लूका 4
4
सैतान कर चलते ईसू कर परीछा
(मत्ती 4:1-11; मरकुस 1:12-13)
1ईसू हर पबितर आत्मा ले भएर के, एरदन नदी ले फिरिस, ओ घनी पबितर आत्मा हर ओके बिरान जघा में, जाए बर अगुवाई करीस, 2उहां सैतान हर चालीस दिन ले ओकर परीछा करत रहीस। ओ चालीस दिन तक ओहर कांही जाएत नई खाईस, तेकर ओके भूख लागीस। 3तेकर सैतान हर ईसू ला कहीस, “तंए तो फूरोंच परमेस्वर कर बेटा लागस ना, तेकर ले ए पखना ला कएह दे, कि एहर रोटी बएन जाए।” 4बकिन ईसू हर, ओके जबाब देहीस, “नहीं, काबरकि परमेस्वर कर किताब में लिखल हवे, मईनसे हर सिरीप रोटीच खाए के नई जीए।” 5तेकर सैतान हर ओके एगोट ऊंच जघा में ले गईस, अऊ एकेच घरी में दुनिया कर सब राएज ला देखाईस, 6अऊ सैतान हर ईसू जग कहीस, “मंए ए सब अधिकार, अऊ एकर धन संपती ला तोके दे देहूं, काबरकि एहर मोके सोंपल गईसे, अऊ मंए जेके चाहथों, ओके ला दे देथों। 7एकरले अगर तंए गोड़े गिर के मोर अराधना करबे, त ए सबेच जाएत हर तोर होए जाही।” 8#व्यवस्थाविवरन 6:13ईसू हर ओके जबाब देहीस, “परमेस्वर कर किताब में लिखल हवे, तंए परभू, अपन परमेस्वर कर अराधना करबे, अऊ सिरीप ओकरेच सेवा करबे।”
9तेकर सैतान हर ईसू ला यरूसलेम में ले गईस, अऊ मंदिर कर सबले ऊपर टीप कर धरी में ठड़ुहाईस अऊ ओके ला कहीस, “तंए तो फूरोंच में, परमेस्वर कर बेटा लागस ना, त इहां ले खालहे तरेक दे, 10काबरकि परमेस्वर कर किताब में लिखल हवे, ‘ओहर अपन दूत मन ला अगियां देही, कि ओमन तोर रकछा करहीं’ 11अऊ ओमन तोके ला अपन हाथ में उठाए लेहीं, तेमेकि तोर गोड़ ला पखना ले ठोकर झईन लागे।” 12ईसू हर ओके जबाब देहीस, “एहूच कस लिखल हवे, कि तंए परभू, अपन परमेस्वर कर परीछा झईन करबे।” 13जे घनी सैतान हर सब परीछा ला ले दारीस, तेकर दूसर मोका मिलत ले, ओकर जग ले चएल देहीस।
नासरत गांव में ईसू कर इनकार
(मत्ती 13:53-58; मरकुस 6:1-6)
14फेर ईसू हर, पबितर आत्मा कर सक्ति ले भरपूर होए के, गलील जिला में फिर आईस, अऊ ओकर चरचा, आस-पास कर सब इलाका में फईल गईस। 15ईसू हर, ओमन कर धरम सभा कर घर में उपदेस देहे लागीस, अऊ सब झेमन ओकर बड़ाई करत रहीन। 16फेर ईसू हर नासरत गांव में आईस, जिहां ओके ला पाले-पोसे रहीन, अऊ जेकस ओ हमेसा करत रहीस, ओही कस #4:16 सबत कर दिन कर मतलब हवे, सातवा दिन। परमेस्वर यहूदी मन ला अगियां देहे रहीस कि ए दिन ला पबितर मानीहा अऊ ओकर अराधना करीहा। पबितर दिन में ओमन कर धरम सभा में गईस, अऊ ओजग परमेस्वर कर किताब ला पढ़े बर ठड़होए गईस। 17तेकर यसायाह अगमजानी कर किताब ला ओके देहीन, अऊ ईसू हर किताब ला खोएल के, ओ जघा ला निकालीस जिहां एकस लिखाए रहीस,
18“परभू कर आत्मा हर मोर ऊपरे हवे,
