpənik? Kətama wen konmacitplomko?
11Ehpit itəm: Kətama wen Nsakəmam. Sesohs 'tiyal: Nil skat konmacitpəloməlo. Macəha, skat apc milkəmiksowən.
12Nit tehc Sesohs apc okəlolah pəmawsowino, itəm: Nil pəssakwekəm skitkəmikw. Nekəm tan nosokowit skat pəmihewoc piskahtek. Kenok otiyinc pəmawsowakəne pəssakwek.
13Nit tehc Palosiyək 'tiyawal: Kil knəspiwolamewos. Kənəspiwəlamewakən skat əleyiw.
14Sesohs 'tiya: Cikaw nil nspiwolamewosiyan nəspiw olamewakən əlihe. Ipəcəl nkəcicihton wecihayanpən, tan elihaye. Kenok kilowaw skat kəcicihtoniya tan wecihayanpən, kesəna tan elihay.
15Kilowaw wecitplotəmotiyekw mhəkek nil skat ntəpəlomaw wen.
16Təpəlotəmanəp ntəplotəmowakən olamewiw. Ipəcəl skat npeskowiw, kenok nil nti naka Nmihtakws tan petəkimitpən nwiceyakw.
17Elowikhaso ktəpəlotəmowakənowak: Nisowək pəmawsowinowək onəspiw olamewakənowal əlihi.
18Nil nəspiwolamewos, naka Nmihtakws tan petəkimitpən nəspiwəlamewəkw.
19Nit tehc otcawal: Kmihtakws tama iyo? Sesohs asitewtəm: Kilowaw kətama kəcicihipa nil kesəna skat kəcicihawihwa Nmihtakws. Kəciciyekwsəpən nil, kəcicihawapənə Nmihtakws.
20Ihla Sesohs etli itəkil nihtəl kekwseyal manikwamək; etlikehkihkemit kci himiyewikwamək. Kenok skat wen otakwonawiyəl; ipəcəl otepənaskowihakeweyam mehc meskw ikehew.
21Nit tehc Sesohs apc 'tiya: Nil nmacəha, kilowihipac, kenok klakəmikso akəni mehcin hətipac; tan tet elcay skatəc kisi pitapasiyoniya.
22Nit tehc Leswihsək itəmotowək: Napəhosoc? Ipəcəl itəm. Tan tet elcay skatəc kisi pitapasiyoniya.
23Sesohs 'tiya: Kilowaw ktətlewawoltipa emekew. Nil spəmək ntətlewaw. Kilowaw skitkəmikw ktətlewawoltipa. Nil skat skitkəmikw ntətleyawiw.
24Nit tehc yoholekw klahkəmiksowakəni mehcinhətipac. Ipəcəl skat wəlamsətəmowekw nil nət, klahkəmiksowakəni mehcinhətipac.
25Nit tehc 'tiyawal: Wen kil? Sesohs 'tiya: Nit tan amskwahs macehak yoholekwpən.
26Ktanakətol kekwseyal eyanil elakəni mlekwil, ktəpəlomələniya; kenok Nekəm tan petəkimitpən welamewakənit, tanil wici notəmanil ohəkek, nihtəl etli itəmanil skitkəmikw.
27Nekəmaw skat onəstəmoniya otakənotəmakoniya oci Mihtakwsilicil Kelowəsitəl.
28Nit tehc Sesohs 'tiya: Tan toci kisi onakelekoc pəmawsowin 'Kwəssəl kəcicitoniyac nil nət, skat kekw noci kisehtowən nil nhəkek; kenok Nmihtakws elkehkimitpən nit elewestowanil yohtəl kekwseyal.
29Nekəm tan petəkimitpən nisewawtihpən. Nmihtakws skat nəkələko nkətəkayw, ipəcəl mecimiw ntəlokanəl tanil elolitəhatəkil.
30Tan toci Sesohs itək yohtəl kekwseyal ktanakwsowək olamsətəmotowək ohəkek.
31Nihtəc Sesohs 'tiya Leswihs tanihi olamsətəmotilicihi ohəkek: Kilowaw nkesoltiyekw nkəlosowakən ikək, olamewakən ikək kotəkehkimkwəs soltipac nhəkek.
32Kəcicitoniyac olamewakən, olamewakən ktəlehləkoniyac ktəpelməsoltipa.
33Otasitemawal Nilon Aplahamk onican, mehc meskw noci wehkanwoltipən tan wen: kikwse weci itəmən: Ktəpelməsoltipac?
34Sesohs 'tasitema: Leyo, yoholekw, msiw wen tan lahkəmiksowakən eloket, nit lahkəmiksowakəni nowawket.
35Nətloket skat iyew wenocikwamək mecimiw; kenok Kelowəsit 'Kwəssəl mecimiw eynəl.