एकरले ओहर गरीब मन ला, सुघर खभेर सुनाए बर मोके चुनीसे,
मोके एकरले भेजीसे,
कि मंए कैदी #4:18 जेमन सैतान कर पाप कर गुलाम में हवें; ओमन ला कएदी कथें।मन ला छोंड़ाए कर,
अऊ अंधा मन ला देखे कर सुघर खभेर कर परचार करों,
अऊ दुखलीहा मन ला, कसरीहा मन कर हाथ ले छोंड़ाओं,
19अऊ ए घोंसना करों,
कि परभू कर दया मिले कर घनी आए पहुंचीसे।”
20तेकर फेर ईसू हर, किताब ला बंद कएर के सेवक कर हाथ में दे देहीस, अऊ बईठ गईस। धरम सभा कर घर कर, सब मईनसे मन कर आंएख हर, ओकर ऊपरे लगे रहीस। 21तेकर ईसू हर ओमन ला कहे लागीस, “आएज ए लिखल बचन हर, तुमन कर सुनत घरी पूरा होईसे।” 22ओजग कर सब झेमन ओकर बड़ाई करीन, अऊ जे दया ले भरल बात हर, ओकर मूंह ले निकलत रहीस, ओला सुईन के अचमहों होए गईन, अऊ कहे लागीन, “एहर यूसुफ कर बेटा ना लागे का?” 23तेहीच घनी ईसू हर, ओमन ला कहीस, “तुमन मोर ऊपरे, एकस कहावत ला जरूर कईहा, ‘ए बईध, तंए अपन-आप ला सुघर कएर ले।’ हमन सुने हन, कि जे चमत्कार ला तंए कफरनहूम गांव में करे हस, ओला अपनोच गांव में कर।” 24अऊ ओहर कहीस, “मंए तुमन ला फूरोंच कहथों, कोनो अगमजानी हर अपन गांव में माएन-मरजाद नई पाए।” 25फेर ईसू हर कहीस, “मंए तुमन ला फूरोंच कहथों, परमेस्वर कर अगमजानी एलीयाह कर दिन में, जे घनी साढ़े तीन बछर ले पानी नई गिरीस, अऊ सब देस में ढेरेच अकाल परीस, ते घनी इसराएल में ढेरेच बगरा अदावेंन रहीन। 26बकिन एलीयाह ला, ओमन में ले ककरो जग भेजल नई गईस, सिरीप सएदा जिला कर सारफत गांव में, एगोट अदावेंन जग भेजल गईस, जेहर यहूदी नई रहीस। 27अऊ एलीसा अगमजानी कर समय में, इसराएल देस में ढेरेच झेमन ला कुड़गा रोग रहीस, बकिन सीरिया जिला में रहोईया नामान कर छोंएड़, ओमन में ले कोनो ला चंगा नई करीस।” 28ए गोएठ ला सुईन के, जेतना झेमन धरम सभा कर घर में रहीन, ओमन ढेरेच गुसाए गईन#4:28 यहूदी मन एकर बर गुसाए गईन कि जे नामान हर चंगाई पाए रहीस, ओहर यहूदी नई रहीस। यहूदी मन गैर यहूदी मन ला नई पतियावत रहीन। । 29अऊ ओमन उईठ के, ईसू ला सहर कर बाहरी निकालीन, अऊ जे पहार में ओमन कर सहर हर बसे रहीस, ओकर टीप में ले गईन, कि ओके ला उहां ले खालहे गिराए दें। 30बकिन ईसू हर, ओमन कर मझार में ले निकेल के, अपन डगर में चईल देहीस।
ईसू दुस्टआत्मा ला निकालथे
(मरकुस 1:21-28)
31फेर ओहर गलील जिला कर कफरनहूम गांव में गईस, अऊ पबितर दिन में मईनसे मन ला उपदेस देहत रहीस, 32ओमन ईसू कर उपदेस ला सुईन के, अचमहों होए गईन, काबरकि ओकर गोएठ हर अधिकार कर संगे रहीस।
33एक दिन जे घनी ईसू हर धरम सभा में रहीस, त उहां एक झन मईनसे रहीस, जेकर ऊपरे असुध आत्मा रहीस, ओहर जोर से किरलाए के कहीस, 34“ए नासरत गांव कर ईसू, तंए मोर काम में अड़ंगा झईन डाल, का तंए हमन ला नास करे बर आए हस? मंए तोके जानथों तंए कोन लागस? तंए तो परमेस्वर कर भेजल पबितर जन लागस!” 35ईसू हर ओके दबकाए के कहीस, “कले रह अऊ ओमे ले निकेल जा,” तेकर दुस्टआत्मा हर ओके ला मझार में पटेक के अऊ बिगर नुकसान पहुंचाए, ओकर ऊपर ले निकेल गईस। 36सब मईनसे मन, एला देख के अचमहों होईन अऊ एक दूसर जग गोठियाए के कहे लागीन, “एहर कईसना बात हवे, एहर सक्ति अऊ अधिकार कर संगे असुध आत्मा मन ला भी हुकूम देथे अऊ ओमन निकेल जाथें।” 37ईसू हर जे जाएत करीस, ओकर चरचा, ओ जघा कर चाएरो कती होए लागीस।
ईसू ढेरेच झेमन ला चंगा करथे
(मत्ती 8:14-17; मरकुस 1:29-34)
38ईसू हर धरम सभा कर जघा ले उईठ के, समोन कर घरे गईस। समोन कर सास ला ढेरेच जर चघाए रहीस, अऊ ओमन ओकर सास ला चंगा करे बर ईसू जग बिनती करीन, 39तेकर ईसू हर, ओकर जग ठड़होए के जर ला दबकाईस, अऊ जर हर उतेर गईस, अऊ ओहर तुरतेंच उईठ के, ओमन कर सेवा-सतकार करे लागीस।
40बेर बुड़त जुआर, जेमन-जेमन कर घरे कईयो मधे कर बेमरीहा मन रहीन, ओमन ला ईसू जग ले लानीन। ओहर एक-एक झन कर ऊपरे हाथ राएख के, ओमन ला चंगा करीस। #4:40 बेर बुड़त जुआर बेमरीहा मन ला एकर बर लानत रहीन, कि ओही घनी (सांझ जुआर में) पबितर दिन हर खतम हो गए रहीस। यहूदी मन कर एकस कानहूंन रहीस कि ओमन पबितर दिन में कांही काम-बूता नई करें। यहूदी मन कर देस में सांझ छव बजे ले, दूसर दिन सुरू होए जाथे। 41अऊ ढेरेच मईनसे मन में दुस्टआत्मा रहीस; ओमन ईसू कर हुकूम ला सुईन के निकेल गईन अऊ किरलाए के, एकस कहे लागीन, “तंए परमेस्वर कर बेटा लागस!” बकिन ईसू हर ओमन के घुड़काईस, अऊ गोठियाए नई देहीस, काबरकि ओमन जानत रहीन, कि ओहर मसीह लागे।
ईसू धरम सभा में परचार करथे
(मरकुस 1:35-39)
42दूसर दिन बिहाने, ईसू हर निकेल के एगोट सुनसान जघा में गईस, अऊ ढेरेच बगरा मईनसे मन, खोजत ओकर जग आईन, अऊ ओमन ईसू जग बिनती करे लागीन, कि ओमन ला छोंएड़ के झईन जाए। 43बकिन ईसू हर ओमन ला कहीस, “मोके दूसरोच सहर में परमेस्वर कर राएज कर सुघर खभेर ला, सुनाए बर जरूरी हवे, काबरकि मंए एकरे बर भेजल गए हों।” 44अऊ ईसू हर, एहूदिया जिला#4:44 तईहा जुग कर हाथ ले लिखल दुई ठे किताब मन में, दुई जघा कर नांव लिखल हवे, एक ठे किताब में एहूदिया जिला अऊ दूसर में गलील जिला। कर दूसर-दूसर जघा में जाए के, यहूदी मन कर धरम सभा कर घर में, उपदेस देहत रहीस।
Aktualisht i përzgjedhur:
लूका 4: SGJ
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© (Active) Wycliffe Bible Translators, Inc. All rights reserved.