36Nit tehc Kelowəsit 'Kwəssəl ktəpelməsoltiniyac, kolamewitpeləməsoltipac.
37Kəciciholpa kotapeksihpa Aplahamk; kenok ktəkweci nehpihihpa, ipəcəl nkəlosowakən skat iyew khəkewak.
38Nosko wotəmən tan kekwse weci nəmihitowanpən Nmihtakws; naka kilowaw na ktəlehtakhətiniya. Tan ilinotəmekwpən kmihtakwsowa.
39'Tiyawal: Nilon Aplaham nmihtakwsən. Sesohs 'tiya: Aplaham omitakwseyekw, Aplaham otəlohkewakənəl ktəlokhətiniyapənilp.
40Kenok təkec ktəkwecineyepihihpa, skitap tan yəholakwpən olamewakən. Aplaham kətama təlokawnewihpən nit.
41Kilowaw ktəlokhətiniya kmihtakwsowa otəlohkewakənəl. Nekəmaw yahahtit, itihawal: Skat nsekewiwhskicino oltihpən. Piskowiw nmihtakwsən, Kelowəsit nət.
42Sesohs 'tiya: Kelowəsit kmihtakwsowa kəselmihpap. Ipəcəl nocihahpən Kelowəsitow ikək, npəkəcihahpən, nil skat npetəkimsiw, kenok Kelowəsit petəkimitpən.
43Kekw weci skat nsətəmowekw nkəlosowakən? Ipəcəl skat knotəmoniya tan ntitəm.
44Kilowaw ktəleyoltipa kəmihtakwsowa məcəhantok, naka kəmihtakwsowa otəlohkewakənəl koli təhatəməniya ktəlehtakhətiniya. Wecehtahkamək amskwahsete macəpak nepahtekewinowiwos, skatəna mecimiyiw olamewakənək, ipəcəl olamewakən skat eyiw ohəkek. Keloskit oməshonək ocikəloso; ipəcəl wikikəlosko nekəm mihtakwsəl kəloskowakən.
45Ipəcəl nolamewest, skat kolamsətəwipa.
46Wenəlo kilowaw kisiyolamihit npahtatakan? Wəlamewestowan, kekw weci skat olamsətowiwekw?
47Nekəm tan təleyawit Kelowəsit ohəkek ociksətəmənəl Kelowəsitəl okəlosowakənəl. Nit tehc kilowaw skat weciciksətəmotihwekw, ipəcəl skat ktətlewawoltihpa Kelowəsit ohəkek.
48Leswihsək asitematit 'tiyawal: Skat nolyitəmopən ksameliyakewo, naka ktiwan məcəhant khəkek.
49Sesohs asitewtəm: Məcəhant skat ntewaw nhəkek; kenok nkihitəmitəhama Nmihtakws, kilowaw kənskitəhamihpa nil.
50Skat nkwilowahtowan nil nkihi təmitəhamkosowakən. Kenok wen iyo tan kilowahtakw, tan teplomowet.
51Leyo, tan yoholekw, tan wen kenok nkəlosowakən, npowakən skatəc onəmihtowən mecimiw.
52Leswihsək 'tiyawal: Təkec nkəcicitonen ktiwan məcəhant khəkek. Aplaham mehcineyesəpənak naka nikanikcici takewinok, kenok kil ktitəm, Tan wen kelnək nkəlosowakən, skatəc oməspətəmowən npowakən mecimiw.
53Kil piyemikəpme skatək kmihtakwsno Aplaham? Tanek mehcinetsəpənak? Naka nhikanikcicitakewinək mehcinhətetsəpənik. Tan kil ktəleləsin?
54Sesohs asitewtəm: Kci təmitəhamsiyan, nkcitəmitəhamsot skatəc kekwseyawiw. Nmihtakws tan kihitəmitəhamit, tan kilowaw itəmekw nekəm kelowəsitowa.
55Kilowaw skat kəcicihawihwa; kenok nil nkəciciha. Etəman skat nkəcicihaw ntəlikəloskapihp tahalo kilowaw. Kenok nkəciciha, okəlosowakənəl nkəlnəmowan.
56Aplaham kmihtakwsowa olitohasopənak onəmihton nkiskom; onəmihtoneyapən, olitəhasopən.
57Nit tehc Leswihsək 'tiyawal: Kil mehc meskw naninsk kesikətənewo, knəmiyasəpənak Aplaham?
58Sesohs 'tiya: Leyo, yoholekw, meskw Aplaham eyihkw nil nti.
59Nit tehc nekəmaw wihkwehtoniyal pənapskol otəkəmaniya. Kenok Sesohs kalso, ocinotehe kci himiyewikwamək.
Aktualisht i përzgjedhur:
Wikhikən 8: PQM2014
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Maliseet Gospel of John © Canadian Bible Society, 2014